ਹਰਿਆਣਾ TET 2026 ਦੀ ਪ੍ਰੀਖਿਆ ਸ਼ੁਰੂ
ਪ੍ਰੀਖਿਆ ਨੂੰ ਲੈ ਕੇ ਸੁਰੱਖਿਆ ਦੇ ਪੁਖਤਾ ਇੰਤਜ਼ਾਮ, 128 ਫਲਾਇੰਗ ਸਕੁਐਡ ਤਾਇਨਾਤ
ਚੰਡੀਗੜ੍ਹ, 4 ਜੁਲਾਈ 2026 (ਵਿਸ਼ਵ ਵਾਰਤਾ)– ਹਰਿਆਣਾ ਦੇ 19 ਜ਼ਿਲ੍ਹਿਆਂ ਵਿੱਚ ਅੱਜ ਹਰਿਆਣਾ ਅਧਿਆਪਕ ਯੋਗਤਾ ਪ੍ਰੀਖਿਆ (HTET) ਦੁਪਹਿਰ ਤਿੰਨ ਵਜੇ ਸ਼ੁਰੂ ਹੋਈ ਹੈ, ਜੋ ਸ਼ਾਮ ਸਾਢੇ ਪੰਜ ਵਜੇ ਤੱਕ ਚੱਲੇਗੀ।ਇਸ ਤੋਂ ਪਹਿਲਾਂ ਪ੍ਰੀਖਿਆ ਕੇਂਦਰਾਂ ‘ਤੇ ਦੁਪਹਿਰ ਸਾਢੇ 12 ਵਜੇ ਤੋਂ ਐਂਟਰੀ ਸ਼ੁਰੂ ਹੋ ਗਈ ਸੀ।
ਦੱਸ ਦਈਏ ਕਿ ਲੈਵਲ-3 ਦੀ ਪ੍ਰੀਖਿਆ ਅੱਜ ਦੁਪਹਿਰ 3 ਵਜੇ ਤੋਂ ਸਾਢੇ 5 ਵਜੇ ਤੱਕ ਹੋਵੇਗੀ। ਉੱਥੇ ਹੀ ਲੈਵਲ-2 ਦੀ ਪ੍ਰੀਖਿਆ ਐਤਵਾਰ ਸਵੇਰੇ 10 ਵਜੇ ਤੋਂ ਸਾਢੇ 12 ਵਜੇ ਤੱਕ ਹੋਵੇਗੀ। ਇਸ ਤੋਂ ਇਲਾਵਾ ਲੈਵਲ-1 ਦੀ ਪ੍ਰੀਖਿਆ ਵੀ ਕੱਲ੍ਹ ਦੁਪਹਿਰ 3 ਵਜੇ ਤੋਂ 5 ਵਜੇ ਤੱਕ ਹੋਵੇਗੀ। ਹਰਿਆਣਾ ਸਕੂਲ ਸਿੱਖਿਆ ਬੋਰਡ ਨੇ ਪ੍ਰੀਖਿਆ ਨੂੰ ਲੈ ਕੇ 128 ਉੱਡਣ ਦਸਤੇ ਗਠਿਤ ਕੀਤੇ ਹਨ।
ਖ਼ਾਸ ਗੱਲ ਇਹ ਹੈ ਕਿ ਹਰਿਆਣਾ ਸਕੂਲ ਸਿੱਖਿਆ ਬੋਰਡ ਨੇ ਸ਼ੁੱਕਰਵਾਰ ਨੂੰ ਹੀ ਬੋਰਡ ਮੁੱਖ ਦਫ਼ਤਰ ਤੋਂ ਪ੍ਰਸ਼ਨ ਪੱਤਰਜ਼ਿਲ੍ਹਾ ਹੈੱਡਕੁਆਰਟਰਾਂ ਵਿੱਚ ਭੇਜ ਦਿੱਤੇ ਸਨ। ਪੰਚਕੂਲਾ, ਕੁਰੂਕਸ਼ੇਤਰ ਅਤੇ ਕਰਨਾਲ ਵਿੱਚ ਪ੍ਰੀਖਿਆ ਕੇਂਦਰ ਨਹੀਂ ਬਣਾਇਆ ਗਿਆ ਹੈ, ਇਨ੍ਹਾਂ ਜ਼ਿਲ੍ਹਿਆਂ ਵਿੱਚ ਸਹਾਇਕ ਜ਼ਿਲ੍ਹਾ ਅਟਾਰਨੀ (ADA) ਦੀ ਪ੍ਰੀਖਿਆ ਹੋਵੇਗੀ। ਪੰਚਕੂਲਾ ਦੇ ਪ੍ਰੀਖਿਆਰਥੀਆਂ ਦਾ ਸੈਂਟਰ ਅੰਬਾਲਾ, ਕਰਨਾਲ ਵਾਲਿਆਂ ਦਾ ਪਾਣੀਪਤ ਅਤੇ ਕੁਰੂਕਸ਼ੇਤਰ ਦੇ ਪ੍ਰੀਖਿਆਰਥੀਆਂ ਦਾ ਸੈਂਟਰ ਯਮੁਨਾਨਗਰ ਵਿੱਚ ਬਣਾਇਆ ਗਿਆ ਹੈ।
ਅੱਜ ਪ੍ਰੀਖਿਆ ਦੌਰਾਨ ਸਖ਼ਤ ਨਿਯਮਾਂ ਕਾਰਨ ਪ੍ਰੀਖਿਆਰਥੀਆਂ ਨੂੰ ਕਈ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਝੱਜਰ ਵਿੱਚ ਪਲਾਸਟਿਕ ਦੀ ਬੋਤਲ ਦਾ ਰੈਪਰ ਲਾਹ ਕੇ ਹੀ ਅੰਦਰ ਜਾਣ ਦਿੱਤਾ ਗਿਆ। ਇਸ ਦੇ ਨਾਲ ਹੀ ਚੂੜੀਆਂ, ਹੇਅਰਬੈਂਡ, ਰਬੜ ਅਤੇ ਮੌਲੀ ਤੱਕ ਉਤਰਵਾ ਦਿੱਤੇ ਗਏ। ਹਿਸਾਰ ਵਿੱਚ ਮਹਿਲਾ ਪ੍ਰੀਖਿਆਰਥੀਆਂ ਦੇ ਵਾਲ ਖੁਲ੍ਹਵਾਏ ਗਏ। ਨਾਲ ਹੀ ਜੁੱਤੀਆਂ-ਜੁਰਾਬਾਂ ਵੀ ਉਤਰਵਾਈਆਂ ਗਈਆਂ। ਇੱਥੋਂ ਤੱਕ ਕਿ ਨੱਕ ਦੀ ਕੋਕਾ ਵੀ ਉਤਰਵਾ ਦਿੱਤਾ ਗਿਆ। ਸੋਨੀਪਤ ਵਿੱਚ ਮਹਿਲਾ ਪ੍ਰੀਖਿਆਰਥੀ ਕੰਨਾਂ ਦੀਆਂ ਵਾਲੀਆਂ ਉਤਾਰਦੀਆਂ ਨਜ਼ਰ ਆਈਆਂ। ਦੋ ਵਜੇ ਐਂਟਰੀ ਬੰਦ ਕਰ ਦਿੱਤੀ ਗਈ। ਇਸ ਦੌਰਾਨ ਕਈ ਪ੍ਰੀਖਿਆਰਥੀ ਦੌੜ ਕੇ ਆਖਰੀ ਮਿੰਟ ਤੱਕ ਸੈਂਟਰ ਪਹੁੰਚਦੇ ਦਿਖਾਈ ਦਿੱਤੇ।
ਦੂਜੇ ਪਾਸੇ, ਫਤਿਹਾਬਾਦ ਵਿੱਚ ਟੋਹਾਣਾ ਤੋਂ ਪ੍ਰੀਖਿਆ ਦੇਣ ਆਈ ਲੜਕੀ ਲੇਟ ਹੋ ਗਈ। ਉਸਨੇ ਤੁਰੰਤ ਡਾਇਲ 112 ‘ਤੇ ਸੂਚਨਾ ਦਿੱਤੀ। ਟੀਮ ਤੁਰੰਤ ਮੌਕੇ ‘ਤੇ ਪਹੁੰਚੀ ਅਤੇ 30 ਮਿੰਟਾਂ ਵਿੱਚ ਵਿਦਿਆਰਥਣ ਨੂੰ ਪ੍ਰੀਖਿਆ ਕੇਂਦਰ ਪਹੁੰਚਾ ਦਿੱਤਾ।
