ਮਾਨਸਾ ਚ ਵੀ ਪੁਲਸ ਪਾਰਟੀ ਤੇ ਹਮਲਾ ਥਾਣੇਦਾਰ ਦੇ ਲੱਗਿਆ ਸੱਟਾ , ਹਸਪਤਾਲ਼ ਚ ਕਰਾਇਆ ਗਿਆ ਦਾਖਲ

ਮਾਨਸਾ, 12 ਅਪਰੈਲ( ਵਿਸ਼ਵ ਵਾਰਤਾ)-ਕਰਫਿਊ ਦੀ ਉਲੰਘਣਾ ਕਰਨ ਵਾਲਿਆਂ ਨੂੰ ਰੋਕਣ ਗਈ ਮਾਨਸਾ ਪੁਲੀਸ ਉਤੇ ਪਿੰਡ ਠੂਠਿਆਂਵਾਲੀ ਦੇ ਕੁੱਝ ਨੌਜਵਾਨਾਂ ਵੱਲੋਂ ਕੀਤੇ ਗਏ ਹਮਲੇ ਦੌਰਾਨ ਏਐਸਆਈ ਗੁਰਤੇਜ਼ ਸਿੰਘ ਜਖ਼ਮੀ ਹੋ ਗਏ, ਜਿੰਨਾਂ ਨੂੰ ਮਾਨਸਾ ਦੇ ਸਿਵਲ ਹਸਪਤਾਲ ਵਿਖੇ ਭਰਤੀ ਕਰਵਾਇਆ ਅਤੇ ਬਾਅਦ ਵਿੱਚ ਪੁਲੀਸ ਵੱਲੋਂ ਕਰੋਨਾ ਕਰਫਿਊ ਦੀ ਉਲੰਘਣਾ ਕਰਨ ਵਾਲੇ 24 ਜਣਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਿੰਨਾਂ ਨੂੰ ਮਾਨਸਾ ਦੀ ਇੱਕ ਅਦਾਲਤ ਵਿੱਚ ਪੇਸ਼ ਕਰਨ ਤੋਂ ਬਾਅਦ ਇੱਕ ਦਿਨ ਦਾ ਪੁਲੀਸ ਰਿਮਾਂਡ ਹਾਸਲ ਕੀਤਾ ਗਿਆ ਹੈ ਤਾਂ ਜੋ ਪੁਲੀਸ ਦੀ ਕੀਤੀ ਗਈ ਕੁੱਟਮਾਰ ਲਈ ਵਰਤੇ ਗਏ ਹਥਿਆਰਾਂ ਨੂੰ ਬਰਾਮਦ ਕਰਵਾਇਆ ਜਾ ਸਕੇ।
ਮਾਨਸਾ ਦੇ ਸੀਨੀਅਰ ਕਪਤਾਨ ਪੁਲੀਸ ਡਾ.ਨਰਿੰਦਰ ਭਾਰਗਵ ਨੇ ਦੱਸਿਆ ਕਿ ਠੂਠਿਆਂਵਾਲੀ (ਮਾਨਸਾ) ਪੁਲੀਸ ਚੌਂਕੀ ਦੇ ਇੰਚਾਰਜ ਗੁਰਤੇਜ਼ ਸਿੰਘ ਸਮੇਤ ਪੁਲੀਸ ਪਾਰਟੀ ਜਦੋਂ ਬੀਤੀ ਸ਼ਾਮ ਪਿੰਡ ਠੂਠਿਆਂਵਾਲੀ ਵਿਖੇ ਕਰਫਿਊ ਦੌਰਾਨ ਗਸ਼ਤ ਕਰਨ ਗਈ ਤਾਂ ਪਿੰਡ ਦੀ ਫਿਰਨੀ ਅਤੇ ਧਰਮਸ਼ਾਲਾ ਕੋਲ ਦਰਸ਼ਨ ਸਿੰਘ ਸਮੇਤ 14-15 ਹੋਰ ਲੋਕ ਸ਼ਰੇਆਮ ਘੁੰਮ ਰਹੇ ਸਨ ਅਤੇ ਜਦੋਂ ਉਨ੍ਹਾਂ ਨੂੰ ਕਰਫਿਊ ਦੀ ਉਲੰਘਣਾ ਕਰਨ ਦੇ ਕਸੂਰਵਾਰ ਤੋਂ ਵਰਜ਼ਿਤ ਕੀਤਾ ਗਿਆ ਤਾਂ ਉਨ੍ਹਾਂ ਨੇ ਗਸ਼ਤ ਕਰਨ ਅੱਗੇ ਗਈ ਪੁਲੀਸ ਪਾਰਟੀ ਦੀ ਆਉਂਦੀ ਗੱਡੀ ਨੂੰ ਘੇਰਕੇ ਉਸਦੀ ਭੰਨਤੋੜ ਕੀਤੀ ਅਤੇ ਥਾਣੇਦਾਰ ਗੁਰਤੇਜ਼ ਸਿੰਘ ਨੂੰ ਗੰਭੀਰ ਰੂਪ ਵਿੱਚ ਜਖ਼ਮੀ ਕਰ ਦਿੱਤਾ।ਡਾ.ਭਾਰਗਵ ਨੇ ਦੱਸਿਆ ਕਿ ਪੁਲੀਸ ਦੀ ਕੁੱਟਮਾਰ ਕਰਨ ਵਾਲੇ 30-35 ਹੋਰ ਨਾਮੂਲਮ ਵਿਅਕਤੀਆਂ ਨੇ ਡਾਗਾਂ,ਸੋਟੀਆਂ ਨਾਲ ਲੈਂਸ ਹੋਕੇ ਸੈਲਫ਼ ਸੀਲਿੰਗ ਨਾਕੇ ‘ਤੇ ਖੜ੍ਹੀ ਟਰਾਲੀ ਨੂੰ ਪਲਟਾ ਦਿੱਤਾ ਅਤੇ ਪੁਲੀਸ ਪਾਰਟੀ ‘ਤੇ ਹਮਲਾ ਕਰ ਦਿੱਤਾ ਗਿਆ। ਉਨ੍ਹਾਂ ਕਿਹਾ ਕਿ ਮਾਰ ਦੇਣ ਦੀ ਨੀਅਤ ਨਾਲ ਹੋਏ ਇਸ ਹਮਲੇ ਵਿੱਚ ਪੁਲੀਸ ਦੀ ਗੱਡੀ ਉਤੇ ਇੱਟਾਂ-ਰੋੜੇ ਵੀ ਮਾਰੇ ਗਏ, ਪਰ ਕਿਸੇ ਰੂਪ ਵਿੱਚ ਪੁਲੀਸ ਪਾਰਟੀ ਉਥੋਂ ਬਚ ਨਿਕਲਣ ਵਿੱਚ ਸਫ਼ਲ ਹੋ ਗਈ ਅਤੇ ਬਾਅਦ ਪੁਲੀਸ ਨੇ ਰਾਤ ਨੂੰ ਪੂਰੇ ਪਿੰਡ ਦੀ ਘੇਰਾਬੰਦੀ ਕਰਕੇ ਲੋਕਾਂ ਨੂੰ ਪਿੰਡ ਤੋਂ ਬਾਹਰ ਨਾ ਨਿਕਲਣ ਦਿੱਤਾ ਅਤੇ ਸਵੇਰੇ ਅਜਿਹੇ ਲੋਕਾਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ। ਉਨ੍ਹਾਂ ਕਿਹਾ ਕਿ ਪੁਲੀਸ ਨੇ ਥਾਣੇਦਾਰ ਗੁਰਤੇਜ਼ ਸਿੰਘ ਦੇ ਬਿਆਨ ‘ਤੇ ਦਰਸ਼ਨ ਸਿੰਘ, ਗੋਲਡੀ,ਸਿੱਪੀ,ਸੇਵਕ ਸਿੰਘ,ਸੇਵਕ ਸਿੰਘ, ਗੁਗਨੀ,ਭਾਊ ਸਿੰਘ,ਜੈਲ ਸਿੰਘ,ਲਾਲੂ ਮਿਸਤਰੀ,ਪੰਨੂੰ,ਕੁਲਜੀਤ,ਜੀਤਾ,ਪੀਕਾ,ਤਰਸੇਮ ਸਿੰਘ ਅਤੇ 30/35 ਨਾਮਲੂਮ ਵਿਆਕਤੀਆਂ ਵਿਰੁੱਧ ਮੁਕੱਦਮਾ ਨੰਬਰ 108 ਮਿਤੀ 12-04-2020 ਅ/ਧ 307,353,186,188,269,148,149 ਹਿੰ:ਦੰ:, ਧਾਰਾ 51-ਏ. ਡਿਜਾਸਟਰ ਮੈਨੇਜਮੈਂਟ ਐਕਟ-2005 ਥਾਣਾ ਸਦਰ ਮਾਨਸਾ ਦਰਜ਼ ਰਜਿਸਟਰ ਕੀਤਾ ਗਿਆ।
ਉਨ੍ਹਾਂ ਦੱਸਿਆ ਕਿ ਤਫਤੀਸ ਨਾਮਲੂਮ ਦੋਸ਼ੀਆਂ ਨੂੰ ਟਰੇਸ ਕਰਕੇ 14 ਹੋਰ ਦੋਸੀਆਂ ਨੂੰ ਨਾਮਜਦ ਕਰਕੇ ਹਰਪ੍ਰੀਤ ਸਿੰਘ, ਗਗਨਦੀਪ ਸਿੰਘ,ਕ੍ਰਿਸ਼ਨ ਸਿੰੰਘ,ਸਤਨਾਮ ਸਿੰਘ,ਰਾਜ ਕੁਮਾਰ,ਨਾਇਬ ਸਿੰਘ,ਰਿੰਕੂ ਸਿੰਘ,ਗੁਰਜੰਟ ਸਿੰਘ,ਜਰਨੈਲ ਸਿੰਘ, ਸੁਖਦੇਵ ਸਿੰਘ,ਚਮਕੌਰ ਸਿੰਘ,ਦੁੱਲਾ ਸਿੰਘ,ਸੰਦੀਪ ਸਿੰਘ,ਸੇਵਕ ਸਿੰਘ ਵਾਸੀਆਨ ਠੂਠਿਆਵਾਲੀ ਨੂੰ ਵੀ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਸ਼ਾਮ ਤੱਕ ਮੁਕੱਦਮਾ ਵਿੱਚ ਕੁੱਲ 24 ਦੋਸ਼ੀਆਨ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।