NATIONAL SPORTS DAY
ਪੈਰਿਸ 29ਅਗਸਤ (ਵਿਸ਼ਵ ਵਾਰਤਾ): ਫਰਾਂਸ ਦੀ ਰਾਜਧਾਨੀ ਪੈਰਿਸ ਵਿੱਚ ਬੀਤੇ ਕੱਲ੍ਹ ਪੈਰਾਲੰਪਿਕ ਖੇਡਾਂ ਦੀ ਸ਼ਾਨਦਾਰ ਸ਼ੁਰੂਆਤ ਹੋਈ। ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਪੈਰਿਸ ਵਿੱਚ ਇੱਕ ਰੰਗਾਰੰਗ ਸਮਾਰੋਹ ਦੌਰਾਨ ਖੇਡਾਂ ਦਾ ਉਦਘਾਟਨ ਕੀਤਾ। 167 ਦੇਸ਼ਾਂ ਦੀ ਨੁਮਾਇੰਦਗੀ ਕਰਨ ਵਾਲੇ ਕੁੱਲ 4,400 ਪੈਰਾਲੰਪਿਕ ਐਥਲੀਟਾਂ ਨੇ ਚੈਂਪਸ ਐਲੀਸਿਸ ਤੋਂ ਪਲੇਸ ਡੇ ਲਾ ਕੋਨਕੋਰਡ ਤੱਕ ਮਾਰਚ ਕੀਤਾ। ਭਾਰਤੀ ਦਲ ਦੀ ਅਗਵਾਈ ਟੋਕੀਓ 2020 ਦੇ ਸੋਨ ਤਗਮਾ ਜੇਤੂ ਜੈਵਲਿਨ ਥ੍ਰੋਅਰ ਸੁਮਿਤ ਅੰਤਿਲ ਅਤੇ ਵਿਸ਼ਵ ਰਿਕਾਰਡ ਧਾਰਕ ਟੇਬਲ ਟੈਨਿਸ ਖਿਡਾਰਨ ਭਾਗਿਆਸ਼੍ਰੀ ਜਾਧਵ ਨੇ ਕੀਤੀ। ਖੇਡਾਂ ਦੇ ਇਸ ਐਡੀਸ਼ਨ ਵਿੱਚ ਕੁੱਲ 84 ਭਾਰਤੀ ਪੈਰਾ-ਐਥਲੀਟ ਹਿੱਸਾ ਲੈਣਗੇ। ਪੈਰਾਲੰਪਿਕ ਖੇਡਾਂ ਦੇ ਇਤਿਹਾਸ ਵਿੱਚ ਇਹ ਭਾਰਤੀ ਅਥਲੀਟਾਂ ਦਾ ਸਭ ਤੋਂ ਵੱਡਾ ਦਲ ਹੈ। ਭਾਰਤ ਕੁੱਲ 22 ਖੇਡਾਂ ਵਿੱਚੋਂ 12 ਖੇਡਾਂ ਵਿੱਚ ਹਿੱਸਾ ਲਵੇਗਾ। ਕ੍ਰਿਸ਼ਨਾ ਨਾਗਰ ਬੈਡਮਿੰਟਨ ਵਿੱਚ ਪੁਰਸ਼ ਸਿੰਗਲ ਖ਼ਿਤਾਬ ਲਈ ਖੇਡੇਗਾ। ਜਦਕਿ ਅਵਨੀ ਲੇਖਾ ਅਤੇ ਮਨੀਸ਼ ਨਰਵਾਲ ਸ਼ੂਟਿੰਗ ਨੂੰ ਨਿਸ਼ਾਨਾ ਬਣਾਉਣਗੇ। ਭਾਰਤੀ ਐਥਲੀਟ ਤੀਰਅੰਦਾਜ਼ੀ, ਸਾਈਕਲਿੰਗ, ਤਾਈਕਵਾਂਡੋ, ਤੈਰਾਕੀ ਅਤੇ ਟੇਬਲ ਟੈਨਿਸ ਵਿੱਚ ਭਾਗ ਲੈਣਗੇ। ਭਲਕੇ ਤੋਂ ਐਥਲੈਟਿਕਸ ਮੁਕਾਬਲੇ ਸ਼ੁਰੂ ਹੋਣਗੇ। ਇਸ ਵਿੱਚ 38 ਭਾਰਤੀ ਐਥਲੀਟ ਹਿੱਸਾ ਲੈਣਗੇ। ਲੋਕਾਂ ਦੀਆਂ ਨਜ਼ਰਾਂ ਜੈਵਲਿਨ ਥ੍ਰੋਅਰ ਸੁਮਿਤ ਅੰਤਿਲ ਅਤੇ ਟੇਬਲ ਟੈਨਿਸ ਖਿਡਾਰਨ ਭਾਵਨਾ ਪਟੇਲ ‘ਤੇ ਹੋਣਗੀਆਂ। ਪੈਰਿਸ ਪੈਰਾਲੰਪਿਕ 9 ਸਤੰਬਰ ਨੂੰ ਸਮਾਪਤੀ ਸਮਾਰੋਹ ਦੇ ਨਾਲ ਸਮਾਪਤ ਹੋਵੇਗਾ। ਭਾਰਤ ਅੱਜ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗਾ ਪਹਿਲੇ ਦਿਨ ਪੈਰਾ ਬੈਡਮਿੰਟਨ ਤੋਂ ਲੈ ਕੇ ਪੈਰਾ ਸ਼ੂਟਿੰਗ ਤੱਕ ਕਈ ਖਿਡਾਰੀ ਐਕਸ਼ਨ ਵਿੱਚ ਨਜ਼ਰ ਆਉਣਗੇ। ਟੋਕੀਓ ਵਿੱਚ ਹੋਈਆਂ ਪਿਛਲੀਆਂ ਪੈਰਾਲੰਪਿਕ ਖੇਡਾਂ ਵਿੱਚ ਭਾਰਤ ਨੇ 5 ਸੋਨ, 8 ਚਾਂਦੀ ਅਤੇ 6 ਕਾਂਸੀ ਦੇ ਤਗਮਿਆਂ ਸਮੇਤ ਕੁੱਲ 19 ਤਗਮੇ ਜਿੱਤੇ ਸਨ।
