ਨੈਰੋਬੀ ਅਤੇ ਮਿਊਨਿਖ 2029 ਅਤੇ 2031 ਦੀਆਂ World Athletics Championships ਦੀ ਕਰਨਗੇ ਮੇਜ਼ਬਾਨੀ
ਨਵੀਂ ਦਿੱਲੀ, 16ਸਤੰਬਰ (ਵਿਸ਼ਵ ਵਾਰਤਾ): ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਪਹਿਲੀ ਵਾਰ ਅਫਰੀਕਾ ਜਾਵੇਗੀ ਕਿਉਂਕਿ ਨੈਰੋਬੀ ਨੂੰ ਇਸ ਦੋ-ਸਾਲਾ ਈਵੈਂਟ ਦੇ 2029 ਐਡੀਸ਼ਨ ਲਈ ਮੇਜ਼ਬਾਨ ਵਜੋਂ ਚੁਣਿਆ ਗਿਆ ਹੈ, ਜਦੋਂ ਕਿ ਜਰਮਨੀ ਦਾ ਸ਼ਹਿਰ ਮਿਊਨਿਖ 2031 ਦੀ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕਰੇਗਾ।
ਇਹ ਫੈਸਲਾ ਬੁਡਾਪੇਸਟ ਵਿੱਚ ਵਿਸ਼ਵ ਅਥਲੈਟਿਕਸ ਕੌਂਸਲ ਦੀ 242ਵੀਂ ਮੀਟਿੰਗ ਦੌਰਾਨ ਲਿਆ ਗਿਆ, ਜਿਸ ਵਿੱਚ ਲੰਡਨ 2029 ਦੇ ਈਵੈਂਟ ਦੀ ਮੇਜ਼ਬਾਨੀ ਦੀ ਦੌੜ ਵਿੱਚ ਪਿੱਛੇ ਰਹਿ ਗਿਆ। ਕੀਨੀਆ ਦੀ ਰਾਜਧਾਨੀ ਨੈਰੋਬੀ ਨੇ 2029 ਦੇ ਐਡੀਸ਼ਨ ਲਈ ਰੋਮ, ਮਿਊਨਿਖ ਅਤੇ ਲੰਡਨ ਵਰਗੇ ਹੋਰ ਦਾਅਵੇਦਾਰਾਂ ਨੂੰ ਪਿੱਛੇ ਛੱਡ ਦਿੱਤਾ।
ਵਿਸ਼ਵ ਅਥਲੈਟਿਕਸ ਦੇ ਪ੍ਰਧਾਨ ਸੇਬੇਸਟੀਅਨ ਕੋਏ ਨੇ ਕਿਹਾ, “ਅਸੀਂ ਖੁਸ਼ਕਿਸਮਤ ਸੀ ਕਿ ਸਾਡੇ ਕੋਲ 2029 ਅਤੇ 2031 ਲਈ ਚਾਰ ਸ਼ਾਨਦਾਰ ਦਾਅਵੇਦਾਰੀ ਪੇਸ਼ਕਸ਼ਾਂ ਸਨ, ਅਤੇ ਕੌਂਸਲ ਲਈ ਇਹ ਫੈਸਲਾ ਲੈਣਾ ਆਸਾਨ ਨਹੀਂ ਸੀ। ਚਾਰੇ ਉਮੀਦਵਾਰਾਂ ਦੁਆਰਾ ਦਿਖਾਈ ਗਈ ਗੁਣਵੱਤਾ, ਉਤਸ਼ਾਹ ਅਤੇ ਵਚਨਬੱਧਤਾ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੀ ਤਾਕਤ ਅਤੇ ਵਿਸ਼ਵਵਿਆਪੀ ਖਿੱਚ ਨੂੰ ਉਜਾਗਰ ਕਰਦੀ ਹੈ।”
“ਕੌਂਸਲ ਦੇ ਅੱਜ ਦੇ ਇਸ ਫੈਸਲੇ ਨਾਲ, ਅਸੀਂ ਏਸ਼ੀਆ, ਅਫਰੀਕਾ ਅਤੇ ਯੂਰਪ ਵਿੱਚ ਅਗਲੇ ਤਿੰਨ ਐਡੀਸ਼ਨਾਂ ਦੌਰਾਨ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕਰਕੇ ਦੁਨੀਆ ਭਰ ਵਿੱਚ ਅਥਲੈਟਿਕਸ ਨੂੰ ਅੱਗੇ ਵਧਾਉਣ ਦੇ ਆਪਣੇ ਮਿਸ਼ਨ ਨੂੰ ਪੂਰਾ ਕਰਨਾ ਜਾਰੀ ਰੱਖਾਂਗੇ।”
ਕੋਏ ਨੇ ਅੱਗੇ ਕਿਹਾ, “ਅੰਤ ਵਿੱਚ ਨੈਰੋਬੀ ਅਤੇ ਮਿਊਨਿਖ ਨੇ ਦੋ ਬਹੁਤ ਹੀ ਪ੍ਰਭਾਵਸ਼ਾਲੀ ਪ੍ਰਸਤਾਵ ਪੇਸ਼ ਕੀਤੇ। ਉਹ ਸਾਡੀ ਖੇਡ ਲਈ ਬਹੁਤ ਵੱਖਰੇ ਪਰ ਬਰਾਬਰ ਰੋਮਾਂਚਕ ਮੌਕੇ ਪ੍ਰਦਾਨ ਕਰਦੇ ਹਨ, ਅਤੇ ਮੈਨੂੰ ਖੁਸ਼ੀ ਹੈ ਕਿ ਅਸੀਂ ਹੁਣ ਦੋ ਵਿਸ਼ਵ-ਪੱਧਰੀ ਚੈਂਪੀਅਨਸ਼ਿਪਾਂ ਕਰਵਾਉਣ ਲਈ ਦੋਵਾਂ ਸ਼ਹਿਰਾਂ ਨਾਲ ਕੰਮ ਸ਼ੁਰੂ ਕਰ ਸਕਦੇ ਹਾਂ।”
ਅਫਰੀਕੀ ਦੇਸ਼ ਪਹਿਲਾਂ ਵੀ ਕਈ ਬਹੁ-ਰਾਸ਼ਟਰੀ ਸਮਾਗਮਾਂ ਦੀ ਮੇਜ਼ਬਾਨੀ ਕਰ ਚੁੱਕੇ ਹਨ। ਯੂਗਾਂਡਾ ਦੇ ਕੰਪਾਲਾ ਨੇ 2017 ਵਿੱਚ ਵਿਸ਼ਵ ਕਰਾਸ ਕੰਟਰੀ ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕੀਤੀ ਸੀ, ਅਤੇ ਉਸੇ ਸਾਲ ਨੈਰੋਬੀ ਨੇ ਵਿਸ਼ਵ ਅੰਡਰ-18 ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕੀਤੀ ਸੀ।
ਬੋਤਸਵਾਨਾ ਦੇ ਗਾਬੋਰੋਨ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਵਿਸ਼ਵ ਅਥਲੈਟਿਕਸ ਰਿਲੇਅ ਦੀ ਮੇਜ਼ਬਾਨੀ ਕੀਤੀ ਸੀ, ਜੋ ਅਫਰੀਕਾ ਵਿੱਚ ਆਯੋਜਿਤ ਹੋਣ ਵਾਲਾ ਉਸ ਈਵੈਂਟ ਦਾ ਪਹਿਲਾ ਐਡੀਸ਼ਨ ਸੀ। ਹਾਲਾਂਕਿ, ਇਹ ਪਹਿਲੀ ਵਾਰ ਹੋਵੇਗਾ ਹਾਲਾਂਕਿ, ਇਸ ਸਥਾਨ ਨੂੰ 2029 ਦੇ ਸਮਾਗਮ ਲਈ ਮਨਜ਼ੂਰੀ ਨਹੀਂ ਮਿਲੀ।
ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੇ ਇਤਿਹਾਸ ਵਿੱਚ ਕੀਨੀਆ ਦੂਜਾ ਸਭ ਤੋਂ ਸਫਲ ਦੇਸ਼ ਹੈ। ਕੋਏ ਨੇ ਕਿਹਾ, “ਨੈਰੋਬੀ ਨੇ ਇੱਕ ਪ੍ਰਭਾਵਸ਼ਾਲੀ ਅਤੇ ਭਾਵਨਾਤਮਕ ਦਾਅਵੇਦਾਰੀ ਪੇਸ਼ ਕੀਤੀ, ਅਤੇ ਪਹਿਲੀ ਵਾਰ ਅਫਰੀਕਾ ਵਿੱਚ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦਾ ਆਯੋਜਨ ਕਰਨਾ ਇਤਿਹਾਸਕ ਹੋਵੇਗਾ।”
“ਕੀਨੀਆ ਅਥਲੈਟਿਕਸ ਦੇ ਖੇਤਰ ਵਿੱਚ ਮਹਾਨ ਦੇਸ਼ਾਂ ਵਿੱਚੋਂ ਇੱਕ ਹੈ। ਇਹ ਖੇਡ ਦੇਸ਼ ਦੇ ਸੱਭਿਆਚਾਰ ਅਤੇ ਜੀਵਨ-ਸ਼ੈਲੀ ਦਾ ਅਨਿੱਖੜਵਾਂ ਅੰਗ ਹੈ। ਫੇਥ ਕਿਪਯੇਗੋਨ, ਵਿਵੀਅਨ ਚੇਰੂਯੋਟ, ਏਲੀਉਡ ਕਿਪਚੋਗੇ, ਹੈਲਨ ਓਬੀਰੀ ਅਤੇ ਡੇਵਿਡ ਰੁਦੀਸ਼ਾ ਵਰਗੇ ਵਿਸ਼ਵ ਪੱਧਰੀ ਸੋਨ ਤਗਮਾ ਜੇਤੂਆਂ ਦੇ ਨਾਲ-ਨਾਲ ਦੋ ਵਾਰ ਦੇ ਓਲੰਪਿਕ ਚੈਂਪੀਅਨ ਕਿਪ ਕੀਨੋ, ਕਈ ਵਾਰ ਦੇ ਵਿਸ਼ਵ ਕਰਾਸ-ਕੰਟਰੀ ਚੈਂਪੀਅਨ ਪਾਲ ਟੇਰਗਾਟ ਅਤੇ ਕਈ ਵਾਰ ਦੀ ਵਿਸ਼ਵ ਹਾਫ-ਮੈਰਾਥਨ ਚੈਂਪੀਅਨ ਟੇਗਲਾ ਲੋਰੋਪੇ ਵਰਗੇ ਖਿਡਾਰੀਆਂ ਨੇ ਸਾਡੀ ਖੇਡ ਦੇ ਇਤਿਹਾਸ ਨੂੰ ਨਵਾਂ ਰੂਪ ਦਿੱਤਾ ਹੈ।
“ਇਹ ਬਹੁਤ ਜ਼ਰੂਰੀ ਸੀ ਕਿ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਉਦੋਂ ਅਫਰੀਕਾ ਆਵੇ ਜਦੋਂ ਸਾਡੇ ਕੋਲ ਸਹੀ ਮੇਜ਼ਬਾਨ, ਸਹੀ ਦਾਅਵੇਦਾਰੀ ਅਤੇ ਢੁਕਵੇਂ ਹਾਲਾਤ ਹੋਣ। ਨੈਰੋਬੀ ਨੇ ਜ਼ੋਰਦਾਰ ਢੰਗ ਨਾਲ ਸਾਬਤ ਕਰ ਦਿੱਤਾ ਹੈ ਕਿ ਇਹ ਉਨ੍ਹਾਂ ਦਾ ਸਮਾਂ ਹੈ।”
ਇਸ ਦੌਰਾਨ, ਜਰਮਨੀ ਤੀਜੀ ਵਾਰ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕਰੇਗਾ, ਜਿਸ ਵਿੱਚ ਮਿਊਨਿਖ ਦਾ ਓਲੰਪਿਕ ਸਟੇਡੀਅਮ 2031 ਦੇ ਸਮਾਗਮ ਦੀ ਮੇਜ਼ਬਾਨੀ ਕਰੇਗਾ। ਕੋਏ ਨੇ ਕਿਹਾ, “ਜਰਮਨੀ ਨੇ ਵਾਰ-ਵਾਰ ਸਾਬਤ ਕੀਤਾ ਹੈ ਕਿ ਉਹ ਵੱਡੇ ਅਥਲੈਟਿਕਸ ਸਮਾਗਮਾਂ ਲਈ ਇੱਕ ਸ਼ਾਨਦਾਰ ਅਤੇ ਭਰੋਸੇਮੰਦ ਮੇਜ਼ਬਾਨ ਹੈ। ਬਰਲਿਨ 2009 ਵਿਸ਼ਵ ਚੈਂਪੀਅਨਸ਼ਿਪ ਦੇ ਯਾਦਗਾਰੀ ਸੰਸਕਰਣਾਂ ਵਿੱਚੋਂ ਇੱਕ ਰਿਹਾ ਹੈ, ਅਤੇ ਉਦੋਂ ਤੋਂ ਅਸੀਂ ਬਰਲਿਨ ਅਤੇ ਮਿਊਨਿਖ ਵਿੱਚ ਯੂਰਪੀਅਨ ਚੈਂਪੀਅਨਸ਼ਿਪ ਦੌਰਾਨ ਇਸ ਖੇਡ ਲਈ ਭਾਰੀ ਸਮਰਥਨ ਦੇਖਿਆ ਹੈ।” “ਅਸੀਂ ਮਿਊਨਿਖ ਓਲੰਪੀਆਪਾਰਕ (ਜੋ ਵਿਸ਼ਵ ਖੇਡਾਂ ਦੇ ਪ੍ਰਮੁੱਖ ਸਥਾਨਾਂ ਵਿੱਚੋਂ ਇੱਕ ਹੈ) ਲਈ ਉਸ ਦ੍ਰਿਸ਼ਟੀਕੋਣ ਵਿੱਚ ਪੂਰੀ ਤਰ੍ਹਾਂ ਵਿਸ਼ਵਾਸ ਰੱਖਦੇ ਹਾਂ, ਜਿਸ ਦਾ ਮਕਸਦ ਐਥਲੈਟਿਕਸ ਲਈ ਜਰਮਨ ਲੋਕਾਂ ਦੇ ਉਤਸ਼ਾਹ ਨੂੰ ਕਲਾ ਅਤੇ ਸੱਭਿਆਚਾਰਕ ਤਿਉਹਾਰ ਦੇ ਵਿਸ਼ੇਸ਼ ਅੰਦਾਜ਼ ਨਾਲ ਜੋੜ ਕੇ ਇੱਕ ਵਿਲੱਖਣ ਅਤੇ ਸ਼ਕਤੀਸ਼ਾਲੀ ਅਨੁਭਵ ਸਿਰਜਣਾ ਹੈ। ਸਾਲ 2022 ਵਿੱਚ ਇੱਥੋਂ ਦਾ ਮਾਹੌਲ ਬੇਮਿਸਾਲ ਸੀ ਅਤੇ ਦਰਸ਼ਕਾਂ ਦੀ ਗਿਣਤੀ ਨੇ ਇਹ ਸਾਬਤ ਕਰ ਦਿੱਤਾ ਕਿ ਸ਼ਹਿਰ ਅਤੇ ਪੂਰੇ ਜਰਮਨੀ ਵਿੱਚ ਵੱਡੇ ਸਮਾਗਮਾਂ ਲਈ ਕਿੰਨਾ ਉਤਸ਼ਾਹ ਮੌਜੂਦ ਹੈ।
“ਓਲੰਪੀਆਪਾਰਕ ਸਥਿਰਤਾ (sustainability) ਦਾ ਵੀ ਪ੍ਰਤੀਕ ਹੈ, ਅਤੇ ਸਾਨੂੰ ਪੂਰਾ ਭਰੋਸਾ ਹੈ ਕਿ ਵਿਸ਼ਵ ਚੈਂਪੀਅਨਸ਼ਿਪ ਦੀ ਯੋਜਨਾਬੰਦੀ ਅਤੇ ਅਮਲ ਦੌਰਾਨ ਇਸ ਨੂੰ ਮੁੱਖ ਮੁੱਲ ਵਜੋਂ ਅਪਣਾਇਆ ਜਾਵੇਗਾ, ਜੋ ਕਿ ਅੰਤਰਰਾਸ਼ਟਰੀ ਪੱਧਰ ‘ਤੇ ਪ੍ਰਚਲਿਤ ਵਧੀਆ ਅਭਿਆਸਾਂ ਅਤੇ ‘ਐਥਲੈਟਿਕਸ ਫਾਰ ਏ ਬੈਟਰ ਵਰਲਡ ਗੋਲਡ ਈਵੈਂਟ’ (Athletics for a Better World Gold Event) ਦੇ ਮਿਆਰਾਂ ਦੇ ਅਨੁਕੂਲ ਹੋਵੇਗਾ।”
ਵਿਸ਼ਵ ਐਥਲੈਟਿਕਸ ਚੈਂਪੀਅਨਸ਼ਿਪ ਅਗਲੀ ਵਾਰ 10-19 ਸਤੰਬਰ 2027 ਨੂੰ ਬੀਜਿੰਗ ਵਿੱਚ ਆਯੋਜਿਤ ਕੀਤੀ ਜਾਵੇਗੀ। ਨੈਰੋਬੀ 2029 ਅਤੇ ਮਿਊਨਿਖ 2031 ਦੇ ਮੁਕਾਬਲੇ ਵੀ ਸਤੰਬਰ ਵਿੱਚ ਹੀ ਕਰਵਾਏ ਜਾਣਗੇ, ਤਾਂ ਜੋ ਗਲੋਬਲ ਐਥਲੈਟਿਕਸ ਕੈਲੰਡਰ ਦੇ ਉਸ ਉਦੇਸ਼ ਨੂੰ ਪੂਰਾ ਕੀਤਾ ਜਾ ਸਕੇ ਜਿਸ ਤਹਿਤ ਸੀਜ਼ਨ ਦੇ ਅੰਤ ਵਿੱਚ ਇੱਕ ਵੱਡੀ ਵਿਸ਼ਵ ਚੈਂਪੀਅਨਸ਼ਿਪ ਨਾਲ ਮੁਕਾਬਲਿਆਂ ਦਾ ਸਿਖਰਲਾ ਪੜਾਅ ਆਉਂਦਾ ਹੈ।
