Israel ਪ੍ਰਧਾਨ ਮੰਤਰੀ ਨੂੰ ਪ੍ਰੋਸਟੇਟ ਕੈਂਸਰ! ਨੇਤਨਯਾਹੂ ਨੇ ਸਾਂਝੀ ਕੀਤੀ ਹੈਲਥ ਅਪਡੇਟ
ਨਵੀ ਦਿੱਲੀ, 24 ਅਪ੍ਰੈਲ 2026 (ਵਿਸ਼ਵ ਵਾਰਤਾ) – ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਹਾਲ ਹੀ ਵਿੱਚ ਆਪਣਾ ਹੈਲਥ ਅਪਡੇਟ ਸਾਂਝਾ ਕੀਤਾ ਹੈ। ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪ੍ਰੋਸਟੇਟ ਕੈਂਸਰ ਹੋਇਆ ਸੀ। ਉਨ੍ਹਾਂ ਨੇ ਰੇਡੀਏਸ਼ਨ ਥੈਰੇਪੀ ਰਾਹੀਂ ਚੁੱਪ-ਚਾਪ ਇਸ ਦਾ ਇਲਾਜ ਕਰਵਾਇਆ। ਕਰੀਬ ਦੋ ਮਹੀਨਿਆਂ ਤੱਕ ਇਸ ਬਿਮਾਰੀ ਨੂੰ ਜਨਤਕ ਨਹੀਂ ਕੀਤਾ ਗਿਆ ਅਤੇ ਹੁਣ ਇਲਾਜ ਪੂਰਾ ਹੋਣ ਤੋਂ ਬਾਅਦ ਇਹ ਜਾਣਕਾਰੀ ਦਿੱਤੀ ਗਈ ਹੈ।
76 ਸਾਲਾ ਨੇਤਨਯਾਹੂ ਨੇ ਕਿਹਾ ਕਿ ਇਹ ਪਹਿਲੀ ਵਾਰ ਹੈ ਜਦੋਂ ਉਨ੍ਹਾਂ ਵਿੱਚ ਕੈਂਸਰ ਦੀ ਪਛਾਣ ਹੋਈ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਆਪਣੀ ਮੈਡੀਕਲ ਰਿਪੋਰਟ ਜਾਰੀ ਕਰਨ ਵਿੱਚ ਇਸ ਸਾਲ ਜਾਣਬੁੱਝ ਕੇ ਦੇਰੀ ਕੀਤੀ, ਤਾਂ ਜੋ ਈਰਾਨ ਜੰਗ ਦੇ ਦੌਰਾਨ ਇਸ ਨੂੰ ਇਜ਼ਰਾਈਲ ਦੇ ਖਿਲਾਫ ਪ੍ਰਚਾਰ ਵਜੋਂ ਵਰਤ ਨਾ ਸਕੇ। ਇਹ ਜਾਣਕਾਰੀ ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਦਿੱਤੀ।
ਨੇਤਨਯਾਹੂ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘X’ ‘ਤੇ ਲਿਖਿਆ, ‘ਅੱਜ ਮੇਰੀ ਸਾਲਾਨਾ ਮੈਡੀਕਲ ਰਿਪੋਰਟ ਪ੍ਰਕਾਸ਼ਿਤ ਹੋਈ ਹੈ। ਮੈਂ ਇਸਨੂੰ 2 ਮਹੀਨਿਆਂ ਲਈ ਮੁਲਤਵੀ ਕਰਨ ਦੀ ਬੇਨਤੀ ਕੀਤੀ ਸੀ ਤਾਂ ਜੋ ਈਰਾਨੀ ਅੱਤਵਾਦੀ ਸ਼ਾਸਨ ਨੂੰ ਇਜ਼ਰਾਈਲ ਵਿਰੁੱਧ ਝੂਠਾ ਪ੍ਰਚਾਰ ਫੈਲਾਉਣ ਦਾ ਮੌਕਾ ਨਾ ਮਿਲੇ। ਮੈਂ ਤੁਹਾਡੇ ਨਾਲ 3 ਗੱਲਾਂ ਸਾਂਝੀਆਂ ਕਰਨਾ ਚਾਹੁੰਦਾ ਹਾਂ। ਪ੍ਰਮਾਤਮਾ ਦਾ ਸ਼ੁਕਰ ਹੈ, ਮੈਂ ਤੰਦਰੁਸਤ ਹਾਂ, ਮੇਰੀ ਸਰੀਰਕ ਹਾਲਤ ਬਿਹਤਰ ਹੈ। ਮੈਨੂੰ ਪ੍ਰੋਸਟੇਟ ਨਾਲ ਸਬੰਧਤ ਇੱਕ ਮਾਮੂਲੀ ਸਮੱਸਿਆ ਸੀ, ਜਿਸਦਾ ਪੂਰੀ ਤਰ੍ਹਾਂ ਇਲਾਜ ਹੋ ਚੁੱਕਾ ਹੈ। ਪ੍ਰਮਾਤਮਾ ਦੀ ਕਿਰਪਾ ਨਾਲ ਹੁਣ ਉਹ ਸਮੱਸਿਆ ਮੇਰੇ ਲਈ ਨਹੀਂ ਰਹੀ। ਡੇਢ ਸਾਲ ਪਹਿਲਾਂ, ਮੇਰੀ ਵਧੀ ਹੋਈ ‘ਬੇਨਾਇਨ ਪ੍ਰੋਸਟੇਟ ਗਲੈਂਡ’ ਦੀ ਸਫਲ ਸਰਜਰੀ ਹੋਈ ਸੀ ਅਤੇ ਉਦੋਂ ਤੋਂ ਮੈਂ ਨਿਯਮਤ ਡਾਕਟਰੀ ਨਿਗਰਾਨੀ ਹੇਠ ਹਾਂ।’
ਨੇਤਨਯਾਹੂ ਨੇ ਅੱਗੇ ਲਿਖਿਆ, ‘ਪਿਛਲੀ ਨਿਗਰਾਨੀ ਦੌਰਾਨ ਪ੍ਰੋਸਟੇਟ ਵਿੱਚ ਇੱਕ ਸੈਂਟੀਮੀਟਰ ਤੋਂ ਵੀ ਛੋਟਾ ਇੱਕ ਨਿੱਕਾ ਜਿਹਾ ਧੱਬਾ ਪਾਇਆ ਗਿਆ ਸੀ। ਜਾਂਚ ਕਰਨ ‘ਤੇ ਪਤਾ ਲੱਗਿਆ ਕਿ ਇਹ ਇੱਕ ਘਾਤਕ ਟਿਊਮਰ ਦਾ ਬਹੁਤ ਸ਼ੁਰੂਆਤੀ ਪੜਾਅ ਹੈ, ਜਿਸ ਵਿੱਚ ਕੋਈ ਫੈਲਾਅ ਜਾਂ ਮੈਟਾਸਟੇਸਿਸ ਨਹੀਂ ਹੈ। ਡਾਕਟਰਾਂ ਨੇ ਮੈਨੂੰ ਦੱਸਿਆ ਕਿ ਇਹ ਮੇਰੀ ਉਮਰ ਦੇ ਮਰਦਾਂ ਵਿੱਚ ਬਹੁਤ ਆਮ ਹੈ, ਅਤੇ ਮੇਰੇ ਕੋਲ ਦੋ ਵਿਕਲਪ ਸਨ – ਜਾਂ ਤਾਂ ਇਲਾਜ ਕਰਵਾਏ ਬਿਨਾਂ ਨਿਗਰਾਨੀ ਹੇਠ ਰਹਿਣਾ ਜਾਂ ਫਿਰ ਇਸ ਦਾ ਇਲਾਜ ਕਰਵਾ ਕੇ ਸਮੱਸਿਆ ਤੋਂ ਛੁਟਕਾਰਾ ਪਾਉਣਾ। ਤੁਸੀਂ ਮੈਨੂੰ ਪਹਿਲਾਂ ਹੀ ਜਾਣਦੇ ਹੋ ਕਿ ਜਦੋਂ ਮੈਨੂੰ ਕਿਸੇ ਸੰਭਾਵੀ ਖ਼ਤਰੇ ਬਾਰੇ ਸਮੇਂ ਸਿਰ ਜਾਣਕਾਰੀ ਮਿਲਦੀ ਹੈ, ਤਾਂ ਮੈਂ ਤੁਰੰਤ ਉਸਦਾ ਹੱਲ ਕਰਨਾ ਚਾਹੁੰਦਾ ਹਾਂ। ਇਹ ਰਾਸ਼ਟਰੀ ਪੱਧਰ ‘ਤੇ ਵੀ ਸੱਚ ਹੈ ਅਤੇ ਨਿੱਜੀ ਪੱਧਰ ‘ਤੇ ਵੀ। ਮੈਂ ਵੀ ਇਹੀ ਕੀਤਾ। ਮੈਂ ਇਲਾਜ ਕਰਵਾਇਆ ਜਿਸ ਨਾਲ ਸਮੱਸਿਆ ਪੂਰੀ ਤਰ੍ਹਾਂ ਦੂਰ ਹੋ ਗਈ ਅਤੇ ਉਸ ਦਾ ਕੋਈ ਨਿਸ਼ਾਨ ਨਹੀਂ ਬਚਿਆ।’
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
