International: ਇਜ਼ਰਾਈਲ ਚੋਣਾਂ ਦੇ ਅੰਤਿਮ ਨਤੀਜੇ ਅੱਜ ਹੋਣਗੇ ਜਾਰੀ, ਨੇਤਨਯਾਹੂ ਦਾ ਗਠਜੋੜ ਬਹੁਮਤ ਤੋਂ ਦੂਰ
ਚੰਡੀਗੜ੍ਹ, 5 ਨਵੰਬਰ 2026 (ਵਿਸ਼ਵ ਵਾਰਤਾ): ਇਜ਼ਰਾਈਲ ਦੀਆਂ ਸੰਸਦੀ (ਨੇਸੇਟ) ਚੋਣਾਂ ਦੇ ਅੰਤਿਮ ਅਧਿਕਾਰਤ ਨਤੀਜੇ ਬੁੱਧਵਾਰ ਨੂੰ ਜਾਰੀ ਕਰਕੇ ਰਾਸ਼ਟਰਪਤੀ ਇਸਾਕ ਹਰਜ਼ੋਗ ਨੂੰ ਸੌਂਪੇ ਜਾਣਗੇ। ਇਜ਼ਰਾਈਲ ਦੇ ਚੋਣ ਕਾਨੂੰਨ ਮੁਤਾਬਕ 4 ਨਵੰਬਰ ਤੱਕ ਨਤੀਜਿਆਂ ਨੂੰ ਪ੍ਰਮਾਣਿਤ ਕਰਨਾ ਲਾਜ਼ਮੀ ਹੈ।
27 ਅਕਤੂਬਰ ਨੂੰ ਹੋਈਆਂ ਚੋਣਾਂ ਤੋਂ ਬਾਅਦ ਸਾਹਮਣੇ ਆਏ ਨਤੀਜਿਆਂ ਵਿੱਚ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦੀ ਲਿਕੁਡ ਪਾਰਟੀ ਸਭ ਤੋਂ ਵੱਡੀ ਪਾਰਟੀ ਬਣ ਕੇ ਉਭਰੀ ਹੈ, ਪਰ ਉਨ੍ਹਾਂ ਦੀ ਅਗਵਾਈ ਵਾਲਾ ਗਠਜੋੜ ਸਰਕਾਰ ਬਣਾਉਣ ਲਈ ਲੋੜੀਂਦੇ 61 ਸੀਟਾਂ ਦੇ ਬਹੁਮਤ ਦੇ ਅੰਕੜੇ ਤੋਂ ਦੂਰ ਰਹਿ ਗਿਆ ਹੈ। ਇਸ ਕਾਰਨ ਇਜ਼ਰਾਈਲ ਵਿੱਚ ਸਰਕਾਰ ਗਠਨ ਨੂੰ ਲੈ ਕੇ ਸਿਆਸੀ ਅਨਿਸ਼ਚਿਤਤਾ ਬਣੀ ਹੋਈ ਹੈ।
ਕਿਸ ਪਾਰਟੀ ਨੂੰ ਕਿੰਨੀਆਂ ਸੀਟਾਂ ਮਿਲੀਆਂ ?: ਉਪਲਬਧ ਨਤੀਜਿਆਂ ਮੁਤਾਬਕ ਪ੍ਰਧਾਨ ਮੰਤਰੀ ਨੇਤਨਯਾਹੂ ਦੀ ਲਿਕੁਡ ਪਾਰਟੀ ਨੇ 27 ਸੀਟਾਂ ਜਿੱਤੀਆਂ ਹਨ। ਗਾਦੀ ਆਈਜ਼ਨਕੋਟ ਦੀ ਅਗਵਾਈ ਵਾਲੀ ਯਾਸ਼ਰ ਪਾਰਟੀ 21 ਸੀਟਾਂ ਨਾਲ ਦੂਜੇ ਸਥਾਨ ’ਤੇ ਰਹੀ ਹੈ। ਹੋਰ ਪਾਰਟੀਆਂ ਦੀਆਂ ਸੀਟਾਂ ਦਾ ਵੇਰਵਾ ਇਸ ਤਰ੍ਹਾਂ ਹੈ:
– ਲਿਕੁਡ: 27 ਸੀਟਾਂ
– ਯਾਸ਼ਰ: 21 ਸੀਟਾਂ
– ਬੀ’ਯਾਚਾਦ: 12 ਸੀਟਾਂ
– ਜੁਆਇੰਟ ਲਿਸਟ: 11 ਸੀਟਾਂ
– ਡੈਮੋਕ੍ਰੇਟਸ: 8 ਸੀਟਾਂ
– ਰਾ’ਅਮ ਪਾਰਟੀ: 8 ਸੀਟਾਂ
– ਇਜ਼ਰਾਈਲ ਬੇਤੇਨੂ: 7 ਸੀਟਾਂ
– ਯੂਨਾਈਟਿਡ ਤੌਰਾਹ ਜੁਡਾਇਜ਼ਮ: 7 ਸੀਟਾਂ
– ਓਤਜ਼ਮਾ ਯੇਹੂਦਿਤ: 7 ਸੀਟਾਂ
– ਸ਼ਾਸ: 6 ਸੀਟਾਂ
– ਰਿਲੀਜੀਅਸ ਜ਼ਾਇਓਨਿਜ਼ਮ: 6 ਸੀਟਾਂ
ਚੋਣ ਨਤੀਜਿਆਂ ਵਿੱਚ ਕਿਸੇ ਵੀ ਗਠਜੋੜ ਨੂੰ ਸਪੱਸ਼ਟ ਬਹੁਮਤ ਨਾ ਮਿਲਣ ਕਾਰਨ ਨੇਤਨਯਾਹੂ ਦੀ ਸੱਤਾ ’ਤੇ ਪਕੜ ਨੂੰ ਲੈ ਕੇ ਸਵਾਲ ਖੜ੍ਹੇ ਹੋ ਗਏ ਹਨ। ਹੁਣ ਅੰਤਿਮ ਪ੍ਰਮਾਣਿਤ ਨਤੀਜਿਆਂ ਤੋਂ ਬਾਅਦ ਸਰਕਾਰ ਬਣਾਉਣ ਲਈ ਵੱਖ-ਵੱਖ ਪਾਰਟੀਆਂ ਵਿਚਾਲੇ ਸਿਆਸੀ ਜੋੜ-ਤੋੜ ਅਹਿਮ ਹੋਵੇਗੀ।
