Himachal ‘ਚ ਭਾਰੀ ਬਰਫ਼ਬਾਰੀ ਕਾਰਨ ਜਨਜੀਵਨ ਪ੍ਰਭਾਵਿਤ, 5 ਰਾਸ਼ਟਰੀ ਰਾਜਮਾਰਗਾਂ ਸਣੇ 500 ਤੋਂ ਵੱਧ ਸੜਕਾਂ ਬੰਦ
ਹਿਮਾਚਲ, 24 ਜਨਵਰੀ 2026 (ਵਿਸ਼ਵ ਵਾਰਤਾ): ਹਿਮਾਚਲ (Himachal) ‘ਚ ਹੋਈ ਭਾਰੀ ਬਰਫ਼ਬਾਰੀ ਕਾਰਨ ਕਈ ਇਲਾਕੇ ਬਰਫ਼ ਨਾਲ ਢੱਕੇ ਗਏ। ਸ਼ਿਮਲਾ, ਮਨਾਲੀ, ਡਲਹੌਜ਼ੀ ਅਤੇ ਚੈਲ ਵਰਗੇ ਪਹਾੜੀ ਸਥਾਨਾਂ ‘ਤੇ ਸੀਜ਼ਨ ਦੀ ਪਹਿਲੀ ਬਰਫ਼ਬਾਰੀ ਹੋਈ। ਹਿਮਾਚਲ ਦੇ ਹੇਠਲੇ ਇਲਾਕਿਆਂ ਵਿੱਚ ਭਾਰੀ ਮੀਂਹ ਦੇ ਨਾਲ-ਨਾਲ ਗੜੇਮਾਰੀ ਵੀ ਹੋਈ। ਭਾਰੀ ਬਰਫ਼ਬਾਰੀ ਅਤੇ ਮੀਂਹ ਕਾਰਨ, ਰਾਜ ਦੀਆਂ 563 ਸੜਕਾਂ, ਜਿਨ੍ਹਾਂ ਵਿੱਚ ਪੰਜ ਰਾਸ਼ਟਰੀ ਰਾਜਮਾਰਗ ਸ਼ਾਮਲ ਹਨ, ਬੰਦ ਹੋ ਗਈਆਂ ਹਨ। ਰਾਜ ਦੇ ਕਈ ਇਲਾਕਿਆਂ ਜਿਨ੍ਹਾਂ ਵਿੱਚ ਅੱਪਰ ਸ਼ਿਮਲਾ ਵੀ ਸ਼ਾਮਲ ਹੈ, ਦਾ ਸੰਪਰਕ ਕੱਟ ਗਿਆ ਹੈ। ਹਜ਼ਾਰਾਂ ਸੈਲਾਨੀ ਵੱਖ-ਵੱਖ ਥਾਵਾਂ ‘ਤੇ ਫਸੇ ਹੋਏ ਹਨ।
ਆਨੀ-ਕੁੱਲੂ, ਸ਼ਿਮਲਾ-ਕਿੰਨੌਰ, ਮਨਾਲੀ-ਲੇਹ, ਹਟਕੋਟੀ-ਪਾਉਂਟਾ ਸਾਹਿਬ ਅਤੇ ਚੰਬਾ-ਭਰਮੌਰ ਐਨਐਚ ਸਮੇਤ ਸੈਂਕੜੇ ਸੜਕਾਂ ਦੇ ਬੰਦ ਹੋਣ ਕਾਰਨ ਆਵਾਜਾਈ ਸੇਵਾਵਾਂ ਠੱਪ ਹੋ ਗਈਆਂ ਹਨ। ਕੁਫ਼ਰੀ-ਫਾਗੂ ਤੋਂ 100 ਅਤੇ ਆਨੀ ਦੇ ਰਘੂਪੁਰਗੜ੍ਹ ਤੋਂ 48 ਲੋਕਾਂ ਨੂੰ ਰੈਸਕਿਊ ਕੀਤਾ ਗਿਆ। ਰਾਜ ਵਿੱਚ 10,384 ਟ੍ਰਾਂਸਫਾਰਮਰਾਂ ਦੇ ਫੇਲ੍ਹ ਹੋਣ ਕਾਰਨ ਸੈਂਕੜੇ ਪਿੰਡਾਂ ‘ਚ ਬਿਜਲੀ ਗੁਲ ਹੈ। ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਬਰਫ਼ ਹਟਾਉਣ ਦਾ ਕੰਮ ਸ਼ਾਮ ਤੱਕ ਪੂਰਾ ਹੋ ਜਾਵੇਗਾ, ਅਤੇ ਉਸ ਤੋਂ ਬਾਅਦ ਹੀ ਵਾਹਨਾਂ ਨੂੰ ਮਨਾਲੀ ਵੱਲ ਜਾਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ।
ਭਾਰੀ ਬਰਫ਼ਬਾਰੀ ਕਾਰਨ ਮਨਾਲੀ ਤੋਂ ਲਾਹੌਲ ਘਾਟੀ ਤੱਕ ਅਟਲ ਸੁਰੰਗ ਰਾਹੀਂ ਜਾਣ ਵਾਲੀ ਸੜਕ ਵੀ ਪੂਰੀ ਤਰ੍ਹਾਂ ਬੰਦ ਹੈ। ਬਰਫ਼ਬਾਰੀ ਅਤੇ ਮੀਂਹ ਕਾਰਨ ਸ਼ਿਮਲਾ, ਮਨਾਲੀ ਅਤੇ ਡਲਹੌਜ਼ੀ ਵਿੱਚ ਘੱਟੋ-ਘੱਟ ਤਾਪਮਾਨ ਵਿੱਚ ਵੀ ਗਿਰਾਵਟ ਆਈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
