Godzilla vs Kong ਫੇਮ ਅਦਾਕਾਰਾ Kaylee Hottle ਦੀ ਕਾਰ ਹਾਦਸੇ ਵਿੱਚ ਮੌਤ
ਨਵੀਂ ਦਿੱਲੀ: 22 ਜੁਲਾਈ (ਵਿਸ਼ਵ ਵਾਰਤਾ) – ਹਾਲੀਵੁੱਡ ਫਿਲਮ ‘ਗੌਡਜ਼ਿਲਾ ਵਰਸੇਜ਼ ਕਾਂਗ’ (2021) ਅਤੇ ਇਸ ਦੇ ਸੀਕਵਲ ‘ਗੌਡਜ਼ਿਲਾ x ਕਾਂਗ: ਦ ਨਿਊ ਐਂਪਾਇਰ’ (2024) ਵਿੱਚ ਜੀਆ ਦੀ ਭੂਮਿਕਾ ਨਿਭਾਉਣ ਵਾਲੀ ਨੌਜਵਾਨ ਅਦਾਕਾਰਾ ਕੇਲੀ ਹੌਟਲ ਦਾ 18 ਸਾਲ ਦੀ ਉਮਰ ਵਿੱਚ ਇੱਕ ਕਾਰ ਹਾਦਸੇ ਵਿੱਚ ਦਿਹਾਂਤ ਹੋ ਗਿਆ। ਦ ਨਿਊਯਾਰਕ ਟਾਈਮਜ਼ ਮੁਤਾਬਕ, ਕੇਲੀ ਦੇ ਪਿਤਾ ਜੋਸ਼ੂਆ ਹੌਟਲ ਨੇ ਅਮਰੀਕੀ ਸੈਨਤ ਭਾਸ਼ਾ (ASL) ਵਿੱਚ ਫੇਸਬੁੱਕ ਲਾਈਵ ਰਾਹੀਂ ਇਸ ਦੁਖਦਾਈ ਖ਼ਬਰ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਕੇਲੀ ਦੀ ਮੌਤ ਅਮਰੀਕਾ ਦੇ ਮੈਰੀਲੈਂਡ ਰਾਜ ਵਿੱਚ ਇੱਕ ਕਾਰ ਹਾਦਸੇ ਦੌਰਾਨ ਹੋਈ।
ਟੈਕਸਾਸ ਸਕੂਲ ‘ਫਾਰ ਦ ਡੈਫ’, ਜਿੱਥੇ ਕੇਲੀ ਸੀਨੀਅਰ ਵਿਦਿਆਰਥਣ ਸੀ, ਨੇ ਵੀ ਅਧਿਕਾਰਤ ਬਿਆਨ ਜਾਰੀ ਕਰਕੇ ਉਸ ਦੇ ਦਿਹਾਂਤ ਦੀ ਪੁਸ਼ਟੀ ਕੀਤੀ। ਸਕੂਲ ਨੇ ਕਿਹਾ ਕਿ ਇਸ ਦੁੱਖ ਦੀ ਘੜੀ ਵਿੱਚ ਉਹ ਕੇਲੀ ਦੇ ਪਰਿਵਾਰ, ਦੋਸਤਾਂ, ਸਹਿਪਾਠੀਆਂ ਅਤੇ ਪ੍ਰਸ਼ੰਸ਼ਕਾਂ ਦੇ ਨਾਲ ਖੜ੍ਹੇ ਹਨ ਅਤੇ ਲੋਕਾਂ ਨੂੰ ਪਰਿਵਾਰ ਦੀ ਨਿੱਜਤਾ ਦਾ ਸਤਿਕਾਰ ਕਰਨ ਦੀ ਅਪੀਲ ਕੀਤੀ।
ਕੇਲੀ ਹੌਟਲ ਇੱਕ ਬੋਲ਼ੇ ਪਰਿਵਾਰ ਨਾਲ ਸੰਬੰਧਿਤ ਸੀ ਅਤੇ ਉਹ ਖੁਦ ਵੀ ਬੋਲ਼ੀ ਸੀ। ਉਸ ਨੇ ਜੀਆ ਦੇ ਕਿਰਦਾਰ ਰਾਹੀਂ ਦਰਸ਼ਕਾਂ ਦੇ ਦਿਲਾਂ ਵਿੱਚ ਖਾਸ ਥਾਂ ਬਣਾਈ। ਫਿਲਮ ਵਿੱਚ ਜੀਆ ਇੱਕ ਬੋਲ਼ੀ ਅਨਾਥ ਬੱਚੀ ਹੈ, ਜਿਸ ਦਾ ਕੋਂਗ ਨਾਲ ਡੂੰਘਾ ਰਿਸ਼ਤਾ ਦਿਖਾਇਆ ਗਿਆ ਹੈ। ਕੇਲੀ ਨੇ ਅਮਰੀਕੀ ਸੈਨਤ ਭਾਸ਼ਾ ਰਾਹੀਂ ਕੋਂਗ ਨਾਲ ਸੰਚਾਰ ਕਰਦੇ ਹੋਏ ਆਪਣੇ ਅਦਾਕਾਰੀ ਦੇ ਹੁਨਰ ਨਾਲ ਖੂਬ ਪ੍ਰਸ਼ੰਸਾ ਹਾਸਲ ਕੀਤੀ।
ਅਟਲਾਂਟਾ (ਜਾਰਜੀਆ) ਵਿੱਚ ਜਨਮੀ ਕੇਲੀ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਇਸ਼ਤਿਹਾਰਾਂ ਨਾਲ ਕੀਤੀ ਸੀ। ਸਾਲ 2017 ਵਿੱਚ ਉਹ ਪਹਿਲੀ ਵਾਰ ਕੈਮਰੇ ਸਾਹਮਣੇ ਆਈ ਅਤੇ ਬੋਲ਼ੇ ਭਾਈਚਾਰੇ ਲਈ ਜਾਗਰੂਕਤਾ ਫੈਲਾਉਣ ਵਾਲੇ ਕਈ ਵਿਗਿਆਪਨਾਂ ਵਿੱਚ ਕੰਮ ਕੀਤਾ। ਬਾਅਦ ਵਿੱਚ ਕਾਸਟਿੰਗ ਡਾਇਰੈਕਟਰ ਸਾਰਾ ਹੈਲੀ ਫਿਨ ਨੇ ਉਸ ਨੂੰ ‘ਗੌਡਜ਼ਿਲਾ ਵਰਸੇਜ਼ ਕਾਂਗ’ ਵਿੱਚ ਜੀਆ ਦੇ ਕਿਰਦਾਰ ਲਈ ਚੁਣਿਆ, ਜਿਸ ਨਾਲ ਉਹ ਅੰਤਰਰਾਸ਼ਟਰੀ ਪੱਧਰ ‘ਤੇ ਪ੍ਰਸਿੱਧ ਹੋ ਗਈ। ਕੇਲੀ ਹੌਟਲ ਦੇ ਅਚਾਨਕ ਦਿਹਾਂਤ ਨਾਲ ਫਿਲਮ ਜਗਤ ਅਤੇ ਉਸ ਦੇ ਪ੍ਰਸ਼ੰਸਕਾਂ ਵਿੱਚ ਸੋਗ ਦੀ ਲਹਿਰ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
