Cabs with IndiGo: ਹਵਾਈ ਯਾਤਰੀਆਂ ਲਈ ਵੱਡੀ ਖ਼ਬਰ! ਇੰਡੀਗੋ ਨੇ ਸ਼ੁਰੂ ਕੀਤੀ ਏਅਰਪੋਰਟ ਕੈਬ ਸਰਵਿਸ
– ਸਿਰਫ਼ 49 ਰੁਪਏ ‘ਚ ਮਿਲੇਗੀ ਸੁਵਿਧਾ!
ਨਵੀ ਦਿੱਲੀ, 18 ਜੂਨ 2026 (ਵਿਸ਼ਵ ਵਾਰਤਾ): ਦੇਸ਼ ਦੀ ਸਭ ਤੋਂ ਵੱਡੀ ਏਅਰਲਾਈਨ Indigo ਨੇ ਹਵਾਈ ਯਾਤਰੀਆਂ ਦੇ ਸਫ਼ਰ ਨੂੰ ਹੋਰ ਵੀ ਜ਼ਿਆਦਾ ਸੁਖਾਲਾ ਅਤੇ ਤਣਾਅ-ਮੁਕਤ ਬਣਾਉਣ ਲਈ ਇੱਕ ਵੱਡਾ ਕਦਮ ਚੁੱਕਿਆ ਹੈ। ਕੰਪਨੀ ਨੇ ‘ਕੈਬਸ ਵਿਦ ਇੰਡੀਗੋ’ (Cabs with IndiGo) ਨਾਂ ਨਾਲ ਇੱਕ ਨਵੀਂ ਏਅਰਪੋਰਟ ਟ੍ਰਾਂਸਫਰ ਸਰਵਿਸ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਸੇਵਾ ਰਾਹੀਂ ਹੁਣ ਯਾਤਰੀ ਦੇਸ਼ ਦੇ ਪ੍ਰਮੁੱਖ ਸ਼ਹਿਰਾਂ ਵਿੱਚ ਏਅਰਪੋਰਟ ਆਉਣ-ਜਾਣ ਲਈ ਸਿੱਧਾ ਇੰਡੀਗੋ ਦੇ ਪਲੇਟਫਾਰਮ ਤੋਂ ਹੀ ਕੈਬ ਬੁੱਕ ਕਰ ਸਕਣਗੇ।
ਏਅਰਲਾਈਨਜ਼ ਦੇ ਅਨੁਸਾਰ, ਯਾਤਰੀ ਸਿਰਫ਼ 49 ਰੁਪਏ ਦੇ ਕੇ ਕੈਬ ਰਿਜ਼ਰਵ ਕਰ ਸਕਣਗੇ। ਇਸ ਦੀ ਖ਼ਾਸੀਅਤ ਇਹ ਹੈ ਕਿ ਕਿਰਾਇਆ ਪਹਿਲਾਂ ਤੋਂ ਹੀ ਤੈਅ ਹੋਵੇਗਾ, ਇਸ ਲਈ ਸਰਜ ਪ੍ਰਾਈਸਿੰਗ (ਅਚਾਨਕ ਵਧਿਆ ਹੋਇਆ ਕਿਰਾਇਆ) ਨਹੀਂ ਲੱਗੇਗਾ। ਇਸ ਦੇ ਨਾਲ ਹੀ ਪਿਕ-ਅੱਪ ਦੇ ਸਮੇਂ ਤੱਕ ਮੁਫ਼ਤ ਕੈਂਸਿਲੇਸ਼ਨ ਦੀ ਸਹੂਲਤ ਮਿਲੇਗੀ।
ਇੰਡੀਗੋ ਦਾ ਦਾਅਵਾ ਹੈ ਕਿ ਯਾਤਰੀਆਂ ਨੂੰ ਤੈਅ ਸਮੇਂ ‘ਤੇ 100% ਕੈਬ ਦੀ ਸਹੂਲਤ ਮਿਲੇਗੀ। ਇਸ ਦੇ ਨਾਲ ਹੀ ਜੇਕਰ ਫਲਾਈਟ ਕਿਸੇ ਕਾਰਨ ਲੇਟ ਹੁੰਦੀ ਹੈ, ਤਾਂ ਅਜਿਹੀਆਂ ਸਥਿਤੀਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ 30 ਮਿੰਟ ਤੱਕ ਦਾ ਮੁਫ਼ਤ ਵੇਟਿੰਗ ਟਾਈਮ ਵੀ ਦਿੱਤਾ ਜਾਵੇਗਾ। ਏਅਰਲਾਈਨਜ਼ ਦੇ ਮੁਤਾਬਕ, ਯਾਤਰੀ ਇੰਡੀਗੋ ਦੀ ਵੈੱਬਸਾਈਟ ਅਤੇ ਮੋਬਾਈਲ ਐਪ ਰਾਹੀਂ ਇਸ ਸੇਵਾ ਦਾ ਲਾਭ ਉਠਾ ਸਕਦੇ ਹਨ। ਕੰਪਨੀ ਦਾ ਕਹਿਣਾ ਹੈ ਕਿ ਇਸ ਨਾਲ ਯਾਤਰੀਆਂ ਨੂੰ ਇੱਕੋ ਪਲੇਟਫਾਰਮ ‘ਤੇ ਫਲਾਈਟ, ਹੋਟਲ ਅਤੇ ਹੁਣ ਕੈਬ ਬੁਕਿੰਗ ਦੀ ਸਹੂਲਤ ਮਿਲੇਗੀ।
ਇੰਡੀਗੋ ਦੇ ਚੀਫ਼ ਡਿਜੀਟਲ ਐਂਡ ਇਨਫਾਰਮੇਸ਼ਨ ਅਫ਼ਸਰ ਨੀਤਨ ਚੋਪੜਾ ਨੇ ਇਸ ਲਾਂਚਿੰਗ ‘ਤੇ ਕਿਹਾ ਕਿ ਇਹ ਸਰਵਿਸ ਕੰਪਨੀ ਦੇ ਟ੍ਰੈਵਲ ਈਕੋਸਿਸਟਮ ਨੂੰ ਵਧਾਉਣ ਦੀ ਰਣਨੀਤੀ ਦਾ ਹਿੱਸਾ ਹੈ। ਸਾਡਾ ਮਕਸਦ ਯਾਤਰੀਆਂ ਨੂੰ ਹਵਾਈ ਸਫ਼ਰ ਤੋਂ ਇਲਾਵਾ ਜ਼ਮੀਨੀ ਸਫ਼ਰ ਵਿੱਚ ਵੀ ਇੱਕ ਬਿਹਤਰੀਨ ਅਤੇ ਸੁਖਾਲਾ ਅਨੁਭਵ ਦੇਣਾ ਹੈ। ਇਹ ਸਰਵਿਸ ਇੰਡੀਗੋ ਦੀ ਵੈੱਬਸਾਈਟ ਅਤੇ ਮੋਬਾਈਲ ਐਪ ‘ਤੇ ਬੁਕਿੰਗ ਲਈ ਉਪਲਬਧ ਕਰਵਾ ਦਿੱਤੀ ਗਈ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
