ਰਾਹੁਲ ਗਾਂਧੀ ਦੇ ਧਰਨੇ ਤੋਂ ਬਾਅਦ ਪੈਲੇਟ ਗਨ ਮਾਮਲੇ ‘ਚ FIR ਦਰਜ
ਚੰਡੀਗੜ੍ਹ, 21 ਅਗਸਤ (ਵਿਸ਼ਵ ਵਾਰਤਾ): ਰਾਹੁਲ ਗਾਂਧੀ ਦੇ 6 ਘੰਟੇ ਦੇ ਧਰਨੇ ਤੋਂ ਬਾਅਦ ਦਿੱਲੀ ਪੁਲਿਸ ਨੇ 20 ਜੁਲਾਈ ਨੂੰ ਜੰਤਰ-ਮੰਤਰ ‘ਤੇ ਪ੍ਰਦਰਸ਼ਨ ਕਰਨ ਵਾਲੇ ਵਿਦਿਆਰਥੀ ਸਾਹਿਲ ਦੀ ਐੱਫ.ਆਈ.ਆਰ. ਦਰਜ ਕਰ ਲਈ ਹੈ। ਹਾਲਾਂਕਿ, ਇਹ ਮਾਮਲਾ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਦਰਜ ਕੀਤਾ ਗਿਆ ਹੈ। ਸਾਹਿਲ ਦਾ ਦੋਸ਼ ਹੈ ਕਿ ਪੈਲੇਟ ਗਨ ਦੇ ਛੱਰੇ ਲੱਗਣ ਕਾਰਨ ਉਸ ਦੀ ਅੱਖ ਦੀ ਰੋਸ਼ਨੀ ਚਲੀ ਗਈ।
ਐੱਫ.ਆਈ.ਆਰ. ਦਰਜ ਹੋਣ ਤੱਕ ਰਾਹੁਲ ਗਾਂਧੀ ਸੰਸਦ ਮਾਰਗ ਥਾਣੇ ਦੇ ਬਾਹਰ ਹੀ ਬੈਠੇ ਰਹੇ ਅਤੇ ਮਾਮਲਾ ਦਰਜ ਹੋਣ ਤੋਂ ਬਾਅਦ ਪੀੜਤ ਵਿਦਿਆਰਥੀ ਦੇ ਨਾਲ ਥਾਣੇ ਤੋਂ ਬਾਹਰ ਆਏ। ਰਾਹੁਲ ਸ਼ੁੱਕਰਵਾਰ ਦੁਪਹਿਰ ਕਰੀਬ 12:30 ਵਜੇ ਥਾਣੇ ਪਹੁੰਚੇ ਸਨ।
ਜਦੋਂ ਰਾਹੁਲ ਦੀ ਮੰਗ ਨਹੀਂ ਮੰਨੀ ਗਈ, ਤਾਂ ਉਹ ਡੀ.ਸੀ.ਪੀ. (DCP) ਨੂੰ ਮਿਲੇ। ਗੱਲਬਾਤ ਦਾ ਕੋਈ ਨਤੀਜਾ ਨਾ ਨਿਕਲਣ ‘ਤੇ ਉਹ ਧਰਨੇ ‘ਤੇ ਬੈਠ ਗਏ ਅਤੇ ਕਿਹਾ, “ਜਦੋਂ ਤੱਕ ਐੱਫ.ਆਈ.ਆਰ. ਦਰਜ ਨਹੀਂ ਹੋਵੇਗੀ, ਮੈਂ ਇੱਥੋਂ ਨਹੀਂ ਹਟਾਂਗਾ।” ਰਾਹੁਲ ਨੇ ਸਾਹਿਲ ਨੂੰ ਲੱਗੇ ਛੱਰੇ ਦਿਖਾਉਂਦੇ ਹੋਏ ਕਿਹਾ ਸੀ, “ਇਹ ਛੱਰੇ ਸਬੂਤ ਹਨ, ਜੋ ਸਾਹਿਲ ਦੇ ਸਰੀਰ ‘ਚੋਂ ਨਿਕਲੇ ਹਨ। ਜੇਕਰ ਪੁਲਿਸ ਨੇ ਗੋਲੀ ਨਹੀਂ ਚਲਾਈ ਤਾਂ ਫਿਰ ਕਿਸ ਨੇ ਚਲਾਈ?” ਰਾਹੁਲ ਦੇ ਨਾਲ ਪ੍ਰਿਯੰਕਾ ਗਾਂਧੀ, ਅਧੀਰ ਰੰਜਨ ਚੌਧਰੀ, ਸਲਮਾਨ ਖ਼ੁਰਸ਼ੀਦ ਅਤੇ ਜੈਰਾਮ ਰਮੇਸ਼ ਵੀ ਮੌਜੂਦ ਸਨ।
