CWG 2026 : ਰਾਸ਼ਟਰਮੰਡਲ ਖੇਡਾਂ ‘ਚ ਧੀਆਂ ਦਾ ਕਮਾਲ: ਬਾਕਸਿੰਗ ‘ਚ ਪ੍ਰੀਤੀ ਅਤੇ ਜੈਸਮੀਨ ਨੇ ਜਿੱਤੇ ਗੋਲਡ ਮੈਡਲ
ਨਵੀ ਦਿੱਲੀ, 1 ਅਗਸਤ 2026 (ਵਿਸ਼ਵ ਵਾਰਤਾ): ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਵਿੱਚ ਹਰਿਆਣਾ ਨੇ ਤੀਜਾ ਸੋਨ ਤਗਮਾ ਜਿੱਤ ਲਿਆ ਹੈ। ਬਾਕਸਿੰਗ ਵਿੱਚ 54 ਕਿਲੋ ਭਾਰ ਵਰਗ ਵਿੱਚ ਪ੍ਰੀਤੀ ਨੇ 5-0 ਨਾਲ ਆਪਣਾ ਮੁਕਾਬਲਾ ਜਿੱਤਿਆ। ਪ੍ਰੀਤੀ ਨੇ ਤਿੰਨੋਂ ਰਾਊਂਡਾਂ ਵਿੱਚ ਕੈਨੇਡਾ ਦੀ ਵਿਰੋਧੀ ਖਿਡਾਰਨ ਐਸ.ਐਸ. ਡੇਲਗਾਡੋ ਨੂੰ ਕਈ ਸ਼ਾਨਦਾਰ ਪੰਚ ਮਾਰੇ। ਪ੍ਰੀਤੀ ਤੋਂ ਬਾਅਦ 57 ਕਿਲੋ ਭਾਰ ਵਰਗ ਵਿੱਚ ਜੈਸਮੀਨ ਲੰਬੋਰੀਆ ਨੇ ਉੱਤਰੀ ਆਇਰਲੈਂਡ ਦੀ ਐਮ. ਵਾਲਸ ਨੂੰ ਹਰਾ ਕੇ ਅੱਜ ਦਾ ਦੂਜਾ ਸੋਨ ਤਗਮਾ ਜਿੱਤਿਆ।
ਇਹਨਾਂ ਤੋਂ ਬਾਅਦ ਭਿਵਾਨੀ ਦੀ ਪ੍ਰਿਯਾ ਘਨਘਸ, ਸਾਖਸ਼ੀ ਚੌਧਰੀ, ਪ੍ਰੀਤੀ ਪੰਵਾਰ, ਸਚਿਨ ਸਿਵਾਚ ਅਤੇ ਹਿਸਾਰ ਦੇ ਅੰਕੁਸ਼ ਪੰਘਾਲ ਤੇ ਹਾਂਸੀ ਦੇ ਨਰਿੰਦਰ ਬੇਰਵਾਲ ਦੇ ਵੀ ਮੁਕਾਬਲੇ ਹੋਣਗੇ।
ਪ੍ਰੀਤੀ ਦੀ ਜਿੱਤ ਤੋਂ ਬਾਅਦ ਪਿਤਾ ਨੇ ਕਿਹਾ, “ਸਾਨੂੰ ਬਹੁਤ ਖ਼ੁਸ਼ੀ ਹੈ ਕਿ ਸਾਡੀ ਧੀ ਨੇ ਸੋਨ ਤਗਮਾ ਜਿੱਤਿਆ ਹੈ। ਸਕਾਟਲੈਂਡ ਰਵਾਨਾ ਹੋਣ ਤੋਂ ਪਹਿਲਾਂ ਉਸ ਨੇ ਸਾਡੇ ਨਾਲ ਵਾਅਦਾ ਕੀਤਾ ਸੀ ਕਿ ਚਾਹੇ ਕੁਝ ਵੀ ਹੋ ਜਾਵੇ, ਉਹ ਦੇਸ਼ ਲਈ ਮੈਡਲ ਜ਼ਰੂਰ ਜਿੱਤ ਕੇ ਆਵੇਗੀ। ਉਸ ਨੇ ਆਪਣਾ ਵਾਅਦਾ ਪੂਰਾ ਕਰ ਕੇ ਦਿਖਾਇਆ।”
ਜੈਸਮੀਨ ਦੇ ਸੋਨ ਤਗਮਾ ਜਿੱਤਣ ਤੋਂ ਬਾਅਦ ਉਨ੍ਹਾਂ ਦੇ ਪਿਤਾ ਜੈਵੀਰ ਸਿੰਘ ਨੇ ਕਿਹਾ- “ਅਸੀਂ ਬਹੁਤ ਖੁਸ਼ ਹਾਂ, ਧੀ ਨੇ ਦੇਸ਼ ਲਈ ਗੋਲਡ ਮੈਡਲ ਜਿੱਤਿਆ ਹੈ। ਪਹਿਲਾਂ ਤੋਂ ਹੀ ਜੈਸਮੀਨ ਦੇ ਜਿੱਤਣ ਦੀ ਉਮੀਦ ਸੀ। ਮੈਚ ਦੇ ਵਿਚਕਾਰ ਥੋੜ੍ਹੀ ਘਬਰਾਹਟ ਜ਼ਰੂਰ ਸੀ। ਹੁਣ ਭਿਵਾਨੀ ਆਉਣ ‘ਤੇ ਧੀ ਦਾ ਸ਼ਾਨਦਾਰ ਸਵਾਗਤ ਕਰਾਂਗੇ।”
