ਰਾਬਤਾ ਮੈਗਜ਼ੀਨ ਦੇ ਮੁੱਖ ਸੰਪਾਦਕ ਸੁਖਵੀਰ ਜੋਗਾ ਦਾ ਭੋਗ ਭਲਕੇ 30 ਮਈ ਨੂੰ
ਮਾਨਸਾ 29 ਮਈ (ਵਿਸ਼ਵ ਵਾਰਤਾ)- :ਪਿਛਲੀ 21 ਮਈ 2021 , ਨੂੰ ਰੋਜ਼ਾਨਾ ਦੀ ਤਰ੍ਹਾਂ ਜਦੋਂ ਸੋਗ ਮਈ ਖਬਰਾਂ ਫੇਸਬੁੱਕ ਤੇ ਦਿਲ ਨੂੰ ਉਦਾਸ ਕਰ ਰਹੀਆਂ ਸਨ,,ਤੇ ਇੱਕ ਖਬਰ ਨੇ ਸਭ ਨੂੰ ਝੰਜੋੜ ਕੇ ਰੱਖ ਦਿੱਤਾ….ਉਹ ਸੀ ਸੁਖਵੀਰ ਜੋਗਾ ਦੀ ਮੌਤ ਦੀ ਖਬਰ।
ਸੁਖਵੀਰ ਜੋਗਾ…ਕਲਮ ਦਾ ਧਨੀ ਤੇ ਰਾਬਤਾ ਮੈਗਜ਼ੀਨ ਦਾ ਮੁੱਖ ਸੰਪਾਦਕ ਸੀ।ਹਰ ਵੱਡੇ ਛੋਟੇ ਕਲਾਕਾਰ ਦੀ ਇੰਟਰਵਿਊ ਤਕਰੀਬਨ ਹਰ ਇੱਕ ਅਖਬਾਰ ਤੇ ਮੈਗਜ਼ੀਨ ਵਿੱਚ ਲਿਖਣ ਵਾਲੇ ਬੇਬਾਕ ਤੇ ਤਰਕਸ਼ੀਲ ਸੁਸਾਇਟੀ ਦਾ ਨਿਧੜਕ ਜਰਨੈਲ ਸੀ।ਭਾਵੇਂ ਕਿ ਪੋਲੀਓ ਦੀ ਨਾਮੁਰਾਦ ਬਿਮਾਰੀ ਨੇ ਉਸ ਨੂੰ ਬਚਪਨ ਤੋਂ ਹੀ ਨਕਾਰਾ ਕੀਤਾ ਹੋਇਆ ਸੀ,ਪਰ ਤੁਰਨ-ਫਿਰਨ,ਹਿੰਮਤੀ ਤੇ ਸਾਹਸੀ ਦੇ ਤੌਰ ਤੇ ਉਸਦਾ ਕੋਈ ਮੁਕਾਬਲਾ ਨਹੀਂ ਸੀ। ਗੱਲ ਸਾਫ਼ ਤੇ ਸਿੱਧੀ ਮੂੰਹ ਤੇ ਕਰਨ ਦੀ ਉਸਦੀ ਆਦਤ ਸੀ।
ਕਿੱਤੇ ਵੱਲੋਂ ਇੱਕ ਅਧਿਆਪਕ ਸੀ ਤੇ ਗਰਮੀ ਦੀਆਂ ਛੁੱਟੀਆਂ ਦੌਰਾਨ ਆਪਣੇ ਦੋਸਤਾਂ ਦੇ ਸਹਿਯੋਗ ਨਾਲ ਗਰੀਬ ਬੱਚਿਆਂ ਦੀਆਂ ਫਰੀ ਕਲਾਸਾਂ ਲਗਾਕੇ ਮੈਰੀਟੋਰੀਅਸ ਤੇ ਹੋਰ ਚੰਗੇ ਵਿਦਿਅਕ ਅਦਾਰਿਆਂ ਵਿੱਚ ਬੱਚਿਆਂ ਨੂੰ ਹਰ ਸਾਲ ਅੱਗੇ ਵਧਣ ਲਈ ਪ੍ਰੇਰਦਾ ਰਹਿੰਦਾ ਸੀ। ਕਲਾ, ਸੱਭਿਆਚਾਰ ਤੇ ਵਿਦਿਆ ਉਸ ਦੇ ਮਨ ਭਾਉਂਦੇ ਕਾਰਜ ਸਨ ਤੇ ਹੁਨਰ ਵਾਲੇ ਬੱਚਿਆਂ ਨੂੰ ਆਪ ਥਿਏਟਰ ਨਾਲ ਜੋੜਨਾ ਤੇ ਮਹੀਨੇ ਵਿੱਚ ਇੱਕ ਵਾਰ ਕਾਮਯਾਬ ਵਿਅਕਤੀ ਨਾਲ ਬੱਚਿਆਂ ਨੂੰ ਮਿਲਾਉਂਦਾ ਤਾਂ ਕਿ ਉਹ ਵੀ ਤਰੱਕੀ ਦੇ ਰਾਹ ਚੱਲ ਸਕਣ। ਉਸ ਦਾ ਸ਼ੌਂਕ ਜਨੂਨ ਤੋਂ ਉਪਰ ਸੀ।
ਭਾਵੇਂ ਕਿ ਸੁਖਵੀਰ ਜੋਗਾ ਸਾਲ 2015 ਵਿੱਚ ਸਵਾਇਨ ਫਲੂ ਦੀ ਜਕੜ ‘ਚ ਆਇਆ ਸੀ, ਪਰ ਆਪਣੀ ਦਲੇਰੀ ਤੇ ਉੱਚੀ ਸੋਚ ਤੇ ਸਿਰੜ ਦੇ ਸਦਕਾ ਦੋਵੇਂ ਫੇਫੜੇ ਖਰਾਬ ਹੋਣ ਕਰਕੇ ਵੀ ਨਿਰੋਗੀ ਜਾਪਦਾ ਸੀ। ਪਰ, ਹੋਣੀ ਨੂੰ ਕੁਝ ਹੋਰ ਹੀ ਮਨਜ਼ੂਰ ਹੁੰਦਾ। ਸੁਖਵੀਰ ਜੋਗਾ ਦੇ ਪਿਤਾ ਜੀ , ਸ.ਸੁਖਦੇਵ ਸਿੰਘ ਜੋਗਾ ਰਿਟਾਇਰਡ ਅਧਿਆਪਕ ਹਨ ਤੇ ਸਮਾਜ ਸੇਵੀ ਹੋਣ ਕਰਕੇ ਇਲਾਕੇ ‘ਚ ਚੰਗਾ ਅਸਲ ਰਸੂਖ ਰੱਖਦੇ ਹਨ। ਮਾਤਾ ਜੀ ਘਰ ਵਿੱਚ ਬੱਚਿਆਂ ਦੀ ਦੇਖ ਰੇਖ ਕਰਦੇ ਹਨ। ਸੁਖਵੀਰ ਜੋਗਾ ਦੇ 2 ਬੱਚੇ ਹਨ,,,ਇੱਕ ਬੇਟੀ ਨਵਰੀਤ ਕੌਰ ਜੋਗਾ, ਜੋ ਕਿ ਐੱਮ-ਏ 1 ਤੇ ਦੂਜਾ ਸਰਬਜੀਤ ਸਿੰਘ ਬੀ.ਏ 2 ਵਿੱਚ ਪੜ੍ਹਾਈ ਕਰਦੇ ਹਨ। ਉਹਨਾਂ ਦੀ ਧਰਮ ਪਤਨੀ ਘਰੇਲੂ ਕੰਮਕਾਜੀ ਔਰਤ ਹਨ। ਸੁਖਵੀਰ ਜੋਗਾ ਦੇ ਛੋਟੇ ਵੀਰ ਅਮਨਦੀਪ ਸਿੰਘ ਤੇ ਛੋਟੀ ਭੈਣ ਬਲਜੀਤ ਕੌਰ ਹਨ,,ਜੋ ਕਿ ਵਿਆਹੇ ਹੋਏ ਹਨ।
ਕੁੱਲ ਮਿਲਾ ਕੇ ਸਾਹਿਤ ਪ੍ਰੇਮੀਆਂ ਅਤੇ ਸਾਕ ਸੰਬੰਧੀ ਵਿੱਚ ਅਤੇ ਵੱਡੀ ਤਾਦਾਦ ਦੇ ਵਿੱਚ ਦੋਸਤ ਮਿੱਤਰ ਸਭ ਸਦਮੇ ਵਿੱਚ ਹਨ। ਵੱਖ ਵੱਖ ਜਥੇਬੰਦੀਆਂ, ਅਧਿਆਪਕ ਯੂਨੀਅਨ , ਨਗਰ ਪੰਚਾਇਤ ਤੇ ਹਰ ਆਮ ਤੇ ਖਾਸ ਵੱਲੋਂ ਇਸ ਸਮੇਂ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ ਜਾ ਰਿਹਾ ਹੈ।
ਤੇ ਅੱਜ 30 ਮਈ 2021 , ਨੂੰ ਉਹਨਾਂ ਦੀ ਅੰਤਿਮ ਅਰਦਾਸ ਗੁਰੂਦੁਆਰਾ ਸਾਹਿਬ ਨੌਵੀਂ ਪਾਤਸ਼ਾਹੀ , ਨੇੜੇ ਬੱਸ ਅੱਡਾ, ਜੋਗਾ ਜਿਲਾ ਮਾਨਸਾ ਵਿਖੇ ਬਾਅਦ ਦੁਪਹਿਰ 12:30 ਵਜੇ ਹੋਵੇਗੀ।
