ਅੰਮ੍ਰਿਤਸਰ, 20 ਨਵੰਬਰ (ਵਿਸ਼ਵ ਵਾਰਤਾ)-ਖ਼ਾਲਸਾ ਕਾਲਜ ਗਰਲਜ਼ ਸੀਨੀਅਰ ਸੈਕੰਡਰੀ ਸਕੂਲ ਸਪੋਰਟਸ ਵਿੰਗ (ਲੜਕੀਆਂ) ਦੀ ਹਾਕੀ ਟੀਮ ਨੇ ਜ਼ਿਲ੍ਹਾ ਬਠਿੰਡਾ ਵਿਖੇ ਕਰਵਾਈਆਂ ਗਈਆਂ ਅੰਡਰ‐19 (ਲੜਕੀਆਂ) 63ਵੀਂ ਪੰਜਾਬ ਰਾਜ ਸਕੂਲ ਖੇਡਾਂ ‘ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਫ਼ਾਈਨਲ ਮੈਚ ‘ਚ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਤਰਨ ਤਾਰਨ ਦੀ ਟੀਮ ਨੂੰ 4‐0 ਨਾਲ ਹਰਾ ਕੇ ਟਰਾਫ਼ੀ ‘ਤੇ ਆਪਣਾ ਕਬਜ਼ਾ ਜਮਾਇਆ। ਜਦ ਕਿ ਇਸ ਤੋਂ ਪਹਿਲਾਂ ਸਕੂਲ ਟੀਮ ਦਾ ਸੈਮੀਫ਼ਾਈਲ ਮੁਕਾਬਲਾ ਸਪੋਰਟਸ ਸਕੂਲ, ਬਾਦਲ ਦਰਮਿਆਨ ਹੋਇਆ, ਜਿਸ ‘ਚ 7‐0 ਨਾਲ ਸਕੂਲ ਖਿਡਾਰਣਾਂ ਨੇ ਹਾਕੀ ਦਾ ਕਮਾਲ ਵਿਖਾਇਆ।
ਖ਼ਾਲਸਾ ਕਾਲਜ ਗਵਰਨਿੰਗ ਕੌਂਸਲ ਦੇ ਆਨਰੇਰੀ ਸਕੱਤਰ ਸ: ਰਜਿੰਦਰ ਮੋਹਨ ਸਿੰਘ ਛੀਨਾ ਨੇ ਟੀਮ ਦੇ ਕੋਚ ਸ: ਬਲਦੇਵ ਸਿੰਘ ਅਤੇ ਸਾਥੀ ਕੋਚ ਅਮਰਜੀਤ ਸਿੰਘ ਨੂੰ ਮੁਬਾਰਕਬਾਦ ਦਿੰਦਿਆ ਦੱਸਿਆ ਕਿ ਇਨ੍ਹਾਂ ਖੇਡਾਂ ਦੌਰਾਨ ਬਰਨਾਲਾ, ਜਲੰਧਰ, ਲੁਧਿਆਣਾ, ਮੁਕਤਸਰ ਸਾਹਿਬ, ਘੁੱਦਾ, ਕਪੂਰਥਲਾ, ਫ਼ਾਜਿਲਕਾ, ਸੰਗਰੂਰ, ਫ਼ਿਰੋਜਪੁਰ, ਗੁਰਦਾਸਪੁਰ, ਪਟਿਆਲਾ, ਮੋਗਾ, ਤਰਨ ਤਾਰਨ, ਫ਼ਤਿਹਗੜ੍ਹ ਆਦਿ ਜ਼ਿਲ੍ਹੇ ਦੀਆਂ ਵਿਦਿਆਰਥਣਾਂ ਨੇ ਹਾਕੀ ਦੀ ਚੈਂਪੀਅਨਸ਼ਿਪ ‘ਚ ਹਿੱਸਾ ਲਿਆ।
ਡਾਇਰੈਕਟਰ (ਸਪੋਰਟਸ) ਡਾ. ਕੰਵਲਜੀਤ ਸਿੰਘ, ਜਿਨ੍ਹਾਂ ਦੀ ਅਗਵਾਈ ‘ਚ ਖ਼ਾਲਸਾ ਸਕੂਲ ਹਾਕੀ ਟੀਮ ਚਲ ਰਹੀ ਹੈ, ਨੇ ਜਾਣਕਾਰੀ ਦਿੰਦਿਆ ਦੱਸਿਆ ਕਿ ਸਕੂਲ ਟੀਮ ਅਤੇ ਸਪੋਰਟਸ ਵਿੰਗ ਘੁੱਦਾ ਦਰਮਿਆਨ ਹੋਏ ਮੈਚ ‘ਚ 5‐1 ਦਾ ਫ਼ਰਕ ਰਿਹਾ, ਜਿਸ ‘ਚ ਅਮਨ ਨੇ 1, ਸਿਮਰਨ ਨੇ 1, ਮੀਨਾਕਸ਼ੀ ਨੇ 2 ਅਤੇ ਬਲਜਿੰਦਰ ਨੇ 1 ਗੋਲ ਕੀਤਾ। ਸਪੋਰਟਸ ਸਕੂਲ ਬਾਦਲ ਨਾਲ ਹੋਏ ਸੈਮੀਫ਼ਾਈਲ ਮੈਚ ‘ਚ 7‐0 ਦਾ ਅੰਤਰ ਦਰਜ ਕੀਤਾ ਗਿਆ, ਜਿਸ ‘ਚ ਟੀਮ ਦੀ ਅਮਨ ਨੇ 1, ਸਿਮਰਨ ਨੇ 1, ਰੁਪਿੰਦਰ ਨੇ 2, ਬਲਜਿੰਦਰ ਨੇ 1, ਮੀਨਾਕਸ਼ੀ ਨੇ 1 ਅਤੇ ਸਨੇਹਾ ਨੇ 2 ਨਾਲ ਮੈਚ ‘ਚ ਜਿੱਤ ਹਾਸਲ ਕੀਤੀ। ਉਨ੍ਹਾਂ ਕਿਹਾ ਫਾਈਨਲ ਮੈਚ ਜੋ ਕਿ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਤਰਨ ਤਾਰਨ ਵਿਚਾਲੇ ਹੋਇਆ, ‘ਚ 4‐0 ਨਾਲ ਸਿਮਰਨ ਨੇ 2, ਰੁਪਿੰਦਰ ਨੇ 1, ਅਮਨ ਨੇ 1 ਨਾਲ ਟੀਮ ਨੂੰ ਜਿੱਤ ਦਿਵਾਉਂਦਿਆਂ ਟਰਾਫ਼ੀ ਆਪਣੇ ਕਬਜ਼ੇ ‘ਚ ਕੀਤੀ।
ਸਕੂਲ ਪ੍ਰਿੰਸੀਪਲ ਸ੍ਰੀਮਤੀ ਤੇਜਿੰਦਰ ਕੌਰ ਬਿੰਦਰਾ ਨੇ ਜੇਤੂ ਵਿਦਿਆਰਥਣਾਂ ਨੂੰ ਵਧਾਈ ਦਿੰਦਿਆ ਕਿਹਾ ਕਿ ਉਨ੍ਹਾਂ ਨੂੰ ਆਸ ਹੈ ਕਿ ਉਪਰੋਕਤ ਖਿਡਾਰਨਾਂ ਸਹੀ ਸਿਖਲਾਈ ਪ੍ਰਾਪਤ ਕਰਕੇ ਦੇਸ਼ ਦੇ ਨਾਮ ਆਉਣ ਵਾਲੇ ਮੁਕਾਬਲੇ ‘ਚ ਚਮਕਾਉਣਗੀਆਂ।
ਕੈਪਸ਼ਨ: ਖ਼ਾਲਸਾ ਕਾਲਜ ਗਰਲਜ਼ ਸੀਨੀਅਰ ਸੈਕੰਡਰੀ ਸਕੂਲ (ਲੜਕੀਆਂ) ਦੀ ਬਠਿੰਡਾ ਵਿਖੇ ਹੋਏ ਮੁਕਾਬਲੇ ਦੌਰਾਨ ਹਾਕੀ ਦੀ ਜੇਤੂ ਟੀਮ ਕੋਚ ਅਮਰਜੀਤ ਨਾਲ।
