ਮਾਨਸਾ:- 4 ਨਵੰਬਰ:(ਵਿਸ਼ਵ ਵਾਰਤਾ)ਪ੍ਰਾਈਵੇਟ ਫਾਇਨਾਸ਼ ਕੰਪਨੀਆਂ ਦੇ ਕਰਜ਼ਿਆਂ ‘ਚ ਫਸੀਆਂ ਗਰੀਬ ਔਰਤਾਂ ਸਿਰ ਚੜੇ ਕਰਜ਼ਾ ਮੁਆਫ਼ੀ,ਚੋਣ ਵਾਅਦੇ ਮੁਤਾਬਕ ਪੰਜਾਬ ‘ਚ ਬਿਜਲੀ ਰੇਟ ਅੱਧੇ ਕਰਨ ਦੇ ਸਵਾਲਾਂ ਤੇ ਧਾਰੀ ਚੁੱਪ ਖਿਲਾਫ਼ ਅਤੇ ਹਜ਼ਾਰਾਂ ਰੁਪਏ ਦੇ ਆਏ ਬਿਜਲੀ ਬਿੱਲ ਨਾ ਭਰ ਸਕਣ ਵਾਲੇ ਗਰੀਬਾਂ ਦੇ ਪੱਟੇ ਜਾ ਰਹੇ ਬਿਜਲੀ ਮੀਟਰ,ਬੁਢਾਪਾ ਪੈਂਨਸ਼ਨ ਵਾਪਿਸ ਲੈਣ ਦੇ ਭੇਜੇ ਨੋਟਿਸਾਂ ਦੇ ਰੋਸ ਵਿੱਚ ਅੱਜ ਕਰਵਾ ਚੌਥ ਦੇ ਵਰਤਾ ਵਾਲੇ ਦਿਨ ਔਰਤ ਜਿਥੇ ਆਪਣੇ ਪਤੀਆਂ ਦੀ ਲੰਮੀ ਉਮਰ ਲਈ ਵਰਤ ਰੱਖ ਰਹੀਆਂ ਹਨ।ਉੱਥੇ ਪੰਜਾਬ ਦੀਆਂ ਗਰੀਬ ਔਰਤਾਂ ਕੈਪਟਨ ਸਰਕਾਰ ਖਿਲਾਫ਼ ਘੜਾ ਭੰਨ ਰੋਸ ਮੁਜ਼ਾਹਰੇ ਕੀਤੇ ਗਏ।
ਅੱਜ ਇਹ ਘੜਾ ਭੰਨ ਮੁਜ਼ਾਹਰੇ ਮਜ਼ਦੂਰ ਮੁਕਤੀ ਮੋਰਚਾ ਪੰਜਾਬ ਦੇ ਸੱਦੇ ਤੇ ਜਿਲ੍ਹਾ ਮਾਨਸਾ,ਬਠਿੰਡਾ,ਸੰਗਰੂਰ,ਬਰਨਾਲਾ,ਫਿਰੋਜ਼ਪੁਰ,ਫਰੀਦਕੋਟ,ਲੁਧਿਆਣਾ,ਪਟਿਆਲਾ,ਗੁਰਦਾਸਪੁਰ,ਹੁਸ਼ਿਆਰਪੁਰ,ਅੰਮ੍ਰਿਤਸਰ ਸਮੇਤ ਪੰਜਾਬ ਦੇ ਕਈ ਜਿਲ੍ਹਿਆਂ ਅੰਦਰ ਔਰਤਾਂ ਨੇ ਘੜਾ ਭੰਨ ਮੁਜ਼ਾਹਰੇ ਕੀਤੇ।ਅੱਜ ਮਾਨਸਾ ਵਿਖੇ ਘੜ੍ਹਾ ਭੰਨ ਮੁਜ਼ਾਹਰੇ ਨੂੰ ਸੰਬੋਧਨ ਕਰਦਿਆਂ ਮਜ਼ਦੂਰ ਮੁਕਤੀ ਮੋਰਚਾ ਪੰਜਾਬ ਦੇ ਸੂਬਾ ਪ੍ਰਧਾਨ ਕਾਮਰੇਡ ਭਗਵੰਤ ਸਿੰਘ ਸਮਾਉਂ ਅਤੇ ਜਿਲ੍ਹਾ ਪ੍ਰਧਾਨ ਕਾਮਰੇਡ ਨਿੱਕਾ ਸਿੰਘ ਬਹਾਦਰਪੁਰ ਨੇ ਕਿਹਾ ਕਿ ਅੱਜ ਖੇਤੀ ਕਾਨੂੰਨਾਂ ਖਿਲਾਫ਼ ਖੜਕੇ ਕੈਪਟਨ ਸਰਕਾਰ ਭਾਵੇ ਕਿਸਾਨ ਹਮਾਇਤੀ ਹੋਣ ਦਾ ਤਾਂ ਸਬੂਤ ਦੇ ਰਹੀ ਹੈ ਪਰ ਪੰਜਾਬ ਦੇ ਦਲਿਤਾਂ,ਬੇਜ਼ਮੀਨੇ ਗਰੀਬਾਂ,ਮਜ਼ਦੂਰਾਂ ਦੇ ਔਰਤ ਕਰਜ਼ਾ ਮੁਆਫ਼ੀ,ਕੇਂਦਰ ਸਰਕਾਰ ਵੱਲੋਂ ਕਿਰਤ ਕਾਨੂੰਨਾਂ ‘ਚ ਕੀਤੀਆਂ ਸੋਧਾਂ,ਰਾਜ ਅੰਦਰ ਬਿਜਲੀ ਰੇਟ ਅੱਧੇ ਕਰਨ ਅਤੇ ਲੌਕਡਾਊਨ ਸਮੇਂ ਦੇ ਬਿਜਲੀ ਬਿੱਲ ਮੁਆਫ਼ ਕਰਨ ਦੇ ਮੁਦਿਆਂ ਤੇ ਚੁੱਪ ਧਾਰ ਕੇ ਕੈਪਟਨ ਸਰਕਾਰ ਗਰੀਬ ਮਜ਼ਦੂਰਾਂ ਨੂੰ ਨਜ਼ਰ ਅੰਦਾਜ਼ ਕਰ ਰਹੀ ਹੈ।ਉਹਨਾਂ ਕਿਹਾ ਕਿ ਬੇਸ਼ੱਕ ਮੋਦੀ ਸਰਕਾਰ ਨੇ ਕਾਲੇ ਕਾਨੂੰਨਾਂ ਨੂੰ ਕਿਸਾਨਾਂ ਦੇ ਨਾਅ ਹੇਠ ਪਾਸ ਕੀਤਾ ਹੈ ਪਰ ਇਹਨਾਂ ਦਾ ਸਭ ਤੋਂ ਬੁਰੇ ਪ੍ਰਭਾਵ ਪੰਜਾਬ ਅਤੇ ਦੇਸ਼ ਦੇ ਮਜ਼ਦੂਰਾਂ ਦੀ ਸਮਾਜਿਕ ਅਤੇ ਆਰਥਿਕ ਜ਼ਿੰਦਗੀ ਉੱਪਰ ਪੈਣਗੇ।ਜ਼ਰੂਰੀ ਵਸਤਾਂ 1955 ਦੇ ਕਾਨੂੰਨ ਵਿੱਚ 2020 ਦੀ ਸੋਧ ਪੂਰੀ ਤਰ੍ਹਾਂ ਜਮ੍ਹਾਖੋਰਾਂ,ਚੋਰ ਬਜ਼ਾਰੀਆਂ,ਬਲੈਕ ਮਾਰਕੀਟਿੰਗ ਅਤੇ ਸੱਟੇਬਾਜ਼ਾਂ ਨੂੰ ਮਨਆਈ ਲੁੱਟ ਦਾ ਲਾਇਸੰਸ ਦਿੰਦੀ ਹੈ।ਇਸ ਸੋਧ ਨਾਲ ਇਹ ਅਨਾਜ਼,ਦਾਲਾਂ,ਪਿਆਜ਼,ਆਲੂ,ਫਲਾਂ ਆਦਿ ਵਸਤਾਂ ਦੇ ਭੰਡਾਰ ਕਰਨ ਲਈ ਆਜ਼ਾਦ ਹੋਣਗੇ।ਜਿਸ ਦੇ ਤਹਿਤ ਅੱਜ ਪਿਆਜ਼ ਤੇ ਆਲੂ ਦੇ ਰੇਟਾਂ ਰਾਹੀ ਗਰੀਬਾਂ ਨੂੰ ਲੁੱਟਿਆ ਜਾ ਰਿਹਾ ਹੈ।ਉਹਨਾਂ ਕਿਹਾ ਕਿ 5 ਨਵੰਬਰ ਨੂੰ ਕਿਸਾਨਾਂ ਵੱਲੋਂ 4 ਘੰਟੇ ਕੀਤੇ ਜਾ ਰਹੇ ਚੱਕਾ ਜਾਮ ਦੀ ਪੂਰਨ ਹਮਾਇਤ ਕੀਤੀ ਜਾਵੇਗੀ ਅਤੇ 10 ਨਵੰਬਰ ਨੂੰ ਮਜ਼ਦੂਰ ਮੁਕਤੀ ਮੋਰਚਾ ਪੰਜਾਬ ਦੀ ਅਗਵਾਈ ਹੇਠ ਮਜ਼ਦੂਰ ਕਿਸਾਨ ਧਰਨਿਆਂ ‘ਚ ਸ਼ਾਮਿਲ ਹੋਣਗੇ।ਉਹਨਾਂ ਕਿਹਾ ਕਿ ਅੱਜ ਮੋਦੀ ਦੇ ਰਾਜ ਅੰਦਰ ਜ਼ਮੀਨਾਂ ਅਤੇ ਧੀਆਂ ਨੂੰ ਬਚਾਉਣ ਲਈ ਇਕੱਠੇ ਹੋਣਾ ਜ਼ਰੂਰੀ ਹੈ।ਇਸ ਸਮੇਂ ਜਿਲ੍ਹਾ ਸਕੱਤਰ ਕਾਮਰੇਡ ਗੁਰਸੇਵਕ ਸਿੰਘ ਮਾਨ,ਕ੍ਰਿਸ਼ਣਾ ਕੌਰ,ਗੁਲਾਬ ਖੀਵਾ,ਮਹਿੰਦਰ ਕੌਰ ਖੋਖਰ,ਲਿਬਰੇਸ਼ਨ ਦੇ ਸ਼ਹਿਰੀ ਸਕੱਤਰ ਕਾਮਰੇਡ ਵਿੰਦਰ ਅਲਖ਼,ਗੁਲਾਬ ਖੀਵਾ,ਮੇਲਾ ਸਿੰਘ ਹੀਰੋ ਜਸਵਿੰਦਰ ਮੌਜੀਆਂ,ਬੂਟਾ ਦੂਲੋਵਾਲ ਨੇ ਵੀ ਸੰਬੋਧਨ ਕੀਤਾ






















