ਕੋਲਕਾਤਾ ਟੈਸਟ : ਭਾਰਤ ਦੀਆਂ 172 ਦੌੜਾਂ ਦੇ ਜਵਾਬ ‘ਚ ਸ੍ਰੀਲੰਕਾ ਨੇ ਕੀਤੀ ਮਜ਼ਬੂਤ ਸ਼ੁਰੂਆਤ

ਕੋਲਕਾਤਾ, 18 ਨਵੰਬਰ – ਕੋਲਕਾਤਾ ਟੈਸਟ ਵਿਚ ਅੱਜ ਭਾਰਤ ਨੇ ਪਹਿਲਾਂ 172 ਦੌੜਾਂ ਬਣਾਈਆਂ, ਜਿਸ ਦੇ ਜਵਾਬ ਵਿਚ ਸ੍ਰੀਲੰਕਾਈ ਟੀਮ ਨੇ ਤੀਸਰੇ ਦਿਨ ਦੀ ਖੇਡ ਖਤਮ ਹੋਣ ਤੱਕ 4 ਵਿਕਟਾਂ ਦੇ ਨੁਕਸਾਨ ਉਤੇ 165 ਦੌੜਾਂ ਬਣਾ ਲਈਆਂ ਸਨ ਅਤੇ ਉਹ ਭਾਰਤ ਤੋਂ ਫਿਲਹਾਲ 7 ਦੌੜਾਂ ਪਿੱਛੇ ਹੈ|
ਸ੍ਰੀਲੰਕਾ ਦੀ ਸਲਾਮੀ ਜੋੜੀ ਕੁਝ ਖਾਸ ਨਾ ਕਰ ਸਕੀ ਅਤੇ ਸਦੀਰਾ 23 ਤੇ ਕੁਲਰਤਨੇ 8 ਦੌੜਾਂ ਬਣਾ ਕੇ ਚਲਦੇ ਬਣੇ| ਇਸ ਤੋਂ ਇਲਾਵਾ ਥਿਰਮਾਨੇ ਨੇ 51 ਅਤੇ ਮੈਥੀਊਜ ਨੇ 52 ਦੌੜਾਂ ਦੀ ਪਾਰੀ ਖੇਡ ਕੇ ਆਪਣੀ ਟੀਮ ਨੂੰ ਸੰਕਟ ਵਿਚੋਂ ਬਾਹਰ ਕੱਢਿਆ| ਦਿਨ ਦੀ ਖੇਡ ਖਤਮ ਹੋਣ ਤੱਕ ਚਾਂਦੀਮਲ 13 ਅਤੇ ਡਿਕਵੇਲਾ 14 ਦੌੜਾਂ ਬਣਾ ਕੇ ਕ੍ਰੀਜ ਤੇ ਸਨ| ਭਾਰਤ ਵੱਲੋਂ ਭੁਵਨੇਸਵਰ ਕੁਮਾਰ ਤੇ ਉਮੇਸ ਯਾਦਵ ਨੇ 2-2 ਵਿਕਟਾਂ ਹਾਸਿਲ ਕੀਤੀਆਂ|
ਇਸ ਤੋਂ ਪਹਿਲਾਂ ਭਾਰਤ ਦੀ ਸਮੁੱਚੀ ਪਾਰੀ 172 ਦੌੜਾਂ ਉਤੇ ਹੀ ਸਿਮਟ ਗਈ| ਪੁਜਾਰਾ 52 ਦੌੜਾਂ ਬਣਾ ਕੇ ਆਊਟ ਹੋਇਆ, ਜਦੋਂ ਕਿ ਸਾਹਾ ਨੇ 29, ਜਡੇਜਾ ਨੇ 22, ਬੀ. ਕੁਮਾਰ ਨੇ 13, ਮੁਹੰਮਦ ਸ਼ਮੀ ਨੇ 24 ਦੌੜਾਂ ਬਣਾਈਆਂ|