
ਚੰਡੀਗੜ / ਜਲੰਧਰ : 18 ਅਪ੍ਰੈਲ
“ ਦੇਸ਼ ਪੰਜਾਬ ਵਿਚਾਰ ਮੰਚ” ਨੇ ਪੰਜਾਬ ਦੇ ਮੁੱਖ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਪੰਜਾਬ ਸਰਕਾਰ ਵੱਲੋਂ ਕੇਂਦਰ ਸਰਕਾਰ ਕੋਲੋਂ ਕਿਸਾਨਾਂ ਦੀ ਕਣਕ ਖਰੀਦਣ ਦੇ ਸੁਚਾਰੂ ਪਰਬੰਧ ਲਈ ਬੋਨਸ , ਗ਼ਰੀਬਾਂ ਦੀਆਂ ਭਲਾਈ ਸਕੀਮਾਂ ਤੋ ਹੋਰ ਸਹੂਲਤਾਂ ਲਈ ਵਾਰ ਵਾਰ ਪੈਕੇਜ ਮੰਗਣ ਸਬੰਧੀ ਮੋਦੀ ਸਰਕਾਰ ਵੱਲੋਂ ਧਾਰਨ ਕੀਤੇ ਨਾਂਹ ਪੱਖੀ ਵਤੀਰੇ ਦੀ ਵਜਾਹਤ ਕਰਕੇ ਮਨਪ੍ਰੀਤ ਬਾਦਲ ਨੂੰ ਨੈਤਿਕ ਤੌਰ ‘ਤੇ ਖ਼ਜ਼ਾਨਾ ਮੰਤਰੀ ਬਣੇ ਰਹਿਣ ਦਾ ਕੋਈ ਹੱਕ ਨਹੀ ਹੈ। ਮੰਚ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਜ਼ੋਰਦਾਰ ਅਪੀਲ ਕੀਤੀ ਹੈ ਕਿ ਜੇ ਉਹ ਸੱਚੀ ਮੁੱਚੀ ਆਪਣੇ ਸਟੈਂਡ ਤੇ ਪੰਜਾਬ ਦੇ ਲੋਕ ਹਿਤਾਂ ਪ੍ਰਤੀ ਸ਼ੁਹਿਰਦ ਹਨ ਤਾਂ ਉਹਨਾ ਨੂੰ ਤੁਰੰਤ ਆਪਣੇ ਖ਼ਜ਼ਾਨਾ ਮੰਤਰੀ ਨੂੰ ਅਹੁਦੇ ਤੋਂ ਬਰਖਾਸਤ ਕਰਨਾ ਚਾਹੀਦਾ ਹੈ ਕਿਉਂਕਿ ਉਸਨੂੰ ਪੰਜਾਬ ਦੇ ਲੋਕਾਂ ਨਾਲ਼ੋਂ ਕੇਂਦਰ ਦੇ ਹਿੱਤ ਜ਼ਿਆਦਾ ਪਿਆਰੇ ਹਨ।
ਅੱਜ ਇੱਥੇ ਜਾਰੀ ਕੀਤੇ ਬਿਆਨ ਵਿੱਚ ਮੰਚ ਦੇ ਕਨਵੀਨਰ ਮਾਲਵਿੰਦਰ ਸਿੰਘ ਮਾਲੀ ਨੇ ਕਿਹਾ ਹੈ ਕਿ ਮੁਲਕ ਦੇ ਮੌਜੂਦਾ ਆਰਥਕ ਸਿਆਸੀ ਪਰਬੰਧ ਅੰਦਰ ਕੇਂਦਰ ਸਰਕਾਰ ਨੇ ਜੀ.ਐਸ.ਟੀ. ਨਿਜ਼ਾਮ ਲਾਗੂ ਕਰਕੇ ਟੈਕਸਾਂ ਦੇ ਲੱਗਭੱਗ ਸਾਰੇ ਸਰੋਤਾਂ ਨੂੰ ਆਪਣੇ ਕੰਟਰੋਲ ਵਿੱਚ ਲਿਆ ਹੋਇਆ ਹੈ। ਰਾਜਾਂ ਦੀ ਹਾਲਤ ਮਿਊਂਸਪਲ ਕਮੇਟੀਆਂ ਵਰਗੀ ਬਣੀ ਹੋਈ ਹੈ। ਇਸ ਸੰਬੰਧੀ ਪੰਜਾਬ ਦੇ ਮੁੱਖ ਮੰਤਰੀ ਕਿਸਾਨਾ ਦੇ ਕਰਜ਼ੇ ਮੁਆਫ ਕਰਨ, ਵਾਤਾਵਰਨ ਸੁੱਧਤਾ ਲਈ ਸਸਤੀ ਮਸ਼ੀਨਰੀ ਮੁਹੱਈਆ ਕਰਾਉਣ ਤੋਂ ਲੈਕੇ ਹੋਰ ਭਲਾਈ ਸਕੀਮਾਂ ਲਾਗੂ ਕਰਨ ਲਈ ਵਾਰ ਵਾਰ ਮੁਲਕ ਦੇ ਖ਼ਜ਼ਾਨੇ ‘ਤੇ ਸੱਪ ਕੁੰਡਲ਼ੀ ਮਾਰੀ ਬੈਠੀ ਮੋਦੀ ਸਰਕਾਰ ਤੋਂ ਸਹਾਇਤਾ ਦੀ ਹੱਕੀ ਮੰਗ ਕਰਦੇ ਆ ਰਹੇ ਹਨ। ਪਰ ਪੰਜਾਬ ਦੇ ਖ਼ਜ਼ਾਨਾ ਮੰਤਰੀ ਨੇ ਪਹਿਲਾਂ ਵੀ ਕਦੇ ਖੁੱਲਕੇ ਪੰਜਾਬ ਸਰਕਾਰ ਦੀ ਇਸ ਨੀਤੀ ਦੀ ਪੈਰਵਾਈ ਨਹੀ ਕੀਤੀ ਸਗੋਂ ਹੁਣ ਕੈਰੋਨਾ ਸੰਕਟ ਦੀ ਆੜ ਵਿੱਚ ਪੰਜਾਬ ਸਰਕਾਰ ਦੀ ਇਸ ਪਹੁੰਚ ਦੇ ਵਿਰੋਧ ਵਿੱਚ ਖੜੋਕੇ ਆਪਣੀ ਪੰਜਾਬ ਵਿਰੋਧੀ ਸੋਚ ਦਾ ਸ਼ਰੇਆਮ ਮੁਜ਼ਾਹਰਾ ਕਰ ਦਿੱਤਾ ਹੈ।
ਬਿਆਨ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਹੁਣ ਜਦੋਂ ਪੰਜਾਬ ਕੈਰੋਨਾ ਮਹਾਂਮਾਰੀ ਦੇ ਸੰਕਟ ਕਾਰਨ ਪਹਿਲਾਂ ਨਾਲ਼ੋਂ ਵੀ ਵਧੇਰੇ ਆਰਥਕ ਸੰਕਟ ਵਿੱਚ ਫਸਿਆ ਹੋਇਆ ਹੈ ਜੋ ਹੋਰ ਵੀ ਗੰਭੀਰ ਹੋਵੇਗਾ ਤਾਂ ਮਨਪ੍ਰੀਤ ਬਾਦਲ ਨੇ “ ਚੋਰ ਨਾਲ਼ੋਂ ਪੰਡ ਕਾਹਲੀ” ਵਾਲੀ ਨੀਤੀ ਤਹਿਤ ਕੇਂਦਰ ਸਰਕਾਰ ਕੋਲੋਂ ਕੋਈ ਵੀ ਆਰਥਕ ਸਹਾਇਤਾ ਮੰਗਣ ਤੋਂ ਨਾ ਸਿਰਫ ਨਾਂਹ ਕਰ ਦਿੱਤੀ ਹੈ ਸਗੋਂ ਅਜਿਹਾ ਸੋਚਣ ਨੂੰ ਵੀ “ ਹਿੰਦੋਸਤਾਨ” ਨਾਲ ਗ਼ਦਾਰੀ ਕਰਨ ਦੇ ਤੁੱਲ ਕਰਾਰ ਦੇ ਦਿੱਤਾ ਹੈ। ਪੰਜਾਬ ਸਰਕਾਰ ਦੇ ਹਿੱਸੇ ਦਾ ਕੇਂਦਰ ਕੋਲੋਂ ਬਕਾਇਆ ਮੰਗਣ ਲਈ ਮੁੱਖ ਮੰਤਰੀ ਵੱਲੋਂ ਵਾਰ ਵਾਰ ਜ਼ੋਰ ਦੇਣ ਨੂੰ ਵੀ ਫ਼ਜ਼ੂਲ ਸਾਬਿਤ ਕਰਨ ਲਈ ਮਨਪ੍ਰੀਤ ਬਾਦਲ ਕਹਿ ਰਿਹਾ ਹੈ ਕਿ “ ਜੰਗ ਵੇਲੇ” ਅਜਿਹੇ ਮੇਹਣੇ ਸੋਭਦੇ ਨਹੀ ਤੇ ਸਾਨੂੰ “ ਵਿਚਾਰੀ “ ਦਿੱਲੀ ਤੋਂ ਭਵਿੱਖ ਵਿੱਚ ਵੀ ਕਿਸੇ ਪੈਕੇਜ ਦੀ ਕੋਈ ਆਸ ਹੀ ਨਹੀ ਹੈ।ਪੰਜਾਬ ਦੇ ਕਾਨੂੰਨੀ ਹੱਕ ਜੀ ਐਸ ਟੀ ਦਾ ਬਕਾਇਆ ਲੈਣ ਨੂੰ ਵੀ ਉਹ ਸਰਸਰੀ ਲਹਿਜੇ ਵਿੱਚ ਇੰਝ ਕਹਿ ਰਿਹਾ ਹੈ ਕਿ “ ਜੇ” ਉਹ ਸਾਡਾ ਬਕਾਇਆ ਦੇ ਦੇਣ ਤਾਂ ਪੰਜਾਬ ਆਪਣੇ ਸਾਰੇ ਮਸਲੇ ਅਰਾਮ ਨਾਲ ਆਪ ਹੀ ਹੱਲ ਕਰ ਲਵੇਗਾ, ਨਹੀ ਤਾਂ ਕੋਈ ਰੋਸਾ ਵੀ ਨਹੀ ਹੈ।
ਚੇਤੇ ਰਹੇ ਕਿ ਮੁਲਕ ਦੇ ਟੈਕਸ ਪਰਬੰਧ ਅੰਦਰਲੇ ਰਾਜਾਂ ਦੇ ਹੱਕ ਨੂੰ ਕੇਂਦਰ ਸਰਕਾਰ ਵੱਲੋਂ ਆਪਣੇ ਮੁਕੰਮਲ ਕੰਟਰੋਲ ਹੇਠ ਲੈਣ ਲਈ “ਵਸਤਾਂ ਦੀ ਸਰਵਿਸ ‘ਤੇ ਟੈਕਸ” ਜੀ.ਐਸ.ਟੀ. ਪ੍ਰਣਾਲੀ ਦੀ ਸਭ ਤੋਂ ਭੌਂਕੜ ਵਕਾਲਤ ਮਨਪ੍ਰੀਤ ਬਾਦਲ ਨੇ ਹੀ ਕੀਤੀ ਸੀ ਜਦੋਂ ਕਿ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਸੀ ਕਿ ਇਹ ਰਾਜਾਂ ਨੂੰ ਮੰਗਤੇ ਬਣਾਕੇ ਰੱਖ ਦੇਵੇਗੀ।
ਪੰਜਾਬ ਦੇ ਲੋਕਾਂ ਨੂੰ ਮਨਪ੍ਰੀਤ ਬਾਦਲ ਦੀ ਹਮੇਸਾਂ ਤੋਂ ਹੀ “ ਜਜ਼ਬਾਤੀ ਲਫਾਜੀ” ਆਸਰੇ ਲੋਕਾਂ ਸਿਰ ਭਾਰ ਮੜਨ ਦੀ ਸੋਚ ਨੂੰ ਯਾਦ ਕਰਵਾਉਂਦਿਆਂ ਬਿਆਨ ਵਿੱਚ ਕਿਹਾ ਹੈ ਕਿ ਬਾਦਲ ਸਰਕਾਰ ਵੇਲੇ ਤੋਂ ਲੈਕੇ ਇਹ ਸਖਸ ਹਮੇਸਾਂ ਹੀ ਹਰ ਆਰਥਕ ਸੰਕਟ ਮੌਕੇ ਲੋਕਾਂ ਨੂੰ ਦਿੱਤੀਆਂ ਜਾ ਰਹੀਆਂ ਰਿਆਇਤਾਂ ਤੇ ਸਹੂਲਤਾਂ ਦਾ ਵਿਰੋਧ ਕਰਦਾ ਆ ਰਿਹਾ ਹੈ ਤੇ ਉਹਨਾ ਨੂੰ ਇਕ ਡੰਗ ਦੀ ਰੋਟੀ ਖਾਣ ਦਾ ਮਸ਼ਵਰਾ ਦਿੰਦਾ ਆ ਰਿਹਾ ਹੈ ਪਰ ਦੂਜੇ ਪਾਸੇ ਇਸਨੇ ਸਰਕਾਰੀ ਖ਼ਜ਼ਾਨੇ ਵਿੱਚ ਟੈਕਸ ਇਕੱਠੇ ਹੋਣ ਵਾਲੇ ਖਾਲ ਵਿਚਲੀਆਂ ਘਰਲਾਂ ਤੇ ਚੋਰ ਮੋਰੀਆਂ ਨੂੰ ਬੰਦ ਕਰਨ ਲਈ ਕਦੇ ਵੀ ਡੱਕਾ ਦੂਹਰਾ ਨਹੀ ਕੀਤਾ। ਸਰਕਾਰੀ ਮੁਲਾਜ਼ਮਾਂ ਦੀ ਭਰਤੀ ਰੋਕਣ, ਪੋਸਟਾਂ ਖਾਲ਼ੀਂ ਰੱਖਣ, ਡੀ.ਏ ਦੱਬਣ, ਤਨਖਾਹਾਂ ਜਾਮ ਕਰਨ, ਕੱਚੇ, ਦਿਹਾੜੀਦਾਰ ਤੇ ਠੇਕੇ ‘ਤੇ ਕੰਮ ਕਰਦੇ ਕਰਮਚਾਰੀਆਂ ਦੀਆਂ ਹੱਕੀ ਮੰਗਾਂ ਉੱਪਰ ਇਸਨੇ ਕਦੇ ਕੰਨ ਹੀ ਨਹੀ ਧਰਿਆ।
ਮਾਲਵਿੰਦਰ ਸਿੰਘ ਮਾਲੀ , ਗੁਰਬਚਨ ਸਿੰਘ ਜਲੰਧਰ ਤੇ ਹਰਤੇਜ ਸਿੰਘ ਮਹਿਤਾ ਦੇ ਦਸਤਖ਼ਤਾਂ ਹੇਠ ਜਾਰੀ ਬਿਆਨ ਵਿੱਚ ਪੰਜਾਬ ਦੀਆਂ ਸਾਰੀਆਂ ਸਿਆਸੀ ਪਾਰਟੀਆਂ , ਮੁਲਾਜ਼ਮ ਯੂਨੀਅਨਾਂ ,ਮਜ਼ਦੂਰ ਕਿਸਾਨ ਤੇ ਹੋਰ ਜਨਤਕ ਜਥੇਬੰਦੀਆਂ ਨੂੰ ਵੀ ਇਸ ਮੁੱਦੇ ਸੰਬੰਧੀ ਅਵਾਜ਼ ਬੁਲੰਦ ਕਰਨ ਦੀ ਅਪੀਲ ਕੀਤੀ ਹੈ।
ਅਖੀਰ ਵਿੱਚ ਲੋਕਾਂ ਨੂੰ ਚਿਤਾਵਨੀ ਦਿੰਦਿਆਂ ਕਿਹਾ ਗਿਆ ਹੈ ਕਿ ਦਿੱਲੀ ਦਰਬਾਰ ਦੇ ਪੈਰੋਕਾਰ ਪੰਜਾਬ ਦੇ ਖ਼ਜ਼ਾਨਾ ਮੰਤਰੀ ਦੀ ਬਰਖਾਸਤਗੀ ਦੀ ਮੰਗ ਕਰੋ ਨਹੀ ਤਾਂ ਇਸਨੇ ਮੁਲਾਜ਼ਮਾਂ ਦੀ ਤਨਖ਼ਾਹ ਵਿੱਚ ਕਟੌਤੀ ਸਮੇਤ ਲੋਕਾਂ ਦਾ ਖ਼ੂਨ ਨਿਚੋੜਨ ਵਾਲੇ ਫ਼ੈਸਲੇ ਸਾਡੇ ਸਿਰ ਮੜਨ ਲਈ ਲੱਕ ਬੰਨ ਹੈ ਤੇ ਇਹ ਬਿਆਨਬਾਜੀ ਉਸੇ ਦੀ ਭੂਮਿਕਾ ਹੈ।
ਦਿਲਜੀਤ ਦੋਸਾਂਝ ਨੇ ਇੰਦੋਰ ਸ਼ੋਅ ਦੌਰਾਨ ਵਿਰੋਧੀਆਂ ਨੂੰ ਦਿੱਤਾ ਕਰਾਰਾ ਜਵਾਬ
ਚੰਡੀਗੜ੍ਹ, 16 ਨਵੰਬਰ (ਵਿਸ਼ਵ ਵਾਰਤਾ) ਮਸ਼ਹੂਰ ਪੰਜਾਬੀ ਗਾਇਕ ਦਿਲਜੀਤ ਦੋਸਾਂਝ ਇਸ ਸਮੇਂ ਆਪਣੇ "AURA ਇੰਡੀਆ ਟੂਰ 2026" ਨਾਲ ਪ੍ਰਸ਼ਸੰਕਾਂ ਦਾ...





















