ਮਹਿਲਾ ਹਾਕੀ ਵਿਸ਼ਵ ਕੱਪ 2026: ਭਾਰਤ – ਚੀਨ ਵਿਚਾਲੇ ਰੋਮਾਂਚਕ ਮੁਕਾਬਲਾ 2-2 ਨਾਲ ਡਰਾਅ
ਨਵੀ ਦਿੱਲੀ , 16 ਅਗਸਤ (ਵਿਸ਼ਵ ਵਾਰਤਾ):ਮਹਿਲਾ ਹਾਕੀ ਵਿਸ਼ਵ ਕੱਪ 2026 ਦੇ ਪਹਿਲੇ ਮੁਕਾਬਲੇ ਵਿੱਚ ਭਾਰਤੀ ਮਹਿਲਾ ਹਾਕੀ ਟੀਮ ਦਾ ਸਾਹਮਣਾ ਚੀਨ ਦੀ ਮਹਿਲਾ ਹਾਕੀ ਟੀਮ ਨਾਲ ਹੋਇਆ। ਬੇਹੱਦ ਰੋਮਾਂਚਕ ਇਸ ਮੈਚ ਵਿੱਚ ਅਤੇ ਸ਼ੁਰੂਆਤੀ ਬੜ੍ਹਤ ਬਣਾਉਣ ਦੇ ਬਾਵਜੂਦ ਭਾਰਤੀ ਮਹਿਲਾ ਟੀਮ ਇਸ ਮੈਚ ਵਿੱਚ ਜਿੱਤ ਹਾਸਲ ਨਹੀਂ ਕਰ ਸਕੀ ਅਤੇ ਚੀਨ ਖ਼ਿਲਾਫ਼ ਇਹ ਮੈਚ 2-2 ਨਾਲ ਬਰਾਬਰੀ ‘ਤੇ ਖ਼ਤਮ ਹੋਇਆ। ਇਸ ਮੈਚ ਦੇ ਡਰਾਅ ਹੋਣ ਤੋਂ ਬਾਅਦ ਭਾਰਤ ਅਤੇ ਚੀਨ ਦੋਵਾਂ ਹੀ ਟੀਮਾਂ ਨੂੰ ਇੱਕ-ਇੱਕ ਅੰਕ ਮਿਲਿਆ।
ਇਸ ਮੈਚ ਦੀ ਸ਼ੁਰੂਆਤ ਭਾਰਤੀ ਟੀਮ ਨੇ ਸ਼ਾਨਦਾਰ ਤਰੀਕੇ ਨਾਲ ਕੀਤੀ ਅਤੇ ਪਹਿਲੇ ਕਵਾਟਰ ਦੇ 8ਵੇਂ ਮਿੰਟ ਵਿੱਚ ਹੀ ਦੀਪਿਕਾ ਨੇ ਟੀਮ ਲਈ ਪਹਿਲਾ ਗੋਲ ਦਾਗ ਦਿੱਤਾ ਅਤੇ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾ ਦਿੱਤੀ। ਹਾਲਾਂਕਿ ਪਹਿਲੇ ਕਵਾਟਰ ਦੇ ਖ਼ਤਮ ਹੋਣ ਤੋਂ ਠੀਕ ਇੱਕ ਮਿੰਟ ਪਹਿਲਾਂ ਹੀ ਚੀਨ ਦੀ ਝਾਂਗ ਯਿੰਗ ਨੇ 14ਵੇਂ ਮਿੰਟ ਵਿੱਚ ਪੈਨਲਟੀ ਕਾਰਨਰ ਜ਼ਰੀਏ ਗੋਲ ਕਰਦਿਆਂ ਸਕੋਰ ਨੂੰ 1-1 ਦੀ ਬਰਾਬਰੀ ‘ਤੇ ਲਿਆ ਦਿੱਤਾ। ਯਾਨੀ ਪਹਿਲੇ ਕਵਾਟਰ ਦੀ ਖੇਡ ਖ਼ਤਮ ਹੋਣ ਤੋਂ ਬਾਅਦ ਦੋਵੇਂ ਟੀਮਾਂ ਇੱਕ-ਇੱਕ ਦੀ ਬਰਾਬਰੀ ‘ਤੇ ਰਹੀਆਂ।
ਦੂਜੇ ਕਵਾਟਰ ਵਿੱਚ ਇੱਕ ਵਾਰ ਫਿਰ ਤੋਂ ਭਾਰਤ ਵੱਲੋਂ ਦੀਪਿਕਾ ਨੇ ਪੈਨਲਟੀ ਕਾਰਨਰ ‘ਤੇ ਸ਼ਾਨਦਾਰ ਗੋਲ ਕਰਦੇ ਹੋਏ ਭਾਰਤ ਨੂੰ ਬੜ੍ਹਤ ਦਿਵਾਈ ਅਤੇ ਫਿਰ ਦੂਜੇ ਕਵਾਟਰ ਵਿੱਚ ਚੀਨ ਵੱਲੋਂ ਕੋਈ ਗੋਲ ਨਹੀਂ ਹੋ ਸਕਿਆ। ਜਦੋਂ 30 ਮਿੰਟ ਯਾਨੀ ਪਹਿਲੇ ਹਾਫ਼ ਦੀ ਖੇਡ ਖ਼ਤਮ ਹੋਈ ਤਾਂ ਭਾਰਤ ਮੈਚ ਵਿੱਚ 2-1 ਦੀ ਬੜ੍ਹਤ ‘ਤੇ ਸੀ, ਪਰ ਤੀਜੇ ਅਤੇ ਚੌਥੇ ਕਵਾਟਰ ਵਿੱਚ ਚੀਨ ਨੇ ਆਪਣੇ ਤਗੜੇ ਬਚਾਅ (ਡਿਫ਼ੈਂਸ) ਦੇ ਦਮ ‘ਤੇ ਭਾਰਤ ਨੂੰ ਇੱਕ ਵੀ ਗੋਲ ਨਹੀਂ ਕਰਨ ਦਿੱਤਾ ਅਤੇ ਤੀਜੇ ਕਵਾਟਰ ਦੇ 39ਵੇਂ ਮਿੰਟ ਵਿੱਚ ਮਾ ਨਿੰਗ ਦੇ ਗੋਲ ਨੇ ਸਕੋਰ 2-2 ਦੀ ਬਰਾਬਰੀ ‘ਤੇ ਲਿਆ ਦਿੱਤਾ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
