ਧਰਮਿੰਦਰ ਪ੍ਰਧਾਨ ਨੂੰ ਹਟਾ ਕੇ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਬਣਾਇਆ ਜਾਵੇ- ਕੇਜਰੀਵਾਲ

ਸੋਨਮ ਵਾਂਗਚੁਕ ਸਿੱਖਿਆ ਵਿੱਚ ਕੋਈ ਕ੍ਰਾਂਤੀ ਨਾ ਲਿਆ ਦੇਣ, ਇਸੇ ਡਰ ਤੋਂ ਪ੍ਰਧਾਨ ਮੰਤਰੀ ਉਨ੍ਹਾਂ ਨੂੰ ਸਿੱਖਿਆ ਮੰਤਰੀ ਨਹੀਂ ਬਣਾਉਣਗੇ- ਕੇਜਰੀਵਾਲ

ਦੇਸ਼ ਦੀ ਸਿੱਖਿਆ ਵਿਵਸਥਾ ਪੂਰੀ ਤਰ੍ਹਾਂ ਸੜ ਚੁੱਕੀ ਹੈ, ਇੱਕ ਕ੍ਰਾਂਤੀਕਾਰੀ ਕਦਮ ਹੀ ਇਸਨੂੰ ਠੀਕ ਕਰ ਸਕਦਾ ਹੈ- ਕੇਜਰੀਵਾਲ

ਨੀਟ  ਪੇਪਰ ਲੀਕ ਤੋਂ ਬਾਅਦ 20 ਬੱਚਿਆਂ ਨੇ ਖੁਦਕੁਸ਼ੀ ਕਰ ਲਈ, ਪਰ ਸਰਕਾਰ ‘ਤੇ ਕੋਈ ਅਸਰ ਨਹੀਂ ਪਿਆ- ਕੇਜਰੀਵਾਲ

ਹਰ ਵਾਰ ਕਮੇਟੀ ਬਣਦੀ ਹੈ, ਜਾਂਚ, ਐਫਆਈਆਰ, ਗ੍ਰਿਫਤਾਰੀ ਅਤੇ ਜ਼ਮਾਨਤ ਮਿਲ ਜਾਂਦੀ ਹੈ, ਫਿਰ ਪੇਪਰ ਲੀਕ ਹੁੰਦਾ ਹੈ- ਕੇਜਰੀਵਾਲ

ਹੰਕਾਰ ਵਿੱਚ ਡੁੱਬੀ ਇਹ ਸਰਕਾਰ ਨੌਜਵਾਨਾਂ ਦੀ ਗੱਲ ਸੁਣ ਲਵੇ, ਨਹੀਂ ਤਾਂ ਤਿੰਨ ਸਾਲ ਬਾਅਦ ਇਸਨੂੰ ਵੀ ਆਪਣਾ ਹੰਕਾਰ ਲੈ ਡੁੱਬੇਗਾ- ਕੇਜਰੀਵਾਲ

20 ਜੁਲਾਈ ਨੂੰ ਜੰਤਰ-ਮੰਤਰ ‘ਤੇ ਵੱਡੀ ਗਿਣਤੀ ਵਿੱਚ ਲੋਕ ਆਉਣ ਅਤੇ ਸੰਸਦ ਤੱਕ ਪੈਦਲ ਯਾਤਰਾ ਨੂੰ ਸਫਲ ਬਣਾਉਣ- ਕੇਜਰੀਵਾਲ

ਲੋਕ ਘਰਾਂ ਤੋਂ ਨਿਕਲ ਕੇ ਜੰਤਰ-ਮੰਤਰ ਆਉਣ ਅਤੇ ਸੋਨਮ ਵਾਂਗਚੁਕ ਦੀ ਆਵਾਜ਼ ਬਣਨ ਅਤੇ ਮੋਦੀ ਜੀ ਨੂੰ ਝੁਕਣ ਲਈ ਮਜਬੂਰ ਕਰਨ- ਸੰਜੇ ਸਿੰਘ

ਆਪ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਜੰਤਰ-ਮੰਤਰ ‘ਤੇ ਸੋਨਮ ਵਾਂਗਚੁਕ ਦੇ ਅਨਸ਼ਨ ਨੂੰ ਸਮਰਥਨ ਦੇ ਕੇ ਨੌਜਵਾਨਾਂ ਨੂੰ ਸੰਬੋਧਨ ਕੀਤਾ

धर्मेंद्र प्रधान को तो इस्तीफ़ा देना चाहिए और सोनम वांगचुक को देश का शिक्षा मंत्री बनाना चाहिए। pic.twitter.com/iqhpeVEYFh

— Arvind Kejriwal (@ArvindKejriwal) July 16, 2026

ਨਵੀਂ ਦਿੱਲੀ, 17 ਜੁਲਾਈ (ਵਿਸ਼ਵ ਵਾਰਤਾ):- ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਜੰਤਰ-ਮੰਤਰ ਤੋਂ ਸਿੱਖਿਆ ਸ਼ਾਸਤਰੀ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਬਣਾਉਣ ਦੀ ਮੰਗ ਰੱਖ ਕੇ ਨੌਜਵਾਨਾਂ ਦੇ ਅੰਦਰ ਉਮੀਦ ਦੀ ਨਵੀਂ ਕਿਰਨ ਜਗਾ ਦਿੱਤੀ ਹੈ। ਵੀਰਵਾਰ ਨੂੰ ਉਨ੍ਹਾਂ ਨੇ ਸਿੱਖਿਆ ਵਿਵਸਥਾ ਵਿੱਚ ਪਾਰਦਰਸ਼ਤਾ ਲਿਆਉਣ ਅਤੇ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਦੇ ਅਸਤੀਫੇ ਦੀ ਮੰਗ ਨੂੰ ਲੈ ਕੇ ਅਨਸ਼ਨ ‘ਤੇ ਬੈਠੇ ਸੋਨਮ ਵਾਂਗਚੁਕ ਨਾਲ ਮੁਲਾਕਾਤ ਕਰਕੇ ਉਨ੍ਹਾਂ ਦੇ ਸੰਘਰਸ਼ ਦਾ ਸਮਰਥਨ ਕੀਤਾ। ਉਨ੍ਹਾਂ ਪ੍ਰਧਾਨ ਮੰਤਰੀ ਨੂੰ ਕਿਹਾ ਕਿ ਧਰਮਿੰਦਰ ਪ੍ਰਧਾਨ ਨੂੰ ਹਟਾ ਕੇ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਬਣਾਇਆ ਜਾਵੇ। ਪਰ ਪ੍ਰਧਾਨ ਮੰਤਰੀ ਅਜਿਹਾ ਕਰਨਗੇ ਨਹੀਂ, ਕਿਉਂਕਿ ਉਨ੍ਹਾਂ ਨੂੰ ਡਰ ਹੈ ਕਿ ਕਿਤੇ ਸੋਨਮ ਵਾਂਗਚੁਕ ਸਿੱਖਿਆ ਵਿੱਚ ਕੋਈ ਕ੍ਰਾਂਤੀ ਨਾ ਲਿਆ ਦੇਣ।

ਦੇਸ਼ ਦੀ ਸੜ ਚੁੱਕੀ ਸਿੱਖਿਆ ਵਿਵਸਥਾ ਨੂੰ ਇੱਕ ਕ੍ਰਾਂਤੀਕਾਰੀ ਕਦਮ ਹੀ ਠੀਕ ਕਰ ਸਕਦਾ ਹੈ। ਇਸ ਲਈ ਦੇਸ਼ ਨੂੰ ਸੋਨਮ ਵਾਂਗਚੁਕ ਵਰਗੇ ਇੱਕ ਕ੍ਰਾਂਤੀਕਾਰੀ ਸਿੱਖਿਆ ਮੰਤਰੀ ਦੇ ਨਾਲ-ਨਾਲ ਕ੍ਰਾਂਤੀਕਾਰੀ ਕਦਮਾਂ ਦੀ ਲੋੜ ਹੈ। ਇਸ ਦੌਰਾਨ ਸੰਸਦ ਮੈਂਬਰ ਸੰਜੇ ਸਿੰਘ ਸਮੇਤ ਪਾਰਟੀ ਦੇ ਕਈ ਸੀਨੀਅਰ ਆਗੂ ਮੌਜੂਦ ਸਨ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਸਾਡੇ ਦੇਸ਼ ਦੀ ਸਿੱਖਿਆ ਪ੍ਰਣਾਲੀ ਨੂੰ ਦਰੁਸਤ ਕਰਨ ਲਈ ਪੂਰੇ ਦੇਸ਼ ਦੇ ਨੌਜਵਾਨ ਜੋ ‘ਕਾਕਰੋਚ ਅੰਦੋਲਨ’ ਦੇ ਬੈਨਰ ਹੇਠ ਇਕੱਠੇ ਹੋਏ ਹਨ, ਮੈਂ ਉਨ੍ਹਾਂ ਸਭ ਲੋਕਾਂ ਨੂੰ ਸਲਾਮ ਕਰਦਾ ਹਾਂ। ਮੈਂ ਸੋਨਮ ਵਾਂਗਚੁਕ ਨੂੰ ਸਲਾਮ ਕਰਦਾ ਹਾਂ ਜੋ ਆਪਣੇ ਲਈ ਨਹੀਂ, ਸਗੋਂ ਨੌਜਵਾਨਾਂ ਅਤੇ ਸਾਡੇ ਦੇਸ਼ ਦੇ ਬੱਚਿਆਂ ਲਈ ਆਪਣੀ ਜਾਨ ਦਾਅ ‘ਤੇ ਲਗਾ ਕੇ ਪਿਛਲੇ 19 ਦਿਨਾਂ ਤੋਂ ਅਨਸ਼ਨ ‘ਤੇ ਬੈਠੇ ਹਨ।

ਅਰਵਿੰਦ ਕੇਜਰੀਵਾਲ ਨੇ ਦੱਸਿਆ ਕਿ ਸਾਡੇ ਦੇਸ਼ ਵਿੱਚ ਅਜਿਹੇ ਬਹੁਤ ਸਾਰੇ ਅਧਿਆਪਕ ਹਨ ਜਿਨ੍ਹਾਂ ਨੇ ਪੇਪਰ ਲੀਕ ਦੇ ਖਿਲਾਫ ਆਪਣੇ-ਆਪਣੇ ਸ਼ਹਿਰ ਤੋਂ ਆਵਾਜ਼ ਉਠਾਈ, ਪਰ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਉਨ੍ਹਾਂ ਅਧਿਆਪਕਾਂ ਨੂੰ ਤਰ੍ਹਾਂ-ਤਰ੍ਹਾਂ ਨਾਲ ਤਸੀਹੇ ਦਿੱਤੇ ਗਏ ਅਤੇ ਉਨ੍ਹਾਂ ਦੇ ਖਿਲਾਫ ਐਫਆਈਆਰ ਕੀਤੀ ਗਈ, ਮੈਂ ਉਨ੍ਹਾਂ ਸਭ ਲੋਕਾਂ ਨੂੰ ਵੀ ਸਲਾਮ ਕਰਦਾ ਹਾਂ। ਸੋਨਮ ਵਾਂਗਚੁਕ ਇੱਕ ਬਹੁਤ ਵੱਡੇ ਸਿੱਖਿਆ ਸ਼ਾਸਤਰੀ ਹਨ। ਉਨ੍ਹਾਂ ਨੇ ਪਹਿਲਾਂ ਵੀ ਲੱਦਾਖ ਅਤੇ ਦੇਸ਼ ਲਈ ਕਈ ਵਾਰ ਅਨਸ਼ਨ ਕੀਤੇ ਹਨ ਅਤੇ ਅੱਜ ਉਨ੍ਹਾਂ ਨੇ ਦੇਸ਼ ਲਈ ਆਪਣੀ ਜਾਨ ਦਾਅ ‘ਤੇ ਲਗਾਈ ਹੋਈ ਹੈ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਜਦੋਂ ਕੋਈ ਬੱਚਾ ਮੁਕਾਬਲੇ ਦੀ ਪ੍ਰੀਖਿਆ ਦੇਣ ਜਾਂਦਾ ਹੈ ਤਾਂ ਉਹ ਸਿਰਫ ਇੱਕ ਪ੍ਰੀਖਿਆ ਨਹੀਂ, ਸਗੋਂ ਉਸਦੇ ਲਈ ਇੱਕ ਸੁਪਨਾ ਹੁੰਦਾ ਹੈ। ਜਦੋਂ ਉਹ ਪ੍ਰੀਖਿਆ ਹਾਲ ਵਿੱਚ ਵੜਦਾ ਹੈ ਤਾਂ ਉਸਨੂੰ ਵਿਸ਼ਵਾਸ ਹੁੰਦਾ ਹੈ ਕਿ ਮੈਂ ਆਪਣੀ ਮਿਹਨਤ ਅਤੇ ਆਪਣੀ ਬੁੱਧੀ ਦੇ ਜ਼ੋਰ ‘ਤੇ ਆਪਣਾ ਭਵਿੱਖ ਬਣਾਵਾਂਗਾ। ਮੈਂ ਵੀ ਆਈਆਈਟੀ  ਦੇ ਪੇਪਰ ਦਿੱਤੇ ਸਨ ਅਤੇ ਉਸ ਵਿੱਚ ਸਫਲ ਹੋ ਕੇ ਆਈਆਈਟੀ ਗਿਆ ਸੀ, ਪਰ ਉਨ੍ਹਾਂ ਦਿਨਾਂ ਵਿੱਚ ਪੇਪਰ ਲੀਕ ਨਹੀਂ ਹੁੰਦੇ ਸਨ। ਜੇਕਰ ਉਨ੍ਹਾਂ ਦਿਨਾਂ ਵਿੱਚ ਪੇਪਰ ਲੀਕ ਹੋ ਰਹੇ ਹੁੰਦੇ ਤਾਂ ਸ਼ਾਇਦ ਮੇਰਾ ਆਈਆਈਟੀ ਦੇਣ ਦਾ ਵਿਸ਼ਵਾਸ ਹੀ ਨਹੀਂ ਬਣਦਾ। ਮੇਰੇ ਦੋਵੇਂ ਬੱਚੇ ਵੀ ਆਈਆਈਟੀ ਤੋਂ ਹਨ ਅਤੇ ਉਨ੍ਹਾਂ ਦੇ ਸਮੇਂ ‘ਤੇ ਵੀ ਪੇਪਰ ਲੀਕ ਨਹੀਂ ਹੁੰਦੇ ਸਨ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ਤੋਂ ਜਿਸ ਤਰ੍ਹਾਂ ਨਾਲ ਦੇਸ਼ ਵਿੱਚ ਪੇਪਰ ਲੀਕ ਹੋਣ ਲੱਗੇ ਹਨ, ਉਸ ਨਾਲ ਬੱਚੇ ਦਾ ਉਹ ਆਤਮ-ਵਿਸ਼ਵਾਸ ਡਗਮਗਾਉਣ ਲੱਗਾ ਹੈ ਕਿ ਜੇਕਰ ਉਹ ਮਿਹਨਤ ਕਰੇਗਾ ਅਤੇ ਇੰਟੈਲੀਜੈਂਟ ਹੈ ਤਾਂ ਅਮੀਰਾਂ ਦੇ ਬੱਚਿਆਂ ਨੂੰ ਵੀ ਪਿੱਛੇ ਛੱਡ ਦੇਵੇਗਾ। ਅੱਜ ਬੱਚਿਆਂ ਦਾ ਇਹ ਡਗਮਗਾਉਂਦਾ ਆਤਮ-ਵਿਸ਼ਵਾਸ ਸਹੀ ਨਹੀਂ ਹੈ ਅਤੇ ਦੇਸ਼ ਲਈ ਬਹੁਤ ਖਤਰਨਾਕ ਗੱਲ ਹੈ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਹੁਣ ਹਰ ਸਾਲ ਪੇਪਰ ਲੀਕ ਹੋ ਰਹੇ ਹਨ। ਸਾਲ 2024 ਵਿੱਚ ਜੋ ਪੇਪਰ ਲੀਕ ਹੋਇਆ ਸੀ, ਸਰਕਾਰ ਨੇ ਉਸਦੇ ਮਾਸਟਰਮਾਈਂਡ ਨੂੰ ਜ਼ਮਾਨਤ ਦਿਵਾ ਦਿੱਤੀ। ਹੁਣ ਇਹ ਇੱਕ ਸਿਸਟਮ ਬਣ ਗਿਆ ਹੈ ਕਿ ਹਰ ਸਾਲ ਪੇਪਰ ਲੀਕ ਹੁੰਦੇ ਹਨ, ਕਮੇਟੀਆਂ ਬੈਠਦੀਆਂ ਹਨ, ਜਾਂਚ ਹੁੰਦੀ ਹੈ, ਐਫਆਈਆਰ ਹੁੰਦੀ ਹੈ, ਗ੍ਰਿਫਤਾਰੀ ਹੁੰਦੀ ਹੈ, ਜ਼ਮਾਨਤ ਮਿਲ ਜਾਂਦੀ ਹੈ ਅਤੇ ਅਗਲੇ ਸਾਲ ਦੇ ਪੇਪਰ ਲੀਕ ਹੋਣ ਦੀ ਫਿਰ ਤਿਆਰੀ ਸ਼ੁਰੂ ਹੋ ਜਾਂਦੀ ਹੈ। ਦੇਸ਼ ਦਾ ਨੌਜਵਾਨ ਅਤੇ ਇਹ ਬੱਚੇ ਇਸਨੂੰ ਕਦੋਂ ਤੱਕ ਬਰਦਾਸ਼ਤ ਕਰਨਗੇ?

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਨੀਟ ਪੇਪਰ ਲੀਕ ਤੋਂ ਬਾਅਦ 20 ਤੋਂ ਵੱਧ ਬੱਚਿਆਂ ਨੇ ਸੁਸਾਈਡ ਕਰ ਲਿਆ, ਪਰ ਸਰਕਾਰ ਨੂੰ ਕੋਈ ਅਕਲ ਨਹੀਂ ਆਈ। ਇਨ੍ਹਾਂ ਦੇ ਕੰਨਾਂ ‘ਤੇ ਜੂੰ ਤੱਕ ਨਹੀਂ ਸਰਕਦੀ, ਭਾਵੇਂ ਜਿੰਨੇ ਮਰਜ਼ੀ ਬੱਚੇ ਸੁਸਾਈਡ ਕਰ ਲੈਣ। ਜੋ ਬੱਚੇ ਸੁਸਾਈਡ ਕਰ ਰਹੇ ਹਨ ਉਹ ਸਾਡੇ ਘਰਾਂ ਦੇ ਬੱਚੇ ਸਨ, ਪਰ ਸਰਕਾਰ ਨੇ ਕੁਝ ਨਹੀਂ ਕੀਤਾ। ਸੀਬੀਐਸਈ ਵਿੱਚ ਪੂਰਾ ਮੁਲਾਂਕਣ ਸਿਸਟਮ ਗੜਬੜਾ ਗਿਆ, ਗ੍ਰਿਫਤਾਰ ਕਰਨਾ ਤਾਂ ਦੂਰ ਦੀ ਗੱਲ ਹੈ, ਸਰਕਾਰ ਨੇ ਜ਼ਿੰਮੇਵਾਰ ਕੰਪਨੀ ਦੇ ਖਿਲਾਫ ਐਫਆਈਆਰ ਤੱਕ ਦਰਜ ਨਹੀਂ ਕੀਤੀ। ਇੰਨੇ ਵੱਡੇ ਪੱਧਰ ‘ਤੇ ਪੂਰੇ ਦੇਸ਼ ਵਿੱਚ ਅੰਦੋਲਨ ਚੱਲ ਰਿਹਾ ਹੈ, ਫਿਰ ਵੀ ਸਰਕਾਰ ਨੇ ਕੋਈ ਅਜਿਹਾ ਸਿਸਟਮ ਵਿੱਚ ਬਦਲਾਅ ਨਹੀਂ ਕੀਤਾ ਜਿਸ ਨਾਲ ਅਗਲੇ ਸਾਲ ਪੇਪਰ ਲੀਕ ਨਾ ਹੋਣ। ਅਗਲੇ ਸਾਲ ਫਿਰ ਪੇਪਰ ਲੀਕ ਹੋਣਗੇ ਅਤੇ ਸਾਡੇ ਬੱਚੇ ਫਿਰ ਮਰਨਗੇ, ਫਿਰ ਖੁਦਕੁਸ਼ੀ ਕਰਨਗੇ। ਇਹ ਸਿਸਟਮ ਕਦੋਂ ਬਦਲੇਗਾ? ਇਸ ਸਿਸਟਮ ਨੂੰ ਬਦਲਣਾ ਹੀ ਪਵੇਗਾ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਇਹੀ ਜੰਤਰ-ਮੰਤਰ ਸੀ, 4 ਅਪ੍ਰੈਲ 2011 ਦਾ ਦਿਨ ਸੀ ਅਤੇ ਇੱਥੇ ਅੰਨਾ ਹਜ਼ਾਰੇ ਬੈਠੇ ਹੋਏ ਸਨ। ਉਸ ਵਕਤ ਦੀ ਸਰਕਾਰ ਨੂੰ ਵੀ ਬਹੁਤ ਹੰਕਾਰ ਸੀ, ਪਰ ਤਿੰਨ ਸਾਲ ਦੇ ਬਾਅਦ ਉਹ ਸਰਕਾਰ ਆਪਣੇ ਹੰਕਾਰ ਦੀ ਵਜ੍ਹਾ ਨਾਲ ਨਹੀਂ ਬਚੀ ਅਤੇ ਡੁੱਬ ਗਈ। ਅੱਜ 2026 ਹੈ ਅਤੇ ਮੈਂ ਸਰਕਾਰ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਉਹ ਨੌਜਵਾਨਾਂ ਦੇ ‘ਕਾਕਰੋਚ ਅੰਦੋਲਨ’ ਅਤੇ ਸੋਨਮ ਵਾਂਗਚੁਕ ਦੀ ਗੱਲ ਸੁਣ ਲਵੇ, ਨਹੀਂ ਤਾਂ ਅੱਜ ਤੋਂ ਤਿੰਨ ਸਾਲ ਬਾਅਦ ਉਨ੍ਹਾਂ ਦਾ ਵੀ ਇਹੀ ਹਸ਼ਰ ਹੋਵੇਗਾ, ਜੋ 2014 ਵਿੱਚ ਉਸ ਹੰਕਾਰੀ ਸਰਕਾਰ ਦਾ ਹੋਇਆ ਸੀ। ਇਸ ਸਰਕਾਰ ਨੂੰ ਅਕਲ ਨਹੀਂ ਆ ਰਹੀ ਹੈ ਅਤੇ ਇਹ ਵੀ ਬਹੁਤ ਜ਼ਿਆਦਾ ਹੰਕਾਰ ਵਿੱਚ ਡੁੱਬੇ ਹੋਏ ਹਨ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਧਰਮਿੰਦਰ ਪ੍ਰਧਾਨ ਨੂੰ ਤਾਂ ਅਸਤੀਫਾ ਦੇਣਾ ਹੀ ਚਾਹੀਦਾ ਹੈ, ਪਰ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਬਣਾਉਣਾ ਚਾਹੀਦਾ ਹੈ। ਮੈਂ ਪ੍ਰਧਾਨ ਮੰਤਰੀ ਜੀ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਧਰਮਿੰਦਰ ਪ੍ਰਧਾਨ ਨੂੰ ਹਟਾਓ ਅਤੇ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਬਣਾਓ। ਮੈਨੂੰ ਪਤਾ ਹੈ ਕਿ ਪ੍ਰਧਾਨ ਮੰਤਰੀ ਸੁਣਨ ਵਾਲੇ ਨਹੀਂ ਹਨ।

ਪ੍ਰਧਾਨ ਮੰਤਰੀ ਸੋਨਮ ਵਾਂਗਚੁਕ ਨੂੰ ਦੇਸ਼ ਦਾ ਸਿੱਖਿਆ ਮੰਤਰੀ ਨਹੀਂ ਬਣਾਉਣਗੇ, ਕਿਉਂਕਿ ਉਨ੍ਹਾਂ ਨੂੰ ਡਰ ਲੱਗਦਾ ਹੈ ਕਿ ਕਿਤੇ ਸੋਨਮ ਵਾਂਗਚੁਕ ਕੋਈ ਕ੍ਰਾਂਤੀਕਾਰੀ ਚੀਜ਼ ਨਾ ਕਰ ਦੇਣ। ਅੱਜ ਸਿੱਖਿਆ ਵਿਵਸਥਾ ਜਿੰਨੀ ਖਰਾਬ ਹੋ ਗਈ ਹੈ, ਉਸਨੂੰ ਠੀਕ ਕਰਨ ਲਈ ਸਾਨੂੰ ਕ੍ਰਾਂਤੀਕਾਰੀ ਕਦਮਾਂ ਦੀ ਹੀ ਲੋੜ ਹੈ। ਬਿਨਾਂ ਕ੍ਰਾਂਤੀ ਦੇ ਸਿੱਖਿਆ ਵਿਵਸਥਾ ਠੀਕ ਨਹੀਂ ਹੋਣ ਵਾਲੀ ਹੈ। ਇਸਦੇ ਲਈ ਸਾਨੂੰ ਸੋਨਮ ਵਾਂਗਚੁਕ ਵਰਗੇ ਇੱਕ ਕ੍ਰਾਂਤੀਕਾਰੀ ਸਿੱਖਿਆ ਮੰਤਰੀ ਅਤੇ ਕ੍ਰਾਂਤੀਕਾਰੀ ਕਦਮਾਂ ਦੀ ਲੋੜ ਹੈ। ਉਨ੍ਹਾਂ ਦੇਸ਼ ਵਾਸੀਆਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ 20 ਜੁਲਾਈ ਨੂੰ ਜ਼ਿਆਦਾ ਤੋਂ ਜ਼ਿਆਦਾ ਗਿਣਤੀ ਵਿੱਚ ਜੰਤਰ-ਮੰਤਰ ਆਉਣਾ ਹੈ ਅਤੇ ਸ਼ਾਂਤੀਪੂਰਨ ਸੰਸਦ ਮਾਰਚ ਨੂੰ ਸਫਲ ਬਣਾਉਣਾ ਹੈ।

ਇਸ ਦੌਰਾਨ “ਆਪ” ਦੇ ਸੀਨੀਅਰ ਆਗੂ ਅਤੇ ਰਾਜ ਸਭਾ ਮੈਂਬਰ ਸੰਜੇ ਸਿੰਘ ਨੇ ਰਾਸ਼ਟਰ ਕਵੀ ਰਾਮਧਾਰੀ ਸਿੰਘ ‘ਦਿਨਕਰ’ ਦੀਆਂ ਪੰਕਤੀਆਂ ‘ਸਮਰ ਸ਼ੇਸ਼ ਹੈ, ਨਹੀਂ ਪਾਪ ਕਾ ਭਾਗੀ ਕੇਵਲ ਵਯਾਧ, ਜੋ ਤਟਸਥ ਹੈਂ ਸਮਯ ਲਿਖੇਗਾ ਉਨਕਾ ਭੀ ਅਪਰਾਧ’ ਦਾ ਜ਼ਿਕਰ ਕਰਦਿਆਂ ਘਰਾਂ ਵਿੱਚ ਬੈਠੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਬਾਹਰ ਨਿਕਲ ਕੇ ਜੰਤਰ-ਮੰਤਰ ਪਹੁੰਚਣ। ਲੋਕਾਂ ਨੂੰ ਸੋਨਮ ਵਾਂਗਚੁਕ ਦੀ ਆਵਾਜ਼ ਵਿੱਚ ਆਵਾਜ਼ ਮਿਲਾ ਕੇ ਭਾਰਤ ਸਰਕਾਰ ਅਤੇ ਨਰਿੰਦਰ ਮੋਦੀ ਨੂੰ ਝੁਕਣ ਲਈ ਮਜਬੂਰ ਕਰਨਾ ਹੈ।

ਸੰਜੇ ਸਿੰਘ ਨੇ ਅੱਗੇ ਕਿਹਾ ਕਿ ਮੋਦੀ ਜੀ ਤੋਂ ਵੱਡਾ ਨੌਟੰਕੀਬਾਜ਼ ਪੂਰੀ ਦੁਨੀਆ ਵਿੱਚ ਕੋਈ ਨਹੀਂ ਮਿਲੇਗਾ। ਜਦੋਂ ਦੇਸ਼ ਵਿੱਚ ਕੋਰੋਨਾ ਆਇਆ ਅਤੇ ਨੋਟਬੰਦੀ ਵਿੱਚ ਲੋਕ ਮਰ ਗਏ, ਤਦ ਉਹ ਰੋਣ ਲੱਗੇ। ਦੇਸ਼ ਦੇ ਪ੍ਰਧਾਨ ਮੰਤਰੀ ਦਿਨ-ਰਾਤ ਸਿਰਫ ਝੂਠ ਬੋਲਣ ਦਾ ਕੰਮ ਕਰਦੇ ਹਨ। ਇਸ ਲਈ ਮੈਂ ਯਕੀਨ ਦਿਵਾ ਕੇ ਜਾ ਰਿਹਾ ਹਾਂ ਕਿ 20 ਜੁਲਾਈ ਤੋਂ ਸੰਸਦ ਦੇ ਅੰਦਰ ਸਾਰੇ ਸਾਥੀ ਸੰਸਦ ਮੈਂਬਰਾਂ ਨਾਲ ਗੱਲ ਕਰਕੇ ਅਸੀਂ ਲੋਕ ਨੌਜਵਾਨਾਂ ਲਈ ਲੜਾਈ ਲੜਨ ਦਾ ਕੰਮ ਕਰਾਂਗੇ। 20 ਜੁਲਾਈ ਨੂੰ ਸੋਨਮ ਵਾਂਗਚੁਕ ਦੇ ਸੱਦੇ ‘ਤੇ ਮੈਂ ਵੀ ਇੱਕ ਵਰਕਰ ਅਤੇ ਸਾਥੀ ਦੇ ਰੂਪ ਵਿੱਚ ਇਸ ਅੰਦੋਲਨ ਵਿੱਚ ਸ਼ਾਮਲ ਹੋਣ ਲਈ ਜੰਤਰ-ਮੰਤਰ ਆਵਾਂਗਾ ਅਤੇ ਸਾਡੇ ਹੋਰ ਸਾਥੀ ਵੀ ਇੱਥੇ ਪਹੁੰਚਣਗੇ।

ਸੰਜੇ ਸਿੰਘ ਨੇ ਕਿਹਾ ਕਿ ਅਰਵਿੰਦ ਕੇਜਰੀਵਾਲ ਨੇ ਭਰੋਸਾ ਦਿਵਾਇਆ ਹੈ ਕਿ ਅਸੀਂ ਇਸ ਅੰਦੋਲਨ ਨੂੰ ਹਰ ਤਰੀਕੇ ਨਾਲ ਆਪਣਾ ਸਮਰਥਨ ਦੇਵਾਂਗੇ। ਅਸੀਂ ਹੋਰ ਰਾਜਨੀਤਿਕ ਦਲਾਂ ਅਤੇ ਜਨ ਅੰਦੋਲਨਾਂ ਤੋਂ ਵੀ ਇਸ ਅੰਦੋਲਨ ਨੂੰ ਸਮਰਥਨ ਦੇਣ ਦੀ ਅਪੀਲ ਕਰਦੇ ਹਾਂ, ਕਿਉਂਕਿ ਸੋਨਮ ਵਾਂਗਚੁਕ ਕੋਈ ਆਪਣੀ ਨਿੱਜੀ ਲੜਾਈ ਨਹੀਂ ਲੜ ਰਹੇ ਹਨ, ਸਗੋਂ ਦੇਸ਼ ਦੇ ਕਰੋੜਾਂ ਨੌਜਵਾਨਾਂ, ਹਿੰਦੁਸਤਾਨ ਦੇ ਭਵਿੱਖ ਅਤੇ ਆਉਣ ਵਾਲੇ ਕੱਲ੍ਹ ਦੀ ਲੜਾਈ ਲੜ ਰਹੇ ਹਨ।