ਰੇਲ ਯਾਤਰੀਆਂ ਲਈ ਵੱਡੀ ਖ਼ਬਰ: ਦੇਸ਼ ਦੀ ਦੂਜੀ ਵੰਦੇ ਭਾਰਤ ਸਲੀਪਰ ਟ੍ਰੇਨ ਨੂੰ ਮਨਜ਼ੂਰੀ
ਜਾਣੋ ਕਿਹੜੇ ਕਿਹੜੇ ਸ਼ਹਿਰਾਂ ਦੇ ਵਿਚਕਾਰ ਦੌੜੇਗੀ ਇਹ ਟਰੇਨ
ਨਵੀ ਦਿੱਲੀ, 29 ਸਤੰਬਰ 2026 (ਵਿਸ਼ਵ ਵਾਰਤਾ): ਰੇਲ ਯਾਤਰੀਆਂ ਲਈ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਦੇਸ਼ ਦੀ ਦੂਜੀ ਵੰਦੇ ਭਾਰਤ ਸਲੀਪਰ ਟ੍ਰੇਨ ਨੂੰ ਮਨਜ਼ੂਰੀ ਮਿਲ ਗਈ ਹੈ। ਇਹ ਹਾਈ-ਸਪੀਡ ਟ੍ਰੇਨ ਵਾਰਾਣਸੀ ਅਤੇ ਨਵੀਂ ਦਿੱਲੀ ਵਿਚਕਾਰ ਚੱਲੇਗੀ। ਹਾਲਾਂਕਿ, ਰੇਲਵੇ ਨੇ ਇਸ ਰੇਲਗੱਡੀ ਦੇ ਨਿਯਮਤ ਸੰਚਾਲਨ ਦੇ ਦਿਨਾਂ, ਕਿਰਾਏ ਦੀਆਂ ਦਰਾਂ ਅਤੇ ਬੁਕਿੰਗ ਦੀਆਂ ਤਾਰੀਖਾਂ ਬਾਰੇ ਵੀ ਕੋਈ ਜਾਣਕਾਰੀ ਨਹੀਂ ਦਿੱਤੀ ਹੈ।
ਖ਼ਾਸ ਗੱਲ ਇਹ ਹੈ ਕਿ ਇਸ ਟ੍ਰੇਨ ਦਾ ਠਹਿਰਾਅ ਕਾਨਪੁਰ ਸੈਂਟਰਲ ਅਤੇ ਪ੍ਰਯਾਗਰਾਜ ਵਿੱਚ ਵੀ ਹੋਵੇਗਾ। ਇਸ ਨਾਲ ਪੂਰਵਾਂਚਲ, ਮੱਧ ਉੱਤਰ ਪ੍ਰਦੇਸ਼ ਅਤੇ ਕਾਨਪੁਰ ਦੇ ਯਾਤਰੀਆਂ ਨੂੰ ਦਿੱਲੀ ਅਤੇ ਵਾਰਾਣਸੀ ਵਿਚਕਾਰ ਸਫ਼ਰ ਕਰਨ ਦਾ ਨਵਾਂ ਵਿਕਲਪ ਮਿਲੇਗਾ।
ਇਸ ਟ੍ਰੇਨ ਦੇ ਕਾਨਪੁਰ ਵਿੱਚ ਠਹਿਰਾਅ ਨਾਲ ਦਿੱਲੀ ਅਤੇ ਵਾਰਾਣਸੀ ਵਿਚਕਾਰ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਭਰਪੂਰ ਫ਼ਾਇਦਾ ਮਿਲੇਗਾ। ਕਾਨਪੁਰ ਦੇ ਨਾਲ-ਨਾਲ ਆਸ-ਪਾਸ ਦੇ ਜ਼ਿਲ੍ਹਿਆਂ ਅਤੇ ਮੱਧ ਉੱਤਰ ਪ੍ਰਦੇਸ਼ ਦੇ ਯਾਤਰੀਆਂ ਨੂੰ ਵੀ ਤੇਜ਼ ਅਤੇ ਆਰਾਮਦਾਇਕ ਰੇਲ ਕਨੈਕਟੀਵਿਟੀ ਮਿਲ ਸਕਦੀ ਹੈ। ਸੰਸਦ ਮੈਂਬਰ ਰਮੇਸ਼ ਅਵਸਥੀ ਨੇ ਕਾਨਪੁਰ ਵਿੱਚ ਟ੍ਰੇਨ ਦੇ ਠਹਿਰਾਅ ਨੂੰ ਸ਼ਹਿਰ ਲਈ ਮਹੱਤਵਪੂਰਨ ਦੱਸਿਆ ਹੈ। ਉਨ੍ਹਾਂ ਦੇ ਅਨੁਸਾਰ, ਇਸ ਨਾਲ ਵਪਾਰ, ਸੈਰ-ਸਪਾਟਾਅਤੇ ਆਰਥਿਕ ਗਤੀਵਿਧੀਆਂ ਨੂੰ ਬੜ੍ਹਾਵਾ ਮਿਲ ਸਕਦਾ ਹੈ।
ਪ੍ਰਸਤਾਵਿਤ ਸਮਾਂ-ਸਾਰਣੀ ਅਨੁਸਾਰ, ਵੰਦੇ ਭਾਰਤ ਸਲੀਪਰ ਟ੍ਰੇਨ ਵਾਰਾਣਸੀ ਤੋਂ ਰਾਤ 8:40 ਵਜੇ ਰਵਾਨਾ ਹੋਵੇਗੀ, ਜੋ ਰਾਤ 10:05 ਵਜੇ ਪ੍ਰਯਾਗਰਾਜ ਅਤੇ ਕਰੀਬ 11:50 ਵਜੇ ਕਾਨਪੁਰ ਸੈਂਟਰਲ ਪਹੁੰਚੇਗੀ। ਇਸ ਤੋਂ ਬਾਅਦ ਟ੍ਰੇਨ ਸਵੇਰੇ ਕਰੀਬ 4:50 ਵਜੇ ਨਵੀਂ ਦਿੱਲੀ ਪਹੁੰਚ ਜਾਵੇਗੀ। ਇਸ ਤਰ੍ਹਾਂ ਵਾਰਾਣਸੀ ਤੋਂ ਦਿੱਲੀ ਦਾ ਸਫ਼ਰ ਲਗਭਗ 8 ਘੰਟੇ 10 ਮਿੰਟ ਵਿੱਚ ਪੂਰਾ ਹੋਣ ਦੀ ਉਮੀਦ ਹੈ। ਹਾਲਾਂਕਿ, ਰੇਲਵੇ ਵੱਲੋਂ ਅਜੇ ਇਹਨਾਂ ਸਮਿਆਂ ਦਾ ਅਧਿਕਾਰਤ ਤੌਰ ‘ਤੇ ਐਲਾਨ ਨਹੀਂ ਕੀਤਾ ਗਿਆ ਹੈ। ਅੰਤਿਮ ਸਮਾਂ-ਸਾਰਣੀ ਅਤੇ ਸੰਚਾਲਨ ਦੀ ਤਾਰੀਖ਼ ਦਾ ਐਲਾਨ ਪੀ.ਐੱਮ.ਓ. (PMO) ਤੋਂ ਅੰਤਿਮ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੋਣ ਦੀ ਗੱਲ ਕਹੀ ਜਾ ਰਹੀ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
