Punjab: ਸਰਕਾਰ ਵੱਲੋਂ ਦੁੱਧ ਦੀਆਂ ਖ਼ਰੀਦ ਦਰਾਂ ‘ਚ ਵਾਧੇ ਦਾ ਐਲਾਨ
ਚੰਡੀਗੜ੍ਹ, 3 ਅਪ੍ਰੈਲ 2026 (ਵਿਸ਼ਵ ਵਾਰਤਾ ) : ਪੰਜਾਬ ਸਰਕਾਰ ਨੇ ਮਿਲਕਫ਼ੈੱਡ ਪੰਜਾਬ (ਵੇਰਕਾ) ਨਾਲ ਜੁੜੇ ਕਿਸਾਨਾਂ ਲਈ ਦੁੱਧ ਦੀਆਂ ਖ਼ਰੀਦ ਕੀਮਤਾਂ ਵਿਚ ਵੱਡੇ ਵਾਧੇ ਦਾ ਐਲਾਨ ਕੀਤਾ ਹੈ। ਡੇਅਰੀ ਫਾਰਮਰਾਂ ਨੂੰ ਰਾਹਤ ਦਿੰਦੇ ਹੋਏ ਦੁੱਧ ਦੀ ਖਰੀਦ ਦਰਾਂ ਵਿੱਚ ਵਾਧਾ ਕੀਤਾ ਗਿਆ ਹੈ। ਸਰਕਾਰ ਨੇ ਦੁੱਧ ਦੇ ਰੇਟ ਵਿੱਚ ₹15 ਪ੍ਰਤੀ ਕਿਲੋ ਫੈਟ ਦਾ ਵਾਧਾ ਕੀਤਾ ਹੈ, ਜੋ 1 ਅਪ੍ਰੈਲ 2026 ਤੋਂ ਲਾਗੂ ਹੋ ਚੁੱਕਾ ਹੈ।
ਮਿਲਕਫੈੱਡ ਅਨੁਸਾਰ ਗਾਂ ਦੇ ਦੁੱਧ ਦਾ ਪੁਰਾਣਾ ਰੇਟ ਲਗਭਗ ₹770–780 ਪ੍ਰਤੀ ਕਿਲੋ ਫੈਟ ਸੀ, ਜਿਸ ਨੂੰ ਵਧਾ ਕੇ ₹780–795 ਪ੍ਰਤੀ ਕਿਲੋ ਫੈਟ ਕਰ ਦਿੱਤਾ ਗਿਆ ਹੈ। ਉੱਥੇ ਹੀ ਮੱਝ ਦੇ ਦੁੱਧ ਦਾ ਪੁਰਾਣਾ ਰੇਟ ਕਰੀਬ ₹810–820 ਪ੍ਰਤੀ ਕਿਲੋ ਫੈਟ ਸੀ, ਜੋ ਹੁਣ ਵਧ ਕੇ ₹820–835 ਪ੍ਰਤੀ ਕਿਲੋ ਫੈਟ ਹੋ ਗਿਆ ਹੈ।
ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਫੈਸਲਾ ਵਧਦੀ ਲਾਗਤ, ਪਸ਼ੂ ਖੁਰਾਕ ਅਤੇ ਹੋਰ ਖਰਚਿਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਲਿਆ ਗਿਆ ਹੈ, ਤਾਂ ਜੋ ਕਿਸਾਨਾਂ ਨੂੰ ਬਿਹਤਰ ਕੀਮਤ ਮਿਲ ਸਕੇ। ਇਸ ਫੈਸਲੇ ਨਾਲ ਸੂਬੇ ਦੇ ਲਗਭਗ 2.5 ਲੱਖ ਡੇਅਰੀ ਕਿਸਾਨਾਂ ਨੂੰ ਸਿੱਧਾ ਲਾਭ ਮਿਲੇਗਾ, ਜਦਕਿ ਇਸ ਦਾ ਅਸਰ ਲੱਖਾਂ ਹੋਰ ਦੁੱਧ ਉਤਪਾਦਕਾਂ ‘ਤੇ ਵੀ ਪਵੇਗਾ। ਮਿਲਕਫੈੱਡ ਅਨੁਸਾਰ, ਗਾਂ ਅਤੇ ਮੱਝ ਦੋਵਾਂ ਕਿਸਮਾਂ ਦੇ ਦੁੱਧ ਵਿੱਚ ਬਰਾਬਰ ਵਾਧਾ ਕੀਤਾ ਗਿਆ ਹੈ, ਹਾਲਾਂਕਿ ਅੰਤਿਮ ਭੁਗਤਾਨ ਫੈਟ ਪ੍ਰਤੀਸ਼ਤ ਦੇ ਆਧਾਰ ‘ਤੇ ਤੈਅ ਹੁੰਦਾ ਹੈ, ਜਿਸ ਕਾਰਨ ਵੱਖ-ਵੱਖ ਕਿਸਾਨਾਂ ਨੂੰ ਮਿਲਣ ਵਾਲੀ ਰਾਸ਼ੀ ਵਿੱਚ ਥੋੜ੍ਹਾ ਫਰਕ ਹੋ ਸਕਦਾ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
