Politics News : ਟਰੰਪ ਦੀ ਜਿੱਤ ਲਈ ਸਿੱਖ ਵੀ ਕਰਨ ਲੱਗੇ ਅਰਦਾਸ
ਰਿਪਬਲੀਕਨ ਆਗੂ ਹਰਮੀਤ ਕੌਰ ਢਿੱਲੋਂ ਨੇ ਨੈਸ਼ਨਲ ਕਨਵੈਂਸ਼ਨ ‘ਚ ਟਰੰਪ ਲਈ ਕੀਤੀ ਅਰਦਾਸ
ਨਵੀਂ ਦਿੱਲੀ 16ਜੁਲਾਈ (ਵਿਸ਼ਵ ਵਾਰਤਾ)Politics News -ਰਿਪਬਲਿਕਨ ਪਾਰਟੀ ਦੀ ਆਗੂ ਅਤੇ ਸਿਵਲ ਰਾਈਟਸ ਵਕੀਲ ਹਰਮੀਤ ਕੌਰ ਢਿੱਲੋਂ ਨੇ ਪਾਰਟੀ ਦੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਡੋਨਾਲਡ ਟਰੰਪ ਦੀ ਮੌਜੂਦਗੀ ਵਿੱਚ ਰਿਪਬਲਿਕਨ ਨੈਸ਼ਨਲ ਕਨਵੈਨਸ਼ਨ ਵਿੱਚ ‘ਅਰਦਾਸ’ ਕੀਤੀ ਹੈ। ਉਨ੍ਹਾਂ ਟਰੰਪ ਦੀ ਸਿਹਤਯਾਬੀ ਅਤੇ ਜਿੱਤ ਨੂੰ ਲੈ ਕੇ ਅਰਦਾਸ ਕੀਤੀ ਹੈ। ਕੈਲੀਫੋਰਨੀਆ ਰਿਪਬਲਿਕਨ ਪਾਰਟੀ ਦੁਆਰਾ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਪੋਸਟ ਕੀਤੀ ਗਈ ਇੱਕ ਵੀਡੀਓ ਵਿਚ ਹਰਮੀਤ ਢਿੱਲੋਂ ਨੂੰ ਸਾਬਕਾ ਰਾਸ਼ਟਰਪਤੀ ਟਰੰਪ ‘ਤੇ ਹੋਏ ਹਮਲੇ ਦੀ ਚਰਚਾ ਕਰਦੇ ਹੋਏ ਦਿਖਾਇਆ ਗਿਆ ਹੈ। ਟਰੰਪ ‘ਤੇ ਹੋਏ ਹਮਲੇ ਤੋਂ ਬਾਅਦ ਉਹਨਾਂ ਨੂੰ ਮਿਲਣ ਵਾਲੇ ਸਮਰਥਨ ‘ਚ ਵਾਧਾ ਹੋਇਆ ਹੈ। ਸਿੱਖ ਮਹਿਲਾ ਸਿਆਸਤਦਾਨ ਵੱਲੋ ਕੀਤੀ ਅਰਦਾਸ ਵੀ ਇਸਦੀ ਗਵਾਹੀ ਭਰਦੀ ਹੈ। ਢਿੱਲੋਂ ਨੇ ਕਿਹਾ ਹੈ ਕਿ ਪਿਛਲੇ 48 ਘੰਟੇ ਸਾਡੇ ਲਈ ਬੇਹੱਦ ਤਣਾਅ ਵਾਲੇ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਟਰੰਪ ‘ਤੇ ਹੋਏ ਹਮਲੇ ਤੋਂ ਬਾਅਦ ਉਨ੍ਹਾਂ ਦੇ ਸਮਰਥਕ ਤਣਾਅ ਅਤੇ ਡਰ ਨਾਲ ਜੂਝ ਰਹੇ ਸਨ ਜੋ ਕਿ ਹੁਣ ਉਨ੍ਹਾਂ ਦੇ ਦੁਬਾਰਾ ਸਿਆਸੀ ਮੈਦਾਨ ‘ਚ ਆਉਣ ਨਾਲ ਸ਼ਾਂਤ ਹੋਇਆ ਹੈ।
