ਥਰਮਲ ਬਣਾਵਾਲਾ ਤੇ ਅੱਧੀ ਰਾਤ ਉੱਡੇ ਸ਼ੱਕੀ ਡ੍ਰੋਨ, ਪੁਲਿਸ ਨੇ ਚੌਕਸੀ ਵਧਾਈ
ਮਾਨਸਾ, 7 ਅਪਰੈਲ (ਵਿਸ਼ਵ ਵਾਰਤਾ):- ਮਾਨਸਾ ਨੇੜਲੇ ਪਿੰਡ ਬਣਾਂਵਾਲਾ ਵਿਖੇ ਨਿੱਜੀ ਭਾਈਵਾਲੀ ਤਹਿਤ ਲੱਗੇ ਉਤਰੀ ਭਾਰਤ ਦੇ ਸਭ ਤੋਂ ਵੱਡੇ ਤਾਪਘਰ ਤਲਵੰਡੀ ਸਾਬੋ ਪਾਵਰ ਲਿਮਟਿਡ (ਟੀਐਸਪੀਐਲ) ਪਲਾਂਟ ਵਿੱਚ ਅੱਧੀ ਰਾਤ ਤੋਂ ਬਾਅਦ 3-4 ਸ਼ੱਕੀ ਡਰੋਨਾਂ ਦੀਆਂ ਗਤੀ-ਵਿਧੀਆਂ ਦੇਖਣ ਤੋਂ ਬਾਅਦ ਪੁਲੀਸ ਵੱਲੋਂ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਇਨ੍ਹਾਂ ਡਰੋਨਾਂ ਸਬੰਧੀ ਪੁਲੀਸ ਵੱਲੋਂ ਭਾਰਤੀ ਫੌਜ਼ ਨੂੰ ਦਿੱਤੀ ਗਈ ਇੱਕ ਜਾਣਕਾਰੀ ਤੋਂ ਬਾਅਦ ਫੌਜ਼ ਦੇ ਬਠਿੰਡਾ ਸਥਿਤ ਅਧਿਕਾਰੀਆਂ ਵੱਲੋਂ ਤਾਪਘਰ ਵਿਚਲੇ ਪਲਾਂਟ ਦਾ ਬਕਾਇਦਾ ਮੁਆਇਨਾ ਕੀਤਾ ਗਿਆ।
ਹਾਸਲ ਹੋਏ ਵੇਰਵਿਆਂ ਮੁਤਾਬਕ ਤਾਪਘਰ ਵਿੱਚ ਇਹ ਤਿੰਨ-ਚਾਰ ਵੱਡੇ ਡਰੋਨ ਲਗਭਗ ਰਾਤ 2 ਵਜੇ ਦੇ ਕਰੀਬ ਪਲਾਂਟ ਵਿੱਚ ਕਾਫ਼ੀ ਸਮੇਂ ਤੱਕ ਉਡਦੇ ਵੇਖੇ ਗਏ। ਇਹ ਡਰੋਨ ਆਮ ਡਰੋਨਾਂ ਨਾਲੋਂ ਵੇਖਣ ਵਿੱਚ ਵੱਡੇ ਜਾਪਦੇ ਸਨ। ਪਤਾ ਲੱਗਿਆ ਹੈ ਕਿ ਤਾਪਘਰ ਦੀ ਇੱਕ ਟੀਮ ਨੇ ਚਾਰਦੀਵਾਰੀ ਨੰਬਰ-194 ਦੇ ਨੇੜੇ ਇਨ੍ਹਾਂ ਨੂੰ ਵੇਖਿਆ ਗਿਆ ਅਤੇ ਉਨ੍ਹਾਂ ਦੀ ਗਤੀ-ਵਿਧੀ ਉਪਰ ਨੇੜਿਓ ਪੂਰੀ ਨਜ਼ਰ ਰੱਖੀ ਗਈ। ਪੂਰੀ ਯੂਨਿਟ ਦਾ ਸਰਵੇਖਣ ਕਰਨ ਤੋਂ ਬਾਅਦ ਡਰੋਨ ਗੇਟ ਨੰਬਰ-2 ਰਾਹੀਂ ਹੁੰਦੇ ਹੋਏ ਪਲਾਂਟ ਵਿਚੋਂ ਬਾਹਰ ਨਿਕਲ ਗਏ।
ਸਥਿਤੀ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਪਲਾਂਟ ਦੇ ਸੁਰੱਖਿਆ ਵਿਭਾਗ ਨੇ ਤੁਰੰਤ ਕਾਰਵਾਈ ਕਰਦਿਆਂ ਪੁਲੀਸ ਚੌਂਕੀ ਬਹਿਣੀਵਾਲ ਦੇ ਇੰਚਾਰਜ ਗੁਰਦੀਪ ਸਿੰਘ ਨੂੰ ਪੂਰੇ ਮਾਮਲੇ ਦੀ ਜਾਣਕਾਰੀ ਦਿੱਤੀ ਗਈ। ਪੁਲੀਸ ਨੇ ਘਟਨਾ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਇਸ ਮਾਮਲੇ ਦੀ ਜਾਂਚ ਆਰੰਭ ਕਰ ਦਿੱਤੀ ਗਈ।
ਬੇਸ਼ੱਕ ਜ਼ਿਲ੍ਹਾ ਪੁਲੀਸ ਦੇ ਉਚ ਅਧਿਕਾਰੀ ਅਤੇ ਸਿਵਲ ਅਧਿਕਾਰੀ ਇਸ ਮਾਮਲੇ ਸਬੰਧੀ ਕੁੱਝ ਵੀ ਕਹਿਣ ਤੋਂ ਝਿਜਕ ਮਹਿਸੂਸ ਕਰਦੇ ਰਹੇ, ਪਰ ਕੁੱਝ ਅਧਿਕਾਰੀਆਂ ਦਾ ਨਾਮ ਨਾ ਛਾਪਣ ਦੀ ਸ਼ਰਤ ’ਤੇ ਕਹਿਣਾ ਹੈ ਕਿ ਇਨ੍ਹਾਂ ਡਰੋਨਾਂ ਨੂੰ ਸਵੇਰੇ 1:50 ਵਜੇ ਵੇਖਿਆ ਗਿਆ ਅਤੇ ਉਸ ਤੋਂ ਬਾਅਦ ਤੁਰੰਤ ਤਾਪਘਰ ਦੇ ਸੁਰੱਖਿਆ ਪ੍ਰਬੰਧ ਵਧਾਏ ਗਏ ਹਨ ਅਤੇ ਪੁਲੀਸ ਵੱਲੋਂ ਲਗਾਤਾਰ ਨਜ਼ਰਸਾਨੀ ਰੱਖਣੀ ਸ਼ੁਰੂ ਕੀਤੀ ਗਈ ਹੈ। ਬਹਿਣੀਵਾਲ ਪੁਲਿਸ ਚੌਕੀ ਇੰਚਾਰਜ ਗੁਰਦੀਪ ਸਿੰਘ ਨੇ ਦੱਸਿਆ ਕਿ ਥਰਮਲ ਬਣਾਵਾਲਾ ਤੇ ਰਾਤ ਵੇਲੇ ਕੁਝ ਸੱਕੀ ਡ੍ਰੋਨ ਉਡਣ ਦੀ ਉਨ੍ਹਾਂ ਨੂੰ ਸੂਚਨਾ ਦਿੱਤੀ ਗਈ ਹੈ। ਪੁਲਿਸ ਨੇ ਇਸਦੀ ਪੜਤਾਲ ਆਰੰਭ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਡ੍ਰੋਨ ਹੀ ਸੀ ਜਾਂ ਕੁਝ ਹੋਰ।ਇਸਦੀ ਪੜਤਾਲ ਕੀਤੀ ਜਾ ਰਹੀ ਹੈ।
