ਪ੍ਰਧਾਨ ਮੰਤਰੀ ਮੋਦੀ ਪਹੁੰਚੇ UAE, ਰਾਸ਼ਟਰਪਤੀ ਨੇ ਕੀਤਾ ਨਿੱਘਾ ਸਵਾਗਤ
– ਭਾਰਤ-UAE ਵਿਚਾਲੇ ਰੱਖਿਆ, LPG ਸਪਲਾਈ ਅਤੇ ਨਿਵੇਸ਼ ਨੂੰ ਲੈ ਕੇ ਵੱਡੇ ਸਮਝੌਤੇ
ਨਵੀ ਦਿੱਲੀ, 15 ਮਈ 2026 (ਵਿਸ਼ਵ ਵਾਰਤਾ): ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅੱਜ ਸੰਯੁਕਤ ਅਰਬ ਅਮੀਰਾਤ (UAE) ਦੀ ਰਾਜਧਾਨੀ ਅਬੂ ਧਾਬੀ ਪਹੁੰਚੇ ਹਨ। ਅਬੂ ਧਾਬੀ ਵਿੱਚ ਰਾਸ਼ਟਰਪਤੀ ਸ਼ੇਖ ਮੁਹੰਮਦ ਬਿਨ ਜ਼ਾਇਦ ਅਲ ਨਾਹਯਾਨ ਨੇ ਉਨ੍ਹਾਂ ਦਾ ਸਵਾਗਤ ਕੀਤਾ।
ਪ੍ਰਧਾਨ ਮੰਤਰੀ ਮੋਦੀ ਨੇ ਅਬੂ ਧਾਬੀ ਵਿੱਚ ਯੂਏਈ ਦੇ ਰਾਸ਼ਟਰਪਤੀ ਸ਼ੇਖ ਮੁਹੰਮਦ ਬਿਨ ਜ਼ਾਇਦ ਅਲ ਨਾਹਯਾਨ ਦਾ ਨਿੱਘੇ ਸਵਾਗਤ ਲਈ ਧੰਨਵਾਦ ਕੀਤਾ।ਦੁਵੱਲੀ ਬੈਠਕ ਵਿੱਚ ਮੋਦੀ ਨੇ ਕਿਹਾ, “ਮੈਂ ਆਪਣੇ ਦੂਜੇ ਘਰ ਆਇਆ ਹਾਂ। ਇਹ ਭਾਵਨਾ ਮੇਰੀ ਜ਼ਿੰਦਗੀ ਦੀ ਬਹੁਤ ਵੱਡੀ ਪੂੰਜੀ ਹੈ। ਅੱਜ ਤੁਹਾਡੇ ਏਅਰਫੋਰਸ ਜੈੱਟਸ ਨੇ ਮੈਨੂੰ ਐਸਕਾਰਟ ਕੀਤਾ। ਇਹ ਭਾਰਤ ਦੀ ਜਨਤਾ ਦਾ ਸਨਮਾਨ ਹੈ।”
ਇਸ ਤੋਂ ਬਾਅਦ ਦੋਵਾਂ ਆਗੂਆਂ ਵਿਚਾਲੇ ਦੁਵੱਲੀ ਬੈਠਕ ਹੋਈ, ਜਿਸ ਵਿੱਚ ਰੱਖਿਆ ਅਤੇ ਊਰਜਾ ਖੇਤਰ ਸਮੇਤ ਅਹਿਮ ਸਮਝੌਤਿਆਂ ‘ਤੇ ਮੋਹਰ ਲੱਗੀ ਹੈ। ਦੋਵਾਂ ਦੇਸ਼ਾਂ ਵਿਚਾਲੇ ਰਣਨੀਤਕ ਰੱਖਿਆ ਭਾਈਵਾਲੀ ਲਈ ਇੱਕ ਫਰੇਮਵਰਕ ‘ਤੇ ਸਮਝੌਤਾ ਹੋਇਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਭਾਰਤ ਅਤੇ ਯੂਏਈ ਵਿਚਾਲੇ ਐਲਪੀਜੀ (LPG) ਸਪਲਾਈ ਨਾਲ ਜੁੜਿਆ ਅਹਿਮ ਸਮਝੌਤਾ ਵੀ ਹੋਇਆ ਹੈ। ਇਹ ਸਮਝੌਤੇ ਰੱਖਿਆ, ਊਰਜਾ, ਨਿਵੇਸ਼ ਅਤੇ ਇੰਫਰਾਸਟਰਕਚਰ ਸਹਿਯੋਗ ਨਾਲ ਜੁੜੇ ਹੋਏ ਹਨ।ਇਸ ਤੋਂ ਇਲਾਵਾ ਸਟ੍ਰੈਟੇਜਿਕ ਪੈਟਰੋਲੀਅਮ ਰਿਜ਼ਰਵ (ਰਣਨੀਤਕ ਪੈਟਰੋਲੀਅਮ ਭੰਡਾਰ) ਨੂੰ ਲੈ ਕੇ ਵੀ ਐਮਓਯੂ ਸਾਈਨ ਕੀਤਾ ਗਿਆ। ਵਡੀਨਾਰ ਵਿੱਚ ਸ਼ਿਪ ਰਿਪੇਅਰ ਕਲਸਟਰ ਸਥਾਪਤ ਕਰਨ ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਨੇ ਐਮਓਯੂ ‘ਤੇ ਦਸਤਖਤ ਕੀਤੇ।ਇਸ ਤੋਂ ਇਲਾਵਾ, ਯੂਏਈ ਨੇ ਭਾਰਤੀ ਇੰਫਰਾਸਟਰਕਚਰ, ਆਰਬੀਐਲ (RBL) ਬੈਂਕ ਅਤੇ ਸੰਮਾਨ ਕੈਪੀਟਲ ਵਿੱਚ 5 ਅਰਬ ਡਾਲਰ ਦੇ ਨਿਵੇਸ਼ ਦਾ ਐਲਾਨ ਕੀਤਾ।
