ਯੂਪੀਐਸਸੀ ਸਕੱਤਰ ਅਤੇ ਲੇਖਕ ਸ਼ਸ਼ੀ ਰੰਜਨ ਕੁਮਾਰ ਨੇ ਚੰਡੀਗੜ੍ਹ ਦਾ ਦੌਰਾ ਕੀਤਾ; ਸਾਡਾ ਪੰਜਾਬ ਕਿਤਾਬ ਨੂੰ “ਪੰਜਾਬ ਦਾ ਗਜ਼ਟੀਅਰ” ਦੱਸਿਆ
ਚੰਡੀਗੜ੍ਹ, 8 ਮਈ (ਵਿਸ਼ਵ ਵਾਰਤਾ):- ਸੀਨੀਅਰ ਆਈਏਐਸ ਅਧਿਕਾਰੀ ਅਤੇ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ (ਯੂਪੀਐਸਸੀ) ਦੇ ਸਕੱਤਰ ਸ਼ਸ਼ੀ ਰੰਜਨ ਕੁਮਾਰ ਜੋ ਕਿ ਇੱਕ ਉੱਘੇ ਲੇਖਕ ਵੀ ਹਨ, ਆਪਣੀ ਨਵੀਂ ਸਾਹਿਤਕ ਰਚਨਾ, “ਦ ਡਿਕਲਾਈਨ ਆਫ਼ ਹਿੰਦੂ ਸੀਵੀਲਾਈਜੇਸ਼ਨ” ਦੇ ਵਿਸ਼ੇਸ਼ ਸਾਈਨਿੰਗ ਈਵੈਂਟ ਲਈ ਚੰਡੀਗੜ੍ਹ ਆਏ।
ਆਪਣੀ ਫੇਰੀ ਦੌਰਾਨ, ਯੂਪੀਐਸਸੀ ਸਕੱਤਰ ਨੇ ਉੱਘੇ ਲੇਖਕ ਅਤੇ ਸਲਾਹਕਾਰ ਮੁਨੀਸ਼ ਜਿੰਦਲ ਨਾਲ ਵਿਚਾਰ ਚਰਚਾ ਕੀਤੀ। ਦੋਵਾਂ ਨੇ ਪ੍ਰਸ਼ਾਸਨ ਦੀਆਂ ਬਾਰੀਕੀਆਂ, ਇਤਿਹਾਸਕ ਦ੍ਰਿਸ਼ਟੀਕੋਣਾਂ ਅਤੇ ਸਮਾਜ ਦੇ ਮੌਜੂਦਾ ਸਮਾਜਿਕ-ਸੱਭਿਆਚਾਰਕ ਤਾਣੇ-ਬਾਣੇ ਬਾਰੇ ਵਿਆਪਕ ਚਰਚਾ ਵਿੱਚ ਹਿੱਸਾ ਲਿਆ।
ਇਸ ਮੌਕੇ, ਮੁਨੀਸ਼ ਜਿੰਦਲ ਨੇ ਆਪਣੀ ਪ੍ਰਸਿੱਧ ਕਿਤਾਬ ‘ਸਾਡਾ ਪੰਜਾਬ’ ਦੀ ਇੱਕ ਕਾਪੀ ਯੂਪੀਐਸਸੀ ਸਕੱਤਰ ਨੂੰ ਭੇਟ ਕੀਤੀ। ਸ਼ਸ਼ੀ ਰੰਜਨ ਕੁਮਾਰ ਨੇ ਆਪਣੀ ਕਿਤਾਬ, “ਦ ਡਿਕਲਾਈਨ ਆਫ਼ ਹਿੰਦੂ ਸੀਵੀਲਾਈਜੇਸ਼ਨ” ਪੇਸ਼ ਕੀਤੀ, ਜੋ ਇੱਕ ਸੱਭਿਅਤਾ ਦੀ ਪ੍ਰਗਤੀ ਅਤੇ ਇਸਦੇ ਹੌਲੀ-ਹੌਲੀ ਗੁਮਨਾਮੀ ਵੱਲ ਜਾਣ ਸਬੰਧੀ ਸਾਰਥਕ ਬਿਰਤਾਂਤ ਪੇਸ਼ ਕਰਦੀ ਹੈ।
ਮੁਨੀਸ਼ ਜਿੰਦਲ ਦੇ ਕੰਮ ਦੀ ਅਕਾਦਮਿਕ ਮਹਾਰਤ ਦੀ ਸ਼ਲਾਘਾ ਕਰਦਿਆਂ, ਸ਼ਸ਼ੀ ਰੰਜਨ ਕੁਮਾਰ ਨੇ ਕਿਹਾ ਕਿ “ਸਾਡਾ ਪੰਜਾਬ” ਖੋਜਕਰਤਾਵਾਂ, ਵਿਦਵਾਨਾਂ ਅਤੇ ਵਿਦਿਆਰਥੀਆਂ ਲਈ “ਪੰਜਾਬ ਦੇ ਗਜ਼ਟੀਅਰ” ਦੀ ਭੂਮਿਕਾ ਨਿਭਾਉਣ ਵਾਲੀ ਰਚਨਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਕਿਤਾਬ ਸੂਬੇ ਦੇ ਇਤਿਹਾਸ, ਸੱਭਿਆਚਾਰ ਅਤੇ ਸਮਾਜਿਕ-ਰਾਜਨੀਤਿਕ ਦ੍ਰਿਸ਼ਟੀਕੋਣ ਦੀ ਇੱਕ ਵਿਆਪਕ ਅਤੇ ਪ੍ਰਮਾਣਿਕ ਸੂਝ ਪ੍ਰਦਾਨ ਕਰਦੀ ਹੈ।
ਹੌਂਸਲਾ ਅਫਜ਼ਾਈ ਲਈ ਧੰਨਵਾਦ ਕਰਦਿਆਂ, ਮੁਨੀਸ਼ ਜਿੰਦਲ ਨੇ ਕਿਹਾ ਕਿ ਉੱਘੀਆਂ ਸ਼ਖਸੀਅਤਾਂ ਨਾਲ ਅਜਿਹੇ ਵਿਚਾਰ ਵਟਾਂਦਰੇ – ਜੋ ਜਨਤਕ ਪ੍ਰਸ਼ਾਸਨ ਅਤੇ ਸਾਹਿਤ ਦੋਵਾਂ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਉਂਦੇ ਹਨ – ਬਹੁਤ ਪ੍ਰੇਰਣਾਦਾਇਕ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਅਜਿਹੇ ਆਦਾਨ-ਪ੍ਰਦਾਨ ਖੇਤਰ ਦੇ ਨੌਜਵਾਨ ਚਾਹਵਾਨਾਂ ਅਤੇ ਪਾਠਕਾਂ ਨੂੰ ਸੋਚਣ-ਸਮਝਣ ਦਾ ਬਿਹਤਰ ਨਜ਼ਰੀਆ ਪ੍ਰਦਾਨ ਕਰਦੇ ਹਨ।
