National: ਉਮਰ ਅਬਦੁੱਲਾ ਨੇ ਕਸ਼ਮੀਰ ਮੈਰਾਥਨ ਨੂੰ ਦਿਖਾਈ ਹਰੀ ਝੰਡੀ, 12 ਦੇਸ਼ਾਂ ਦੇ ਦੌੜਾਕਾਂ ਨੇ ਲਿਆ ਹਿੱਸਾ
– 1,807 ਦੌੜਾਕਾਂ ਨੇ ਕਰਵਾਈ ਰਜਿਸਟ੍ਰੇਸ਼ਨ
ਚੰਡੀਗੜ੍ਹ, 25 ਅਕਤੂਬਰ (ਵਿਸ਼ਵ ਵਾਰਤਾ): ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਐਤਵਾਰ ਨੂੰ ਕਸ਼ਮੀਰ ਮੈਰਾਥਨ ਦੇ ਤੀਜੇ ਐਡੀਸ਼ਨ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਇਸ ਖੇਡ ਸਮਾਗਮ ਵਿੱਚ 12 ਦੇਸ਼ਾਂ ਦੇ ਅੰਤਰਰਾਸ਼ਟਰੀ ਦੌੜਾਕਾਂ ਸਮੇਤ ਵੱਡੀ ਗਿਣਤੀ ਵਿੱਚ ਖਿਡਾਰੀਆਂ ਨੇ ਹਿੱਸਾ ਲਿਆ। ਜੰਮੂ-ਕਸ਼ਮੀਰ ਸੈਰ-ਸਪਾਟਾ ਵਿਭਾਗ ਮੁਤਾਬਕ, ਮੈਰਾਥਨ ਲਈ ਕੁੱਲ 1,807 ਆਨਲਾਈਨ ਰਜਿਸਟ੍ਰੇਸ਼ਨਾਂ ਹੋਈਆਂ। ਇਨ੍ਹਾਂ ਵਿੱਚ ਜੰਮੂ-ਕਸ਼ਮੀਰ ਦੇ 1,221, ਦੇਸ਼ ਦੇ ਹੋਰ ਹਿੱਸਿਆਂ ਤੋਂ 513 ਅਤੇ 12 ਦੇਸ਼ਾਂ ਦੀ ਨੁਮਾਇੰਦਗੀ ਕਰਨ ਵਾਲੇ 73 ਅੰਤਰਰਾਸ਼ਟਰੀ ਦੌੜਾਕ ਸ਼ਾਮਲ ਹਨ। ਮੈਰਾਥਨ ਵਿੱਚ ਦੋ ਮੁੱਖ ਵਰਗ ਰੱਖੇ ਗਏ। 42 ਕਿਲੋਮੀਟਰ ਦੀ ਪੂਰੀ ਮੈਰਾਥਨ ਸਵੇਰੇ 6:30 ਵਜੇ ਅਤੇ 21 ਕਿਲੋਮੀਟਰ ਦੀ ਹਾਫ ਮੈਰਾਥਨ ਸਵੇਰੇ 7:45 ਵਜੇ ਸ਼ੁਰੂ ਹੋਈ।
ਡਲ ਝੀਲ ਦੇ ਆਲੇ-ਦੁਆਲੇ ਦੌੜੇ ਖਿਡਾਰੀ
ਜ਼ਬਰਵਾਨ ਪਹਾੜੀ ਲੜੀ ਦੇ ਮਨਮੋਹਕ ਨਜ਼ਾਰਿਆਂ ਵਿਚਕਾਰ ਦੌੜਾਕਾਂ ਨੇ ਮਸ਼ਹੂਰ ਡਲ ਝੀਲ ਦੇ ਆਲੇ-ਦੁਆਲੇ ਬਣਾਏ ਗਏ ਰੂਟ ’ਤੇ ਦੌੜ ਲਗਾਈ। ਇਸ ਦੌਰਾਨ ਖਿਡਾਰੀ ਸ਼ਾਨਦਾਰ ਚਿਨਾਰ ਦੇ ਰੁੱਖਾਂ ਨਾਲ ਘਿਰੇ ਰਸਤੇ ਤੋਂ ਲੰਘੇ ਅਤੇ ਨਿਸ਼ਾਤ ਮੁਗ਼ਲ ਗਾਰਡਨ ਦੇ ਬਾਹਰੋਂ ਗੁਜ਼ਰੇ। ਸਥਾਨਕ ਦੌੜਾਕਾਂ ਨੂੰ ਉਤਸ਼ਾਹਿਤ ਕਰਨ ਲਈ ਜੰਮੂ-ਕਸ਼ਮੀਰ ਦੇ ਖਿਡਾਰੀਆਂ ਵਾਸਤੇ ਵੱਖਰੀ ਇਨਾਮ ਸ਼੍ਰੇਣੀ ਵੀ ਰੱਖੀ ਗਈ।
ਮੈਰਾਥਨ ਐਕਸਪੋ ਦਾ ਵੀ ਉਦਘਾਟਨ
ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਮੈਰਾਥਨ ਦੇ ਨਾਲ-ਨਾਲ ‘ਮੈਰਾਥਨ ਐਕਸਪੋ’ ਦਾ ਉਦਘਾਟਨ ਵੀ ਕੀਤਾ। ਇਸ ਵਿੱਚ 20 ਸਟਾਲ ਲਗਾਏ ਗਏ ਹਨ, ਜਿੱਥੇ ਕਸ਼ਮੀਰ ਦੇ ਰਵਾਇਤੀ ਦਸਤਕਾਰੀ ਉਤਪਾਦ, ਹੈਂਡਲੂਮ, ਖੇਤੀਬਾੜੀ ਦੀ ਉਪਜ ਅਤੇ ਹੋਰ ਸਥਾਨਕ ਵਸਤਾਂ ਪ੍ਰਦਰਸ਼ਿਤ ਕੀਤੀਆਂ ਗਈਆਂ। ਇਸ ਐਕਸਪੋ ਦਾ ਮਕਸਦ ਸਥਾਨਕ ਉੱਦਮੀਆਂ, ਕਾਰੀਗਰਾਂ ਅਤੇ ਕਾਰੋਬਾਰੀਆਂ ਨੂੰ ਆਪਣੇ ਉਤਪਾਦ ਦੌੜਾਕਾਂ, ਸੈਲਾਨੀਆਂ ਅਤੇ ਹੋਰ ਮਹਿਮਾਨਾਂ ਤੱਕ ਪਹੁੰਚਾਉਣ ਦਾ ਮੌਕਾ ਦੇਣਾ ਹੈ। ਇਸ ਤਰ੍ਹਾਂ ਖੇਡ ਸਮਾਗਮ ਰਾਹੀਂ ਕਸ਼ਮੀਰ ਦੇ ਸਥਾਨਕ ਉਤਪਾਦਾਂ ਅਤੇ ਸੈਰ-ਸਪਾਟੇ ਨੂੰ ਵੀ ਉਤਸ਼ਾਹਿਤ ਕੀਤਾ ਜਾ ਰਿਹਾ ਹੈ।
ਆਵਾਜਾਈ ਲਈ ਵਿਸ਼ੇਸ਼ ਪ੍ਰਬੰਧ
ਮੈਰਾਥਨ ਦੌਰਾਨ ਦੌੜਾਕਾਂ ਅਤੇ ਆਮ ਲੋਕਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਟ੍ਰੈਫਿਕ ਵਿਭਾਗ ਨੇ ਕਈ ਥਾਵਾਂ ’ਤੇ ਪਾਬੰਦੀਆਂ ਅਤੇ ਰੂਟ ਬਦਲਣ ਦੇ ਪ੍ਰਬੰਧ ਕੀਤੇ। ਵਾਹਨ ਚਾਲਕਾਂ ਨੂੰ ਆਪਣਾ ਸਫ਼ਰ ਪਹਿਲਾਂ ਤੋਂ ਤੈਅ ਕਰਨ, ਟ੍ਰੈਫਿਕ ਸਲਾਹਾਂ ਦੀ ਪਾਲਣਾ ਕਰਨ ਅਤੇ ਬਦਲਵੇਂ ਰਸਤਿਆਂ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ ਗਈ। ਪ੍ਰਸ਼ਾਸਨ ਮੁਤਾਬਕ, ਪਾਬੰਦੀਆਂ ਦੌਰਾਨ ਐਂਬੂਲੈਂਸਾਂ ਅਤੇ ਫਾਇਰ ਬ੍ਰਿਗੇਡ ਸਮੇਤ ਐਮਰਜੈਂਸੀ ਸੇਵਾਵਾਂ ਨੂੰ ਤਰਜੀਹ ਦਿੱਤੀ ਗਈ ਹੈ। ਟ੍ਰੈਫਿਕ ਸਬੰਧੀ ਸਹਾਇਤਾ ਲਈ ਸ੍ਰੀਨਗਰ ਟ੍ਰੈਫਿਕ ਪੁਲਿਸ ਦੀ ਹੈਲਪਲਾਈਨ 103 ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।
ਸਮਾਗਮ ਦੌਰਾਨ ਪਤਝੜ ਦੀ ਹਲਕੀ ਧੁੱਪ ਨੇ ਵੀ ਮੌਸਮ ਨੂੰ ਸੁਹਾਵਣਾ ਬਣਾਈ ਰੱਖਿਆ। ਇਸ ਮੈਰਾਥਨ ਨੇ ਕਸ਼ਮੀਰ ਦੀ ਕੁਦਰਤੀ ਸੁੰਦਰਤਾ, ਅਮੀਰ ਸੱਭਿਆਚਾਰ, ਸੈਰ-ਸਪਾਟੇ ਅਤੇ ਖੇਡਾਂ ਦੀਆਂ ਸੰਭਾਵਨਾਵਾਂ ਨੂੰ ਕੌਮੀ ਅਤੇ ਕੌਮਾਂਤਰੀ ਪੱਧਰ ’ਤੇ ਉਜਾਗਰ ਕੀਤਾ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
