Mansa : ਵੇਦਾਂਤਾ ਪਾਵਰ ਦੇ ਉਪਰਾਲੇ ਨਾਲ ਪੰਜਾਬ ਦਾ ਸਭ ਤੋਂ ਵੱਡਾ ਟੋਰੇਫਾਈਡ ਬਾਇਓਮਾਸ ਪਲਾਂਟ ਹੋਇਆ ਸਥਾਪਤ
ਮਾਨਸਾ, 29 ਅਪ੍ਰੈਲ(ਵਿਸ਼ਵ ਵਾਰਤਾ) Mansa : ਮਾਨਸਾ ਨੇੜਲੇ ਪਿੰਡ ਬਣਾਂਵਾਲਾ ਵਿਖੇ ਨਿੱਜੀ ਭਾਈਵਾਲੀ ਤਹਿਤ ਲੱਗੇ ਉਤਰੀ ਭਾਰਤ ਦੇ ਸਭ ਤੋਂ ਵੱਡੇ ਤਾਪਘਰ ਤਲਵੰਡੀ ਸਾਬੋ ਪਾਵਰ ਲਿਮਟਿਡ (ਟੀਐਸਪੀਐਲ) ਦੀ ਵੇਦਾਂਤਾ ਕੰਪਨੀ ਦੇ ਯਤਨਾਂ ਨਾਲ ਤਾਪਘਰ ਨੇੜੇ ਸੂਬੇ ਦਾ ਸਭ ਤੋਂ ਵੱਡਾ ਬਾਇਓਮਾਸ ਉਤਪਾਦਨ ਪਲਾਂਟ ਸਥਾਪਿਤ ਕੀਤਾ ਹੈ। ਇਹ ਪਲਾਂਟ ਉਨ੍ਹਾਂ ਦੇ ਰਣਨੀਤਿਕ ਕਾਰੋਬਾਰੀ (ਸਟ੍ਰੈਟੇਜੀਕ ਬਿਜਨੇਸ ਪਾਰਟਨਰਾਂ) ਦੁਆਰਾ ਲਗਾਇਆ ਗਿਆ ਹੈ। ਇਸ ਨਵੇਂ ਪਲਾਂਟ ਦੀ ਬਾਇਓ-ਪੈਲੇਟ ਬਨਾਉਣ ਦੀ ਕੁੱਲ ਸਮਰੱਥਾ 500 ਟਨ ਪ੍ਰਤੀ ਦਿਨ ਹੈ।
ਨਵੇਂ ਬਣੇ ਇਸ ਪਲਾਂਟ ਦਾ ਉਦਘਾਟਨ ਪੰਜਾਬ ਕੰਟਰੋਲ ਬੋਰਡ ਦੇ ਚੇਅਰਮੈਨ ਡਾ. ਆਦਰਸ਼ ਪਾਲ ਵਿਗ ਨੇ ਕੀਤਾ।ਇਸ ਮੌਕੇ ਪੰਕਜ ਸ਼ਰਮਾ, ਮੁੱਖ ਸੰਚਾਲਣ ਅਧਿਕਾਰੀ, ਟੀਐਸਪੀਐਲ, ਮੁੱਖ ਵਾਤਾਵਰਣ ਇੰਜੀਨੀਅਰ, ਪੀਪੀਸੀਬੀ ਸਮੀਤਾ, ਸੀਨੀਅਰ ਵਾਤਾਵਰਣ ਇੰਜੀਨੀਅਰ ਇੰਜੀਨੀਅਰ ਰਮਨਦੀਪ ਸਿੰਘ ਵੀ ਮੌਜੂਦ ਸਨ।
ਵੇਦਾਂਤਾ ਪਾਵਰ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਰਾਜਿੰਦਰ ਸਿੰਘ ਅਹੂਜਾ ਨੇ ਕਿਹਾ ਕਿ ਟੋਰੇਫਾਈਡ ਬਾਇਓਮਾਸ ਇੱਕ ਉੱਚ-ਗੁਣਵੱਤਾ ਵਾਲਾ ਠੋਸ ਬਾਇਓਫਿਊਲ ਹੈ, ਜੋ ਝੋਨੇ ਦੀ ਵਾਢੀ ਮਗਰੋਂ ਬਚੀ ਪਰਾਲ਼ੀ ਤੋਂ ਬਣਾਇਆ ਜਾਂਦਾ ਹੈ ਅਤੇ ਇਸ ਨੂੰ ਇੱਕ ਰਸਾਇਣਕ ਪ੍ਰਕਿਰਿਆ ਤੋਂ ਬਾਅਦ ਤਿਆਰ ਕੀਤਾ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਉਤਪਾਦ ਕੋਇਲੇ ਦੇ ਬਦਲੇ ਇੱਕ ਸਾਫ ਅਤੇ ਕਾਰਬਨ-ਨਿਊਟ੍ਰਲ ਵਿਕਲਪ ਦੇ ਤੌਰ ’ਤੇ ਕੰਮ ਕਰਦਾ ਹੈ। ਉਨ੍ਹਾਂ ਕਿਹਾ ਕਿ ਤਾਪਘਰ ਸਿਰਫ ਉੱਚ-ਗੁਣਵੱਤਾ ਵਾਲੇ ਬਾਇਓਫਿਊਲਜ਼ ਹੀ ਵਰਤਦਾ ਹੈ।
ਟੀਐਸਪੀਐਲ ਦੇ ਮੁੱਖ ਸੰਚਾਲਣ ਪੰਕਜ ਸ਼ਰਮਾਂ ਨੇ ਦੱਸਿਆ ਕਿ ਪੰਜਾਬ ਹਰ ਸਾਲ ਲਗਭਗ 15 ਤੋਂ20 ਮਿਲੀਅਨ ਟਨ ਝੋਨੇ ਤੋਂ ਬਣੀ ਪਰਾਲ਼ੀ ਦਾ ਉਤਪਾਦਨ ਕਰਦਾ ਹੈ, ਜਿਸ ਨੂੰ ਜ਼ਿਆਦਾਤਰ ਖੇਤਾਂ ਵਿੱਚ ਹੀ ਸਾੜ ਦਿੱਤਾ ਜਾਂਦਾ ਹੈ, ਜਿਸ ਨਾਲ ਉੱਤਰੀ ਭਾਰਤ ਵਿੱਚ ਮੌਸਮੀ ਰੂਪ ਨਾਲ ਵਾਤਾਵਰਣ ਪ੍ਰਦੂਸ਼ਣ ਵੱਧਦਾ ਹੈ। ਉਨ੍ਹਾਂ ਕਿਹਾ ਕਿ ਤਾਪਘਰ ਇਸ ਬਾਇਓਮਾਸ ਨੂੰ ਆਪਣੇ ਮੌਜੂਦਾ ਬਾਲਣ ਵਿੱਚ ਸ਼ਾਮਲ ਕਰਕੇ ਆਪਣੇ ਕਾਰਬਨ ਫੁੱਟਪਿ੍ਰੰਟ ਨੂੰ ਦੋ ਤਰੀਕਿਆਂ ਨਾਲ ਘਟਾਉਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਤਾਪਘਰ ਨੇ ਆਪਣੇ ਰਣਨੀਤਿਕ ਵਪਾਰਕ ਸਾਥੀਆਂ ਨੂੰ ਪ੍ਰੋਤਸ਼ਾਹਿਤ ਕਰਕੇ ਲਗਭਗ 8 ਲੱਖ ਟਨ ਪਰਾਲੀ ਦੀ ਖਰੀਦ ਕੀਤੀ, ਜਿਸਨੂੰ ਕਰੀਬ 6.4 ਲੱਖ ਟਨ ਟੋਰੇਫਾਈਡ ਬਾਇਓ-ਪੈਲਟਸ ਵਿੱਚ ਬਦਲਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਕੰਪਨੀ ਆਪਣੇ ਰੋਜ਼ਾਨਾ ਕੋਲ ਦੀ ਵਰਤੋਂ ਵਿੱਚ ਕੁਲ 5 ਫੀਸਦੀ ਦੀ ਕਮੀ ਕਰੇਗੀ,ਜਿਸਨੂੰ ਸਮੇਂ ਦੇ ਨਾਲ-ਨਾਲ ਬਾਇਓਪੈਲਟਸ ਨਾਲ ਬਦਲਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਦੋਨੋ ਤਰੀਕੇ ਮਿਲਕੇ ਲਗਭਗ 2.6 ਮਿਲੀਅਨ ਟਨ ਕਾਰਬਨ ਡਾਈਆਕਸਾਈਡ ਦੇ ਉਤਸਰਜਣ ਨੂੰ ਰੋਕਣ ਵਿੱਚ ਸਹਾਇਕ ਹੋਣਗੇ।
ਪ੍ਰਦੂਸ਼ਨ ਕੰਟਰੋਲ ਬੋਰਡ ਦੇ ਚੇਅਰਮੈਨ ਡਾ. ਆਦਰਸ਼ ਪਾਲ ਵਿਗ ਨੇ ਕਿਹਾ ਕਿ “ਇਹਨਾਂ ਨਵੇਂ ਬਣੇ ਬਾਇਓਮਾਸ ਪਲਾਂਟ ਦੀ ਸਥਾਪਨਾ ਨਾਲ ਪੰਜਾਬ ਅਤੇ ਗੁਆਂਢੀ ਰਾਜਾਂ ਵਿੱਚ ਹਵਾ ਦੀ ਗੁਣਵੱਤਾ ਵਿੱਚ ਸੁਧਾਰ ਹੋਵੇਗਾ।ਉਨ੍ਹਾਂ ਕਿਹਾ ਕਿ ਇਸ ਉਪਰਾਲੇ ਸਦਕਾ ਪ੍ਰਦੂਸ਼ਣ ਨਾਲ ਨਜਿੱਠਿਆ ਜਾਵੇਗਾ ਅਤੇ ਵਾਤਾਵਰਣ ਨੂੰ ਬਚਾਉਣ ਲਈ ਇੱਕ ਅਹਿਮ ਕਦਮ ਚੁੱਕਿਆ ਗਿਆ ਹੈ।
ਇੰਜੀਨਿਅਰ ਜੀ.ਐੱਸ. ਮਜੀਠਿਆ ਨੇ ਕਿਹਾ ਕਿ ਇਸ ਉਪਰਾਲੇ ਨਾਲ ਵਾਤਾਵਰਣ ਵਿੱਚ ਵੱਡਾ ਸੁਧਾਰ ਆਵੇਗਾ, ਜਿਸਦਾ ਇਸ ਇਲਾਕੇ ਨੂੰ ਸਿਹਤ ਪੱਖੋਂ ਬੇਹੱਦ ਲਾਭ ਪੁੱਜੇਗਾ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
