Ludhiana: ਸ਼ੱਕੀ ਥੈਲੇ ‘ਚੋਂ ਮਿਲਿਆ IED ਬੰਬ! ਇਲਾਕੇ ‘ਚ ਦਹਿਸ਼ਤ ਦਾ ਮਾਹੌਲ
– ਪੁਲਿਸ ਨੇ ਦੋ ਮੁਲਜ਼ਮਾਂ ਨੂੰ ਲਿਆ ਹਿਰਾਸਤ ‘ਚ
ਲੁਧਿਆਣਾ , 25 ਸਤੰਬਰ (ਵਿਸ਼ਵ ਵਾਰਤਾ): ਲੁਧਿਆਣਾ (Ludhiana)ਦੇ ਬਸਤੀ ਜੋਧੇਵਾਲ ਇਲਾਕੇ ਵਿੱਚ ਇੱਕ ਦੁਕਾਨ ‘ਤੇ ਇੱਕ ਸ਼ੱਕੀ ਬੈਗ ਵਿੱਚੋਂ ਇੱਕ ਇੰਪ੍ਰੋਵਾਈਜ਼ਡ ਐਕਸਪਲੋਸਿਵ ਡਿਵਾਈਸ (ਆਈਈਡੀ) ਬਰਾਮਦ ਹੋਇਆ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਦੋ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਦੱਸ ਦਈਏ ਕਿ ਜਿਸ ਦੁਕਾਨ (Ludhiana) ਤੋਂ ਬੈਗ ਮਿਲਿਆ ਹੈ ਉਸ ਦੇ ਮਾਲਕ ਨੇ ਦੱਸਿਆ ਕਿ ਚਾਰ- ਪੰਜ ਦਿਨ ਪਹਿਲਾਂ, ਇੱਕ ਸ਼ੱਕੀ ਆਦਮੀ ਬ੍ਰੀਫਕੇਸ ਖਰੀਦਣ ਲਈ ਦੁਕਾਨ ‘ਤੇ ਆਇਆ। ਉਸਨੇ ਦੁਕਾਨਦਾਰ ਨੂੰ 500 ਰੁਪਏ ਐਡਵਾਂਸ ਦਿੱਤੇ ਅਤੇ ਬ੍ਰੀਫਕੇਸ ਲੈਣ ਲਈ ਜਲਦੀ ਹੀ ਵਾਪਸ ਆਉਣ ਦਾ ਵਾਅਦਾ ਕੀਤਾ। ਇਸ ਦੌਰਾਨ ਉਹ ਆਪਣੇ ਨਾਲ ਲਿਆਇਆ ਇਕ ਬੈਗ ਦੁਕਾਨ ਵਿੱਚ ਹੀ ਛੱਡ ਗਿਆ। ਬੀਤੀ ਰਾਤ ਜਦੋਂ ਬੈਗ ਵਿੱਚੋਂ ਪੈਟਰੋਲ ਦੀ ਬਦਬੂ ਆਈ ਤਾਂ ਦੁਕਾਨਦਾਰ ਨੇ ਇਮਾਰਤ ਦੇ ਮਾਲਕ ਨੂੰ ਸੂਚਿਤ ਕੀਤਾ। ਮਾਲਕ ਰਿੰਕੂ ਨੇ ਤੁਰੰਤ ਦਰੇਸੀ ਪੁਲਿਸ ਸਟੇਸ਼ਨ ਦੀ ਪੁਲਿਸ ਨੂੰ ਸੂਚਿਤ ਕੀਤਾ।
ਮਾਮਲਾ ਸ਼ੱਕੀ ਲੱਗਣ ‘ਤੇ, ਪੁਲਿਸ ਨੇ ਕਮਿਸ਼ਨਰ ਸਵਪਨ ਸ਼ਰਮਾ ਅਤੇ ਬੰਬ ਸਕੁਐਡ ਨੂੰ ਸੂਚਿਤ ਕੀਤਾ। ਜਿਸ ਤੋਂ ਬਾਅਦ ਬੰਬ ਸਕੁਐਡ ਟੀਮ ਮੌਕੇ ‘ਤੇ ਪਹੁੰਚੀ ਅਤੇ ਬੈਗ ਨੂੰ ਜ਼ਬਤ ਕਰ ਲਿਆ। ਟੀਮ ਨੇ ਜਦ ਬੈਗ ਖੋਲ੍ਹਿਆ ਅਤੇ ਇਸਦੀ ਜਾਂਚ ਕੀਤੀ ਤਾਂ ਇਸ ਵਿੱਚ ਇੱਕ ਬੈਟਰੀ, ਕੁਝ ਤਾਰਾਂ ਅਤੇ ਇੱਕ ਡਾਇਲਰ ਸੀ। ਜਦੋਂ ਇਲਾਕੇ ਦੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ ਗਈ, ਤਾਂ ਦੁਕਾਨ ਵਿੱਚ ਬੈਗ ਛੱਡਣ ਵਾਲੇ ਲੋਕਾਂ ਦੀ ਪਛਾਣ ਹੋ ਗਈ। ਵੀਰਵਾਰ ਦੁਪਹਿਰ 3 ਵਜੇ ਦੇ ਕਰੀਬ, ਪੁਲਿਸ ਨੇ ਦੋ ਸਥਾਨਕ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲਿਆ ਅਤੇ ਉਨ੍ਹਾਂ ਤੋਂ ਪੁੱਛਗਿੱਛ ਕੀਤੀ। ਮੁਲਜ਼ਮਾਂ ਨੇ ਦੁਕਾਨਦਾਰ ਨਾਲ ਨਿੱਜੀ ਰੰਜਿਸ਼ ਦੀ ਗੱਲ ਵੀ ਕਬੂਲ ਕੀਤੀ। ਦੋਵੇ ਉੱਤਰ ਪ੍ਰਦੇਸ਼ ਦੇ ਹਰਦੋਈ ਦੇ ਰਹਿਣ ਵਾਲੇ ਹਨ।
ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ” ਇਸ ਘਟਨਾ ਪਿੱਛੇ ਮੁਲਜ਼ਮਾਂ ਦਾ ਇਰਾਦਾ ਦੁਕਾਨ ਨੂੰ ਅੱਗ ਲਗਾਉਣ ਦਾ ਸੀ। ਬੰਬ ਤੇ ਸਮਾਂ 20 ਸਤੰਬਰ ਨੂੰ ਸਵੇਰੇ 1 ਵਜੇ ਦਾ ਨਿਰਧਾਰਤ ਕੀਤਾ ਗਿਆ ਸੀ, ਪਰ ਕਿਸੇ ਕਾਰਨ ਕਰਕੇ ਟਾਈਮਰ ਕੰਮ ਨਹੀਂ ਕਰ ਸਕਿਆ ਅਤੇ ਅੱਗ ਨਹੀਂ ਲੱਗੀ। ਮੁਲਜ਼ਮਾਂ ਦੀ ਯੋਜਨਾ ਉਸਦੀ ਦੁਕਾਨ ਨੂੰ ਸਾੜਨ ਦੀ ਸੀ, ਤਾਂ ਜੋ ਉਨ੍ਹਾਂ ਦਾ ਕਾਰੋਬਾਰ ਵੱਧ ਚੱਲ ਸਕੇ । ਅਤੇ ਓਥੇ ਇੱਕ ਕਾਸਮੈਟਿਕਸ ਸਟੋਰ ਖੋਲਿਆ ਜਾ ਸਕੇ।” ਉਸਨੇ ਅਤੇ ਉਸਦੇ ਦੋਸਤ ਆਮਿਰ ਨੇ ਯੂਟਿਊਬ ਤੋਂ ਵਿਸਫੋਟਕ ਯੰਤਰ ਬਣਾਉਣਾ ਸਿੱਖਿਆ। ਉਨ੍ਹਾਂ ਨੇ ਫਲਿੱਪਕਾਰਟ ਅਤੇ ਬਾਜ਼ਾਰ ਤੋਂ ਬਹੁਤ ਸਾਰੀ ਸਮੱਗਰੀ ਖਰੀਦੀ। ਜੇਕਰ ਅੱਗ ਲੱਗ ਜਾਂਦੀ, ਤਾਂ ਦੁਕਾਨ ਦੀ ਛੱਤ ‘ਤੇ ਰਹਿਣ ਵਾਲੇ ਪਰਿਵਾਰ ਦਾ ਵੀ ਨੁਕਸਾਨ ਹੋਣਾ ਸੀ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
