International: ਦੁਨੀਆ ਦੇ ਸਭ ਤੋਂ ਵੱਧ ਰਹਿਣ ਯੋਗ ਸ਼ਹਿਰਾਂ ਦੀ ਲਿਸਟ ‘ਚ ਆਸਟ੍ਰੇਲੀਆ ਦੇ ਦੋ ਸ਼ਹਿਰਾਂ ਨੇ ਟਾਪ 5 ‘ਚ ਬਣਾਈ ਥਾਂ
ਚੰਡੀਗੜ੍ਹ, 12 ਜੁਲਾਈ (ਵਿਸ਼ਵ ਵਾਰਤਾ) – 2026 ਦੀ ਗਲੋਬਲ ਲਾਈਵੇਬਿਲਟੀ ਇੰਡੈਕਸ ਵਿੱਚ ਆਸਟ੍ਰੇਲੀਆ ਦੇ ਦੋ ਸ਼ਹਿਰਾਂ ਨੇ ਦੁਨੀਆ ਦੇ ਟਾਪ-5 ਸਭ ਤੋਂ ਵੱਧ ਰਹਿਣ ਯੋਗ ਸ਼ਹਿਰਾਂ ਵਿੱਚ ਥਾਂ ਬਣਾਈ ਹੈ। ਇਸ ਵਾਰ ਮੈਲਬੌਰਨ ਨੇ ਆਪਣੇ ਹੀ ਦੇਸ਼ ਦੇ ਸਿਡਨੀ ਨੂੰ ਪਿੱਛੇ ਛੱਡਦੇ ਹੋਏ ਤੀਜਾ ਸਥਾਨ ਹਾਸਲ ਕੀਤਾ ਹੈ।
ਟਾਪ-5 ਸਭ ਤੋਂ ਵੱਧ ਰਹਿਣ ਯੋਗ ਸ਼ਹਿਰ (2026) ਦੀ ਰੈਂਕਿੰਗ ਲਿਸਟ ‘ਚ ਕੋਪੇਨਹੇਗਨ (ਡੈਨਮਾਰਕ), ਵਿਆਨਾ (ਆਸਟਰੀਆ), ਮੈਲਬੌਰਨ (ਆਸਟ੍ਰੇਲੀਆ), ਸਿਡਨੀ (ਆਸਟ੍ਰੇਲੀਆ) ਅਤੇ ਓਸਾਕਾ (ਜਪਾਨ) ਸ਼ਾਮਿਲ ਹਨ। ਇਸ ਤੋਂ ਬਿਨਾ ਇਸ ਸੂਚੀ ‘ਚ ਐਡੀਲੇਡ ਵੀ ਅੱਠਵੇਂ ਸਥਾਨ ‘ਤੇ ਹੈ। ਮੈਲਬੌਰਨ ਅਤੇ ਸਿਡਨੀ ਦੋਵਾਂ ਨੂੰ ਕੁੱਲ 100 ਵਿੱਚੋਂ 97 ਅੰਕ ਮਿਲੇ। ਦੋਵਾਂ ਨੇ ਸਿਹਤ ਸੰਭਾਲ ਅਤੇ ਸਿੱਖਿਆ ਵਿੱਚ ਪੂਰੇ 100 ਅੰਕ, ਸਥਿਰਤਾ ਵਿੱਚ 95 ਅਤੇ ਬੁਨਿਆਦੀ ਢਾਂਚੇ ਵਿੱਚ 96 ਅੰਕ ਪ੍ਰਾਪਤ ਕੀਤੇ।
ਫ਼ਰਕ ਸੱਭਿਆਚਾਰ ਅਤੇ ਵਾਤਾਵਰਣ ਸ਼੍ਰੇਣੀ ਵਿੱਚ ਰਿਹਾ, ਜਿੱਥੇ ਮੈਲਬੌਰਨ ਨੂੰ 96 ਅੰਕ ਮਿਲੇ, ਜੋ ਸਿਡਨੀ ਨਾਲੋਂ ਦੋ ਅੰਕ ਵੱਧ ਸਨ। ਇਸ ਸ਼੍ਰੇਣੀ ਵਿੱਚ ਮੌਸਮ, ਖੇਡਾਂ ਅਤੇ ਸੱਭਿਆਚਾਰਕ ਗਤੀਵਿਧੀਆਂ, ਖਾਣ-ਪੀਣ ਅਤੇ ਹੋਰ ਉਪਭੋਗਤਾ ਸੇਵਾਵਾਂ ਵਰਗੇ ਪੱਖਾਂ ਦਾ ਮੁਲਾਂਕਣ ਕੀਤਾ ਜਾਂਦਾ ਹੈ।
ਮੈਲਬੌਰਨ ਦੀ ਇਹ ਉਪਲਬਧੀ ਇਸ ਸਾਲ ਦੀਆਂ ਹੋਰ ਅੰਤਰਰਾਸ਼ਟਰੀ ਰੈਂਕਿੰਗਾਂ ਨਾਲ ਵੀ ਮੇਲ ਖਾਂਦੀ ਹੈ। ਇਸ ਨੂੰ ਪਹਿਲਾਂ Time Out ਵੱਲੋਂ ਦੁਨੀਆ ਦਾ ਸਭ ਤੋਂ ਵਧੀਆ ਸ਼ਹਿਰ ਵੀ ਚੁਣਿਆ ਗਿਆ ਸੀ ਅਤੇ ਖਾਣ-ਪੀਣ ਲਈ ਦੁਨੀਆ ਦੇ ਚੋਟੀ ਦੇ ਸ਼ਹਿਰਾਂ ਵਿੱਚ ਵੀ ਸ਼ਾਮਲ ਕੀਤਾ ਗਿਆ ਸੀ।
ਦੱਸ ਦਈਏ ਕਿ ਇਹ ਰੈਂਕਿੰਗ ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ (EIU) ਵੱਲੋਂ 173 ਸ਼ਹਿਰਾਂ ਦਾ ਮੁਲਾਂਕਣ ਕਰਕੇ ਤਿਆਰ ਕੀਤੀ ਗਈ ਹੈ। ਇਸ ਵਿੱਚ ਸਥਿਰਤਾ, ਸਿਹਤ ਸੰਭਾਲ, ਸਿੱਖਿਆ, ਸੱਭਿਆਚਾਰ ਅਤੇ ਵਾਤਾਵਰਣ, ਅਤੇ ਬੁਨਿਆਦੀ ਢਾਂਚੇ ਵਰਗੇ ਮਾਪਦੰਡਾਂ ਨੂੰ ਧਿਆਨ ਵਿੱਚ ਰੱਖਿਆ ਜਾਂਦਾ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
