ਭਾਰਤ ਅਤੇ ਫਿਜੀ ਨੇ ਜਨਤਕ ਸਿਹਤ ਅਤੇ ਫਾਰਮਾਸਿਊਟੀਕਲ ਖੇਤਰਾਂ ਵਿੱਚ ਦੁਵੱਲੇ ਸਬੰਧਾਂ ਨੂੰ ਕੀਤਾ ਮਜ਼ਬੂਤ
ਸੁਵਾ, 14 ਅਕਤੂਬਰ (ਵਿਸ਼ਵ ਵਾਰਤਾ): ਭਾਰਤ ਅਤੇ ਫਿਜੀ ਨੇ ਸਿਹਤ ਮਾਮਲਿਆਂ ‘ਤੇ ਚੌਥੀ ‘ਸਾਂਝੀ ਕਾਰਜਕਾਰੀ ਕਮੇਟੀ’ (JWG-Joint Working Group ) ਦੀ ਮੀਟਿੰਗ ਕੀਤੀ, ਜਿਸ ਵਿੱਚ ਜਨਤਕ ਸਿਹਤ ਦੇ ਨਾਲ-ਨਾਲ ਦਵਾਈਆਂ ਅਤੇ ਫਾਰਮਾਸਿਊਟੀਕਲ ਉਤਪਾਦਾਂ ਦੇ ਖੇਤਰ ਵਿੱਚ ਸਹਿਯੋਗ ਨੂੰ ਮਜ਼ਬੂਤ ਕਰਨ ‘ਤੇ ਚਰਚਾ ਕੀਤੀ ਗਈ।
ਇਸ ਮੀਟਿੰਗ ਵਿੱਚ ਫਿਜੀ ਵਿੱਚ ਭਾਰਤ ਦੇ ਹਾਈ ਕਮਿਸ਼ਨਰ ਸੁਨੀਤ ਮਹਿਤਾ, ਫਿਜੀ ਦੇ ਸਿਹਤ ਅਤੇ ਮੈਡੀਕਲ ਸੇਵਾਵਾਂ ਮੰਤਰਾਲੇ ਦੀ ਕਾਰਜਕਾਰੀ ਸਥਾਈ ਸਕੱਤਰ ਲੁਈਸਾ ਸਿਕਾਮਾਤਾਨਾ ਅਤੇ ਭਾਰਤ ਦੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੀ ਆਰਥਿਕ ਸਲਾਹਕਾਰ ਗੀਤੂ ਜੋਸ਼ੀ ਨੇ ਵਰਚੁਅਲ ਤੌਰ ‘ਤੇ (ਆਨਲਾਈਨ) ਹਿੱਸਾ ਲਿਆ।
ਮੀਟਿੰਗ ਦੌਰਾਨ, ਦੋਵਾਂ ਧਿਰਾਂ ਨੇ ਭਾਰਤ ਅਤੇ ਫਿਜੀ ਦੇ ਲੋਕਾਂ ਦੇ ਭਲੇ ਲਈ ਸਿਹਤ ਦੇ ਖੇਤਰ ਵਿੱਚ ਦੁਵੱਲੇ ਸਹਿਯੋਗ ਨੂੰ ਮਜ਼ਬੂਤ ਕਰਨ ਦੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਇਆ।
ਫਿਜੀ ਵਿੱਚ ਭਾਰਤੀ ਹਾਈ ਕਮਿਸ਼ਨ ਨੇ ‘ਐਕਸ’ (X) ‘ਤੇ ਇੱਕ ਪੋਸਟ ਵਿੱਚ ਕਿਹਾ, “ਹਾਈ ਕਮਿਸ਼ਨਰ ਸੁਨੀਤ ਮਹਿਤਾ ਨੇ ਸਿਹਤ ਮਾਮਲਿਆਂ ‘ਤੇ ਚੌਥੀ ਭਾਰਤ-ਫਿਜੀ ਸਾਂਝੀ ਕਾਰਜਕਾਰੀ ਕਮੇਟੀ (JWG) ਦੀ ਮੀਟਿੰਗ ਵਿੱਚ ਵਰਚੁਅਲ ਤੌਰ ‘ਤੇ ਹਿੱਸਾ ਲਿਆ। ਇਸ ਮੀਟਿੰਗ ਵਿੱਚ ਫਿਜੀ ਦੇ ਸਿਹਤ ਅਤੇ ਮੈਡੀਕਲ ਸੇਵਾਵਾਂ ਮੰਤਰਾਲੇ ਦੀ ਕਾਰਜਕਾਰੀ ਸਥਾਈ ਸਕੱਤਰ ਸ਼੍ਰੀਮਤੀ ਲੁਈਸਾ ਸਿਕਾਮਾਤਾਨਾ ਅਤੇ ਭਾਰਤ ਦੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੀ ਆਰਥਿਕ ਸਲਾਹਕਾਰ ਸ਼੍ਰੀਮਤੀ ਗੀਤੂ ਜੋਸ਼ੀ ਵੀ ਸ਼ਾਮਲ ਸਨ।”
ਬਿਆਨ ਵਿੱਚ ਅੱਗੇ ਕਿਹਾ ਗਿਆ, “ਚਰਚਾ ਦਾ ਮੁੱਖ ਕੇਂਦਰ ਜਨਤਕ ਸਿਹਤ, ਛੂਤ ਦੀਆਂ ਬਿਮਾਰੀਆਂ (ਜਿਵੇਂ ਕਿ HIV/AIDS), ਅਤੇ ਦਵਾਈਆਂ ਤੇ ਫਾਰਮਾਸਿਊਟੀਕਲ ਉਤਪਾਦਾਂ ਦੇ ਖੇਤਰ ਵਿੱਚ ਭਾਰਤ-ਫਿਜੀ ਸਹਿਯੋਗ ਨੂੰ ਮਜ਼ਬੂਤ ਕਰਨਾ ਸੀ। ਇਸ ਵਰਚੁਅਲ ਮੀਟਿੰਗ ਨੇ ਸਿਹਤ ਨਾਲ ਜੁੜੀਆਂ ਮੁੱਖ ਤਰਜੀਹਾਂ ‘ਤੇ ਵਿਚਾਰਾਂ ਦੇ ਆਦਾਨ-ਪ੍ਰਦਾਨ ਅਤੇ ਬਿਹਤਰ ਸਹਿਯੋਗ ਲਈ ਨਵੇਂ ਰਾਹ ਲੱਭਣ ਦਾ ਮੌਕਾ ਪ੍ਰਦਾਨ ਕੀਤਾ, ਜਿਸ ਨਾਲ ਦੋਵਾਂ ਦੇਸ਼ਾਂ ਨੇ ਆਪਣੇ ਲੋਕਾਂ ਦੇ ਭਲੇ ਲਈ ਸਿਹਤ ਖੇਤਰ ਵਿੱਚ ਦੁਵੱਲੇ ਸਹਿਯੋਗ ਨੂੰ ਮਜ਼ਬੂਤ ਕਰਨ ਦੀ ਵਚਨਬੱਧਤਾ ਨੂੰ ਦੁਹਰਾਇਆ।”
ਇਸ ਤੋਂ ਪਹਿਲਾਂ 12 ਅਕਤੂਬਰ ਨੂੰ, ਫਿਜੀ ਦੇ ਸਿਹਤ ਅਤੇ ਮੈਡੀਕਲ ਸੇਵਾਵਾਂ ਮੰਤਰੀ ਰਾਤੂ ਅਟੋਨੀਓ ਰਾਬੀਸੀ ਲਾਲਾਬਾਲਾਵੂ ਨੇ ਤਾਮਾਵੁਆ ਦੇ ਟਵੋਮੀ ਹਸਪਤਾਲ ਵਿਖੇ ‘ਜੈਪੁਰ ਫੁੱਟ ਕੈਂਪ’ ਦਾ ਉਦਘਾਟਨ ਕੀਤਾ। ਫਿਜੀ ਵਿੱਚ ਭਾਰਤੀ ਹਾਈ ਕਮਿਸ਼ਨ ਨੇ ਦੱਸਿਆ ਕਿ ਇਹ ਕੈਂਪ ਸੁਵਾ, ਨਾਡੀ ਅਤੇ ਲਾਬਾਸਾ ਵਿੱਚ ਅੰਗ ਗੁਆ ਚੁੱਕੇ ਲਗਭਗ 650 ਵਿਅਕਤੀਆਂ ਨੂੰ ਨਕਲੀ ਅੰਗ (artificial limbs) ਮੁਹੱਈਆ ਕਰਵਾਏਗਾ। “ਜੈਪੁਰ ਫੁੱਟ ਕੈਂਪ ਦਾ ਉਦਘਾਟਨ ਅੱਜ ਫਿਜੀ ਦੇ ਸਿਹਤ ਅਤੇ ਮੈਡੀਕਲ ਸੇਵਾਵਾਂ ਬਾਰੇ ਮੰਤਰੀ, ਮਾਨਯੋਗ ਡਾ. ਰਾਤੂ ਅਟੋਨੀਓ ਰਾਬੀਸੀ ਲਾਲਾਬਾਲਾਵੂ ਦੁਆਰਾ ਟਾਮਾਵੁਆ ਦੇ ਟਵੋਮੀ ਹਸਪਤਾਲ ਵਿਖੇ ਕੀਤਾ ਗਿਆ। ਭਾਰਤ ਦੇ ਹਾਈ ਕਮਿਸ਼ਨ, ਫਿਜੀ ਦੇ ਸਿਹਤ ਅਤੇ ਮੈਡੀਕਲ ਸੇਵਾਵਾਂ ਮੰਤਰਾਲੇ ਅਤੇ ਭਗਵਾਨ ਮਹਾਵੀਰ ਵਿਕਲਾਂਗ ਸਹਾਇਤਾ ਸਮਿਤੀ (BMVSS), ਭਾਰਤ ਦੀ ਇੱਕ ਸਾਂਝੀ ਪਹਿਲਕਦਮੀ ਵਜੋਂ, ਇਹ ਕੈਂਪ ਸੁਵਾ, ਨਾਡੀ ਅਤੇ ਲਾਬਾਸਾ ਖੇਤਰਾਂ ਵਿੱਚ ਅੰਗ ਗੁਆ ਚੁੱਕੇ ਲਗਭਗ 650 ਵਿਅਕਤੀਆਂ ਨੂੰ ਨਕਲੀ ਅੰਗ ਮੁਹੱਈਆ ਕਰਵਾਏਗਾ,” ਫਿਜੀ ਵਿੱਚ ਭਾਰਤੀ ਹਾਈ ਕਮਿਸ਼ਨ ਨੇ ‘ਐਕਸ’ (X) ‘ਤੇ ਪੋਸਟ ਕੀਤਾ।
ਰਾਤੂ ਅਟੋਨੀਓ ਰਾਬੀਸੀ ਲਾਲਾਬਾਲਾਵੂ ਨੇ ਟਾਮਾਵੁਆ ਦੇ ਟਵੋਮੀ ਹਸਪਤਾਲ ਵਿਖੇ ਜੈਪੁਰ ਫੁੱਟ ਕੈਂਪ ਦੇ ਉਦਘਾਟਨ ਦੌਰਾਨ ਅਪਾਹਜ ਵਿਅਕਤੀਆਂ ਨੂੰ ਨਕਲੀ ਅੰਗ ਸੌਂਪੇ। ਲਾਲਾਬਾਲਾਵੂ ਨੇ ਕੈਂਪ ਵਾਲੀ ਥਾਂ ਅਤੇ ਅੰਗ ਲਗਾਉਣ ਦੀਆਂ ਸਹੂਲਤਾਂ ਦਾ ਦੌਰਾ ਵੀ ਕੀਤਾ ਅਤੇ ਚੱਲਣ-ਫਿਰਨ ਦੀ ਸਮਰੱਥਾ ਬਹਾਲ ਕਰਨ, ਆਤਮ-ਨਿਰਭਰਤਾ ਨੂੰ ਉਤਸ਼ਾਹਿਤ ਕਰਨ ਅਤੇ ਜੀਵਨ ਪੱਧਰ ਨੂੰ ਬਿਹਤਰ ਬਣਾਉਣ ਲਈ ਕੀਤੇ ਜਾ ਰਹੇ ਕੰਮਾਂ ਨੂੰ ਨੇੜਿਓਂ ਦੇਖਿਆ।
