ICC ਨੇ ਐਲਾਨਿਆ ਅੰਡਰ-19 ਪੁਰਸ਼ ਕ੍ਰਿਕਟ ਵਿਸ਼ਵ ਕੱਪ 2026 ਦਾ ਸ਼ਡਿਊਲ
– 15 ਜਨਵਰੀ ਤੋਂ ਸ਼ੁਰੂ ਹੋਣਗੇ ਮੁਕਾਬਲੇ
– ਇਸ ਦਿਨ ਹੋਵੇਗਾ ਫਾਈਨਲ ਮੈਚ, ਦੇਖੋ ਪੂਰਾ Schedule
ਨਵੀ ਦਿੱਲੀ, 19 ਨਵੰਬਰ 2025 (ਵਿਸ਼ਵ ਵਾਰਤਾ) : ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ICC) ਨੇ ਅੰਡਰ-19 ਪੁਰਸ਼ ਕ੍ਰਿਕਟ ਵਿਸ਼ਵ ਕੱਪ 2026 ਦੇ ਸ਼ਡਿਊਲ ਦਾ ਐਲਾਨ ਕਰ ਦਿੱਤਾ ਹੈ। ਇਹ ਵਿਸ਼ਵ ਕੱਪ 15 ਜਨਵਰੀ ਤੋਂ 6 ਫਰਵਰੀ, 2026 ਤੱਕ ਖੇਡਿਆ ਜਾਵੇਗਾ, ਜਿਸਦੀ ਮੇਜ਼ਬਾਨੀ ਜ਼ਿੰਬਾਬਵੇ ਅਤੇ ਨਾਮੀਬੀਆ ਸਾਂਝੇ ਤੌਰ ‘ਤੇ ਕਰਨਗੇ। ਇਸ ਵਿਸ਼ਵ ਕੱਪ ਵਿੱਚ 16 ਟੀਮਾਂ ਅਤੇ ਕੁੱਲ 41 ਮੈਚ ਹੋਣਗੇ। ਫਾਈਨਲ 6 ਫਰਵਰੀ ਨੂੰ ਹਰਾਰੇ ਸਪੋਰਟਸ ਕਲੱਬ ਵਿੱਚ ਖੇਡਿਆ ਜਾਵੇਗਾ।
ਮੈਚਾਂ ਲਈ ਜ਼ਿੰਬਾਬਵੇ ਦੇ ਹਰਾਰੇ ਸਪੋਰਟਸ ਕਲੱਬ, ਤਾਕਾਸ਼ਿੰਗਾ ਸਪੋਰਟਸ ਕਲੱਬ ਅਤੇ ਕਵੀਨਜ਼ ਸਪੋਰਟਸ ਕਲੱਬ ਵਰਗੇ ਮੈਦਾਨਾਂ ਦੀ ਵਰਤੋਂ ਕੀਤੀ ਜਾਵੇਗੀ। ਨਾਮੀਬੀਆ ਵਿੱਚ, ਮੈਚ ਨਾਮੀਬੀਆ ਕ੍ਰਿਕਟ ਗਰਾਊਂਡ ਅਤੇ ਨਾਮੀਬੀਆ ਦੇ ਐਚਪੀ ਓਵਲ ਵਿੱਚ ਖੇਡੇ ਜਾਣਗੇ। ਵਿਸ਼ਵ ਕੱਪ ਵਿੱਚ ਹਿੱਸਾ ਲੈਣ ਵਾਲੀਆਂ 16 ਟੀਮਾਂ ਨੂੰ ਚਾਰ-ਚਾਰ ਟੀਮਾਂ ਦੇ ਚਾਰ ਗਰੁੱਪਾਂ (ਏ, ਬੀ, ਸੀ, ਡੀ) ਵਿੱਚ ਵੰਡਿਆ ਗਿਆ ਹੈ। ਫਾਈਨਲ ਦਾ ਰਸਤਾ ਸੁਪਰ ਸਿਕਸ ਪੜਾਅ ਅਤੇ ਸੈਮੀਫਾਈਨਲ ਰਾਹੀਂ ਤੈਅ ਹੋਵੇਗਾ।
ਭਾਰਤੀ ਟੀਮ ਗਰੁੱਪ ਏ ਵਿੱਚ ਹੈ। ਇਸ ਗਰੁੱਪ ਵਿੱਚ ਹੋਰ ਤਿੰਨ ਟੀਮਾਂ ਬੰਗਲਾਦੇਸ਼, ਅਮਰੀਕਾ ਅਤੇ ਨਿਊਜ਼ੀਲੈਂਡ ਹਨ।
ਗਰੁੱਪ ਬੀ ਵਿੱਚ ਜ਼ਿੰਬਾਬਵੇ, ਪਾਕਿਸਤਾਨ, ਇੰਗਲੈਂਡ ਅਤੇ ਸਕਾਟਲੈਂਡ ਸ਼ਾਮਲ ਹਨ।
ਗਰੁੱਪ ਸੀ ਵਿੱਚ ਆਸਟ੍ਰੇਲੀਆ, ਆਇਰਲੈਂਡ, ਜਾਪਾਨ ਅਤੇ ਸ਼੍ਰੀਲੰਕਾ ਸ਼ਾਮਲ ਹਨ।
ਗਰੁੱਪ ਡੀ ਵਿੱਚ ਤਨਜ਼ਾਨੀਆ, ਵੈਸਟ ਇੰਡੀਜ਼, ਅਫਗਾਨਿਸਤਾਨ ਅਤੇ ਦੱਖਣੀ ਅਫਰੀਕਾ ਨੂੰ ਜਗ੍ਹਾ ਦਿੱਤੀ ਗਈ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
