Governor’s Golf Cup : ਪਰਿਵਾਰ ਦੀ ਖੇਡ ਵਿਰਾਸਤ ਨੂੰ ਅੱਗੇ ਵਧਾ ਰਿਹਾ ਜ਼ੋਰਾਵਰ ਚਹਿਲ ; ਗਵਰਨਰਜ਼ ਗੌਲਫ ਕੱਪ ਵਿੱਚ ਬਣਿਆ ਉਪ ਜੇਤੂ
ਚੰਡੀਗੜ੍ਹ, 10 ਨਵੰਬਰ(ਵਿਸ਼ਵ ਵਾਰਤਾ) Governor’s Golf Cup : ਹਾਕੀ ਓਲੰਪੀਅਨ ਅਤੇ ਜੂਨੀਅਰ ਵਿਸ਼ਵ ਕੱਪ ਜੇਤੂ ਗਗਨ ਅਜੀਤ ਸਿੰਘ ਦੇ ਬੇਟਾ ਜ਼ੋਰਾਵਰ ਚਹਿਲ ਖੇਡਾਂ ਦੀ ਵਿਰਾਸਤ ਨੂੰ ਅੱਗੇ ਵਧਾ ਰਿਹਾ ਹੈ। 9 ਵਰਿਆਂ ਦੇ ਜ਼ੋਰਾਵਰ ਚਹਿਲ ਨੇ ਚੰਡੀਗੜ੍ਹ ਗੌਲਫ ਐਸੋਸੀਏਸ਼ਨ ਵੱਲੋਂ ਕਰਵਾਏ ਪਹਿਲੇ ਗਵਰਨਰਜ਼ ਕੱਪ ਵਿੱਚ ਮੁੰਡਿਆਂ ਦੇ ਮੁਕਾਬਲੇ ਵਿੱਚ 39 ਸਕੋਰ ਨਾਲ ਦੂਜਾ ਸਥਾਨ ਹਾਸਲ ਕੀਤਾ। ਸਟਰਾਅਬੇਰੀ ਫੀਲਡ ਹਾਈ ਸਕੂਲ ਦੇ ਚੌਥੀ ਜਮਾਤ ਦੇ ਵਿਦਿਆਰਥੀ ਜ਼ੋਰਾਵਰ ਨੇ ਪਿੱਛੇ ਜਿਹੇ ਗੁਰੂਗ੍ਰਾਮ ਵਿਖੇ ਹੋਏ ਯੂ.ਐਸ. ਕੱਪ ਦੇ ਕਿਡਜ਼ ਵਰਗ ਵਿੱਚ ਖਿਤਾਬ ਜਿੱਤਿਆ ਸੀ।
ਫਿਰੋਜ਼ਪੁਰ ਦੇ ਇਸ ਪਰਿਵਾਰ ਦੀ ਖੇਡਾਂ ਖਾਸ ਕਰਕੇ ਹਾਕੀ ਨੂੰ ਵੱਡੀ ਦੇਣ ਹੈ। 1972 ਮਿਊਨਿਖ ਓਲੰਪਿਕਸ ਵਿੱਚ ਕਾਂਸੀ ਦਾ ਤਮਗ਼ਾ ਜੇਤੂ ਭਾਰਤੀ ਟੀਮ ਦਾ ਕਪਤਾਨ ਹਰਮੀਕ ਸਿੰਘ ਇਸ ਪਰਿਵਾਰ ਦਾ ਮੋਢੀ ਸੀ। ਹਰਮੀਕ ਸਿੰਘ ਦੇ ਛੋਟੇ ਭਰਾ ਅਜੀਤ ਸਿੰਘ ਨੇ 1976 ਮਾਂਟਰੀਅਲ ਓਲੰਪਿਕਸ ਵਿੱਚ ਹਿੱਸਾ ਲਿਆ ਅਤੇ ਦੁਨੀਆਂ ਦਾ ਸਭ ਤੋਂ ਤੇਜ਼ ਗੋਲ ਕੀਤਾ। ਏਸ਼ੀਅਨ ਗੇਮਜ਼ ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਿਆ। ਹਰਮੀਕ ਸਿੰਘ ਦੇ ਬੇਟੇ ਨਵਸ਼ੇਰ ਸਿੰਘ ਨੇ 1997 ਵਿੱਚ ਮਿਲਟਨ ਕੀਜ਼ ਵਿਖੇ ਜੂਨੀਅਰ ਵਿਸ਼ਵ ਕੱਪ ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਿਆ।
ਅਜੀਤ ਸਿੰਘ ਦੇ ਬੇਟੇ ਗਗਨ ਅਜੀਤ ਸਿੰਘ ਨੇ ਆਪਣੀ ਕਪਤਾਨੀ ਹੇਠ ਭਾਰਤ ਨੂੰ 2001 ਵਿੱਚ ਜੂਨੀਅਰ ਵਿਸ਼ਵ ਕੱਪ ਜਿਤਾਇਆ। 2000 ਵਿੱਚ ਸਿਡਨੀ ਅਤੇ 2004 ਵਿੱਚ ਏਥਨਜ਼ ਵਿਖੇ ਓਲੰਪਿਕ ਖੇਡਾਂ ਵਿੱਚ ਹਿੱਸਾ ਲਿਆ। ਏਸ਼ੀਅਨ ਗੇਮਜ਼ ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਿਆ। ਨਵਸ਼ੇਰ ਸਿੰਘ ਦੇ ਮਾਮੇ ਦੇ ਬੇਟੇ ਰੁਪਿੰਦਰ ਪਾਲ ਸਿੰਘ ਨੇ 2021 ਵਿੱਚ ਟੋਕੀਓ ਓਲੰਪਿਕ ਖੇਡਾਂ ਵਿੱਚ ਕਾਂਸੀ ਦਾ ਤਮਗ਼ਾ ਜਿੱਤਿਆ।
ਗਗਨ ਅਜੀਤ ਸਿੰਘ ਦੇ ਬੇਟੇ ਜ਼ੋਰਾਵਰ ਸਿੰਘ ਚਹਿਲ ਨੇ ਪਰਿਵਾਰ ਦੀ ਤੀਜੀ ਪੀੜੀ ਦੀ ਅਗਵਾਈ ਕਰਦਿਆਂ ਗੌਲਫ ਖੇਡ ਵਿੱਚ ਚੰਗੀ ਸ਼ੁਰੂਆਤ ਕੀਤੀ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
