Cricket : ਮੱਧ ਪੂਰਬ ਤਣਾਅ ਕਾਰਨ ਆਈਸੀਸੀ ਦੀ ਦੋਹਾ ਮੀਟਿੰਗ ਮੁਲਤਵੀ
ਨਵੀ ਦਿੱਲੀ, 8 ਮਾਰਚ (ਵਿਸ਼ਵ ਵਾਰਤਾ): ਇੰਟਰਨੈਸ਼ਨਲ ਕ੍ਰਿਕਟ ਕੌਂਸਲ (ICC) ਨੇ ਈਰਾਨ-ਇਜ਼ਰਾਈਲ ਜੰਗ ਦੇ ਮੱਦੇਨਜ਼ਰ 25-27 ਮਾਰਚ ਨੂੰ ਕਤਰ ਦੇ ਦੋਹਾ ਵਿੱਚ ਹੋਣ ਵਾਲੀ ਮੀਟਿੰਗ ਨੂੰ ਮੁਲਤਵੀ ਕਰ ਦਿੱਤਾ ਹੈ। ਉਮੀਦ ਹੈ ਕਿ ਇਹ ਮੀਟਿੰਗ ਹੁਣ ਅਪ੍ਰੈਲ ਵਿੱਚ ਹੋ ਸਕਦੀ ਹੈ। ਹਾਲਾਂਕਿ, ਨਵੀਆਂ ਤਰੀਕਾਂ ਦਾ ਅਜੇ ਤੱਕ ਰਸਮੀ ਐਲਾਨ ਨਹੀਂ ਕੀਤਾ ਗਿਆ ਹੈ।
ਰਿਪੋਰਟਾਂ ਦੇ ਮੁਤਾਬਕ, ਮਿਡਲ-ਈਸਟ ਵਿੱਚ ਚੱਲ ਜਾਰੀ ਤਣਾਅ ਅਤੇ ਸੁਰੱਖਿਆ ਹਾਲਾਤ ਨੂੰ ਦੇਖਦੇ ਹੋਏ ਇਹ ਫੈਸਲਾ ਲਿਆ ਗਿਆ ਹੈ। ICC ਨੇ ਆਪਣੇ ਮੈਂਬਰ ਬੋਰਡਾਂ ਨੂੰ ਇਸ ਬਾਰੇ ਰਸਮੀ ਜਾਣਕਾਰੀ ਦੇ ਦਿੱਤੀ ਹੈ। ਇਹ ਬੈਠਕ ICC ਦੇ ਗਵਰਨੈਂਸ ਕੈਲੰਡਰ ਦਾ ਹਿੱਸਾ ਸੀ, ਜਿਸ ਵਿੱਚ ਬੋਰਡ ਡਾਇਰੈਕਟਰਾਂ, ਬੋਰਡਾਂ ਦੇ ਚੀਫ਼ ਐਗਜ਼ੀਕਿਊਟਿਵ , ਕਮੇਟੀ ਮੈਂਬਰਾਂ ਅਤੇ ਸੀਨੀਅਰ ਅਧਿਕਾਰੀਆਂ ਨੇ ਸ਼ਾਮਲ ਹੋਣਾ ਸੀ। ਬੈਠਕ ਵਿੱਚ ਗਲੋਬਲ ਕ੍ਰਿਕਟ ਨਾਲ ਜੁੜੇ ਕਈ ਅਹਿਮ ਮੁੱਦਿਆਂ ਅਤੇ ਭਵਿੱਖ ਦੀਆਂ ਯੋਜਨਾਵਾਂ ‘ਤੇ ਚਰਚਾ ਹੋਣੀ ਸੀ।
ਇਸ ਤੋਂ ਪਹਿਲਾਂ ICC ਨੇ 22 ਫਰਵਰੀ ਨੂੰ ਘੋਸ਼ਣਾ ਕੀਤੀ ਸੀ ਕਿ ਇਹ ਬੈਠਕ ਦੋਹਾ ਵਿੱਚ ਆਯੋਜਿਤ ਕੀਤੀ ਜਾਵੇਗੀ। ਦੋਹਾ ਵਿੱਚ ਮੀਟਿੰਗ ਕਰਨ ਦਾ ਫੈਸਲਾ ਕਤਰ ਵਿੱਚ ਕ੍ਰਿਕਟ ਅਤੇ ਦੇਸ਼ ਦੇ ਵੱਡੇ ਸਪੋਰਟਿੰਗ ਈਕੋਸਿਸਟਮ ਨਾਲ ਆਈਸੀਸੀ ਦੇ ਵਧਦੇ ਲਗਾਅ ਕਾਰਨ ਲਿਆ ਗਿਆ ਸੀ। ਫਿਲਹਾਲ, ICC ਨਵੇਂ ਸਥਾਨ ਅਤੇ ਤਰੀਕ ਬਾਰੇ ਵਿਚਾਰ ਕਰ ਰਿਹਾ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
