Chandigarh ਦੇ ਗੁਰਦੁਆਰਾ ਸਾਹਿਬ ਵਿੱਚ ਹੰਗਾਮਾ; ਨਿਹੰਗਾਂ ਨੇ ਕੀਤੀ ਵੇਟਰਾਂ ਦੀ ਕੁੱਟਮਾਰ!
ਜਾਣੋ ਕਿਉ ਵਧਿਆ ਵਿਵਾਦ?
ਚੰਡੀਗੜ੍ਹ, 17 ਫਰਵਰੀ 2026 (ਵਿਸ਼ਵ ਵਾਰਤਾ): ਚੰਡੀਗੜ੍ਹ ਦੇ ਗੁਰਦੁਆਰਾ ਗੁਰੂ ਨਾਨਕ ਦਰਬਾਰ ਵਿਖੇ ਨਿਹੰਗਾਂ ਵੱਲੋਂ ਵੇਟਰਾਂ ਦੀ ਕੁੱਟਮਾਰ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸੰਬੰਧੀ ਸੋਸ਼ਲ ਮੀਡੀਆ ‘ਤੇ ਕੁਝ ਵੀਡੀਓਜ਼ ਵੀ ਵਾਇਰਲ ਹੋ ਰਹੀਆਂ ਹਨ। ਵਾਇਰਲ ਵੀਡੀਓ ਵਿੱਚ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਵੇਟਰਾਂ ਕੋਲੋਂ ਤੰਬਾਕੂ, ਬੀੜੀ ਅਤੇ ਜ਼ਰਦਾ ਮਿਲਿਆ ਸੀ। ਉੱਥੇ ਹੀ ਇਕ ਹੋਰ ਵੀਡੀਓ ਵਿੱਚ ਨਿਹੰਗ, ਗੁਰਦੁਆਰਾ ਕਮੇਟੀ ਦੀ ਚੇਅਰਪਰਸਨ ਨਾਲ ਬਹਿਸ ਕਰਦੇ ਵੀ ਨਜ਼ਰ ਆਏ। ਦੋਵੇਂ ਵੀਡੀਓ 31 ਜਨਵਰੀ ਦੇ ਦੱਸੇ ਜਾ ਰਹੇ ਹਨ, ਜੋ ਹੁਣ ਵਾਇਰਲ ਹੋ ਰਹੇ ਹਨ।
ਇਸ ਮਾਮਲੇ ਵਿੱਚ ਗੁਰਦੁਆਰਾ ਸਾਹਿਬ ਦੀ ਕਮੇਟੀ ਦਾ ਕਹਿਣਾ ਹੈ ਕਿ ਇਹ ਪੂਰੀ ਘਟਨਾ ਗੁਰਦੁਆਰਾ ਸਾਹਿਬ ਦੇ ਅਕਸ ਨੂੰ ਖ਼ਰਾਬ ਕਰਨ ਦੀ ਕੋਸ਼ਿਸ਼ ਹੈ। ਕਮੇਟੀ ਨੇ ਇਹ ਵੀ ਦੱਸਿਆ ਕਿ ਵੇਟਰਾਂ ਦੀ ਕੁੱਟਮਾਰ ਕਰਨ ਵਾਲਿਆਂ ਵਿੱਚੋਂ ਇੱਕ ਨਿਹੰਗ ਪਹਿਲਾਂ ਕਰੀਬ ਦੋ ਸਾਲ ਤੱਕ ਗੁਰਦੁਆਰੇ ਵਿੱਚ ਸੇਵਾ ਕਰ ਚੁੱਕਾ ਹੈ।
ਕਮੇਟੀ ਦੀ ਚੇਅਰਪਰਸਨ ਸੁਰਜੀਤ ਕੌਰ, ਜਿਨ੍ਹਾਂ ਨਾਲ ਨਿਹੰਗਾਂ ਦੀ ਬਹਿਸ ਹੋਈ ਸੀ, ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਉਮਰ 87 ਸਾਲ ਹੈ। ਉਹ 50 ਸਾਲਾਂ ਤੋਂ ਅੰਮ੍ਰਿਤਧਾਰੀ ਹਨ। ਇਨ੍ਹਾਂ ਨਿਹੰਗਾਂ ਨੇ ਗਲਤ ਕੰਮ ਕੀਤਾ ਹੈ। ਇਹ ਗੁੰਡਿਆਂ ਵਾਂਗ ਗੁਰਦੁਆਰਾ ਸਾਹਿਬ ਵਿੱਚ ਦਾਖਲ ਹੋਏ। ਜੇਕਰ ਪੁਲਿਸ ਹੁੰਦੀ ਤਾਂ ਉਨ੍ਹਾਂ ਨੂੰ ਜਾਂਚ ਕਰਨ ਦਾ ਅਧਿਕਾਰ ਹੈ, ਉਹ ਵਾਰੰਟ ਲੈ ਕੇ ਆਉਂਦੀ। ਨਿਹੰਗਾਂ ਨੇ ਸਾਨੂੰ ਕੁਝ ਨਹੀਂ ਦੱਸਿਆ ਅਤੇ ਸਿੱਧਾ ਗੁਰਦੁਆਰੇ ਵਿੱਚ ਵੜ ਗਏ। ਇਹ ਕੌਣ ਹੁੰਦੇ ਹਨ ਗੁਰਦੁਆਰੇ ਵਿੱਚ ਇਸ ਤਰ੍ਹਾਂ ਆਉਣ ਵਾਲੇ? ਇਹ ਗੁਰਦੁਆਰਾ ਸਾਹਿਬ ਵਿੱਚ ਉਲਟੇ ਪਾਸਿਓਂ ਦਾਖਲ ਹੋਏ। ਉਸ ਸਮੇਂ ਸਾਡਾ ਪ੍ਰੋਗਰਾਮ ਚੱਲ ਰਿਹਾ ਸੀ। ਇਹ ਕਿਉਂ ਆਏ? ਇਸ ਤਰਾਂ ਕੁੱਟਮਾਰ ਕਰਨ ਦਾ ਕੀ ਮਤਲਬ ਹੈ?
ਸੁਰਜੀਤ ਕੌਰ ਨੇ ਕਿਹਾ ਕਿ “ਅਸੀਂ ਗੁਰਦੁਆਰੇ ਵਿੱਚ ਨਸ਼ਾ ਨਹੀਂ ਵਿਕਵਾਉਂਦੇ। ਅਸੀਂ ਅੰਮ੍ਰਿਤਧਾਰੀ ਲੋਕ ਹਾਂ। ਅਸੀਂ ਗੁਰਦੁਆਰਾ ਸਾਹਿਬ ਦੇ ਬਾਹਰ ਲਿਖਿਆ ਹੋਇਆ ਹੈ ਕਿ ਇੱਥੇ ਸ਼ਰਾਬ ਪੀ ਕੇ ਅੰਦਰ ਨਹੀਂ ਆ ਸਕਦੇ। ਅਸੀਂ ਬੰਦਾ ਤਾਇਨਾਤ ਕੀਤਾ ਹੋਇਆ ਹੈ।” ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਇਸ ਤਰਾਂ ਵੀਡੀਓ ਵਾਇਰਲ ਕਰਨਾ ਵੀ ਗਲਤ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
