Chandigarh ‘ਚ ਸ਼ਰਾਬ ਦੇ ਠੇਕਿਆਂ ਦੀ ਨੀਲਾਮੀ
– ਪਲਸੌਰਾ ਨੇ ਤੋੜੇ ਰਿਕਾਰਡ! ਧਨਾਸ ਅਤੇ ਸੈਕਟਰ-61 ਵੀ ਰਹੇ ਚਰਚਾ ‘ਚ
ਚੰਡੀਗੜ੍ਹ, 19 ਮਾਰਚ 2026 (ਵਿਸ਼ਵ ਵਾਰਤਾ) – ਸ਼ਹਿਰ ਵਿੱਚ ਵੀਰਵਾਰ ਨੂੰ ਕਰਵਾਈ ਗਈ ਸ਼ਰਾਬ ਦੇ ਠੇਕਿਆਂ ਦੀ ਸਾਲਾਨਾ ਨੀਲਾਮੀ ਵਿੱਚ ਇਸ ਵਾਰ ਵੀ ਦਿਲਚਸਪ ਮੁਕਾਬਲਾ ਦੇਖਣ ਨੂੰ ਮਿਲਿਆ। ਚੰਡੀਗੜ੍ਹ ਪ੍ਰਸ਼ਾਸਨ ਦੇ ਐਕਸਾਈਜ਼ ਐਂਡ ਟੈਕਸੇਸ਼ਨ ਵਿਭਾਗ ਵੱਲੋਂ ਕਰਵਾਈ ਗਈ ਇਸ ਨੀਲਾਮੀ ਪ੍ਰਕਿਰਿਆ ਵਿੱਚ ਕੁੱਲ 97 ਠੇਕਿਆਂ ਵਿੱਚੋਂ ਸਿਰਫ਼ 83 ਠੇਕੇ ਹੀ ਵਿਕ ਸਕੇ, ਜਦਕਿ ਬਾਕੀ ਬਚੇ ਠੇਕਿਆਂ ਲਈ ਜਲਦੀ ਹੀ ਦੁਬਾਰਾ ਨੀਲਾਮੀ ਕਰਵਾਈ ਜਾਵੇਗੀ।
ਨੀਲਾਮੀ ਦੌਰਾਨ ਕਈ ਪ੍ਰਮੁੱਖ ਇਲਾਕਿਆਂ ਦੇ ਠੇਕਿਆਂ ‘ਤੇ ਜ਼ੋਰਦਾਰ ਬੋਲੀ ਲੱਗੀ। ਸਭ ਤੋਂ ਮਹਿੰਗਾ ਠੇਕਾ ਪਲਸੌਰਾ ਖੇਤਰ ਦਾ ਰਿਹਾ, ਜੋ 16.71 ਕਰੋੜ ਰੁਪਏ ਵਿੱਚ ਨੀਲਾਮ ਹੋਇਆ। ਇਸ ਠੇਕੇ ਦੀ ਰਾਖਵੀਂ ਕੀਮਤ 11.41 ਕਰੋੜ ਰੁਪਏ ਤੈਅ ਕੀਤੀ ਗਈ ਸੀ, ਯਾਨੀ ਬੋਲੀ ਵਿੱਚ ਕਰੀਬ 5 ਕਰੋੜ ਰੁਪਏ ਤੋਂ ਵੱਧ ਦਾ ਮੁਨਾਫ਼ਾ ਦਰਜ ਕੀਤਾ ਗਿਆ। ਪਿਛਲੇ ਸਾਲ ਇਹੀ ਠੇਕਾ 14 ਕਰੋੜ ਰੁਪਏ ਵਿੱਚ ਨੀਲਾਮ ਹੋਇਆ ਸੀ, ਇਸ ਵਾਰ ਕੀਮਤ ਵਿੱਚ ਵੱਡਾ ਉਛਾਲ ਦੇਖਿਆ ਗਿਆ।
ਦੂਜੇ ਨੰਬਰ ’ਤੇ ਧਨਾਸ ਖੇਤਰ ਦਾ ਠੇਕਾ ਰਿਹਾ, ਜੋ 12.27 ਕਰੋੜ ਰੁਪਏ ਵਿੱਚ ਵਿਕਿਆ। ਇਸਦੀ ਰਾਖਵੀਂ ਕੀਮਤ 9.62 ਕਰੋੜ ਰੁਪਏ ਤੈਅ ਕੀਤੀ ਗਈ ਸੀ। ਧਨਾਸ ਦਾ ਠੇਕਾ ਪਿਛਲੇ ਕਈ ਸਾਲਾਂ ਤੱਕ ਸ਼ਹਿਰ ਦੇ ਸਭ ਤੋਂ ਮਹਿੰਗੇ ਠੇਕਿਆਂ ‘ਚ ਸ਼ੁਮਾਰ ਹੈ। ਪਿਛਲੇ ਸਾਲ ਇਹ 11.27 ਕਰੋੜ ਰੁਪਏ ਅਤੇ 2024 ਵਿੱਚ 9.17 ਕਰੋੜ ਰੁਪਏ ਵਿੱਚ ਨੀਲਾਮ ਹੋਇਆ ਸੀ।
ਤੀਜੇ ਸਥਾਨ ’ਤੇ ਸੈਕਟਰ-61 ਮਾਰਕੀਟ ਦਾ ਠੇਕਾ ਰਿਹਾ, ਜੋ 11.52 ਕਰੋੜ ਰੁਪਏ ਵਿੱਚ ਨੀਲਾਮ ਹੋਇਆ। ਹਾਲਾਂਕਿ ਇਸਦੀ ਰਾਖਵੀਂ ਕੀਮਤ 8.21 ਕਰੋੜ ਰੁਪਏ ਸੀ, ਪਰ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਿੱਚ ਥੋੜ੍ਹੀ ਗਿਰਾਵਟ ਦੇਖਣ ਨੂੰ ਮਿਲੀ, ਬੀਤੇ ਸਾਲ ਇਹ ਠੇਕਾ 12.25 ਕਰੋੜ ਰੁਪਏ ਵਿੱਚ ਗਿਆ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਪੂਰੀ ਨੀਲਾਮੀ ਪ੍ਰਕਿਰਿਆ ਤੋਂ ਪ੍ਰਸ਼ਾਸਨ ਨੂੰ ਲਾਇਸੈਂਸ ਫ਼ੀਸ ਦੇ ਰੂਪ ਵਿੱਚ ਕੁੱਲ 496.81 ਕਰੋੜ ਰੁਪਏ ਦਾ ਮਾਲੀਆ ਪ੍ਰਾਪਤ ਹੋਇਆ, ਜੋ ਕਿ ਨਿਰਧਾਰਤ ਰਾਖਵੀਂ ਕੀਮਤ ਤੋਂ ਲਗਭਗ 29 ਪ੍ਰਤੀਸ਼ਤ ਵੱਧ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
