45 ਫੁੱਟ ਉੱਚੀ ਜ਼ਿਪ ਲਾਈਨ ਤੋਂ ਡਿੱਗਣ ਕਾਰਨ 16 ਸਾਲਾ ਲੜਕੇ ਦੀ ਮੌਤ
ਉੱਤਰ ਪ੍ਰਦੇਸ਼, 25 ਮਈ 2026 (ਵਿਸ਼ਵ ਵਾਰਤਾ): ਆਗਰਾ ਵਿੱਚ ਫਿਰੋਜ਼ਾਬਾਦ ਦੇ ਇੱਕ ਚੂੜੀ ਕਾਰੋਬਾਰੀ ਦੇ 16 ਸਾਲਾ ਪੁੱਤਰ ਦੀ 45 ਫੁੱਟ ਉੱਚੀ ਜ਼ਿਪ ਲਾਈਨ ਤੋਂ ਡਿੱਗਣ ਕਾਰਨ ਮੌਤ ਹੋ ਗਈ। ਜ਼ਿਪ ਲਾਈਨ ਝੂਲੇ ਤੋਂ ਜਿਵੇਂ ਹੀ ਦੂਜੇ ਪਾਸੇ ਵਧਿਆ, ਉਸ ਦੀ ਸੇਫਟੀ ਬੈਲਟ ਦਾ ਹੁੱਕ ਖੁੱਲ੍ਹ ਗਿਆ ਅਤੇ ਉਹ ਹੇਠਾਂ ਡਿੱਗ ਗਿਆ। ਉਸ ਦੇ ਮਾਤਾ-ਪਿਤਾ ਦੇ ਸਾਹਮਣੇ ਹੀ ਉਸ ਨੇ ਤੜਫ-ਤੜਫ ਕੇ ਦਮ ਤੋੜ ਦਿੱਤਾ।
ਉਸਦੇ ਸਿਰ ਅਤੇ ਹੋਰ ਅੰਗਾਂ ‘ਤੇ ਵੀ ਸੱਟਾਂ ਲੱਗੀਆਂ। ਇਸ ਘਟਨਾ ਨਾਲ ਇਲਾਕੇ ‘ਚ ਦਹਿਸ਼ਤ ਫੈਲ ਗਈ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਪੁਲਿਸ ਨੇ ਜ਼ਿਪ ਲਾਈਨ ਆਪਰੇਟਰ ਅਤੇ ਮੈਨੇਜਰ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਮਾਂ – ਬਾਪ ਆਪਣੇ ਪੁੱਤਰ ਦੀ ਅੱਖਾਂ ਸਾਹਮਣੇ ਮੌਤ ਦੇਖ ਕੇ ਬੇਸੁੱਧ ਹੋ ਗਏ। ਲੋਕਾਂ ਨੇ ਕਿਸੇ ਤਰ੍ਹਾਂ ਉਨ੍ਹਾਂ ਨੂੰ ਦਿਲਾਸਾ ਦਿੱਤਾ।ਹਾਦਸੇ ਤੋਂ ਬਾਅਦ ਪੁਲਿਸ ਨੇ ਜ਼ਿਪ ਲਾਈਨ ਦਾ ਸੰਚਾਲਨ ਬੰਦ ਕਰਵਾ ਦਿੱਤਾ ਹੈ। ਜ਼ਿਪ ਲਾਈਨ ਸੰਚਾਲਕ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ।
ਡੀਸੀਪੀ ਸਿਟੀ ਸਈਅਦ ਅਲੀ ਅੱਬਾਸ ਨੇ ਦੱਸਿਆ ਕਿ ਪਿਤਾ ਦੀ ਸ਼ਿਕਾਇਤ ‘ਤੇ ਈਓਡੀ (EOD) ਚੌਪਾਟੀ, ਜ਼ਿਪ ਲਾਈਨ ਦੇ ਸੇਫਟੀ ਇੰਚਾਰਜ ਅਤੇ ਈਓਡੀ ਦੇ ਮਾਲਕ ਖ਼ਿਲਾਫ਼ ਤਾਜਗੰਜ ਥਾਣੇ ਵਿੱਚ ਐੱਫਆਈਆਰ (FIR) ਦਰਜ ਕਰ ਲਈ ਗਈ ਹੈ।
ਇਹ ਘਟਨਾ ਸ਼ਹਿਰ ਦੇ ਤਾਜਗੰਜ ਵਿੱਚ ਐਤਵਾਰ ਨੂੰ ਵਾਪਰੀ। ਕੁਨਾਲ ਅਗਰਵਾਲ ਆਪਣੇ ਮਾਤਾ-ਪਿਤਾ ਨਾਲ ਫਿਰੋਜ਼ਾਬਾਦ ਤੋਂ ਆਗਰਾ ਘੁੰਮਣ ਆਇਆ ਸੀ। ਕੁਨਾਲ ਨੇ ਜ਼ਿਪ ਲਾਈਨ ਕਰਨ ਦੀ ਜ਼ਿੱਦ ਕੀਤੀ। ਚੌਪਾਟੀ ਵਿੱਚ 120 ਫੁੱਟ ਲੰਬੀ ਅਤੇ 45 ਫੁੱਟ ਉੱਚੀ ਜ਼ਿਪ ਲਾਈਨ ਹੈ। ਕੁਨਾਲ ਨੂੰ ਐਡਵੈਂਚਰ (ਦਾ ਸ਼ੌਕ ਸੀ। ਜ਼ਿਪ ਲਾਈਨ ਨੂੰ ਦੇਖ ਕੇ ਉਹ ਜ਼ਿੱਦ ਕਰਨ ਲੱਗਾ। ਉਹ ਕਹਿਣ ਲੱਗਾ ਕਿ ਉਸ ਨੇ ਵੀ ਜ਼ਿਪਿੰਗ ਕਰਨੀ ਹੈ।
ਜਦੋਂ ਉਹ ਜ਼ਿਪ ਲਾਈਨ ‘ਤੇ ਜਾਣ ਲੱਗਾ ਤਾਂ ਆਪਣੇ ਛੋਟੇ ਭਰਾ ਮਯੰਕ ਨੂੰ ਬੋਲਿਆ, ‘ਤੂੰ ਮੇਰੀ ਵੀਡੀਓ ਬਣਾਉਂਦਾ ਰਹੀਂ। ਮਯੰਕ ਕੁਨਾਲ ਦੀ ਵੀਡੀਓ ਬਣਾ ਰਿਹਾ ਸੀ। ਕਰਮਚਾਰੀਆਂ ਨੇ ਬੱਚੇ ਨੂੰ ਜ਼ਿਪ ਲਾਈਨ ‘ਤੇ ਚੜ੍ਹਾਇਆ ਅਤੇ ਬੈਲਟ ਪਹਿਨਾਈ। ਜਦ ਉਸ ਨੂੰ ਦੂਜੇ ਪਾਸੇ ਵੱਲ ਛੱਡਿਆ ਗਿਆ। ਇਸੇ ਦੌਰਾਨ ਇਹ ਹਾਦਸਾ ਵਾਪਰ ਗਿਆ। ਬੱਚਾ ਪਹਿਲਾਂ ਲੋਹੇ ਦੀ ਜਾਲੀ ਨਾਲ ਟਕਰਾਇਆ, ਫਿਰ ਸਿੱਧਾ ਜ਼ਮੀਨ ‘ਤੇ ਆ ਡਿੱਗਿਆ। ਜਿਸ ਕਾਰਨ ਉਸਦੀ ਮੌਤ ਹੋ ਗਈ। ਪੁਲਿਸ ਨੇ ਪਰਿਵਾਰ ਨੂੰ ਸਮਝਾ ਕੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ।
