ਅਗਲੇ ਹਫਤੇ 4 ਦਿਨ ਬੈਂਕ ਰਹਿਣਗੇ ਬੰਦ: ਘਰੋਂ ਜਾਣ ਤੋਂ ਪਹਿਲਾਂ ਨੋਟ ਕਰ ਲਓ ਤਾਰੀਖਾਂ
ਚੰਡੀਗੜ੍ਹ, 23 ਅਗਸਤ 2026 (ਵਿਸ਼ਵ ਵਾਰਤਾ) : ਜੇਕਰ ਅਗਲੇ ਹਫਤੇ ਤੁਹਾਨੂੰ ਬੈਂਕ ਦਾ ਕੋਈ ਜ਼ਰੂਰੀ ਕੰਮ ਹੈ ਤਾਂ ਬੈਂਕ ਸ਼ਾਖਾ ਜਾਣ ਤੋਂ ਪਹਿਲਾਂ ਤਾਰੀਖ਼ ਜ਼ਰੂਰ ਦੇਖ ਲਵੋ। ਕਿਉਕਿ ਇਸ ਹਫ਼ਤੇ ਤਿਉਹਾਰਾਂ ਅਤੇ ਹਫ਼ਤਾਵਾਰੀ ਛੁੱਟੀਆਂ ਦੇ ਚੱਲਦਿਆਂ 24 ਤੋਂ 30 ਅਗਸਤ ਦਰਮਿਆਨ ਦੇਸ਼ ਦੇ ਵੱਖ-ਵੱਖ ਰਾਜਾਂ ਵਿੱਚ ਬੈਂਕ ਕੁੱਲ 4 ਦਿਨ ਬੰਦ ਰਹਿਣ ਵਾਲੇ ਹਨ। ਰੱਖੜੀ, ਈਦ-ਏ-ਮਿਲਾਦ ਅਤੇ ਓਣਮ ਵਰਗੇ ਵੱਡੇ ਤਿਉਹਾਰਾਂ ਕਰਕੇ ਬੈਂਕ ਸ਼ਾਖਾਵਾਂ ਵਿੱਚ ਕੰਮਕਾਜ ਨਹੀਂ ਹੋਵੇਗਾ।
24 ਤੋਂ 30 ਅਗਸਤ ਦਰਮਿਆਨ ਵੱਖ-ਵੱਖ ਰਾਜਾਂ ਵਿੱਚ ਤਿਉਹਾਰਾਂ ਦੇ ਚੱਲਦਿਆਂ ਬੈਂਕ ਸ਼ਾਖਾਵਾਂ ਵਿੱਚ ਛੁੱਟੀਆਂ ਰਹਿਣਗੀਆਂ। ਕਿਤੇ 25 ਅਗਸਤ ਨੂੰ ਬੈਂਕ ਬੰਦ ਰਹਿਣਗੇ, ਕਿਤੇ 26 ਅਗਸਤ ਨੂੰ ਅਤੇ ਕੁਝ ਰਾਜਾਂ ਵਿੱਚ 28 ਅਗਸਤ ਨੂੰ ਛੁੱਟੀ ਰਹੇਗੀ। ਇਸ ਤੋਂ ਇਲਾਵਾ 30 ਅਗਸਤ ਨੂੰ ਐਤਵਾਰ ਹੈ।ਖ਼ਾਸ ਗੱਲ ਇਹ ਹੈ ਕਿ 29 ਅਗਸਤ ਨੂੰ ਬੈਂਕ ਬੰਦ ਨਹੀਂ ਰਹਿਣਗੇ, ਕਿਉਂਕਿ ਇਹ ਮਹੀਨੇ ਦਾ ਪੰਜਵਾਂ ਸ਼ਨੀਵਾਰ ਹੈ।
ਆਰ.ਬੀ.ਆਈ. (RBI) ਦੇ ਨਿਯਮਾਂ ਮੁਤਾਬਕ ਬੈਂਕ ਹਰ ਮਹੀਨੇ ਦੇ ਦੂਜੇ ਅਤੇ ਚੌਥੇ ਸ਼ਨੀਵਾਰ ਨੂੰ ਬੰਦ ਹੁੰਦੇ ਹਨ। ਇਸ ਲਈ ਜੇਕਰ ਤੁਸੀਂ ਚੈੱਕ ਜਮ੍ਹਾਂ ਕਰਵਾਉਣਾ ਹੈ, ਬੈਂਕ ਵਿੱਚ ਕੋਈ ਦਸਤਾਵੇਜ਼ ਜਮ੍ਹਾਂ ਕਰਵਾਉਣੇ ਹਨ, ਨਕਦੀ (ਕੈਸ਼) ਨਾਲ ਜੁੜਿਆ ਕੋਈ ਕੰਮ ਹੈ ਜਾਂ ਸ਼ਾਖਾ ਵਿੱਚ ਜਾ ਕੇ ਕੋਈ ਹੋਰ ਜ਼ਰੂਰੀ ਕੰਮ ਨਿਪਟਾਉਣਾ ਹੈ ਤਾਂ ਤਾਰੀਖ਼ ਦੇਖ ਕੇ ਹੀ ਘਰੋਂ ਨਿਕਲੋ।
ਰਿਜ਼ਰਵ ਬੈਂਕ (RBI) ਦੀ ਅਧਿਕਾਰਤ ਛੁੱਟੀਆਂ ਦੀ ਸੂਚੀ ਅਨੁਸਾਰ, ਇਸ ਹਫ਼ਤੇ ਵੱਖ-ਵੱਖ ਸ਼ਹਿਰਾਂ ਅਤੇ ਰਾਜਾਂ ਵਿੱਚ ਲਗਭਗ 3 ਤੋਂ 4 ਦਿਨ ਕੰਮਕਾਜ ਠੱਪ ਰਹੇਗਾ।
25 ਅਗਸਤ (ਮੰਗਲਵਾਰ): ਮਿਲਾਦ-ਉਨ-ਨਬੀ (ਪੈਗੰਬਰ ਮੁਹੰਮਦ ਸਾਹਿਬ ਦਾ ਜਨਮਦਿਨ) ਅਤੇ ਪਹਿਲੇ ਓਣਮ ਦੇ ਮੌਕੇ ‘ਤੇ ਕੇਰਲ ਅਤੇ ਆਂਧਰਾ ਪ੍ਰਦੇਸ਼ ਵਿੱਚ ਸਾਰੇ ਬੈਂਕ ਬੰਦ ਰਹਿਣਗੇ।
26 ਅਗਸਤ (ਬੁੱਧਵਾਰ): ਈਦ-ਏ-ਮਿਲਾਦ, ਬਾਰਾਵਫ਼ਾਤ ਅਤੇ ਤਿਰੂਵੋਨਮ ਦੇ ਮੌਕੇ ‘ਤੇ ਦਿੱਲੀ, ਉੱਤਰ ਪ੍ਰਦੇਸ਼, ਬਿਹਾਰ, ਮਹਾਰਾਸ਼ਟਰ, ਕਰਨਾਟਕ, ਮੱਧ ਪ੍ਰਦੇਸ਼, ਤਮਿਲਨਾਡੂ, ਉੱਤਰਾਖੰਡ, ਤੇਲੰਗਾਨਾ, ਮਨੀਪੁਰ, ਜੰਮੂ-ਕਸ਼ਮੀਰ, ਕੇਰਲ, ਛੱਤੀਸਗੜ੍ਹ ਅਤੇ ਝਾਰਖੰਡ ਵਿੱਚ ਬੈਂਕਾਂ ਦੀ ਛੁੱਟੀ ਰਹੇਗੀ।
28 ਅਗਸਤ (ਸ਼ੁੱਕਰਵਾਰ): ਰੱਖੜੀ ਦੇ ਪਵਿੱਤਰ ਤਿਉਹਾਰ ਕਰਕੇ ਉੱਤਰ ਪ੍ਰਦੇਸ਼, ਰਾਜਸਥਾਨ, ਮੱਧ ਪ੍ਰਦੇਸ਼, ਗੁਜਰਾਤ, ਉੱਤਰਾਖੰਡ, ਸਿੱਕਮ, ਜੰਮੂ-ਕਸ਼ਮੀਰ, ਕੇਰਲ ਅਤੇ ਹਿਮਾਚਲ ਪ੍ਰਦੇਸ਼ ਵਿੱਚ ਬੈਂਕ ਸ਼ਾਖਾਵਾਂ ਬੰਦ ਰਹਿਣਗੀਆਂ।
30 ਅਗਸਤ (ਐਤਵਾਰ): ਹਫ਼ਤਾਵਾਰੀ ਛੁੱਟੀ ਕਰਕੇ ਦੇਸ਼ ਭਰ ਦੇ ਸਾਰੇ ਬੈਂਕਾਂ ਵਿੱਚ ਕੰਮਕਾਜ ਬੰਦ ਰਹੇਗਾ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
