AAP ਵਿਧਾਇਕ ਡਿੰਪੀ ਢਿੱਲੋਂ ਦੀ ਗੱਡੀ ਰੋਕਣ ਦਾ ਮਾਮਲਾ : ਵਿਧਾਇਕ ਨੇ ਵੀਡੀਓ ਜਾਰੀ ਕਰਕੇ ਰੱਖਿਆ ਆਪਣਾ ਪੱਖ
ਚੰਡੀਗੜ੍ਹ, 10 ਮਈ 2026 (ਵਿਸ਼ਵ ਵਾਰਤਾ)– ਮੋਹਾਲੀ ਵਿੱਚ AAP ਵਿਧਾਇਕ ਹਰਦੀਪ ਸਿੰਘ ਡਿੰਪੀ ਢਿੱਲੋਂ ਨੂੰ ਪੁਲਿਸ ਨਾਕੇ ‘ਤੇ ਬੀਤੇ ਦਿਨੀ ਇੱਕ ਏਐਸਆਈ (ASI) ਵੱਲੋਂ ਰੋਕ ਲਿਆ ਗਿਆ। ਉਨ੍ਹਾਂ ਦੀ ਗੱਡੀ ‘ਤੇ ਲੱਗੀ ਬਲਿੰਕਰ ਲਾਈਟ ਨੂੰ ਲੈ ਕੇ ਸਵਾਲ-ਜਵਾਬ ਕੀਤੇ ਗਏ। ਇਸ ਦੌਰਾਨ ਵਿਧਾਇਕ ਆਪਣੇ ਪਰਿਵਾਰ ਨਾਲ ਚੰਡੀਗੜ੍ਹ ਵਿੱਚ ਡਿਨਰ ਕਰਨ ਜਾ ਰਹੇ ਸਨ।
ਇਹ ਮਾਮਲਾ ਸ਼ੁੱਕਰਵਾਰ ਦਾ ਹੈ, ਜਿਸ ਤੋਂ ਬਾਅਦ ਸ਼ਨੀਵਾਰ ਨੂੰ ASI ਨੂੰ ਸਸਪੈਂਡ ਕਰ ਦਿੱਤਾ ਗਿਆ। ਵਿਧਾਇਕ ਨੇ ASI ‘ਤੇ ਰੋਅਬ ਝਾੜਨ ਦਾ ਦੋਸ਼ ਲਗਾਇਆ ਅਤੇ ਇਸ ਦੀ ਸ਼ਿਕਾਇਤ ਐਸਐਸਪੀ ਹਰਮਨਦੀਪ ਸਿੰਘ ਹੰਸ ਨੂੰ ਕੀਤੀ ਸੀ।
ਵਿਧਾਇਕ ਡਿੰਪੀ ਢਿੱਲੋਂ ਨੇ ਹੁਣ ਇੱਕ ਵੀਡੀਓ ਜਾਰੀ ਕਰਕੇ ਆਪਣਾ ਪੱਖ ਰੱਖਿਆ ਹੈ। ਵਿਧਾਇਕ ਹਰਦੀਪ ਸਿੰਘ ਡਿੰਪੀ ਢਿੱਲੋਂ ਨੇ ਕਿਹਾ ਕਿ, “ਮੈਂ ਇੱਕ ਵੱਡੇ ਮੁੱਦੇ ‘ਤੇ, ਜੋ ਪਿਛਲੇ ਦੋ ਦਿਨਾਂ ਤੋਂ ਚੱਲ ਰਿਹਾ ਹੈ, ਉਸ ਦੇ ਸਬੰਧ ਵਿੱਚ ਲਾਈਵ ਹੋ ਕੇ ਸਾਰਿਆਂ ਨੂੰ ਅਸਲੀ ਗੱਲ ਦੱਸਣਾ ਚਾਹੁੰਦਾ ਹਾਂ।” ਉਨ੍ਹਾਂ ਕਿਹਾ ਕਿ ਉਹ ਆਪਣੀ ਪਤਨੀ ਅਤੇ ਡਰਾਈਵਰ ਨਾਲ ਖਾਣਾ ਖਾਣ ਜਾ ਰਹੇ ਸਨ। ਫੇਜ਼-8 ਪੁਲਿਸ ਨੇ ਉੱਥੇ ਨਾਕਾ ਲਗਾਇਆ ਹੋਇਆ ਸੀ, ਜਿੱਥੇ ASI ਲਖਬੀਰ ਸਿੰਘ ਤਾਇਨਾਤ ਸੀ। ਗੱਡੀ ‘ਤੇ ਲੱਗੀ ਬਲਿੰਕਰ ਲਾਈਟ ਨੂੰ ਲੈ ਕੇ ASI ਨੇ ਡਰਾਈਵਰ ਤੋਂ ਸਵਾਲ ਕੀਤਾ। ਡਰਾਈਵਰ ਨੇ ਦੱਸਿਆ ਕਿ ਗੱਡੀ ਵਿੱਚ ਮੌਜੂਦਾ ਵਿਧਾਇਕ ਬੈਠੇ ਹਨ ਅਤੇ ਇਹ ਗੱਡੀ ਵਿਧਾਨ ਸਭਾ ਵਿੱਚ ਰਜਿਸਟਰਡ ਹੈ।
ਇਸ ਤੋਂ ਬਾਅਦ ASI ਨੇ ਆਈਡੀ ਕਾਰਡ ਦਿਖਾਉਣ ਲਈ ਕਿਹਾ। ਜਦੋਂ ਡਰਾਈਵਰ ਮੋਬਾਈਲ ਵਿੱਚ ਆਈਡੀ ਕਾਰਡ ਦਿਖਾਉਣ ਲੱਗਾ ਤਾਂ ASI ਨੇ ਉੱਥੇ ਮੌਜੂਦ ਕਾਂਸਟੇਬਲ ਨੂੰ ਕਿਹਾ ਕਿ ਇਨ੍ਹਾਂ ਦਾ ਕਾਰਡ ਚੈੱਕ ਕਰੋ, ਜੇਕਰ ਮੌਜੂਦਾ ਵਿਧਾਇਕ ਹਨ ਤਾਂ ਛੱਡ ਦੇਣਾ, ਨਹੀਂ ਤਾਂ ਚਾਲਾਨ ਕਰ ਦੇਣਾ। ਇਸ ਤੋਂ ਬਾਅਦ ਉਹ ਓਥੋਂ ਚਲਾ ਗਿਆ।
ਉਨ੍ਹਾਂ ਅੱਗੇ ਕਿਹਾ ਕਿ ” ਇਸ ਦੌਰਾਨ ਉੱਥੇ ਥਾਣਾ ਇੰਚਾਰਜ ਸਤਨਾਮ ਸਿੰਘ ਆ ਗਏ। ਉਨ੍ਹਾਂ ਨੇ ਆ ਕੇ ਪੁੱਛਿਆ ਕਿ ਕੀ ਗੱਲ ਹੋ ਗਈ? ਮੈਂ ਉਨ੍ਹਾਂ ਨੂੰ ਦੱਸਿਆ ਕਿ ਮੈਂ ਮੌਜੂਦਾ ਵਿਧਾਇਕ ਹਾਂ। ਮੈਂ ਜਨਤਾ ਦਾ ਚੁਣਿਆ ਹੋਇਆ ਨੁਮਾਇੰਦਾ ਹਾਂ। ਮੇਰੇ ਹਲਕੇ ਦੇ 1 ਲੱਖ 65 ਹਜ਼ਾਰ ਵੋਟਰ ਹਨ, ਜਿਨ੍ਹਾਂ ਨੇ ਮੈਨੂੰ ਚੁਣਿਆ ਹੈ। ਜੇਕਰ ਇਹ ASI ਮੇਰੇ ਨਾਲ ਇਸ ਤਰ੍ਹਾਂ ਦਾ ਵਿਵਹਾਰ ਕਰ ਰਿਹਾ ਹੈ, ਤਾਂ ਆਮ ਲੋਕਾਂ ਨਾਲ ਕੀ ਹੁੰਦਾ ਹੋਵੇਗਾ। ਇਸ ‘ਤੇ ਸਤਨਾਮ ਸਿੰਘ ਨੇ ਮੁਆਫ਼ੀ ਮੰਗੀ।”
ਉਨ੍ਹਾਂ ਕਿਹਾ ਕਿ “ਉਸੇ ਸਮੇਂ ਮੈਂ ਐਸ.ਐਸ.ਪੀ. (SSP) ਸਾਹਿਬ ਨੂੰ ਫ਼ੋਨ ਲਗਾਇਆ ਅਤੇ ਕਿਹਾ ਕਿ ਤੁਹਾਡਾ ਇੱਕ ਅਫ਼ਸਰ ਇੱਥੇ ਤਾਇਨਾਤ ਹੈ, ਜੋ ਬਹੁਤ ਗੰਦਾ ਵਿਵਹਾਰ ਕਰਦਾ ਹੈ। ਮੈਨੂੰ ਚਾਲਾਨ ਤੋਂ ਕੋਈ ਦਿੱਕਤ ਨਹੀਂ ਹੈ, ਚਾਹੇ ਇੱਕ ਦੀ ਜਗ੍ਹਾ ਦੋ ਚਾਲਾਨ ਕਰ ਦਿੰਦਾ, ਪਰ ਇਸ ਦਾ ਵਿਵਹਾਰ ਬਹੁਤ ਖ਼ਰਾਬ ਹੈ। ਪਬਲਿਕ ਦੇ ਨਾਲ ਇਸ ਦੇ ਬੋਲਣ ਦਾ ਤਰੀਕਾ ਠੀਕ ਨਹੀਂ ਹੈ। ਉਨ੍ਹਾਂ ਨੇ ਪੜਤਾਲ ਕੀਤੀ ਅਤੇ ਇਸ ਨੂੰ ਸਸਪੈਂਡ ਕਰ ਦਿੱਤਾ।”
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
