ਪਰਦੂਮਨ ਹੱਤਿਆਕਾਂਡ ‘ਚ ਆਇਆ ਨਵਾਂ ਮੋੜ : ਕੰਡਕਟਰ ਨੇ ਨਹੀਂ, 11ਵੀਂ ਦੇ ਵਿਦਿਆਰਥੀ ਨੇ ਕੀਤਾ ਸੀ ਕਤਲ

ਨਵੀਂ ਦਿੱਲੀ, 8 ਨਵੰਬਰ – ਗੁਰੂਗ੍ਰਾਮ ਵਿਖੇ ਰਿਆਨ ਇੰਟਰਨੈਸ਼ਨਲ ਸਕੂਲ ਦੇ ਵਿਦਿਆਰਥੀ ਪਰਦੂਮਨ ਹੱਤਿਆਕਾਂਡ ਮਾਮਲੇ ਵਿਚ ਨਵਾਂ ਮੋੜ ਆ ਗਿਆ ਹੈ| ਸੀ.ਬੀ.ਆਈ ਨੇ ਦਾਅਵਾ ਕੀਤਾ ਹੈ ਕਿ ਪਰਦੂਮਨ ਦੀ ਹੱਤਿਆ ਬੱਸ ਕੰਡਕਟਰ ਨੇ ਨਹੀਂ, ਬਲਕਿ ਸਕੂਲ ਵਿਚ ਹੀ ਪੜ੍ਹਨ ਵਾਲੇ 11ਵੀਂ ਜਮਾਤ ਦੇ ਇੱਕ ਵਿਦਿਆਰਥੀ ਨੇ ਕੀਤੀ ਸੀ| ਸੀਬੀਆਈ ਨੇ ਦਾਅਵਾ ਕੀਤਾ ਹੈ ਕਿ 11ਵੀਂ ਜਮਾਤ ਨੇ ਪੀ.ਟੀ.ਐੱਮ ਨੂੰ ਟਾਲਣ ਲਈ ਪਰਦੂਮਨ ਦੀ ਹੱਤਿਆ ਕੀਤੀ ਸੀ ਅਤੇ ਉਹ ਉਸ ਦਿਨ ਸਕੂਲ ਵਿਚ ਚਾਕੂ ਲੈ ਕੇ ਆਇਆ ਸੀ| ਸੀ.ਬੀ.ਆਈ ਨੇ ਸੀਸੀਟੀਵੀ ਫੁਟੇਜ਼ ਅਤੇ ਹੋਰ ਕਈ ਅਹਿਮ ਸਬੂਤਾਂ ਦੇ ਆਧਾਰ ਤੇ ਇਸ ਵਿਦਿਆਰਥੀ ਨੂੰ ਗ੍ਰਿਫਤਾਰ ਕਰ ਲਿਆ ਹੈ|
ਦੂਸਰੇ ਪਾਸੇ ਸੀਬੀਆਈ ਦੇ ਇਸ ਵੱਡੇ ਖੁਲਾਸੇ ਤੋਂ ਬਾਅਦ ਹਰਿਆਣਾ ਪੁਲਿਸ ਦੀ ਕਾਰਵਾਈ ਉਤੇ ਵੀ ਸਵਾਲ ਉੱਠਣ ਲੱਗ ਪਏ ਹਨ| ਹਰਿਆਣਾ ਪੁਲਿਸ ਨੇ ਹੱਤਿਆਕਾਂਡ ਤੋਂ ਥੋੜ੍ਹੀ ਦੇਰ ਬਾਅਦ ਹੀ ਬੱਸ ਦੇ ਕੰਡਕਟਰ ਨੂੰ ਗ੍ਰਿਫਤਾਰ ਕਰ ਲਿਆ ਸੀ, ਜਿਸ ਨੂੰ ਰਿਮਾਂਡ ਉਤੇ ਲੈਣ ਤੋਂ ਬਾਅਦ ਜੇਲ੍ਹ ਵਿਚ ਬੰਦ ਕਰ ਦਿੱਤਾ ਗਿਆ ਹੈ| ਹੁਣ ਸੀਬੀਆਈ ਨੇ ਦਾਅਵਾ ਕੀਤਾ ਹੈ ਕਿ ਇਹ ਕਤਲ 11ਵੀਂ ਜਮਾਤ ਦੇ ਵਿਦਿਆਰਥੀ ਨੇ ਕੀਤਾ ਹੈ|