ਕੋਟਕਪੂਰਾ 13 ਅਪਰੈਲ( ਵਿਸ਼ਵ ਵਾਰਤਾ)-ਲੰਘੀ ਰਾਤ ਇਥੇ ਹਰੀਨੌਂ ਰੋਡ ‘ਤੇ ਨਾਕੇ ਉਤੇ ਤਾਇਨਾਤ ਪੁਲੀਸ ਮੁਲਾਜ਼ਮਾਂ ਨਾਲ ਝਗੜਾ ਕਰਨ ਅਤੇ ਗੋਲੀਆਂ ਚਲਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਕੋਟਕਪੂਰਾ ਸ਼ਹਿਰੀ ਪੁਲੀਸ ਥਾਣੇ ਨੇ ਮੁਲਜ਼ਮ ਸਤਪਾਲ ਵਾਸੀ ਰਿਸ਼ੀ ਨਗਰ ਤੇ ਕੰਵਰਪਾਲ ਸਿੰਘ ਵਾਸੀ ਚੌਪੜਿਆਂ ਵਾਲਾ ਬਾਗ਼ ਕੋਟਕਪੂਰਾ ਖ਼ਿਲਾਫ਼ ਭਾਰਤੀ ਦੰਡਾਵਾਲੀ ਤਹਿਤ ਇਰਾਦਾ ਕਤਲ, ਜ਼ਿਲਾ ਮੈਜਿਸਟਰੇਟ ਦੇ ਹੁਕਮਾਂ ਦੀ ਉਲੰਘਣਾ ਕਰਨ ਤੇ ਅਸਲਾ ਐਕਟ ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰਕੇ ਮੁਲਜ਼ਮ ਸਤਪਾਲ ਸਿੰਘ ਨੂੰ ਕਾਬੂ ਕਰ ਲਿਆ ਹੈ ਜਦੋਂਕਿ ਉਸਦੇ ਸਾਥੀ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।
ਜਾਣਕਾਰੀ ਅਨੁਸਾਰ ਸਹਾਇਕ ਥਾਣੇਦਾਰ ਕੇਵਲ ਸਿੰਘ ਇੰਚਾਰਜ ਸਾਂਝ ਕੇਂਦਰ ਫ਼ਰੀਦਕੋਟ ਨੇ ਦਰਜ ਕਰਵਾਈ ਐਫਆਈਆਰ ਵਿੱਚ ਦੱਸਿਆ ਕਿ ਕਰੋਨਾਵਾਇਰਸ ਦੀ ਮਹਾਮਾਰੀ ਕਾਰਨ ਉਨ੍ਹਾਂ ਦੇ ਨਾਲ ਸਹਾਇਕ ਥਾਣੇਦਾਰ ਜਤਿੰਦਰ ਸਿਘ,ਹੋਮਗਾਰਡ ਜਵਾਨ ਗੁਰਜੰਟ ਸਿੰਘ ਤੇ ਮਹਿਲਾ ਕਾਂਸਟੇਬਲ ਸੁਧਾ ਰਾਣੀ ਦੀ ਨਾਕੇ ਉਤੇ ਡਿਊਟੀ ਲੱਗੀ ਸੀ। ਬੀਤੇ ਐਤਵਾਰ ਰਾਤ ਕਰੀਬ ਦਸ ਵਜੇ ਐਕਟਿਵਾ ਪੀਬੀ04ਕਯੂ 2341 ਅਤੇ ਮੋਟਰ ਸਾਈਕਲ ਪੀਬੀ 04 ਜੈੱਡ 2005 ਤੇ ਇਹ ਮੁਲਜ਼ਮ ਆਏ ਤੇ ਇਨ੍ਹਾਂ ਨੇ ਪੁਲੀਸ ਮੁਲਾਜ਼ਮਾਂ ਨਾਲ ਦੁਰਵਿਹਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਹਮਲਾਵਰ ਵਾਰ ਵਾਰ ਪੁਲੀਸ ਮੁਲਾਜ਼ਮਾਂ ਨੂੰ ਕਹਿ ਰਹੇ ਸਨ ਕਿ ਉਹ ਰੇਲਵੇ ਮੁਲਾਜ਼ਮ ਹਨ। ਉਹ ਕੱਲ੍ਹ ਜਦ ਇਥੋਂ ਲੰਘਣ ਲੱਗੇ ਤਦ ਪੁਲੀਸ ਮੁਲਾਜ਼ਮਾਂ ਨੇ ਉਨ੍ਹਾਂ ਤੋਂ ਕਰਫਿਊ ਪਾਸ ਵਿਖਾਉਣ ਲਈ ਰੋਕਿਆ। ਵਾਰ ਵਾਰ ਦੱਸਣ ਤੇ ਕਿ ਉਹ ਰੇਲਵੇ ਮੁਲਾਜ਼ਮ ਹਨ, ਉਨ੍ਹਾਂ ਨੂੰ ਖੱਜਲ ਕੀਤਾ ਗਿਆ। ਇਸ ਦਾ ਸਬਕ ਸਿਖਾਉਣ ਲਈ ਅਸੀਂ ਅੱਜ ਇੱਥੇ ਆਏ ਹਾਂ।
ਪੁਲੀਸ ਮੁਤਾਬਕ ਉਕਤ ਮੁਲਜ਼ਮਾਂ ਨੇ ਪੁਲੀਸ ਨਾਲ ਦੁਰਵਿਹਾਰ ਕਰਨਾ ਸ਼ੁਰੂ ਕਰ ਦਿੱਤਾ ਤੇ ਝਗੜਾ ਕਰਨ ਲੱਗ ਪਏ। ਸ਼ੋਰ ਸੁਣਕੇ ਆਲੇਦੁਆਲੇ ਦੇ ਲੋਕ ਮੌਕ ਤੇ ਇਕੱਠੇ ਹੋਣ ਤੇ ਮੁਲਜ਼ਮ ਰੇਲਵੇ ਲਾਈਨ ਵੱਲ ਭੱਜ ਤੁਰੇ। ਮਗਰੋਂ ਰੇਲਵੇ ਲਾਈਨ ਤੋਂ ਇਹਨਾਂ ਨੇ ਪੱਥਰ ਚੁੱਕ ਕੇ ਪੁਲੀਸ ਤੇ ਪਥਰਾਅ ਕੀਤਾ। ਇਸ ਦੌਰਾਨ ਮੁਲਜ਼ਮ ਕੰਵਰਪਾਲ ਨੇ ਪੁਲੀਸ ਤੇ ਆਪਣੇ ਰਿਵਾਲਵਰ ਨਾਲ ਗੋਲੀਆਂ ਚਲਾਈਆਂ। ਹਮਲੇ ਦੌਰਾਨ ਪੁਲੀਸ ਮੁਲਾਜ਼ਮ ਵਾਲ ਵਾਲ ਬੱਚ ਗਏ। ਪੁਲੀਸ ਨੇ ਮੌਕੇ ਤੇ ਹੀ ਇਕ ਮੁਲਜ਼ਮ ਨੂੰ ਕਾਬੂ ਕਰ ਲਿਆ।
ਥਾਣਾ ਸ਼ਹਿਰੀ ਦੇ ਐੱਸ.ਐੱਚ.ਓ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਮੁਲਜ਼ਮ ਨੂੰ ਅੱਜ ਅਦਾਲਤ ਵਿੱਚ ਪੇਸ਼ ਕਰਕੇ ਰਿਮਾਂਡ ਤੇ ਲੈ ਕੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਤੇ ਦੂਜੇ ਮੁਲਜ਼ਮ ਦੀ ਭਾਲ ਸ਼ੁਰੂ ਹੋ ਗਈ ਹੈ।






















