ਵੇਦਾਂਤਾ ਨੇ ਕਾਰੋਬਾਰੀ ਵੰਡ ਲਈ ਪਹਿਲੀ ਮਈ ਤਹਿ ਕੀਤੀ,ਸ਼ੇਅਰ ਅਲਾਟਮੈਂਟ ਵੇਰਵਿਆਂ ਦਾ ਐਲਾਨ
ਹੁਣ ਤਲਵੰਡੀ ਸਾਬੋ ਪਾਵਰ ਲਿਮਟਿਡ ਦਾ ਨਾਂ ਵੇਦਾਂਤਾ ਪਾਵਰ ਲਿਮਟਿਡ ਰੱਖਿਆ ਗਿਆ
ਮਾਨਸਾ, 21 ਅਪਰੈਲ (ਵਿਸ਼ਵ ਵਾਰਤਾ);- ਵੇਦਾਂਤਾ ਲਿਮਟਿਡ ਨੇ ਅੱਜ ਐਲਾਨ ਕੀਤਾ ਕਿ ਇਸਦੇ ਨਿਰਦੇਸ਼ਕ ਮੰਡਲ ਨੇ ਪਹਿਲਾਂ ਤੋਂ ਐਲਾਨੀ ਗਈ ਸੰਯੁਕਤ ਯੋਜਨਾ ਨੂੰ ਅਮਲੀ ਰੂਪ ਦੇਣ ਲਈ ਮੁੱਖ ਕਦਮਾਂ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ, ਜਿਸ ਨੂੰ ਕੰਪਨੀ ਦੇ ਚੱਲ ਰਹੇ ਰਣਨੀਤਕ ਪੁਨਰਗਠਨ ਵਿੱਚ ਇੱਕ ਅਹਿਮ ਮੀਲ ਪੱਥਰ ਮੰਨਿਆ ਜਾ ਰਿਹਾ ਹੈ।
ਬੋਰਡ ਵੱਲੋਂ ਪਹਿਲੀ ਮਈ ਨੂੰ ਕਾਰੋਬਾਰੀ ਵੰਡ ਲਈ ਮਿਤੀ ਤਹਿ ਕੀਤੀ ਗਈ ਹੈ ਤਾਂ ਜੋ ਉਨ੍ਹਾਂ ਸ਼ੇਅਰ ਧਾਰਕਾਂ ਦੀ ਪਛਾਣ ਕੀਤੀ ਜਾ ਸਕੇ, ਜੋ ਕਾਰੋਬਾਰੀ ਵੰਡ ਅਧੀਨ ਆਉਣ ਵਾਲੀਆਂ ਨਵੀਆਂ ਇਕਾਈਆਂ ਵਿੱਚ ਸ਼ੇਅਰ ਪ੍ਰਾਪਤ ਕਰਨ ਦੇ ਯੋਗ ਹੋਣਗੇ। ਇਹ ਅਹਿਮ ਕਦਮ ਵੇਦਾਂਤਾ ਦੇ ਕਾਰਪੋਰੇਟ ਢਾਂਚੇ ਨੂੰ ਸੈਕਟਰ-ਕੇਂਦਿ੍ਰਤ, ਸੁਤੰਤਰ ਕਾਰੋਬਾਰਾਂ ਵਿੱਚ ਵੰਡਕੇ ਸਰਲ ਬਣਾਏਗਾ। ਇਸ ਨਾਲ ਕੌਮੀ ਸਰਮਾਇਆ ਫੰਡ, ਪ੍ਰਚੂਨ ਨਿਵੇਸ਼ਕਾਂ ਅਤੇ ਰਣਨੀਤਕ ਨਿਵੇਸ਼ਕਾਂ ਸਮੇਤ ਵਿਸ਼ਵਵਿਆਪੀ ਨਿਵੇਸ਼ਕਾਂ ਨੂੰ ਵੇਦਾਂਤਾ ਦੀਆਂ ਸੰਪਤੀਆਂ ਰਾਹੀਂ ਭਾਰਤ ਦੀ ਵਿਕਾਸ ਕਹਾਣੀ ਨਾਲ ਜੁੜੀਆਂ ਸਮਰਪਿਤ ਕੰਪਨੀਆਂ ਵਿੱਚ ਸਿੱਧੇ ਨਿਵੇਸ਼ ਦੇ ਮੌਕੇ ਮਿਲਣਗੇ। ਇਹ ਵਿਅਕਤੀਗਤ ਇਕਾਈਆਂ ਨੂੰ ਆਪਣੇ ਰਣਨੀਤਕ ਏਜੰਡਿਆਂ ਨੂੰ ਵਧੇਰੇ ਖ਼ੁਦਮੁਖਤਿਆਰੀ ਨਾਲ ਅੱਗੇ ਵਧਾਉਣ ਅਤੇ ਗਾਹਕਾਂ ਤੇ ਨਿਵੇਸ਼ ਚੱਕਰਾਂ ਨਾਲ ਬਿਹਤਰ ਤਾਲਮੇਲ ਬਣਾਉਣ ਲਈ ਇੱਕ ਮਜ਼ਬੂਤ ਮੰਚ ਪ੍ਰਦਾਨ ਕਰੇਗਾ।
ਬੋਰਡ ਵੱਲੋਂ ਸ਼ੇਅਰ ਹੱਕਦਾਰੀ ਦੇ ਵੇਰਵਿਆਂ ਅਨੁਸਾਰ ਵੇਦਾਂਤਾ ਲਿਮਟਿਡ ਦੇ ਯੋਗ ਸ਼ੇਅਰ ਧਾਰਕਾਂ ਨੂੰ ਵੱਖ ਹੋਣ ਵਾਲੀਆਂ ਕੰਪਨੀਆਂ ਵਿੱਚ ਨਿਰਧਾਰਤ ਅਨੁਪਾਤ ਵਿੱਚ ਸ਼ੇਅਰ ਮਿਲਣਗੇ। ਵੇਦਾਂਤਾ ਐਲੂਮੀਨੀਅਮ ਮੈਟਲ ਲਿਮਟਿਡ (ਵੀਏਐਮਐਲ) ਵਿੱਚ ਵੇਦਾਂਤਾ ਦੇ ਹਰੇਕ 1 ਸ਼ੇਅਰ ਬਦਲੇ 1 ਰੁਪਏ ਦੀ ਫੇਸ ਵੈਲਯੂ ਵਾਲਾ 1 ਇਕੁਇਟੀ ਸ਼ੇਅਰ ਮਿਲੇਗਾ।
ਬੋਰਡ ਅਨੁਸਾਰ ਹੁਣ ਤਲਵੰਡੀ ਸਾਬੋ ਪਾਵਰ ਲਿਮਟਿਡ ਦਾ ਨਾਮ ਬਦਲਕੇ ਹੁਣ ਵੇਦਾਂਤਾ ਪਾਵਰ ਲਿਮਟਿਡ ਰੱਖਿਆ ਗਿਆ ਹੈ। ਇਸ ਵਿਚ ਵੇਦਾਂਤਾ ਦੇ ਹਰੇਕ 1 ਸ਼ੇਅਰ ਬਦਲੇ 10 ਰੁਪਏ ਦੀ ਫੇਸ ਵੈਲਯੂ ਵਾਲਾ 1 ਇਕੁਇਟੀ ਸ਼ੇਅਰ ਦਿੱਤਾ ਜਾਵੇਗਾ। ਬੋਰਡ ਅਨੁਸਾਰ ਮਾਲਕੋ ਐਨਰਜੀ ਲਿਮਟਿਡ, ਜਿਸ ਦਾ ਨਵਾਂ ਨਾਮ ਵੇਦਾਂਤਾ ਆਇਲ ਐਂਡ ਗੈਸ ਲਿਮਟਿਡ ਹੈ, ਵਿੱਚ ਵੇਦਾਂਤਾ ਦੇ ਹਰੇਕ 1 ਸ਼ੇਅਰ ਬਦਲੇ 1 ਰੁਪਏ ਦੀ ਫੇਸ ਵੈਲਯੂ ਵਾਲਾ 1 ਇਕੁਇਟੀ ਸ਼ੇਅਰ ਮਿਲੇਗਾ ਅਤੇ ਵੇਦਾਂਤਾ ਆਇਰਨ ਐਂਡ ਸਟੀਲ ਲਿਮਟਿਡ (ਵੀਆਈਐਸਐਲ) ਵਿੱਚ ਵੀ 1 ਸ਼ੇਅਰ ਦੇ ਬਦਲੇ 1 ਰੁਪਏ ਦੀ ਫੇਸ ਵੈਲਯੂ ਵਾਲਾ 1 ਇਕੁਇਟੀ ਸ਼ੇਅਰ ਪ੍ਰਾਪਤ ਹੋਵੇਗਾ।
ਬੋਰਡ ਵੱਲੋਂ ਦਿੱਤੀ ਗਈ ਜਾਣਕਾਰੀ ਤਹਿਤ ਇਸ ਪੁਨਰਗਠਨ ਦੇ ਮੁੱਖ ਨੁਕਤਿਆਂ ਅਨੁਸਾਰ ਇਸ ਵੰਡ ਨਾਲ ਐਲੂਮੀਨੀਅਮ, ਬਿਜਲੀ, ਤੇਲ ਅਤੇ ਗੈਸ, ਅਤੇ ਲੋਹਾ ਤੇ ਸਟੀਲ ਦੇ ਖੇਤਰਾਂ ਵਿੱਚ ਚਾਰ ਸੁਤੰਤਰ ਅਤੇ ਸੈਕਟਰ-ਕੇਂਦਿ੍ਰਤ ਇਕਾਈਆਂ ਹੋਂਦ ਵਿੱਚ ਆਉਣਗੀਆਂ। ਤਲਵੰਡੀ ਸਾਬੋ ਪਾਵਰ ਲਿਮਟਿਡ ਅਤੇ ਮਾਲਕੋ ਐਨਰਜੀ ਲਿਮਟਿਡ ਦੀ ਰੀ-ਬ੍ਰਾਂਡਿੰਗ ਉਨ੍ਹਾਂ ਦੇ ਵਿਸ਼ੇਸ਼ ਖੇਤਰਾਂ ਨੂੰ ਦਰਸਾਉਣ ਲਈ ਕੀਤੀ ਗਈ ਹੈ।ਇਹ ਵੱਖ ਹੋਣ ਦੀ ਪ੍ਰਕਿਰਿਆ ਸੰਚਾਲਨ ਫੋਕਸ ਵਿੱਚ ਤੇਜ਼ੀ ਲਿਆਏਗੀ, ਜਿਸ ਨਾਲ ਇਨ੍ਹਾਂ ਕਾਰੋਬਾਰਾਂ ਨੂੰ ਮਾਰਕੀਟ ਦੀਆਂ ਮੰਗਾਂ, ਗਾਹਕਾਂ ਦੀਆਂ ਜ਼ਰੂਰਤਾਂ ਅਤੇ ਨਿਵੇਸ਼ ਲੋੜਾਂ ਅਨੁਸਾਰ ਚੱਲਣ ਵਿੱਚ ਮੱਦਦ ਮਿਲੇਗੀ।ਇਸ ਨਾਲ ਹਰੇਕ ਵਰਟੀਕਲ ਦੇ ਕਾਰੋਬਾਰੀ ਪ੍ਰਦਰਸ਼ਨ ਵਿੱਚ ਪਾਰਦਰਸ਼ਤਾ ਆਵੇਗੀ ਅਤੇ ਬਾਜ਼ਾਰ ਲਈ ਹਰੇਕ ਇਕਾਈ ਦਾ ਸਹੀ ਮੁੱਲ ਨਿਰਧਾਰਤ ਕਰਨਾ ਆਸਾਨ ਹੋ ਜਾਵੇਗਾ, ਜਿਸ ਨਾਲ ਕੰਪਨੀ ਦੀ ਅਸਲ ਕੀਮਤ ਉਭਰਕੇ ਸਾਹਮਣੇ ਆ ਸਕੇਗੀ।
