Ajnala : ਸਰਹੱਦ ਤੇ ਕੰਡਿਆਲੀ ਤਾਰ ਤੋਂ ਪਾਰ ਖੇਤੀ ਕਰਨ ਲਈ ਅੱਜ ਤੋਂ ਖੁੱਲ੍ਹਣਗੇ ਗੇਟ – ਕੁਲਦੀਪ ਸਿੰਘ ਧਾਲੀਵਾਲ
ਅਜਨਾਲਾ/ਅੰਮ੍ਰਿਤਸਰ,20ਮਈ (ਵਿਸ਼ਵ ਵਾਰਤਾ) Ajnala : ਭਾਰਤ – ਪਾਕਿ ਕੌਮਾਂਤਰੀ ਜੰਗੀ ਤਣਾਓ ਦੇ ਮੱਦੇਨਜ਼ਰ ਬੀ ਐਸ ਐੱਫ ਵਲੋਂ ਸਰਹੱਦੀ ਕਿਸਾਨਾਂ ਨੂੰ ਕੰਡਿਆਲੀ ਤਾਰੋ ਖੇਤੀ ਕਰਨ ਲਈ ਲਾਈਆਂ ਸੁਰੱਖਿਆ ਪੱਖੋਂ ਪਾਬੰਦੀਆਂ ਕਾਰਣ ਕਿਸਾਨਾਂ ਨੂੰ ਦਰਪੇਸ਼ ਸਮੱਸਿਆ ਨੂੰ ਨਵਿਰਤ ਕਰਨ ਲਈ ਹੁਣ ਜੰਗੀ ਤਣਾਓ ਮੱਧਮ ਪੈਣ ਕਾਰਣ ਉਹਨਾਂ (ਮੰਤਰੀ ਕੁਲਦੀਪ ਸਿੰਘ ਧਾਲੀਵਾਲ) ਦੇ ਬੇਨਤੀ ਨੁਮਾਂ ਨਿੱਜੀ ਯਤਨਾਂ ਦੇ ਨਤੀਜੇ ਵਜੋਂ ਅੱਜ ਮੰਗਲਵਾਰ 20 ਮਈ ਤੋਂ ਬਕਾਇਦਾ ਪਹਿਲਾਂ ਦੀ ਤਰ੍ਹਾਂ ਕੌਮਾਂਤਰੀ ਸਰਹੱਦ ਤੇ ਕੰਡਿਆਲੀ ਤਾਰ ਤੋਂ ਪਾਰ ਕਿਸਾਨਾਂ ਨੂੰ ਖੇਤੀ ਕਰਨ ਲਈ ਖੁੱਲ ਦੇਂਦਿਆਂ ਗੇਟ ਖੋਲ੍ਹਣ ਦੀ ਸਹੂਲਤ ਬਹਾਲ ਕਰ ਦਿੱਤੀ ਹੈ।
ਮੰਤਰੀ ਸ. ਧਾਲੀਵਾਲ ਬੀਤੇ ਕੱਲ੍ਹ (ਸੋਮਵਾਰ ਨੂੰ) ਅਜਨਾਲਾ ਖੇਤਰ ਦੀ ਕੌਮਾਂਤਰੀ ਭਾਰਤੀ ਸਰਹੱਦੀ ਚੋਂਕੀ ਸ਼ਾਹਪੁਰ ਵਿਖੇ ਉਚੇਚੇ ਤੌਰ ਤੇ ਪੁੱਜ ਕੇ ਬੀ ਐਸ ਐੱਫ ਜੁਆਨਾਂ ਤੇ ਅਧਿਕਾਰੀਆਂ ਵਲੋਂ ਜੰਗੀ ਤਣਾਓ ਦੌਰਾਨ ਗੁਆਂਢੀ ਮੁਲਕ ਪਾਕਿਸਤਨ ਦੀਆਂ ਭਾਰਤ ਵਿਰੋਧੀ ਸਾਜਿਸ਼ਾਂ ਦਾ ਮੂੰਹ ਭੁਆਉਣ ਲਈ ਨਿਭਾਈਆਂ ਗਈਆਂ ਜਾਂਬਾਜ਼ ਸੇਵਾਵਾਂ ਨੂੰ ਸਲੂਟ ਕਰਨ, ਤਣਾਅਗ੍ਰਸਿਤ ਜੁਆਨਾਂ ਦੀ ਸੂਬਾ ਮਾਨ ਸਰਕਾਰ ਵਲੋਂ ਤਰੋ ਤਾਜ਼ਾ ਕਰਨ ਲਈ ਹੌਂਸਲਾ ਅਫਜ਼ਾਈ ਲਈ ਇਕਮੁੱਠਤਾ ਦਾ ਪ੍ਰਗਟਾਵਾ ਕਰਨ ਅਤੇ ਕੰਡਿਆਲੀ ਤਾਰ ਤੋਂ ਪਾਰ ਖੇਤੀ ਕਰਦੇ ਕਿਸਾਨਾਂ ਨੂੰ ਦਰਪੇਸ਼ ਸਮੱਸਿਆਵਾਂ ਦੇ ਹੱਲ ਲਈ ਕੀਤੀ ਗਈ ਮੀਟਿੰਗ ਉਪਰੰਤ ਗੱਲਬਾਤ ਕਰ ਰਹੇ ਸਨ।
ਮੰਤਰੀ ਸ. ਧਾਲੀਵਾਲ ਨੇ ਕਿਹਾ ਕਿ ਬੀ ਐਸ ਐਫ ਜੁਆਨਾਂ ਦੇ ਸਰਹੱਦਾਂ ਤੇ ਤਾਇਨਾਤ ਗੁਆਂਢੀ ਮੁਲਕ ਪਾਕਿਸਤਾਨ ਦੀਆਂ ਭਵਿੱਖ ਚ ਸੰਭਾਵੀ ਨਾਪਾਕ ਸਾਜਿਸ਼ਾਂ ਦਾ ਮੂੰਹ ਤੋੜਵਾਂ ਜੁਆਬ ਦੇਣ ਲਈ ਹੌਂਸਲੇ ਪੂਰੀ ਤਰ੍ਹਾਂ ਬੁਲੰਦ ਹਨ। ਉਹਨਾਂ ਕਿਹਾ ਕਿ ਕੌਮੀ ਦਿਹਾੜੇ ਅਜ਼ਾਦੀ ਦਿਵਸ ਅਤੇ ਗਣਤੰਤਰ ਦਿਵਸ ਮੌਕੇ ਮਾਰਚ ਪਾਸਟ ਦੌਰਾਨ ਪੰਜਾਬ ਪੁਲਸ ਤੇ ਹੋਰ ਸੁਰੱਖਿਆ ਦਲ ਉਹਨਾਂ ਨੂੰ ਬਤੌਰ ਵਜ਼ੀਰ ਹੋਣ ਕਾਰਨ ਸਲੂਟ ਦਿੰਦੇ ਹਨ ਪਰ ਉਹ ਮਹਿਸੂਸ ਕਰਦੇ ਹਨ ਕਿ ਸਰਹੱਦਾਂ ਦੀ ਰਾਖੀ ਲਈ ਬੰਦੂਕ ਫੜ੍ਹ ਕੇ ਔਖੇ ਸੌਖੇ ਹਾਲਾਤਾਂ ਚ ਡੱਟੇ ਰਹਿਣ ਵਾਲੇ ਜੁਆਨਾਂ ਦੀ ਉਹਨਾਂ (, ਮੰਤਰੀ), ਨਾਲੋਂ ਵੀ ਵੱਡੀ ਦੇਸ਼ ਸੇਵਾ ਤੇ ਦੇਸ਼ ਭਗਤੀ ਹੈ। ਜਿਸ ਕਰਕੇ ਉਹ ਜੁਆਨਾਂ ਨੂੰ ਬਤੌਰ ਮੰਤਰੀ ਹੋਣ ਵਜੋਂ ਸਲੂਟ ਦੇਣ ਤੇ ਸਨਮਾਨਿਤ ਕਰਨ ਲਈ ਪੁੱਜੇ ਹਨ। ਉਹਨਾਂ ਨੇ ਬੀ ਐਸ ਐੱਫ ਵਲੋਂ ਸਰਹੱਦੀ ਕੰਡਿਆਲੀ ਗੇਟ ਤੋਂ ਆਰ ਪਾਰ ਖੇਤੀ ਕਰਨ ਲਈ ਕਿਸਾਨਾਂ ਲਈ ਗੇਟ ਖੋਲਣ ਦੇ ਫੈਸਲੇ ਨੂੰ ਕਿਸਾਨ ਤੇ ਪੰਜਾਬ ਹਿੱਤੂ ਕਰਾਰ ਦਿੱਤਾ ਅਤੇ ਬੀ ਐਸ ਐਫ ਨੂੰ ਭਰੋਸਾ ਦਿਵਾਇਆ ਕਿ ਸਰਹੱਦੀ ਕਿਸਾਨ ਦੇਸ਼ ਭਗਤੀ ਦੀ ਕਤਾਰ ਚ ਆਉਂਦੇ ਹਨ ਅਤੇ ਸਰਹੱਦ ਤੇ ਕਿਸੇ ਸਮੇਂ ਵੀ ਤਣਾਓ ਹੋਣ ਤੇ ਬੀ ਐਸ ਐਫ ਨਾਲ ਚਟਾਨ ਵਾਂਗ ਖੜ੍ਹੇ ਹੋਣ ਲਈ ਪ੍ਰਤੀਬੱਧ ਹਨ ਅਤੇ ਭਾਰਤ ਵਿਰੋਧੀ ਘੁਸਪੈਠ ਜਾਂ ਤਸਕਰਾਂ ਦੀਆਂ ਹਰਕਤਾਂ ਦਿਸਣ ਤੇ ਬੀ 3ਐਸ ਐਫ ਨੂੰ ਸਵੈ ਇੱਛਾ ਨਾਲ ਸਮੇਂ ਸਿਰ ਸੂਚਨਾ ਵੀ ਦਿੰਦੇ ਰਹਿਣਗੇ।
ਬੀ ਐਸ ਐੱਫ ਵਲੋਂ ਸਨਮਾਨ ਵਜੋਂ ਮੰਤਰੀ ਸ੍ਰ. ਧਾਲੀਵਾਲ ਨੂੰ ਦਿੱਤੇ ਗਏ ਦੁਪਿਹਰ ਦੇ ਭੋਜ ਮੌਕੇ ਮੰਤਰੀ ਸ. ਧਾਲੀਵਾਲ ਨੇ ਖੁਦ ਆਪਣੇ ਹੱਥਾਂ ਨਾਲ ਰੋਟੀਆ ਤੇ ਸਬਜ਼ੀਆਂ ਵਰਤਾ ਕੇ ਜੁਆਨਾਂ ਦੀ ਸੇਵਾ ਕੀਤੀ। ਇਸ ਮੌਕੇ ਤੇ ਖੁਸ਼ਪਾਲ ਸਿੰਘ ਧਾਲੀਵਾਲ, ਅਮਨਦੀਪ ਕੌਰ ਧਾਲੀਵਾਲ, ਨਗਰ ਪੰਚਾਇਤ ਪ੍ਰਧਾਨ ਭੱਟੀ ਜਸਪਾਲ ਸਿੰਘ ਢਿੱਲੋਂ, ਚੇਅਰਮੈਨ ਬੱਬੂ ਚੇਤਨਪੁਰਾ ਤੇ ਸ਼ਹਿਰੀ ਪ੍ਰਧਾਨ ਅਮਿਤ ਔਲ ਆਦਿ ਤੋਂ ਇਲਾਵਾ ਸਰਹੱਦੀ ਕਿਸਾਨ ਮੌਜੂਦ ਸਨ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
