2022 ਦੇ ਚੋਣ ਦੰਗਲ ਵਿੱਚ ਆਪ ਤੇ ਅਕਾਲੀ ਦਲ ਦੇ ਉਮੀਦਵਾਰ ਪ੍ਰਚਾਰ ਅਤੇ ਪਸਾਰ ਚ ਨਿਕਲੇ ਵਿਰੋਧੀਆਂ ਤੋਂ ਅੱਗੇ
ਬੁਢਲਾਡਾ 12, ਅਕਤੂਬਰ(ਵਿਸ਼ਵ ਵਾਰਤਾ): 2022 ਦੀਆਂ ਵਿਧਾਨ ਸਭਾ ਚੋਣਾ ਲਈ ਸਹਿਜੇ ਸਹਿਜੇ ਸਿਆਸੀ ਮਹਿਫਲਾ ਸੱਜਨੀਆਂ ਸੁਰੂ ਹੋ ਗਈਆ ਹਨ ਉੱਥੇ ਵੱਖ ਵੱਖ ਸਿਆਸੀ ਪਾਰਟੀਆਂ ਦੇ ਦਾਅਵੇਦਾਰਾ ਵੱਲੋਂ ਆਪੋਂ ਆਪਣੇ ਪੱਧਰ ਤੇ ਆਪਣੀਆਂ ਟੀਮਾਂ ਨਾਲ ਲੋਕਾਂ ਤੱਕ ਆਪਣੇ ਆਪ ਨੂੰ ਪੁੱਜਦਾ ਕਰਨ ਲਈ ਪ੍ਰੋਗਰਾਮਾਂ ਵਿੱਚ ਪਹੁੰਚਣਾ ਯਕੀਨੀ ਬਣਾ ਰਹੇ ਹਨ। ਟਿਕਟਾ ਦੇ ਦਾਅਵੇਦਾਰ ਅਤੇ ਚਾਹਵਾਨ ਸਿਆਸੀ ਸਮਾਗਮਾ ਤੋਂ ਇਲਾਵਾ ਹਲਕੇ ਚ ਪਾਠ ਦੇ ਭੋਗ ਅਤੇ ਅੰਤਿਮ ਅਰਦਾਸਾਂ ਤੇ ਮੌਕੇ ਨੂੰ ਵੀ ਖੁੱਜਣ ਨਹੀਂ ਦੇ ਰਹੇ ਅਤੇ ਆਪ ਮੁਹਾਰੇ ਅੱਗੇ ਹੋ ਕੇ ਪਰਿਵਾਰਾਂ ਨਾਲ ਦੁੱਖ ਜਤਾਇਆ ਜਾ ਰਿਹਾ ਹੈ ਜਿਨ੍ਹਾਂ ਨਾ ਇਨ੍ਹਾਂ ਨਾਲ ਦੂਰ ਨੇੜੇ ਦਾ ਕੋਈ ਵਾਸਤਾ ਵੀ ਨਹੀਂ ਹੁੰਦਾ ਪ੍ਰੰਤੂ ਰਾਜਨੀਤਕ ਮਜਬੂਰੀ ਦੇ ਚਲਦਿਆਂ ਅਜਿਹੇ ਸਮਾਗਮਾਂ ਵਿੱਚ ਪਹੁੰਚਣਾ ਹਰ ਕੋਈ ਜਰੂਰੀ ਸਮਝਦਾ ਹੈ।
ਅਕਾਲੀ ਦਲ ਬਸਪਾ ਗੱਠਜੋੜ ਵੱਲੋਂ ਐਲਾਨੇ ਉਮੀਦਵਾਰ ਡਾ ਨਿਸਾਨ ਨੇ ਨੂੱਕੜ ਮੀਟਿੰਗਾਂ ਦਾ ਦੋਰ ਸੁਰੂ ਕੀਤਾ-
ਸ੍ਰੋਮਣੀ ਅਕਾਲੀ ਦਲ(ਬ) ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਇੱਕ ਵਾਰ ਫੇਰ ਡਾ ਨਿਸਾਨ ਸਿੰਘ ਨੂੰ ਪਾਰਟੀ ਦਾ ਉਮੀਦਵਾਰ ਘੋਸਿਤ ਕਰਨ ਤੋ ਬਾਅਦ ਸਿਆਸੀ ਸਰਗਰਮੀਆਂ ਤੇਜ ਕਰ ਦਿੱਤੀਆਂ ਹਨ। ਉਹ ਆਪਣੀ ਟੀਮ ਨਾਲ ਹਲਕੇ ਦੇ 85 ਪਿੰਡ ਅਤੇ 3 ਸਹਿਰੀ ਖੇਤਰਾ ਵਿੱਚ ਬਸਪਾ ਵਰਕਰਾਂ ਨੂੰ ਨਾਲ ਲੈ ਕੇ ਨੁੱਕੜ ਮੀਟਿੰਗਾਂ ਦਾ ਸਿਲਸਿਲਾ ਸੁਰੂ ਕੀਤਾ ਹੋਇਆ ਹੈ। ਜੋ ਹਰ ਪਿੰਡ ਅਤੇ ਸਹਿਰ ਦੇ ਵਰਕਰਾਂ ਨੂੰ ਨਾਲ ਲੈ ਕੇ ਪਾਰਟੀ ਦੀਆਂ ਯੋਜਨਾਵਾਂ ਅਤੇ ਤਿਆਰ ਕੀਤੇ ਗਏ ਚੋਣ ਮਨੋਰਥ ਪੱਤਰ ਰਾਹੀਂ ਲਾਭਪਾਰਤੀ ਸਕੀਮਾਂ ਨੂੰ ਘਰ ਘਰ ਪਹੁੰਚਾ ਰਹੇ ਹਨ।
ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਬੁੱਧ ਰਾਮ ਵੱਲੋਂ ਵੀ ਦੂਸਰੀ ਵਾਰੀ ਪਾਰੀ ਖੇਡਣ ਦੀ ਤਿਆਰੀ-
ਇਸ ਹਲਕੇ ਤੋਂ ਵਿਧਾਇਕ ਚੁਣੇ ਗਏ ਪ੍ਰਿੰਸੀਪਲ ਬੁੱਧ ਰਾਮ ਵੱਲੋ ਦੂਸਰੀ ਪਾਰੀ ਖੇਡਣ ਲਈ ਸਿਆਸੀ ਯੱਕੇ ਫਿੱਟ ਕਰਨੇ ਸੁਰੂ ਕਰ ਦਿੱਤੇ ਗਏ ਹਨ। ਉਨ੍ਹਾ ਵੱਲੋਂ ਹਲਕੇ ਦੇ ਵਿਕਾਸ ਤਰੱਕੀ ਅਤੇ ਸਮੱਸਿਆਵਾਂ ਲਈ ਵਿਧਾਨ ਸਭਾ ਦੇ ਹਰ ਸੈਸਨ ਵਿੱਚ ਪ੍ਰਸਨ ਕਾਲ ਦੌਰਾਨ ਸਮੱਸਿਆਵਾਂ ਦੀਆਂ ਪ੍ਰਸਨ ਕਾਪੀਆਂ ਰਾਹੀਂ ਪ੍ਰਚਾਰ ਕਰ ਰਹੇ ਹਨ ਕਿ ਉਨ੍ਹਾਂ ਨੇ ਸਰਕਾਰ ਨੇ ਇਹ ਸਮੱਸਿਆਵਾਂ ਅਤੇ ਮੰਗਾਂ ਪ੍ਰਵਾਨ ਕਰਵਾ ਕੇ ਹਲਕੇ ਨੂੰ ਵਿਕਾਸ ਅਤੇ ਤਰੱਕੀ ਵੱਲ ਤੋਰੀਆ ਹੈ। ਤੰਦਰੁਸਤ ਪੰਜਾਬ ਮਿਸਨ ਤਹਿਤ ਨੋਜਵਾਨਾਂ ਨੂੰ ਖੇਡਾਂ ਵੱਲ ਉਤਸਾਹਿਤ ਕਰਨ, ਕਿਸਾਨੀ ਦੀ ਮਜਬੂਤੀ ਲਈ, ਸਹਿਰੀ ਲੋਕਾਂ ਦੀਆਂ ਸਮੱਸਿਆਵਾਂ ਪਹਿਲ ਦੇ ਆਧਾਰ ਤੇ ਹੱਲ ਕਰਵਾਉਣ ਲਈ, ਵਪਾਰੀ, ਮੁਲਾਜਮ, ਮਜਦੂਰ, ਕਿਰਤੀ ਲੋਕਾਂ ਦੀ ਆਵਾਜ ਨੂੰ ਬੁਲੰਦ ਕਰਨਾ ਆਦਿ ਮੁੱਦਿਆਂ ਦੇ ਆਧਾਰਤ ਲੋਕਾਂ ਦੀ ਕਚਿਹਰੀ ਵਿੱਚ ਜਾ ਰਹੇ ਹਨ।
ਪੰਜਾਬ ਪੁਲਸ ਦਾ ਸਟੇਟ ਅਵਾਰਡੀ ਬਲਵੰਤ ਭੀਖੀ ਵੀ ਪਿੱਛੇ ਨਹੀਂ ਹੈ-
ਹਲਕੇ ਵਿੱਚ ਨਸਿਆ ਦੇ ਖਿਲਾਫ ਸੁਰੂ ਕੀਤੀ ਮੁਹਿੰਮ ਅਧੀਨ ਹਰ ਪਿੰਡ, ਗਲੀ ਮੁੱਹਲੇ, ਖੇਡ ਸਟੇਡੀਅਮ, ਸੱਥਾ ਤੱਕ ਪਹੁੰਚ ਕਰਕੇ ਜਿੱਥੇ ਨੌਜਵਾਨਾਂ ਨੂੰ ਖੇਡਾਂ ਵੱਲ੍ਹ ਲਾਮਬੰਦ ਕਰ ਰਹੇ ਹਨ ਉੱਥੇ ਇਸ ਹਲਕੇ ਤੋਂ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਵਜੋਂ ਪੇਸਕਾਰੀ ਕਰਕੇ ਵੀ ਸਿਆਸੀ ਅਖਾੜੇ ਵਿੱਚ ਕੁੱਦਣ ਦੀਆਂ ਤਿਆਰੀਆਂ ਲਈ ਵਿਧਾਨ ਸਭਾ ਦੀ ਪੋੜੀ ਚੜ੍ਹਨ ਲਈ ਜਮੀਨ ਤਿਆਰ ਕੀਤੀ ਜਾ ਰਹੀ ਹੈ ਜਿਨ੍ਹਾਂ ਨੂੰ ਅਸਿੱਧੇ ਤੌਰ ਤੇ ਪੰਜਾਬ ਦੇ ਖਜਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਸਮੇਤ ਕਈ ਘਾਗਰ ਕਾਂਗਰਸੀ ਨੇਤਾਵਾਂ ਦਾ ਆਸੀਰਵਾਦ ਝਲਕ ਰਿਹਾ ਹੈ। ਬਲਵੰਤ ਭੀਖੀ ਨੇ ਆਪਣੇ ਪਹਿਲੇ ਗੇੜ ਵਿੱਚ ਹਲਕੇ ਦੇ 100 ਦੇ ਕਰੀਬ ਪੇਂਡੂ ਅਤੇ ਸਹਿਰੀ ਖੇਡ ਮੈਦਾਨਾਂ ਤੱਕ 60 ਫੀਸਦੀ ਨੋਜਵਾਨਾਂ ਨਾਲ ਆਪਣੀ ਸਿਆਸੀ ਗੁਫਤਗੂੰ ਮੁਕੰਮਲ ਕਰ ਲਈ ਹੈ ਉੱਥੇ ਅਣਸੂਚੀਤ ਜਾਤੀ ਨਾਲ ਸੰਬੰਧਤ ਚੁਣੇ ਹੋਏ ਪਿੰਡਾ ਦੇ ਪੰਚ ਸਰਪੰਚਾਂ ਨੂੰ ਵੀ ਆਪਣੇ ਸਿਆਸੀ ਸਫਰ ਦਾ ਹਮਸਫਰ ਬਣਾਉਣ ਲਈ ਮੀਟਿੰਗਾਂ ਦਾ ਸਿਲਸਿਲਾ ਜਾਰੀ ਕੀਤਾ ਹੋਇਆ ਹੈ।
ਦੂਸਰੇ ਪਾਸੇ ਕਾਂਗਰਸੀ ਟਿਕਟ ਦੇ ਦਾਅਵੇਦਾਰ ਇਸ ਹਲਕੇ ਤੋਂ ਚੋਣ ਲੜ੍ਹ ਚੁੱਕੇ ਸੱਤਪਾਲ ਸਿੰਘ ਮੂਲੇਵਾਲਾ ਵੀ ਆਪਣੀਆਂ ਸਿਆਸੀ ਗੋਟੀਆ ਫਿੱਟ ਕਰਨ ਵਿੱਚ ਲੱਗੇ ਹੋਏ ਹਨ ਜੋ ਹਲਕੇ ਵਿੱਚ ਹੋਣ ਵਾਲੇ ਸਮਾਗਮਾਂ ਵਿੱਚ ਹਾਜ਼ਰੀ ਭਰ ਕੇ ਆਪਣੀਆਂ ਸਰਗਰਮੀਆਂ ਨੂੰ ਮਜਬੂਤੀ ਨਾਲ ਅੱਗੇ ਲੈ ਕੇ ਚੱਲ ਰਹੇ ਹਨ।
ਇਸ ਤੋਂ ਇਲਾਵਾ ਪੰਜਾਬ ਪੰਚਾਇਤ ਯੂਨੀਅਨ ਦੇ ਪ੍ਰਧਾਨ ਸੂਬੇਦਾਰ ਭੋਲਾ ਸਿੰਘ ਹਸਨਪੁਰ ਜੋ ਜਾਟ ਮਹਾ ਸਭਾ ਦੇ ਐਸ ਸੀ ਵਿੰਗ ਦੇ ਜਿਲ੍ਹਾਂ ਪ੍ਰਧਾਨ ਵੀ ਹਨ ਵੱਲੋਂ ਵੀ ਕਾਂਗਰਸ ਟਿਕਟ ਦੀ ਦਾਅਵੇਦਾਰੀ ਮਜਬੂਤ ਕਰਦਿਆਂ ਸਭ ਨੂੰ ਨਾਲ ਲੈ ਕੇ ਚੱਲਣ ਦਾ ਹੋਕਾ ਦਿੱਤਾ ਜਾ ਰਿਹਾ ਹੈ। ਅਤੇ ਹਲਕੇ ਦੇ ਵਿਕਾਸ ਅਤੇ ਤਰੱਕੀ ਲਈ 101 ਪੇਜਾਂ ਦਾ ਮਾਸਟਰ ਪਲਾਨ ਤਿਆਰ ਕਰਕੇ ਹਲਕੇ ਨੂੰ ਇੱਕ ਮਾਡਲ ਹਲਕਾ ਬਣਾਉਣ ਦਾ ਸੁਪਨਾ ਸੰਜੋਈ ਬੈਠੇ ਹਨ।
ਭੱਟੀ ਵੱਲੋਂ ਵਿਕਾਸ ਕਾਰਜਾਂ ਦੇ ਨਾ ਤੇ ਹਲਕੇ ਚ ਵੰਡੇ ਜਾ ਰਹੇ ਹਨ ਗ੍ਰਾਟਾ ਦੇ ਗੱਫੇ-
ਹਲਕੇ ਦੀ ਸਿਆਸਤ ਚ ਹਲਕਾ ਇੰਚਾਰਜ ਵੱਲੋ਼ ਕਾਂਗਰਸ ਦੀ ਨੇਤਾ ਰਣਜੀਤ ਕੋਰ ਭੱਟੀ ਵੱਲੋਂ ਵੀ ਵਿਕਾਸ ਕਾਰਜਾਂ ਦੇ ਨਾ ਤੇ ਹਲਕੇ ਚ ਗ੍ਰਾਟਾ ਦੇ ਗੱਫੇ ਵੰਡੇ ਜਾ ਰਹੇ ਹਨ। ਜੋ ਇੱਕ ਵਾਰ ਫੇਰ ਆਪਣੀ ਦਾਅਵੇਦਾਰੀ ਨੂੰ ਮਜਬੂਤ ਕਰਦਿਆਂ ਹਲਕੇ ਵਿੱਚ ਸੰਪਰਕ ਮੁਹਿੰਮ ਅਧੀਨ ਵਰਕਰ ਪ੍ਰੋਗਰਾਮ ਸੁਰੂ ਕੀਤਾ ਹੋਇਆ ਹੈ। ਲੋਕਾਂ ਨਾਲ ਲਗਾਤਾਰ ਤਾਲਮੇਲ ਰੱਖਿਆ ਜਾ ਰਿਹਾ ਹੈ।
