– ਹਜ਼ਾਰਾਂ ਅਧਿਆਪਕਾਂ ਨੇ ਸੂਬਾਈ ਹੱਲਾ ਬੋਲ ਰੈਲੀ ਰਾਹੀ ਜਨਤਕ ਸਿੱਖਿਆ ਵਿਰੋਧੀ ਸਰਕਾਰੀ ਨੀਤੀਆਂ ਨੂੰ ਦਿੱਤੀ ਵੱਡੀ ਚੁਣੌਤੀ
– ਚੋਣ ਵਾਅਦਿਆਂ ਤੋਂ ਪਿੱਛੇ ਹਟਣ ਖਿਲਾਫ ਮੁੱਖ ਮੰਤਰੀ ਦੇ ਸ਼ਹਿਰ ‘ਚ ਅਧਿਆਪਕਾਂ ਕੀਤਾ ਵੱਡਾ ਇਤਿਹਾਸਿਕ ਪ੍ਰਦਰਸ਼ਨ
– ਕੱਚੇੇ ਅਧਿਆਪਕਾਂ ਦੀ ਪੂਰੀ ਤਨਖਾਹ ‘ਤੇ ਵਿਭਾਗੀ ਰੈਗੂਲਰਾਇਜੇਸ਼ਨ ਕਰਵਾਉਣ ਲਈ ਸਮੁੱਚਾ ਅਧਿਆਪਕ ਵਰਗ ਹੋਇਆ ਇੱਕਜੁਟ
ਪਟਿਆਲਾ, 15 ਅਪ੍ਰੈਲ (ਵਿਸ਼ਵ ਵਾਰਤਾ): ਪੰਜਾਬ ਦੀ ਕਾਂਗਰਸ ਸਰਕਾਰ ਵੱਲੋਂ ਮਿਆਰੀ ਜਨਤਕ ਸਿੱਖਿਆ ਦੇਣ ਦੀ ਥਾਂ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਦਾ ਉਜਾੜਾ ਕਰਨ ਖਿਲਾਫ ਸਾਂਝੇ ਅਧਿਆਪਕ ਮੋਰਚੇ ਦੀ ਅਗਵਾਈ ਹੇਠ ਵਿਸ਼ਾਲ ਏਕਤਾ ‘ਚ ਪਰੋਏ ਅਧਿਆਪਕਾਂ ਦਾ ਰੋਹ ਲਗਾਤਾਰ ਤਿੱਖਾ ਹੁੰਦਾ ਜਾ ਰਿਹਾ ਹੈ। ਕੱਚੇ ਅਧਿਆਪਕਾਂ ਤੇ ਮੁਲਾਜ਼ਮਾਂ ਨੂੰ ਪੱਕਾ ਕਰਨ ਦੀ ਥਾਂ ਮਿਲਦੀਆਂ ਤਨਖਾਹਾਂ ਵੀ ਘਟਾਉਣ ਦੀਆਂ ਕੋਸ਼ਿਸ਼ਾਂ ਕਰਨ, ਨਿੱਜ਼ੀਕਰਨ ਦੀ ਨੀਤੀ ਤਹਿਤ 800 ਪ੍ਰਾਇਮਰੀ ਸਕੂਲਾਂ ਨੂੰ ਬੰਦ ਕਰਨ ਅਤੇ ਦੋਸ਼ਪੂਰਨ ਰੈਸ਼ਨਲਾਇਜੇਸ਼ਨ ਨੀਤੀ ਰਾਹੀ ਹਜ਼ਾਰਾਂ ਅਸਾਮੀਆਂ ਘਟਾਕੇ ਸਿੱਖਿਆ ਵਿਭਾਗ ਦੀ ਅਕਾਰ ਘਟਾਈ ਕਰਨ, ਬਜ਼ਟ ਵਿੱਚ ਸਿੱਖਿਆ ਲਈ ਜੀ.ਡੀ.ਪੀ ਦਾ ਘੱਟੋ ਘੱਟ 6% ਖਰਚ ਨਾ ਰੱਖਣ ਅਤੇ ਵਿਦਿਆਰਥੀਆਂ ਨੂੰ ਹਰੇਕ ਪ੍ਰਕਾਰ ਦੀਆਂ ਲੋੜੀਦੀਆਂ ਵਿੱਦਿਅਕ ਸਹੂਲਤਾਂ ਤੋਂ ਵਾਂਝੇ ਰੱਖਣ ਦੇ ਕਦਮਾਂ ਨੇ ਸਰਕਾਰ ਦੀ ਜਨਤਕ ਸਿੱਖਿਆ ਪ੍ਰਤੀ ਅਪਣਾਈ ਜਾ ਰਹੀ ਲੋਕ ਵਿਰੋਧੀ ਨੀਤੀ ਦੀ ਪ੍ਰੋੜਤਾ ਕੀਤੀ ਹੈ।
ਸਾਂਝਾ ਅਧਿਆਪਕ ਮੋਰਚਾ ਪੰਜਾਬ ਦੀ ਅਗਵਾਈ ਵਿੱਚ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਸ਼ਹਿਰ ਵਿੱਚਲੇ ਜੱਸੋਵਾਲ ਖੇਡ ਮੈਦਾਨ ਵਿੱਚ ਸੂਬੇ ਭਰ ‘ਚੋ ਪਹੁੰਚੇ ਹਜ਼ਾਰਾਂ ਅਧਿਆਪਕਾਂ ਨੂੰ ਆਪਣੇ ਸੰਬੋਧਨ ਰਾਹੀ ਸੂਬਾ ਕਨਵੀਨਰਾਂ ਕੁਲਵੰਤ ਸਿੰਘ ਗਿੱਲ, ਬਲਕਾਰ ਸਿੰਘ ਵਲਟੋਹਾ, ਸੁਖਵਿੰਦਰ ਸਿੰਘ ਚਾਹਲ, ਭੁਪਿੰਦਰ ਸਿੰਘ ਵੜੈਚ ਅਤੇ ਬਾਜ਼ ਸਿੰਘ ਖਹਿਰਾ ਨੇ ਅਧਿਆਪਕ ਏਕਤਾ ਨੂੰ ਵੱਡੇ ਸੰਘਰਸ਼ਾਂ ਰਾਹੀ ਲੋਕ ਲਹਿਰ ਬਣਾਕੇ ਸਰਕਾਰ ਨੂੰ ਜਨਤਕ ਸਿੱਖਿਆ ਤੇ ਅਧਿਆਪਕ ਪੱਖੀ ਫੈਸਲੇ ਕਰਨ ਲਈ ਮਜਬੂਰ ਕਰਨ ਦਾ ਸੱਦਾ ਦਿੱਤਾ। ਇਸ ਮੌਕੇ ਅਧਿਆਪਕ ਆਗੂਆਂ ਨੇ ਮੰਗ ਉਠਾਈ ਕਿ ਠੇਕਾ ਅਧਾਰਿਤ ਸਰਵ ਸਿੱਖਿਆ ਅਭਿਆਨ, ਰਮਸਾ ਅਧਿਆਪਕਾਂ ਤੇ ਕਰਮਚਾਰੀਆਂ, ਆਈਈਆਰਟੀ, ਸਿੱਖਿਆ ਵਿਭਾਗ ਦੀ ਪਿਕਟਸ ਸੁਸਾਇਟੀ ਅਧੀਨ ਰੈਗੂਲਰ ਕੰਪਿਊਟਰ ਅਧਿਆਪਕਾਂ, ਸੇਵਾ ਸ਼ਰਤਾਂ ਤਹਿਤ ਤਿੰਨ ਸਾਲ ਪੂਰੇ ਹੋਣ ਦੇ ਬਾਵਜੂਦ ਕੱਚੇ ਵਿਭਾਗੀ 5178 ਅਧਿਆਪਕਾਂ, ਸਰਕਾਰੀ ਆਦਰਸ਼, ਮਾਡਲ ਤੇ ਆਦਰਸ਼ (ਪੀ.ਪੀ.ਪੀ ਮੋਡ) ਅਤੇ ਓ.ਡੀ.ਐੱਲ ਅਧਿਆਪਕਾਂ ਨੂੰ ਪੂਰੇ ਤਨਖਾਹ ਸਕੇਲ ਤੇ ਵਿਭਾਗ ‘ਚ ਰੈਗੂਲਰ ਕਰਕੇ ਹੀ ਜਨਤਕ ਸਿੱਖਿਆ ਦੇ ਖੇਤਰ ਵਿੱਚ ਚੰਗੀ ਪ੍ਰਤਿਭਾ ਦੀ ਆਮਦ ਦੀ ਆਸ ਕੀਤੀ ਜਾ ਸਕਦੀ ਹੈ।
ਸੂਬਾ ਕੋ-ਕਨਵੀਨਰਾਂ ਜਗਸੀਰ ਸਹੋਤਾ, ਪ੍ਰਦੀਪ ਮਲੂਕਾ, ਦੀਦਾਰ ਮੁੱਦਕੀ, ਗੁਰਵਿੰਦਰ ਤਰਨਤਾਰਨ, ਗੁਰਜਿਦਰਪਾਲ ਸਿੰਘ, ਅਮ੍ਰਿਤਪਾਲ ਸਿੱਧੂ, ਸੁਖਰਾਜ ਕਾਹਲੋਂ, ਇਦਰਜੀਤ ਮਲੇਰਕੋਟਲਾ, ਹਰਦੀਪ ਟੋਡਰਪੁਰ, ਹਰਵਿਦਰ ਬਿਲਗਾ, ਹਾਕਮ ਸਿੰਘ, ਸੁਖਜਿਦਰ ਹਰੀਕਾ, ਜਸਵੰਤ ਸਿੰਘ ਪੰਨੂ, ਸੁਖਰਾਜ ਸਿੰਘ, ਸਤਨਾਮ ਸਿੰਘ ਸ਼ੇਰੋਂ ਅਤੇ ਵਨੀਤ ਕੁਮਾਰ ਨੇ ਹੈਰਾਨੀ ਜ਼ਾਹਿਰ ਕੀਤੀ ਕੇ ਕਈ ਸਾਲਾਂ ਤੋਂ ਵਿਦਿਆਰਥੀਆਂ ਦਾ ਭਵਿੱਖ ਸਵਾਰਨ ‘ਚ ਲੱਗੇ ਈ.ਜੀ.ਐੱਸ, ਏ.ਆਈ.ਈ, ਐੱਸ.ਟੀ.ਆਰ, ਏ.ਆਈ.ਈ, ਆਈ.ਈ.ਵੀ, ਵਲੰਟੀਅਰਾਂ ਅਤੇ ਸਿੱਖਿਆ ਪ੍ਰੋਵਾਇਡਰਾਂ ਨੂੰ ਪੱਕੇ ਅਤੇ ਰੈਗੂਲਰ ਅਧਿਆਪਕ ਵਾਲੀਆਂ ਸੇਵਾ ਹਾਲਤਾਂ ਦੇਣ ਤੋਂ ਵੀ ਇਨਕਾਰੀ ਹੋਇਆ ਜਾ ਰਿਹਾ ਹੈ। ਆਗੂਆਂ ਨੇ ਦੱਸਿਆ ਕੇ ਬਦਲੀਆਂ ਦੀ ਨੀਤੀ ਤਹਿਤ ਸੱਤ ਸਾਲ ਦੀ ਠਹਿਰ ਵਾਲੇ ਅਧਿਆਪਕਾਂ ਨੂੰ ਜਬਰੀ ਤਬਦੀਲ ਕਰਨ, ਦੂਰ ਦਰਾਂਡੇ ਸੇਵਾਵਾਂ ਦੇ ਰਹੇ ਨਵਨਿਯੁਕਤ ਅਧਿਆਪਕਾਂ ‘ਤੇ ਤਿੰਨ ਸਾਲ ਤੋਂ ਪਹਿਲਾਂ ਬਦਲੀ ਨਾ ਹੋਣ ਦੀ ਸ਼ਰਤ ਲਗਾਉਣ, ਤਰਕਸੰਗਤ ਪਾਠਕ੍ਰਮ ਅਧਾਰਿਤ ਸਿੱਖਿਆ ਦੇਣ ਦੀ ਥਾਂ ਪੜ੍ਹੋ ਪੰਜਾਬ-ਪੜ੍ਹਾਓ ਪੰਜਾਬ ਪ੍ਰੋਜੈਕਟ ਲਾਗੂ ਕਰਕੇ ਹਜਾਰਾਂ ਅਧਿਆਪਕਾਂ ਨੂੰ ਸਕੂਲਾਂ ਵਿੱਚੋਂ ਕੱਢਣ, ਮਿਡਲ ਸਕੂਲਾਂ ਵਿੱਚੋਂ ਪੰਜਾਬੀਫ਼ਹਿੰਦੀਫ਼ਡਰਾਇੰਗ ਅਤੇ ਸ਼ਰੀਰਕ ਸਿੱਖਿਆ ਦੀਆਂ ਹਜਾਰਾਂ ਅਸਾਮੀਆਂ ਖਤਮ ਕਰਨ, ਪ੍ਰਾਇਮਰੀ ਸਕੂਲਾਂ ਵਿੱਚ ਅਧਿਆਪਕਾਂ ਸਮੇਤ ਹੋਰ ਅਸਾਮੀਆਂ ਦੇਣ ਦੀ ਥਾਂ ਹੈਡ ਟੀਚਰ ਦੀ ਅਸਾਮੀ ਦੇਣ ਤੇ ਵੀ ਮਾਰੂ ਸ਼ਰਤਾਂ ਲਗਾਉਣ, ਬੀਐਡ ਪਾਸ ਪ੍ਰਾਇਮਰੀ ਅਧਿਆਪਕਾਂ ‘ਤੇ ਜਬਰੀ ਬ੍ਰਿਜ਼ ਕੋਰਸ ਦੀ ਸ਼ਰਤ ਲਗਾਉਣ, ਨਵੀਂ ਪੈਨਸ਼ਨ ਸਕੀਮ ਨੂੰ ਰੱਦ ਕਰਕੇ ਪੁਰਾਣੀ ਪੈਨਸ਼ਨ ਨਾ ਬਹਾਲ ਕਰਨ, ਡੀ.ਏ ਅਤੇ ਤਨਖਾਹ ਕਮਿਸ਼ਨ ਦੀ ਰਿਪੋਰਟ ਨਾ ਜਾਰੀ ਕਰਨ, ਹਿੰਦੀ ਤੇ ਸਮਾਜਿਕ ਸਿੱਖਿਆ ਵਰਗੇ ਅਹਿਮ ਵਿਸ਼ਿਆਂ ਨੂੰ ਵਿਕਲਪਿਕ ਬਣਾਉਣ ਅਤੇ ਦੋਸ਼ਪੂਰਨ ਰੈਸ਼ਨਲਾਇਜੇਸ਼ਨ ਨੀਤੀ ਰਾਹੀ ਲੈਕਚਰਾਰ, ਮਾਸਟਰ, ਈ.ਟੀ.ਟੀ ਕਾਡਰਾਂ ਅਤੇ ਕੰਪਿਊਟਰ ਫੈਕਲਟੀ ਦੀਆਂ ਹਜਾਰਾਂ ਅਸਾਮੀਆਂ ਦਾ ਖਾਤਮਾ ਕਰਨ, ਸਰਕਾਰ ਦੀਆਂ ਸਿੱਖਿਆ ਵਿਰੋਧੀ ਨੀਤੀਆਂ ਨੂੰ ਲਾਗੂ ਕਰ ਰਹੇ ਸਿੱਖਿਆ ਸਕੱਤਰ ਨੂੰ ਨਾ ਹਟਾਉਣ, ਬੀ.ਐਲ.ਓ ਡਿਊਟੀਆਂ ਵਰਗੇ ਗੈਰ ਵਿੱਦਿਅਕ ਕੰਮ ਨਾ ਵਾਪਿਸ ਲੈਣ ਅਤੇ ਹਜਾਰਾਂ ਸੰਘਰਸ਼ੀ ਅਧਿਆਪਕਾਂ ਉੱਪਰ ਮੋਹਾਲੀ ਤੇ ਲੁਧਿਆਣਾ ਵਿਖੇ ਪੁਲਿਸ ਕੇਸ ਦਰਜ਼ ਕਰਨ ਵਰਗੇ ਫੈਸਲਿਆਂ ਦੇ ਵਿਰੋਧ ‘ਚ ਅਧਿਆਪਕ ਵਰਗ ਦਾ ਸਾਂਝਾ ਅਧਿਆਪਕ ਮੋਰਚੇ ਰਾਹੀ ਵਿਆਪਕ ਹੋਇਆ ਰੋਸ ਸਿਖਰਾਂ ‘ਤੇ ਹੈ।
ਇਸ ਮੌਕੇ ਹਰਜੀਤ ਸਿੰਘ ਬਸੋਤਾ, ਸੁਰਿੰਦਰ ਪੁਆਰੀ, ਕੁਲਦੀਪ ਸਿੰਘ ਦੌੜਕਾ, ਦਵਿੰਦਰ ਸਿੰਘ ਪੂਨੀਆ, ਗਰਨੈਬ ਸਿੰਘ ਸੰਧੂ, ਬਿਕਰਮਜੀਤ ਅੰਮ੍ਰਿਤਸਰ, ਪ੍ਰੇਮ ਚਾਵਲਾ, ਰਣਜੀਤ ਸਿੰਘ ਮਾਨ, ਦਿਗਵਿਜੇਪਾਲ ਮੋਗਾ, ਗੁਰਸਿਮਰਤ ਜਖੇਪਲ,ਦਵਿੰਦਰ ਰਹਿਲ,ਗੁਰਦੀਪ ਬੈਂਸ, ਰਾਜਵੀਰ ਸਮਰਾਲਾ, ਪਰਮਵੀਰ ਪਟਿਆਲਾ,ਰਾਮ ਚੰਦਰ, ਵਿਸ਼ਵਾਸ਼ ਕਪਿਲਾ, ਅਮਨਦੀਪ ਮਾਨਸਾ, ਜਸਵਿੰਦਰ ਔਜਲਾ, ਸੁਖਦੀਪ ਤਪਾ, ਬਿਕਰਮਜੀਤ ਕੱਦੋਂ, ਸੁਖਦੇਵ ਲਾਲ, ਹਰਜੀਤ ਜੁਨੇਜਾ, ਸੁਭਾਸ਼ ਗਨੋਟਾ, ਰੇਨੂੰ ਕੰਵਰ,ਨਵਨੀਤ ਬਰਾੜ, ਬਿਪਨ ਸ਼ਰਮਾ ਵੀ ਸ਼ਾਮਿਲ ਸਨ।
