ਮਨਪ੍ਰੀਤ ਮੋਨਿਕਾ ਸਿੰਘ ਬਣੀ ਅਮਰੀਕਾ ਦੀ ਪਹਿਲੀ ਮਹਿਲਾ ਸਿੱਖ ਜੱਜ
ਚੰਡੀਗੜ੍ਹ 9 ਜਨਵਰੀ(ਵਿਸ਼ਵ ਵਾਰਤਾ)-ਭਾਰਤੀ ਮੂਲ ਦੀ ਮਨਪ੍ਰੀਤ ਮੋਨਿਕਾ ਸਿੰਘ ਅਮਰੀਕਾ ਦੀ ਪਹਿਲੀ ਮਹਿਲਾ ਸਿੱਖ ਜੱਜ ਬਣ ਗਈ ਹੈ। ਉਹ ਹੈਰਿਸ ਕਾਉਂਟੀ, ਟੈਕਸਾਸ ਵਿੱਚ ਜੱਜ ਵਜੋਂ ਕੰਮ ਕਰੇਗੀ। ਜੱਜ ਚੁਣੇ ਜਾਣ ਤੋਂ ਬਾਅਦ ਮੋਨਿਕਾ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਦੀ ਜਾਣਕਾਰੀ ਦਿੱਤੀ।
ਉਸਨੇ ਲਿਖਿਆ- ਮਾਂ, ਅਸੀਂ ਇਹ ਕਰ ਦਿੱਤਾ ਹੈ, ਸਿਵਲ ਕੋਰਟ ਦਾ ਜੱਜ ਬਣ ਕੇ ਹੈਰਿਸ ਕਾਉਂਟੀ ਦੇ ਲੋਕਾਂ ਲਈ ਕੰਮ ਕਰਨਾ ਮੇਰੇ ਲਈ ਮਾਣ ਵਾਲੀ ਗੱਲ ਹੋਵੇਗੀ।
ਮੋਨਿਕਾ ਦੇ ਜੱਜ ਬਣਨ ਲਈ ਆਯੋਜਿਤ ਸਮਾਰੋਹ ਦੌਰਾਨ ਪੂਰਾ ਕੋਰਟ ਰੂਮ ਲੋਕਾਂ ਨਾਲ ਖਚਾਖਚ ਭਰਿਆ ਹੋਇਆ ਸੀ।
ਜੱਜ ਬਣਨ ਤੋਂ ਬਾਅਦ ਮੋਨਿਕਾ ਨੇ ਕਿਹਾ- ਇਹ ਇਤਿਹਾਸਕ ਪਲ ਹੈ। ਇੱਕ ਦਿਨ ਆਵੇਗਾ ਜਦੋਂ ਇੱਕ ਔਰਤ ਅਤੇ ਸਿੱਖ ਦਾ ਜੱਜ ਬਣਨਾ ਆਮ ਗੱਲ ਹੋ ਜਾਵੇਗੀ। ਮੈਂ ਆਪਣੇ 20 ਸਾਲਾਂ ਦੇ ਤਜ਼ਰਬੇ ਦੀ ਚੰਗੀ ਵਰਤੋਂ ਕਰਾਂਗੀ। ਉਨ੍ਹਾਂ ਕਿਹਾ- ਮੈਨੂੰ ਲੱਗਦਾ ਹੈ ਕਿ ਪੜ੍ਹਦੇ ਸਮੇਂ ਬੱਚਿਆਂ ਲਈ ਇਹ ਜ਼ਰੂਰੀ ਹੈ ਕਿ ਉਹ ਇਹ ਦੇਖ ਸਕਣ ਕਿ ਹੁਣ ਉਹ ਅਜਿਹੇ ਪੇਸ਼ਿਆਂ ਵੱਲ ਵੀ ਜਾ ਸਕਦੇ ਹਨ ਜੋ ਪਹਿਲਾਂ ਉਨ੍ਹਾਂ ਦੀ ਪਹੁੰਚ ਤੋਂ ਬਾਹਰ ਸਨ।
ਮੋਨਿਕਾ ਦੇ ਜੱਜ ਬਣਨ ਦੇ ਸਮਾਰੋਹ ਦੀ ਪ੍ਰਧਾਨਗੀ ਕਰਨ ਵਾਲੇ ਜੱਜ ਭਾਰਤੀ ਮੂਲ ਦੇ ਰਵੀ ਸੰਦਿਲ ਸਨ। ਸੰਦਿਲ ਨੇ ਕਿਹਾ- ਅਮਰੀਕਾ ਵਿੱਚ ਸਿੱਖ ਭਾਈਚਾਰੇ ਲਈ ਇਹ ਪਲ ਬਹੁਤ ਮਹੱਤਵਪੂਰਨ ਹੈ।
ਮੋਨਿਕਾ ਮਨਪ੍ਰੀਤ ਸਿੰਘ ਦਾ ਜਨਮ ਅਮਰੀਕਾ ਦੇ ਹਿਊਸਟਨ ਵਿੱਚ ਹੋਇਆ ਸੀ। ਉਹ ਹੁਣ ਆਪਣੇ ਪਤੀ ਅਤੇ ਦੋ ਬੱਚਿਆਂ ਨਾਲ ਬੇਲੇਅਰ ਵਿੱਚ ਰਹਿੰਦੀ ਹੈ। ਸਿੱਖ ਧਰਮ ਦੁਨੀਆਂ ਦਾ 5ਵਾਂ ਸਭ ਤੋਂ ਵੱਡਾ ਧਰਮ ਹੈ। NBC ਨਿਊਜ਼ ਮੁਤਾਬਕ ਅਮਰੀਕਾ ਵਿਚ ਸਿੱਖ ਭਾਈਚਾਰੇ ਦੇ ਕਰੀਬ 5 ਲੱਖ ਲੋਕ ਰਹਿੰਦੇ ਹਨ। ਇਸ ਦੇ ਬਾਵਜੂਦ ਅਮਰੀਕਾ ਵਿੱਚ ਕੋਈ ਮਹਿਲਾ ਸਿੱਖ ਜੱਜ ਨਹੀਂ ਸੀ।
