ਨੌਜਵਾਨ ਵਪਾਰੀ ਨੇ ਪਤਨੀ ਅਤੇ ਨਾਬਾਲਗ ਬੱਚਿਆਂ ਨੂੰ ਗੋਲੀ ਮਾਰਨ ਤੋਂ ਬਾਅਦ ਖ਼ੁਦ ਵੀ ਕੀਤੀ ਖੁਦਕੁਸ਼ੀ
ਵਪਾਰ ਚ ਵੱਡੇ ਨੁਕਸਾਨ ਅਤੇ ਚੜ੍ਹੇ ਕਰਜ਼ੇ ਤੋਂ ਸੀ ਪਰੇਸ਼ਾਨ ,ਸੁਸਾਇਡ ਨੋਟ ਵੀ ਹੋਇਆ ਬਰਾਮਦ
ਬਠਿੰਡਾ, 22 ਅਕਤੂਬਰ( ਕੁਲਬੀਰ ਬੀਰਾ ):ਬਠਿੰਡਾ ਵਿੱਚ ਅੱਜ ਫਿਰ ਦਿਲ ਦਹਿਲਾਉਣ ਵਾਲੀ ਘਟਨਾ ਵਾਪਰੀ ਹੈ। ਨੌਜਵਾਨ ਵਪਾਰੀ ਦਵਿੰਦਰ ਗਰਗ ਉਮਰ 41 ਸਾਲ ਵਾਸੀ ਗ੍ਰੀਨ ਸਿਟੀ ਫੇਸ-2 ਕੋਠੀ ਨਬਰ 284 ਨੇ ਆਪਣੀ ਪਤਨੀ ਮੀਨਾ ਗਰਗ ਉਮਰ 38 ਸਾਲ,ਪੁੱਤਰ ਅਰੂਸ਼ ਗਰਗ ਉਮਰ 14 ਸਾਲ, ਪੁੱਤਰੀ ਮੁਸਕਾਨ ਗਰਗ ਉਮਰ 10 ਸਾਲ ਨੂੰ ਗੋਲੀ ਮਾਰ ਕੇ ਮਾਰਨ ਤੋਂ ਬਾਅਦ ਖ਼ੁਦ ਵੀ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਫਾਇਰਿੰਗ ਦੀ ਆਵਾਜ਼ ਸੁਣਨ ਤੋਂ ਬਾਅਦ ਇਲਾਕੇ ਵਿੱਚ ਅਫੜਾ ਦਫੜੀ ਮਚ ਗਈ ਅਤੇ ਦੇਖਿਆ ਤਾਂ 4 ਪਰਿਵਾਰਕ ਮੈਂਬਰਾਂ ਦੀਆਂ ਲਾਸ਼ਾਂ ਕਮਰੇ ਵਿੱਚ ਖ਼ੂਨ ਨਾਲ ਲੱਥ ਪੱਥ ਪਈਆਂ ਸਨ। ਸੂਚਨਾ ਮਿਲਦੇ ਹੀ ਮੌਕੇ ਤੇ ਇਲਾਕੇ ਦੇ ਡੀਐਸਪੀ, ਥਾਣੇਦਾਰ ਸਮੇਤ ਪੁਲਸ ਪਾਰਟੀ ਪਹੁੰਚੇ ਅਤੇ ਨੌਜਵਾਨ ਵੈਲਫੇਅਰ ਸੁਸਾਇਟੀ ਦੇ ਸਹਿਯੋਗ ਨਾਲ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਪਹੁੰਚਾਇਆ। ਮ੍ਰਿਤਕ ਦੀ ਜੇਬ ਵਿਚੋਂ ਸੁਸਾਇਡ ਨੋਟ ਵੀ ਬਰਾਮਦ ਹੋਇਆ ਹੈ। ਪੁਲਸ ਦਾ ਕਹਿਣਾ ਹੈ ਕਿ ਦਵਿੰਦਰ ਗਰਗ ਆਨ ਲਾਈਨ ਟ੍ਰੇਡਿੰਗ ਕੰਪਨੀ ਦਾ ਕੰਮ ਕਰਦਾ ਸੀ, ਇਸ ਤੋਂ ਪਹਿਲਾਂ ਉਹ ਚਿੱਟਫ਼ੰਡ ਕੰਪਨੀ ਵਿੱਚ ਵੀ ਪੈਸਾ ਲਾਉਂਦਾ ਰਿਹਾ ਹੈ ਅਤੇ ਵਪਾਰ ਵਿਚ ਵੱਡੇ ਪੱਧਰ ਤੇ ਨਾਮੀ ਵਪਾਰੀ ਵਜੋਂ ਜਾਣਿਆ ਜਾਂਦਾ ਸੀ, ਪ੍ਰੰਤੂ ਵਪਾਰ ਵਿੱਚ ਘਾਟਾ ਪੈਣ ਕਰਕੇ ਹੁਣ ਗ੍ਰੀਨ ਸਿਟੀ ਫੇਜ਼-2 ਦੀ ਕੋਠੀ ਨੰਬਰ 284 ਵਿੱਚ ਉਪਰਲੇ ਪੋਰਸ਼ਨ ਵਿੱਚ ਕਿਰਾਏ ਤੇ ਰਹਿੰਦਾ ਸੀ । ਰਿਸ਼ਤੇਦਾਰ ਅਤੇ ਸਹਿਯੋਗੀ ਦੋਸਤਾਂ ਦਾ ਦਬੀ ਆਵਾਜ਼ ਵਿਚ ਵਿੱਚ ਕਹਿਣਾ ਹੈ ਕਿ ਦਵਿੰਦਰ ਗਰਗ ਹੁਣ ਸਿਰ ਚੜ੍ਹੇ ਕਰਜ਼ੇ ਅਤੇ ਕੰਮ ਕਾਰ ਨਾ ਚਲਣ ਤੋਂ ਪਰੇਸ਼ਾਨ ਰਹਿੰਦਾ ਸੀ, ਜਿਸ ਕਰਕੇ ਉਸ ਨੇ ਘਰੇਲੂ ਹਾਲਾਤ ਤੋਂ ਦੁਖੀ ਹੋ ਕੇ ਵੱਡੀ ਘਟਨਾ ਨੂੰ ਅੰਜਾਮ ਦਿੱਤਾ ਹੈ। ਫਿਲਹਾਲ ਪੁਲਸ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕਰ ਰਹੀ ਹੈ, ਹੋਰ ਕੀ ਸੱਚ ਸਾਹਮਣੇ ਆਉਂਦਾ ਹੈ ਪੁਲਸ ਜਾਂਚ ਤੋਂ ਬਾਅਦ ਹੀ ਸਾਹਮਣੇ ਆਏਗਾ, ਫਿਲਹਾਲ ਸ਼ਹਿਰ ਵਿੱਚ ਵਾਪਰੀ ਇਸ ਘਟਨਾ ਕਰਕੇ ਸਹਿਮ ਦਾ ਮਾਹੌਲ ਹੈ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਹਮੀਰਗੜ ਵਿੱਚ ਪਤਨੀ ਦੀ ਮੌਤ ਤੋਂ ਦੁਖੀ ਵਿਅਕਤੀ ਵਲੋਂ ਆਪਣੇ ਤਿੱਨ ਬੱਚਿਆਂ ਨੂੰ ਫਾਹਾ ਲਾ ਕੇ ਮਾਰਨ ਤੋਂ ਬਾਅਦ ਖ਼ੁਦ ਵੀ ਖੁਦਕੁਸ਼ੀ ਕਰ ਲਈ ਸੀ ਅਤੇ ਇਕ ਮਹੀਨੇ ਵਿੱਚ ਇਹ ਦੂਜੀ ਘਟਨਾ ਵਾਪਰੀ ਹੈ ਜਿਸ ਵਿੱਚ ਪੂਰਾ ਪਰਿਵਾਰ ਹੀ ਖ਼ਤਮ ਹੋ ਗਿਆ ।























