ਚੰਡੀਗੜ੍ਹ 19 ਸਤੰਬਰ ( ਵਿਸ਼ਵ ਵਾਰਤਾ)- ਖੇਤੀ ਸੋਧ ਬਿੱਲਾਂ ਬਾਰੇ ਗੱਲ-ਬਾਤ ਕਰਦਿਆਂ ਕਿਸਾਨ ਆਗੂ ਅਤੇ ਪੰਜਾਬ ਮੰਡੀ ਬੋਰਡ ਦੇ ਡਾਇਰੈਕਟਰ ਰਾਜਿੰਦਰ ਸਿੰਘ ਬਡਹੇੜੀ ਨੇ ਕਿਸਾਨ ਸੰਘਰਸ਼ ਦੀ ਹਮਾਇਤ ਕਰਨ ਦੀ ਅਪੀਲ ਕਰਦਿਆਂ ਤਰਕਸੰਗਤ ਸੁਝਾਅ ਦਿੱਤਾ ਕਿ ਜੇ ਕਿਸਾਨ ਖ਼ਤਮ ਤਾਂ ਸੀਰੀ ਪਾਲ਼ੀ ਮਾਲੀ ਖਤਮ, ਅਨਾਜ ਅਤੇ ਸਬਜ਼ੀ ਮੰਡੀਆਂ ਦੀ ਹੋਂਦ ਖਤਮ ਹੋ ਜਾਵੇਗੀ ਉਥੇ ਕੰਮ ਕਰਨ ਵਾਲ਼ੇ ਆੜ੍ਹਤੀਏ ਤੇ ਪੱਲੇਦਾਰ ਖਤਮ ਹੋ ਜਾਣਗੇ, ਲੋਕਲ ਟਰੱਕ ਡਰਾਇਵਰ ਕਲੀਨਰ ਵਿਹਲੇ ਹੋ ਜਾਣਗੇ।
ਕੰਟਰੈਕਟ ਫਾਰਮਿੰਗ ਨਾਲ਼ ਵੱਡੇ ਫਾਰਮਾਂ ਤੋਂ ਮਾਲ ਸਿੱਧਾ ਵੱਡੀਆਂ ਫੈਕਟਰੀਆਂ ਚ ਜਾਵੇਗਾ ਛੋਟੀ ਇੰਡਸਟਰੀ ਖਤਮ ਹੋ ਜਾਵੇਗੀ ਫੈਕਟਰੀ ਤੋਂ ਪੈਕ ਮਾਲ ਸਿੱਧਾ ਵੱਡੇ ਮਾਲਾਂ-ਸਟੋਰਾਂ ‘ਚ ਪਹੁੰਚਾਇਆ ਜਾਵੇਗਾ ਛੋਟੇ ਦੁਕਾਨਦਾਰ ਬਰਬਾਦ ਹੋ ਜਾਣਗੇ ਕਿਸਾਨਾਂ ਦੀ ਮਾਲਕੀ ਖਤਮ ਹੋ ਜਾਵੇਗੀ ਤਾਂ ਟਰੈਕਟਰ ਵਿਹਲੇ ਹੋ ਜਾਣਗੇ ਖੇਤੀ ਸੰਦ ਬਣਾਉਣ ਵਾਲ਼ੇ ਤੇ ਮੁਰੰਮਤ ਵਾਲ਼ੇ ਬੇਰੋਜ਼ਗਾਰ ਰਹਿਣਗੇ ਜਦੋਂ ਸਾਰਾ ਕੁੱਝ ਹੀ ਪ੍ਰਾਈਵੇਟ ਹੋ ਗਿਆ ਤਾਂ ਸਰਕਾਰੀ ਨੌਕਰੀਆਂ ਤੇ ਸਰਕਾਰੀ ਬਾਬੂ ਖਤਮ, ਇਹ ਖਤਮ-ਖਤਮ ਵਾਲ਼ੀ ਕਤਾਰ ਬਹੁਤ ਲੰਬੀ ਹੈ ਭਰਾਵੋ ਪੰਜਾਬੀ ਕਿਸਾਨ ਦੀ ਹਾਲਤ ਬਿਹਾਰੀ ਕਿਸਾਨ ਵਰਗੀ ਹੋ ਜਾਵੇਗੀ।ਅਜੇ ਵੀ ਕਿਸੇ ਦੇ ਦਿਮਾਗ ‘ਚ ਇਹ ਕੀੜਾ ਹੈ ਕਿ ਮੌਜੂਦਾ ਲੜਾਈ ‘ਇਕੱਲੇ ਕਿਸਾਨਾਂ ਦੀ ਹੈ ਤਾਂ ਰੱਬ ਦੇ ਵਾਸਤੇ ਇਹ ਕੀੜਾ ਕੱਢ ਦਿਓ ਤੇ ਸਾਏ ਇੱਕ ਮੰਚ ਤੇ ਇੱਕਠੇ ਹੋ ਜਾਓ ਜੇਕਰ ਬਚਣਾ ਹੈ , ਜੇ ਬੇਗਾਨੀ ਲੜਾਈ ਸਮਝ ਕੇ ਘੇਸਲ਼ ਵੱਟੀਂ ਰੱਖੀ ਤਾਂ ਪਿੱਛੋਂ ਉਲ਼ਝੀ ਤਾਣੀਂ ਦਾ ਸਿਰਾ ਨਹੀਂ ਲੱਭਣਾਂ, ਇਕੱਲੀ-ਇਕੱਲੀ ਊਂਗਲ਼ ਨੂੰ ਅਗਲੇ ਮਰੋੜ ਸੁੱਟਣਗੇ ਮੌਜੂਦਾ ਹਾਕਮ ਜੇ ਸਾਰੀਆਂ ਊਂਗਲ਼ਾਂ ਦੀ ਬਣੀਂ ਮੁੱਠੀ ਮਰੋੜਨੀਂ ਸੌਖੀ ਨਹੀਂ ਹੁੰਦੀ।ਬਡਹੇੜੀ ਨੇ ਭਾਵਕ ਅਤੇ ਗੰਭੀਰ ਅਪੀਲ ਕਰਦਿਆਂ ਕਿਹਾ ਕਿ ਮੱਧ ਵਰਗੀ ਲੋਕਾਂ ਨੂੰ ਸਿਆਣੇ ਬਣਨ ਦੀ ਲੋੜ ਹੈ ਆਪਣਾ ਰਹਿੰਦਾ ਸਮਾਂ ਅਤੇ ਬੱਚਿਆਂ ਦਾ ਭਵਿੱਖ ਬਚਾਉਣ ਲਈ ਸਾਰਿਆਂ ਦਾ ਇਕੱਠ ਸਮੇਂ ਦੀ ਲੋੜ ਹੈ ਬਜ਼ੁਰਗਾਂ ਦੇ ਕਹਿਣ ਵਾਂਗੂੰ, ਮੁੱਠੀ ਤਾਂ ਲੋੜ ਪੈਣ ਤੇ ਮੁੱਕੀ ਵੀ ਬਣ ਜਾਂਦੀ ਐ” ਜੇ ਕਰ ਵਰਤਮਾਨ ਨਾ ਬਚਾ ਸਕੇ ਭਵਿੱਖ ਕਿਸਾਨਾਂ ਤੋਂ ਬੁਰਾ ਬਾਕੀ ਵਰਗਾਂ ਦਾ ਹੋਵੇਗਾ ਕਿਸਾਨ ਕਦੇ ਭੁੱਖਾ ਨਹੀਂ ਸੌਂਦਾ ਦਾਲ ਰੋਟੀ ਅਤੇ ਦੁੱਧ ਮੱਖਣ ਘਰ ਦਾ ਹੁੰਦਾ ਹੈ ।ਮੈਂ ਖ਼ਾਨਦਾਨੀ ਕਿਸਾਨ ਹਾਂ ਅਤੇ ਕਿਸਾਨ ਦਾ ਪੁੱਤਰ ਹਾਂ ਕਿਸਾਨ ਸੰਘਰਸ਼ ਦਾ ਸਹਿਯੋਗ ਕਰਦਾ ਹਾਂ ਪਰ ਇਸ ਨਾਜ਼ਕ ਮੌਕੇ ਏਕਤਾ ਸਾਰੇ ਵਰਗ ਕਰਨ ਤਾਂ ਹੀ ਮੋਦੀ ਅਤੇ ਬਾਦਲਾਂ ਵਰਗੇ ਮੌਕਾਪ੍ਰਸਤ ਰਾਜਨੀਤਿਕ ਲੋਕਾਂ ਦੀ ਹੋਸ਼ ਟਿਕਾਣੇ ਆਵੇਗੀ ਅਤੇ ਸਾਰੇ ਵਰਗ ਖੁਸ਼ਹਾਲ ਰਹੋਗੇ ਨਹੀਂ ਮੋਦੀ ਬਾਦਲ ਅਤੇ ਚੌਟਾਲਾ ਵਰਗੇ ਤੁਹਾਡਾ ਮੰਦਾ ਹਾਲ ਅਤੇ ਬਰਬਾਦੀ ਕਰਨ ਲਈ ਗੱਠਜੋੜ ਕਰ ਬੈਠੇ ਇਹ ਤਾਕਤ ਅਤੇ ਪੈਸੇ ਲਈ ਕੁਰਸੀਆਂ ਹਾਸਲ ਕਰਨ ਲਈ ਇਕੱਠ ਕਰਦੇ ਹਨ ਆਪਾਂ ਆਪਣੇ ਬੱਚਿਆਂ ਦਾ ਭਵਿੱਖ ਬਚਾਉਣ ਲਈ ਇਕੱਠੇ ਹੋਣਾ ਹੈ ।ਅੱਜ ਸਵਰਗੀ ਚੌਧਰੀ ਮਹਿੰਦਰ ਸਿੰਘ ਟਿਕੈਤ ਵਰਗੇ ਕਿਸਾਨ ਆਗੂ ਦੀ ਜ਼ਰੂਰਤ ਹੈ ਅਤੇ ਸਰਦਾਰ ਬਲਦੇਵ ਸਿੰਘ ਅਤੇ ਸਰ ਛੋਟੂਰਾਮ ਵਰਗੇ ਦੂਰਅੰਦੇਸ਼ ਰਾਜਸੀ ਆਗੂਆਂ ਦੀ ਯਾਦ ਆਉਂਦੀ ਹੈ ਜਿਨ੍ਹਾਂ ਨੇ ਦੇਸ਼ ਦੀ ਅਜ਼ਾਦੀ ਸਮੇਂ ਕਿਸਾਨਾਂ ਦੀ ਬਾਂਹ ਫੜੀ ਸੀ ਪ੍ਰਮਾਤਮਾ ਕਿਸਾਨਾਂ ਦੇ ਸੰਘਰਸ਼ ਨੂੰ ਅਵੱਸ਼ ਕਾਮਯਾਬ ਕਰਾਵੇਗਾ ਕੇਵਲ ਨਿਮਰਤਾ ਨਾਲ਼ ਏਕਤਾ ਕਰਨ ਦੀ ਖੇਚਲ ਕਰਨ ਦੀ ਲੋੜ ਹੈ।






















