ਪੰਜਾਬ ‘ਚ ਗਹਿਰਾ ਹੋਇਆ ਬਿਜਲੀ ਸੰਕਟ
ਕੋਲੇ ਦੀ ਘਾਟ ਕਾਰਨ ਬੰਦ ਹੋਈਆਂ ਦੋ ਪਾਵਰ ਪਲਾਂਟਾਂ ਦੀਆਂ 2-2 ਯੁਨਿਟਾਂ!,ਪਾਵਰਕੌਮ ਨੂੰ ਬਾਹਰੋਂ ਖਰੀਦਣੀ ਪਈ ਬਿਜਲੀ
ਪੜ੍ਹੋ,ਪਾਵਰ ਪਲਾਂਟਾਂ ਕੋਲ ਕਿੰਨੇ ਦਿਨ ਦਾ ਕੋਲਾ ਬਾਕੀ
ਚੰਡੀਗੜ੍ਹ,28 ਅਪ੍ਰੈਲ(ਵਿਸ਼ਵ ਵਾਰਤਾ)- ਪੰਜਾਬ ਵਿੱਚ ਕੋਲੇ ਦੀ ਘਾਟ ਬਿਜਲੀ ਸੰਕਟ ਗਹਿਰਾ ਹੁੰਦਾ ਜਾ ਰਿਹਾ ਹੈ। ਬੀਤੇ ਦਿਨ ਸੂਬੇ ਵਿੱਚ 7300 ਮੈਗਾਵਾਟ ਬਿਜਲੀ ਦੀ ਮੰਗ ਸੀ ਪਰ ਪੰਜਾਬ ਦੇ ਪਾਵਰ ਪਲਾਂਟਾਂ ਵਿੱਚ ਕੇਵਲ 4000 ਮੈਗਵਾਟ ਬਿਜਲੀ ਦਾ ਉਤਪਾਦਨ ਹੀ ਹੋ ਸਕਿਆ। ਜਿਸ ਦੇ ਚੱਲਦਿਆਂ ਪਾਵਰਕੋਮ ਨੂੰ 3000 ਮੈਗਾਵਾਟ ਬਿਜਲੀ ਬਾਹਰੋਂ ਖਰੀਦਣੀ ਪਈ ਹੈ। ਇਸ ਦੇ ਨਾਲ ਹੀ ਰੋਪੜ੍ਹ ਅਤੇ ਤਲਵੰਡੀ ਸਾਬੋ ਪਾਵਰ ਪਲਾਂਟਾਂ ਦੀਆਂ 2-2 ਯੁਨਿਟਾਂ ਵੀ ਬੰਦ ਹੋ ਚੁੱਕੀਆਂ ਹਨ।
ਜਾਣਕਾਰੀ ਅਨੁਸਾਰ ਗੋਇੰਦਵਾਲ ਸਾਹਿਬ ਪਾਵਰ ਪਲਾਂਟ ਵਿੱਚ 2 ਦਿਨ,ਲਹਿਰਾ ਮੁਹੱਬਤ ਵਿੱਚ 4 ਦਿਨ,ਤਲਵੰਡੀ ਸਾਬੋ ਵਿੱਚ 6 ਦਿਨ ਰੋਪੜ੍ਹ ਵਿੱਚ 7 ਦਿਨ ਅਤੇ ਰਾਜਪੁਰਾ ਵਿੱਚ 18 ਦਿਨਾਂ ਦਾ ਕੋਲਾ ਹੀ ਬਾਕੀ ਹੈ। ਸਰਕਾਰ ਵੱਲੋਂ ਇਹ ਦਾਅਵੇ ਕੀਤੇ ਜਾ ਰਹੇ ਹਨ ਕਿ ਕਿਸੇ ਵੀ ਤਰ੍ਹਾਂ ਦੀ ਮੁਸ਼ਕਿਲ ਨਹੀਂ ਹੋਣ ਦਿੱਤੀ ਜਾਵੇਗੀ । ਪਰ ਪੰਜਾਬ ਵਿੱਚ 4 ਤੋਂ 6 ਘੰਟੇ ਦੇ ਕੱਟ ਲੱਗ ਰਹੇ ਹਨ। ਜਿਸ ਨਾਲ ਲੋਕਾਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
