ਡੀਜੀਪੀ ਸੁਮੇਧ ਸੈਣੀ ਨੂੰ ਕਾਂਗਰਸ ਅਤੇ ਅਕਾਲੀ ਦਲ ਬਾਦਲ ਬਚਾਅ ਰਹੇ ਹਨ – ਬਸਪਾ ਸੂਬਾ ਪ੍ਰਧਾਨ
ਚੰਡੀਗੜ੍ਹ 4 ਸਤੰਬਰ (ਵਿਸ਼ਵ ਵਾਰਤਾ)ਬਸਪਾ ਸੂਬਾ ਪ੍ਰਧਾਨ ਸਰਦਾਰ ਜਸਵੀਰ ਸਿੰਘ ਗੜ੍ਹੀ ਨੇ ਵਿਧਾਨ ਸਭਾ ਮੋਹਾਲੀ ਅਤੇ ਡੇਰਾਬਸੀ ਦੀ ਲੀਡਰਸ਼ਿਪ ਨਾਲ ਅਲਗ ਅਲਗ ਸੰਗਠਨ ਸਮੀਖਿਆ ਕੀਤੀ ਅਤੇ ਪੰਜਾਬ ਦੇ ਹਾਲਾਤਾਂ ਉਪਰ ਵਿਸਥਾਰ ਨਾਲ ਚਰਚਾ ਕਰਦਿਆਂ ਕਿਹਾ ਕਿ ਪੰਜਾਬ ਵਿਚ ਫੈਲੇ ਨਸ਼ਿਆਂ, ਗੁਰੂ ਗਰੰਥ ਸਾਹਿਬ ਦੀ ਬੇਅਦਬੀ ਤੇ ਬਰਗਾੜੀ ਗੋਲੀ ਕਾਂਡ ਦੀ ਪੜਤਾਲ ਤਤਕਾਲੀਨ ਡੀ ਜੀ ਪੀ ਸੁਮੇਧ ਸੈਣੀ ਤੋਂ ਹੋਣੀ ਚਾਹੀਦੀ ਹੈ ਜਿਹੜਾ ਹੁਣ ਬਲਵੰਤ ਸਿੰਘ ਮੁਲਤਾਨੀ ਦੇ ਕੇਸ ਵਿੱਚ ਦੋਸ਼ੀ ਹੋਣ ਤੇ ਫਰਾਰ ਹੈ।
ਸਰਦਾਰ ਗੜੀ ਨੇ ਪੰਜਾਬ ਦੇ ਸਾਬਕਾ ਆਈਏਐੱਸ ਅਧਿਕਾਰੀ ਦੇ ਬੇਟੇ ਅਤੇ ਸਿਟਕੋ ਦੇ ਜੂਨੀਅਰ ਇੰਜਨੀਅਰ (ਜੇਈ) ਬਲਵੰਤ ਸਿੰਘ ਮੁਲਤਾਨੀ ਨੂੰ 29 ਸਾਲ ਪਹਿਲਾਂ ਅਗਵਾ ਕਰਨ ਮਗਰੋਂ ਭੇਤਭਰੀ ਹਾਲਤ ਵਿੱਚ ਲਾਪਤਾ ਕਰਨ ਦੇ ਗੰਭੀਰ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਸੂਬੇ ਦੇ ਸਾਬਕਾ ਡੀਜੀਪੀ ਸੁਮੇਧ ਸੈਣੀ ਗ੍ਰਿਫ਼ਤਾਰੀ ਡਰੋਂ ਕਥਿਤ ਆਪਣੀ ਸੁਰੱਖਿਆ ਛੱਤਰੀ ਛੱਡ ਕੇ ਰੂਪੋਸ਼ ਹੋਣ ਦੀ ਨਿਖੇਧੀ ਕਰਦਿਆਂ ਪੰਜਾਬ ਸਰਕਾਰ ਤੇ ਪੰਜਾਬ ਪੁਲੀਸ ਨੂੰ ਦੋਸ਼ੀ ਠਹਿਰਾਇਆ ਹੈ। ਉਹਨਾਂ ਕਿਹਾ ਕਿ ਮਾਮੂਲੀ ਕਰਾਈਮ ਕਰਨ ਵਾਲੇ ਕਥਿਤ ਸਿੱਖ ਵਰਗ ਦੇ ਦੋਸ਼ੀਆਂ ਨੂੰ ਪੁਲੀਸ ਝੱਟ ਗ੍ਰਿਫਤਾਰ ਕਰ ਲੈਂਦੀ ਹੈ ਤੇ ਹਜਾਰਾਂ ਪੰਜਾਬੀਆਂ ਤੇ ਸਿਖਾਂ ਦੇ ਕਥਿਤ ਕਤਲੇਆਮ ਦੇ ਦੋਸ਼ੀ ਤੇ ਕਥਿਤ ਲੁਟੇਰੇ ਨੂੰ ਖੁਲਕੇ ਬਚਣ ਦਾ ਮੌਕਾ ਦਿੰਦੀ ਹੈ।
ਬਸਪਾ ਪੰਜਾਬ ਦੇ ਪ੍ਰਧਾਨ ਜਸਵੀਰ ਸਿੰਘ ਗੜੀ ਨੇ ਕੈਪਟਨ ਸਰਕਾਰ ਤੋਂ ਪੁਛਿਆ ਕਿ ਕੀ ਕਾਂਗਰਸ ਸੁਮੇਧ ਸੈਣੀ ਤੋਂ ਵੀ ਉਵੇਂ ਹੀ ਪੁੱਛ ਪੜਤਾਲ ਕਰੇਗੀ ਜਿਵੇਂ ਸਿੱਖ ਨੌਜਵਾਨਾਂ ਨਾਲ ਕਰਦੀ ਰਹੀ ਹੈ ? ਕੀ ਸੁਮੇਧ ਸੈਣੀ ਦੇ ਪਰਿਵਾਰਿਕ ਮੈਂਬਰ ਰਿਸ਼ਤੇਦਾਰ ਥਾਣੇ ਬੁਲਾਏ ਅਤੇ ਜਲੀਲ ਕੀਤੇ ਜਾਣਗੇ ? ਕੀ ਸੁਮੇਧ ਸੈਣੀ ਅਤੇ ਉਸਦੇ ਬੇਦੋਸ਼ੇ ਪਰਿਵਾਰਿਕ ਮੈਂਬਰਾਂ/ਰਿਸ਼ਤੇਦਾਰਾਂ ਉਪਰ ਵੀ ਤਸੱਦਦ ਢਾਇਆ ਗਿਆ ਜਾਵੇਗਾ ਜਿਵੇਂ ਸਿੱਖ ਨੌਜਵਾਨਾਂ ਨਾਲ ਹੁੰਦਾ ਸੀ ਜਿਵੇਂ 108 ਕਿਲੋ ਦਾ ਘੋਟਣਾ ਲਾਉਣਾ, ਕਰੰਟ ਲਾਉਣਾ, ਪੁੱਠਾ ਲਟਕਾਉਣਾ, ਚੱਢੇ ਪਾੜਨੇ, ਗੰਦ ਮੂੰਹਾਂ ਉਪਰ ਬੰਨ੍ਹਣਾ, ਘਰਾਂ ਦੀਆਂ ਇੱਜਤਾਂ ਬੇਪੱਤ ਕਰਨੀਆ ਆਦਿ। ਕੀ ਸੁਮੇਧ ਸੈਣੀ ਦੇ ਘਰ ਦਾ ਕੀਮਤੀ ਸਮਾਨ ਕਪੜੇ ਭਾਂਡੇ ਚੁੱਕ ਕੇ ਲਿਆਂਦੇ ਜਾਣਗੇ? ਕੀ ਸੁਮੇਧ ਸੈਣੀ ਦੇ ਪਾਲਤੂ ਜਾਨਵਰਾਂ ਨੂੰ ਭੁੱਖੇ ਪਿਆਸੇ ਮਰਨ ਲਈ ਛੱਡਿਆ ?
ਸ. ਗੜੀ ਨੇ ਕਿਹਾ ਕਿ ਜੇਕਰ ਦੋਸ਼ੀ ਸੁਮੇਧ ਸੈਣੀ ਨਾਲ ਅਜਿਹਾ ਕੁਝ ਨਹੀਂ ਹੋਇਆ ਤਾਂ 1984 ਤੋਂ ਲੈਕੇ ਅੱਜ 2020 ਤਕ ਵੀ ਬੇਦੋਸ਼ੇ ਸਿੱਖ ਨੌਜਵਾਨਾਂ ਨਾਲ ਕਿਉਂ ਹੋ ਰਿਹਾ ? ਉਹਨਾਂ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਤੇ ਬਾਦਲ ਪਰਿਵਾਰ ਇਸ ਗੁਨਾਹਗਾਰ ਸੁਮੇਧ ਸੈਣੀ ਦੇ ਸਾਥੀ ਹਨ। ਇਸੇ ਲਈ ਇਸ ਕਥਿਤ ਭ੍ਰਿਸ਼ਟ ਤੇ ਖਤਰਨਾਕ ਅਪਰਾਧੀ ਨੂੰ ਬਚਾਇਆ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ 2008 ਵਿਚ ਸੀਬੀਆਈ ਨੇ ਬਲਵੰਤ ਸਿੰਘ ਮੁਲਤਾਨੀ ਬਾਰੇ ਸੁਪਰੀਮ ਕੋਰਟ ਵਿਚ ਆਪਣਾ ਹਲਫ਼ਨਾਮਾ ਸੌਂਪਿਆ। ਸੁਪਰੀਮ ਕੋਰਟ ਵਿਚ ਉਸ ਵੇਲੇ ਦੀ ਬਾਦਲ ਸਰਕਾਰ ਨੇ ਸੁਮੇਧ ਸੈਣੀ ਦੇ ਹੱਕ ਵਿਚ ਆਪਣਾ ਪੱਖ ਰੱਖਿਆ ਕਿ ਸੈਣੀ ਵਰਗੇ ਇਮਾਨਦਾਰ ਅਫ਼ਸਰ ਨੇ ਪੰਜਾਬ ਤੋਂ ਖਾੜਕੂਵਾਦ ਖ਼ਤਮ ਕਰਨ ਦੀ ਹਮੇਸ਼ਾ ਕੋਸ਼ਿਸ਼ ਕੀਤੀ ਹੈ। ਦਸੰਬਰ 2011 ਵਿਚ ਸੁਪਰੀਮ ਕੋਰਟ ਨੇ ਬਾਦਲ ਸਰਕਾਰ ਦੀ ਅਪੀਲ ਨੂੰ ਮਨਜ਼ੂਰੀ ਦਿਤੀ ਤੇ ਹਾਈਕੋਰਟ ਦੇ ਆਦੇਸ਼ਾਂ ਨੂੰ ਗ਼ਲਤ ਘੋਸ਼ਿਤ ਕੀਤਾ। ਇਸ ਤੋਂ ਜਾਹਿਰ ਹੈ ਕਿ ਸੈਣੀ ਬਾਦਲਾਂ ਦਾ ਖਾਸ ਚਹੇਤਾ ਤੇ ਉਹਨਾਂ ਦੇ ਹਰੇਕ ਕਨੂੰਨ ਵਿਰੋਧੀ ਕਾਰਜਾਂ ਵਿਚ ਸਾਮਲ ਅਣਪਛਾਤੀ ਪੁਲੀਸ ਸੀ। 2015 ਵਿਚ ਹੋਏ ਬਰਗਾੜੀ ਗੋਲੀ ਕਾਂਡ ਤੇ ਗੁਰੂ ਗਰੰਥ ਸਾਹਿਬ ਦੀ ਬੇਅਦਬੀ ਦਾ ਸੈਣੀ ਜ਼ਿੰਮੇਵਾਰ ਸੀ। ਬਸਪਾ ਪੰਜਾਬ ਦੇ ਪ੍ਰਧਾਨ ਜਸਵੀਰ ਸਿੰਘ ਗੜੀ ਨੇ ਕਿਹਾ ਕਿ ਇਨਕਮ ਟੈਕਸ ਵਿਭਾਗ ਨੂੰ ਇਸ ਦੀ ਜ਼ਮੀਨ. ਜਾਇਦਾਦ .ਸੰਪਤੀ ਦੀ ਪੜਤਾਲ ਕਰਨੀ ਚਾਹੀਦੀ ਹੈ ਕਿ ਇਸ ਕੋਲ ਏਨਾ ਪੈਸਾ ਕਿਵੇਂ ਆਇਆ।ਉਹਨਾਂ ਇਹ ਵੀ ਕਿਹਾ ਕਿ ਪੰਜਾਬ ਵਿਚ ਬਾਦਲ ਸਰਕਾਰ ਦੌਰਾਨ ਫੈਲੇ ਚਿਟੇ ਤੇ ਨਸ਼ਿਆਂ ਬਾਰੇ ਇਸ ਤੋਂ ਪੜਤਾਲ ਕਰਨੀ ਚਾਹੀਦੀ ਹੈ ਕਿਉਕਿ ਅਜੇ ਤਕ ਕੋਈ ਵੱਡਾ ਡਰਗ ਸਪਲਾਈਰ ਤੇ ਡਰੱਗ ਕਿੰਗ ਗ੍ਰਿਫਤਾਰ ਨਹੀਂ ਹੋਇਆ। ਗੜੀ ਨੇ ਕਿਹਾ ਕਿ ਬਸਪਾ ਪੰਜਾਬ ਵਿੱਚ ਸੱਤਾ ਵਿਚ ਆਉਣ ਤੇ ਹਰ ਗੱਲ ਦਾ ਹਿਸਾਬ ਪਾਈ ਪਾਈ ਦੀ ਨੀਤੀ ਤੇ ਕਰੇਗੀ ਅਤੇ ਪੀੜਿਤ ਧਿਰ ਨੂੰ ਇਨਸਾਫ ਦਿਵਾਉਣ ਵਿੱਚ ਕੋਈ ਕਸਰ ਨਹੀਂ ਛੱਡੇਗੀ।
ਇਸ ਮੌਕੇ ਰਾਜਾ ਰਾਜਿੰਦਰ ਸਿੰਘ ਸੂਬਾ ਜਨਰਲ ਸਕੱਤਰ, ਸੁਰਿੰਦਰਪਾਲ ਸਿੰਘ ਸਹੋਰਾ, ਡਾਕਟਰ ਸੁਖਦੇਵ ਚਪੜਚਿੜੀ, ਚਰਨਜੀਤ ਦੇਵੀਨਗਰ, ਡਾਕਟਰ ਜਰਨੈਲ ਸਿੰਘ, ਹਰਪ੍ਰੀਤ ਸਿੰਘ, ਜਗਤਾਰ ਸਿੰਘ ਮੋਹਾਲੀ, ਹਰਨੇਕ ਸਿੰਘ ਐੱਸ ਡੀ ਓ, ਦਰਬਾਰਾ ਸਿੰਘ, ਆਦਿ ਹਾਜ਼ਿਰ ਸਨ।
