
ਕਣਕ ਦੀ ਵਾਢੀ ਦੌਰਾਨ ਟਿਊਬਵੈੱਲ ਦੀ ਡਿੱਗੀ ਤੇ ਖ਼ਾਲ ਪਾਣੀ ਨਾਲ ਭਰ ਕੇ ਰੱਖਣੇ ਬਣਾਏ ਜਾਣ ਯਕੀਨੀ
ਬਠਿੰਡਾ, 21 ਅਪ੍ਰੈਲ( ਵਿਸ਼ਵ ਵਾਰਤਾ)- ਕਣਕ ਦੀ ਕਟਾਈ ਦੇ ਸਮੇਂ ਦੌਰਾਨ ਹਰ ਸਾਲ ਸੈਂਕੜੇ ਏਕੜ ਕਣਕ ਦੀ ਫ਼ਸਲ ਤੇ ਨਾੜ ਨੂੰ ਅੱਗ ਲੱਗਣ ਦੀਆਂ ਘਟਨਾਵਾਂ ਕਰਕੇ ਕਿਸਾਨ ਦੀ ਪੁੱਤਾ ਵਾਂਗ ਪਾਲੀ ਹੋਈ ਫ਼ਸਲ ਸੜ ਕੇ ਸਵਾਹ ਹੋ ਜਾਂਦੀ ਹੈ। ਜਿਸ ਨਾਲ ਕਿਸਾਨਾਂ ਦੀ ਆਰਥਿਕਤਾ ਨੂੰ ਗਹਿਰੀ ਸੱਟ ਵੱਜਦੀ ਹੈ ਇਨਾਂ ਅੱਗ ਦੀ ਘਟਨਾਵਾਂ ਨੂੰ ਤੁਰੰਤ ਠੱਲ ਪਾਉਣ ਲਈ ਬੇਹੱਦ ਲੋੜੀਦੀਆਂ ਸਾਵਧਾਨੀਆਂ ਦੀ ਜ਼ਰੂਰਤ ਹੈ। ਇਹ ਵਿਚਾਰ ਡਾ. ਜਸਵੀਰ ਸਿੰਘ ਗੁੰਮਟੀ ਨੇ ਸਾਂਝੇ ਕੀਤੇ।
ਉਨਾਂ ਕਿਸਾਨਾਂ ਨੂੰ ਸਲਾਹ ਦਿੰਦਿਆਂ ਕਿਹਾ ਕਿ ਕਣਕ ਦੀ ਵਾਢੀ ਦਾ ਸੀਜਨ ਪੂਰੇ ਜੋਬਨ ’ਤੇ ਹੈ ਇਸ ਲਈ ਡਾ. ਗੁੰਮਟੀ ਨੇ ਕਿਸਾਨਾਂ ਨੂੰ ਪੁਰਜ਼ੋਰ ਅਪੀਲ ਕਰਦਿਆਂ ਕਿਹਾ ਕਿ ਸਭ ਤੋ ਪਹਿਲਾਂ ਕੰਬਾਇਨਾਂ ਤੇ ਕਣਕ ਢੋਣ ਵਾਲੇ ਟਰੈਕਟਰਾਂ ਦੇ ਕਰੰਟ ਉਪਕਰਨ ਜਿਵੇਂ ਕਿ ਸੈਲਫ਼, ਬੈਟਰੀ ਦੇ ਟਰਮੀਨਲ, ਕਰੰਟ ਸਵਿਚਾਂ ਆਦਿ ਦੇ ਨਟ-ਬੋਲਟ ਪੂਰੇ ਕਸੇ ਹੋਣੇ ਚਾਹੀਦੇ ਹਨ ਅਤੇ ਕਦੇ ਵੀ ਮਸ਼ੀਨ ਦੀ ਸੈਲਫ਼ ਨੂੰ ਪੇਚਕਸ ਜਾਂ ਚਾਬੀ ਨਾਲ ਟਚ ਕਰਕੇ ਸਟਾਰਟ ਨਾ ਕੀਤੀ ਜਾਵੇ, ਤਾਂ ਕਿ ਸਪਾਰਕ ਹੋਣ ਨਾਲ ਅੱਗ ਦੀ ਦੁਰਘਟਨਾ ਨਾ ਵਾਪਰ ਸਕੇ।
ਇਸ ਤੋਂ ਇਲਾਵਾ ਉਨਾਂ ਇਹ ਵੀ ਕਿਹਾ ਕਿ ਕਣਕ ਦੀ ਕਟਾਈ ਸਮੇਂ ਖੇਤਾਂ ’ਚ ਚਾਹ ਬਣਾਉਣ ਸਮੇਂ ਕਣਕ ਦੀ ਫ਼ਸਲ ਤੋਂ ਦੂਰੀ ਬਣਾਉਣੀ ਚਾਹੀਦੀ ਹੈ। ਚਾਹ ਬਣਾਉਣ ਉਪਰੰਤ ਅੱਗ ’ਤੇ ਤੁਰੰਤ ਰੇਤਾ ਜਾਂ ਪਾਣੀ ਪਾ ਕੇ ਬੁਝਾਇਆਂ ਜਾਵੇ। ਉਨਾਂ ਕਿਸਾਨਾਂ ਨੂੰ ਇਹ ਵੀ ਅਪੀਲ ਕੀਤੀ ਕਿ ਜੇਕਰ ਕੋਈ ਲੇਬਰ ਵਾਲਾ ਬੀੜੀ ਸਿਗਰਟ ਪੀਣ ਦਾ ਆਦੀ ਹੈ ਤਾਂ ਉਸ ਨੂੰ ਕਣਕ ਦੀ ਫ਼ਸਲ ਨੂੰ ਕਟਾਈ ਸਮੇਂ ਸਖ਼ਤੀ ਨਾਲ ਵਰਜਿਤ ਕੀਤਾ ਜਾਵੇ। ਟਰਾਂਸਫਾਰਮਰ ਦੇ ਆਲੇ-ਦੁਆਲੇ 1-2 ਮਰਲੇ ਕਣਕ ਨੂੰ ਦਾਤੀ ਨਾਲ ਵੱਡ ਕੇ ਪਾਸੇ ਰੱਖਣਾ ਚਾਹੀਦਾ ਹੈ ਤਾਂ ਜੋ ਟਰਾਂਸਫਾਰਮਰ ’ਚੋਂ ਕੋਈ ਚਿਗਆੜੀ ਨਿਕਲਦੀ ਹੈ ਤਾਂ ਕਣਕ ਦਾ ਅੱਗ ਤੋਂ ਬਚਾ ਹੋ ਸਕੇ।
ਉਨਾਂ ਕਿਸਾਨਾਂ ਨੂੰ ਕਿਹਾ ਕਿ ਜਿਸ ਦਿਨ ਕਣਕ ਦੀ ਵਾਢੀ ਕਰਨੀ ਹੋਵੇ ਤਾਂ ਉਸ ਦਿਨ ਟਿਊਬਵੈੱਲ ਦੀ ਡਿੱਗੀ ਅਤੇ ਖ਼ਾਲ ਪਾਣੀ ਨਾਲ ਭਰ ਕੇ ਰੱਖਣਾ ਯਕੀਨੀ ਬਣਾਉਣ ਤਾਂ ਜੋ ਅੱਗ ਦੀ ਘਟਨਾ ਹੋਣ ਦੀ ਸੂਰਤ ’ਚ ਜਲਦੀ ਅੱਗ ’ਤੇ ਕਾਬੂ ਪਾਇਆ ਜਾ ਸਕੇ। ਡਾ. ਗੁੰਮਟੀ ਨੇ ਕਿਸਾਨਾਂ ਨੂੰ ਇਹ ਵੀ ਅਪੀਲ ਕੀਤੀ ਇਸ ਵਾਰ ਮੌਸਮ ਬੱਦਲਵਾਈ ਵਾਲਾ ਚੱਲ ਰਿਹਾ ਹੈ, ਇਸ ਵਾਸਤੇ ਕਣਕ ਦੀ ਫ਼ਸਲ ਨੂੰ ਪੂਰੀ ਸੁਕਣ ਉਪਰੰਤ ਹੀ ਕਟਾਈ ਕੀਤੀ ਜਾਵੇ ਕਿਉਂਕਿ ਕਣਕ ਜੇ ਜ਼ਿਆਦਾ ਸਿੱਲੀ ਜਾਂ ਗਿੱਲੀ ਹੋਵੇਗੀ ਤਾਂ ਕਈ ਵਾਰ ਕੰਬਾਇਨਾਂ ਵਲੇਟਾ ਮਾਰ ਜਾਂਦੀਆ ਹਨ ਜਿਸ ਨਾਲ ਰਗੜ ਪੈਦਾ ਹੋਣ ਨਾਲ ਵੀ ਅੱਗ ਦੀ ਘਟਨਾ ਵਾਪਰ ਸਕਦੀ ਹੈ। ਤੂੜੀ ਬਣਾਉਣ ਵੇਲੇ ਵੀ ਇਹੀ ਸਾਵਧਾਨੀਆਂ ਦੁਹਰਾਈਆਂ ਜਾਣ।





















