ਡਿਪਟੀ ਕਮਿਸ਼ਨਰ ਸਮੇਤ ਜਲੰਧਰ ਅਤੇ ਕਪੂਰਥਲਾ ਦੇ ਨਾਮੀ ਉਦਯੋਗਪਤੀਆਂ ਲਿਆ ਭਾਗ
ਘਰੇਲੂ ਹਿੰਸਾਂ ਨੂੰ ਰੋਕਣ ਲਈ ਔਰਤਾਂ ਨੂੰ ਆਰਥਿਕ ਤੌਰ ‘ਤੇ ਤਕੜਾ ਕਰਨ ਦੀ ਲੋੜ- ਡਿਪਟੀ ਕਮਿਸ਼ਨਰ
ਸੀ.ਆਈ.ਆਈ.ਵਲੋਂ ਵੀ ਦਿੱਤਾ ਗਿਆ ਸਹਿਯੋਗ

ਕਪੂਰਥਲਾ 05 ਸਤੰਬਰ 2020 ( ਵਿਸ਼ਵ ਵਾਰਤਾ)-ਕਪੂਰਥਲਾ ਜ਼ਿਲਾ ਪ੍ਰਸ਼ਾਸਨ ਵਲੋਂ ਇਕ ਨਿਵੇਕਲੀ ਪਹਿਲ ਕਰਦਿਆਂ ਔਰਤਾਂ ਨੂੰ ਵਿੱਤੀ ਤੌਰ ‘ਤੇ ਸਮਰੱਥ ਬਣਾਉਣ ਸਬੰਧੀ ਜ਼ਿਲਾ ਪ੍ਰਸ਼ਾਸਨ ਕਪੂਰਥਲਾ ਵਲੋਂ ਸੀ.ਆਈ.ਆਈ. (ਕੰਨਫੈਡਰੇਸ਼ਨ ਆਫ਼ ਇੰਡੀਅਨ ਇੰਡਸਟਰੀ) ਵਲੋਂ ਇਕ ਗੋਲਮੇਲ ਕਾਨਫਰੰਸ ਕਰਵਾਈ ਗਈ , ਜਿਸ ਵਿੱਚ ਡਿਪਟੀ ਕਮਿਸ਼ਨਰ ਕਪੂਰਥਲਾ ਸ੍ਰੀਮਤੀ ਦੀਪਤੀ ਉੱਪਲ ਅਤੇ ਕਪੂਰਥਲਾ ਤੇ ਜਲੰਧਰ ਦੇ ਨਾਮੀ ਉਦਯੋਗਪਤੀਆਂ ਵਲੋਂ ਭਾਗ ਲਿਆ ਗਿਆ।
ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ ਦੇਸ਼ ਵਿੱਚ 50 ਫੀਸਦੀ ਅਬਾਦੀ ਔਰਤਾਂ ਦੀ ਹੈ, ਜਿਨਾਂ ਨੂੰ ਵਿੱਤੀ ਤੌਰ ‘ਤੇ ਹੋਰ ਸਮਰੱਥ ਬਣਾਉਣ ਦੀ ਲੋੜ ਹੈ। ਉਨਾਂ ਕਿਹਾ ਕਿ ਪੰਜਾਬ ਸਰਕਾਰ ਵਲੋਂ ਜਿਥੇ ਨੌਜਵਾਨਾਂ ਨੂੰ ਰੋਜ਼ਗਾਰ ਪ੍ਰਦਾਨ ਕਰਨ ਲਈ ਘਰ-ਘਰ ਰੋਜ਼ਗਾਰ ਮਿਸ਼ਨ ਸ਼ੁਰੂ ਕੀਤਾ ਗਿਆ ਹੈ, ਉਥੇ ਹੀ ਔਰਤਾਂ ਦੇ ਸਸ਼ਕਤੀਕਰਨ ਲਈ ਵਿਸ਼ੇਸ਼ ਸਿਖਲਾਈ ਪ੍ਰਦਾਨ ਕੀਤੀ ਜਾ ਰਹੀ ਹੈ।
ਇਸ ਤੋਂ ਇਲਾਵਾ ਜ਼ਿਲਾ ਰੋਜ਼ਗਾਰ ਬਿਊਰੋ ਵਲੋਂ ਲੜਕੀਆਂ ਦੀ ਪਲੇਸਮੈਂਟ ਲਈ ਵਿਸ਼ੇਸ਼ ਪਲੇਸਮੈਂਟ ਸੈਲ ਵੀ ਬਣਾਇਆ ਗਿਆ ਹੈ। ਉਨਾਂ ਕਿਹਾ ਕਿ ਔਰਤਾਂ ਵਿਰੁੱਧ ਹੁੰਦੀ ਘਰੇਲੂ ਹਿੰਸਾ ਨੂੰ ਰੋਕਣ ਲਈ ਔਰਤਾਂ ਨੂੰ ਵਿੱਤੀ ਤੌਰ ‘ਤੇ ਸਮਰੱਥ ਬਣਾਉਣਾ ਸਮੇਂ ਦੀ ਸਭ ਤੋਂ ਵੱਡੀ ਲੋੜ ਹੈ।
ਕਾਨਫਰੰਸ ਦੌਰਾਨ ਸੀ.ਆਈ.ਆਈ.ਪੰਜਾਬ ਦੀ ਸਾਬਕਾ ਚੇਅਰਮੈਨ ਕਾਮਨਾ ਰਾਜ ਅਗਰਵਾਲ, ਸੀ.ਆਈ.ਆਈ.ਪੰਜਾਬ ਦੇ ਉਪ ਚੇਅਰਮੈਨ ਭਵਦੀਪ ਸਰਦਾਨਾ, ਕੈਪੀਟਲ ਸਮਾਲ ਫਾਈਨਾਂਸ ਲਿਮਟਿਡ ਦੇ ਐਮ.ਡੀ. ਸਰਬਜੀਤ ਸਮਰਾ, ਫਰੀਵੈਲ ਸਪੋਰਟਸ ਲਿਮਟਿਡ ਦੇ ਐਮ.ਡੀ. ਰਾਜੇਸ ਖਰਬੰਦਾ, ਆਈ.ਟੀ.ਸੀ.ਫੂਡ ਪਾਰਕ ਲਿਮਟਿਡ ਕਪੂਰਥਲਾ ਦੇ ਯੂਨਿਟ ਹੈਡ ਸਚਿਨ ਪਾਲਾਵਾਰ, ਕਲਸੀ ਮੈਟਲ ਵਰਕ ਲਿਮਟਿਡ ਦੇ ਐਮ.ਡੀ. ਬਰਿੰਦਰ ਕਲਸੀ ਨੇ ਵੀ ਭਾਗ ਲਿਆ।
ਕਾਨਫਰੰਸ ਦਾ ਸੰਚਾਲਨ ਕਰਦੇ ਹੋਏ ਸ੍ਰੀ ਭਵਦੀਪ ਸਰਦਾਨਾ ,ਸੁਖਜੀਤ ਸਟਾਰ ਇੰਡਸਟਰੀ ਨੇ ਦੱਸਿਆ ਕਿ ਆਉਣ ਵਾਲੇਸਮੇਂ ਵਿੱਚ ਔਰਤ ਉਦੱਮੀਆਂ ਦੀ ਭੂਮਿਕਾ ਬਹੁਤ ਅਹਿਮ ਹੋਵੇਗੀ। ਕਾਮਨਾ ਰਾਜ ਅਗਰਵਾਲ ਜੋ ਕਿ 42 ਸਾਲ ਤੋਂ ਉਦਯੋਗਿਕ ਖੇਤਰ ਵਿੱਚ ਕੰਮ ਕਰ ਰਹੇ ਹਨ ਨੇ ਉਦਯੋਗਿਕ ਖੇਤਰ ਵਿੱਚ ਔਰਤਾਂ ਨੂੰ ਦਰਪੇਸ਼ ਮੁਸ਼ਕਿਲਾਂ ਬਾਰੇ ਚਾਨਣਾ ਪਾਇਆ।
ਕਾਨਫਰੰਸ ਵਿੱਚ ਜ਼ਿਲਾ ਰੋਜ਼ਗਾਰ ਤੇ ਸਿਖਲਾਈ ਅਫ਼ਸਰ ਨੀਲਮ ਮਹੇ ,ਸੁਖਪਾਲ ਸਿੰਘ ਜਨਰਲ ਮੈਨੇਜਰ, ਜ਼ਿਲਾ ਉਦਯੋਗ ਕੇਂਦਰ ਨੇ ਭਾਗ ਲਿਆ।